فلِیمون 1 - پنجابی نواں عہد نامہ نظرثانی شدہ چھپائی

¹ پَولُس ولّوں جیہڑا مسِیح یِسُوع دا قیدی اے۔ تے بھرا تِیمُتِھیُس ولّوں ساڈے پیارے تے جوٹی دار فلِیمون۔

² تے بھین افیہ تے ساڈے جوٹی دار سپاہی ارخِپُّس تے تیرے گھر دی کلِیسیا دے ناں۔

³ فضل تے تسلّی ساڈے باپ خُدا تے خُداوند یِسُوع مسِیح ولّوں تُہانوں مِلدی رہے۔

فلِیمون دا اِیمان تے مُحبّت

⁴ مَیں تیرے پیار دا تے اوس اِیمان دا حال سُن کے جیہڑا خُداوند یِسُوع تے ساریاں پاک لوکاں نال اے۔

⁵ ہرویلے خُدا دا شُکر کرنا آں تے اپنیاں دُعاواں وِچ تینُوں یاد کرنا آں۔

⁶ تاں جو تیرے اِیمان دی سنگت تُہاڈی ہر نیکی دی پچھان وِچ مسِیح دے واسطے کمّ دیوے۔

⁷ کیوں جو بھرا! مَینُوں تیرے پیار نال بڑی خُوشی تے تسلّی ہوئی۔ ایس کر کے پئی تیری راہِیں پاک لوکاں دے دِلاں نُوں ٹھنڈ پئی اے۔

اُنیسِمُس دے لئی عرض

⁸ ہُن بھانویں مسِیح وِچ میرا بڑا حَوصلہ اے۔ پئی تینُوں ٹھیک گلّ دا حُکم دیاں۔

⁹ تے وی مَینُوں ایہہ بُہتا چَنگا لگدا اے۔ پئی مَیں بُڈّھا پَولُس سگوں ایس ویلے مسِیح یِسُوع دا قیدی ہو کے پیار نال مِنّتاں کراں۔

¹⁰ سو اپنے پُتر اُنیسِمُس دے لئی جیہڑا قید وِچ مَیتھوں جمّیا۔ تیری مِنّت کرنا آں۔

¹¹ پہلاں اوہ تیرے کِسے کمّ دا نئیں سی۔ پر ہُن تیرے تے میرے دوہاں دے کمّ دا اے۔

¹² اوہنوں اپنے کلیجے دا ٹوٹا جان کے مَیں تیرے کول مُڑ کے گھلّنا آں۔

¹³ اوہنوں مَیں اپنے کول ای رکھنا چاہندا ساں۔ تاں جو تیرے ولّوں ایس قید وِچ جیہڑی خُوشخبری دے سبّب اے میری سیوا کرے۔

¹⁴ پر تیری مرضی باہجوں کُجھ کرنا نئیں ساں چاہندا تاں جو تیرا چَنگا کمّ لاچاری نال نئیں سگوں خُوشی ناں ہوئے۔

¹⁵ شاید تیرے توں اوہ تھوڑے دِناں لئی ایس واسطے اَڈ ہویا سی پئی سدا تیرے کول رہے۔

¹⁶ پر اگّے نُوں غلام وانگر نئیں سگوں غلام نالوں چَنگا ہو کے اجیہے بھرا وانگر جیہڑا جِسم ولّوں وی تے خُداوند ولّوں وی میرا بُہتا پیارا تے تیرا اودُوں وَدّھ پیارا ہوئے۔

¹⁷ سو جے تُوں مَینُوں سنگی جاننا ایں تے اوہنوں اجیہا قبول کر جِہیا مَینُوں۔

¹⁸ جے اوس تیرا کُجھ نُقصان کِیتا اے یا اوہدے ولّ تیرا کُجھ رہندا اے اوہ میرے ناں لِکھ لے۔

¹⁹ مَیں پَولُس اپنی ہتّھِیں لِکھنا آں پئی مَیں آپی دے چھڈاں گا۔ تے ایس گلّ دے آکھن دی لوڑ نئیں پئی میرا قرض جیہڑا تیرے ولّ اے اوہ تُوں آپی ایں۔

²⁰ بھرا! مَیں چاہناں آں۔ پئی مَینُوں تیرے ولّوں خُداوند وِچ تسلّی ہوئے تُوں مسِیح وِچ میرے دِل نُوں ٹھنڈ پا۔

²¹ ایس لئی مَیں لِکھنا آں پئی مَینُوں یقِین اے پئی تُوں میرے آکھے لگیں گا تے مَینُوں معلُوم اے پئی جو کُجھ مَیں آکھنا آں تُوں اودُوں وی ودِھیک کریں گا۔

²² نالے میرے لئی رہن دا تھاں بنائِیں۔ کیوں جو مَینُوں آس اے پئی تُہاڈیاں دُعاواں دی راہِیں مَیں تُہانوں بخشیا جاواں گا۔

اخِیری سلام

²³ اِپَفراس جیہڑا مسِیح یِسُوع وِچ میرے نال قید اے۔

²⁴ تے مرقس تے ارِسترخُس تے دِیماس تے لُوقا جیہڑے میرے نال کمّ کرن والے نیں۔ تینُوں سلام آکھدے نیں۔

²⁵ ساڈے خُداوند یِسُوع مسِیح دا فضل تُہاڈی رُوح اُتّے ہوندا رہے۔ آمِین۔