مرقس 2 - پنجابی نواں عہد نامہ نظرثانی شدہ چھپائی

یِسُوع اِک مفلُوج نُوں شفا دیندا اے

¹ تے کَیّاں دِناں پِچّھوں جد اوہ کَفرنحُوم وِچ فیر آیا۔ تے سُنیاں گیا سی پئی اوہ گھر وِچ اے۔

² تے اینے لوک اکٹّھے ہوئے پئی بُوہے دے اگّے وی تھاں نا رہیا۔ تے اوس اوہناں نُوں کلام سُنایا۔

³ تے اوہ مفلُوج ہوئے نُوں چَوہاں بندیاں کولوں چُکوا کے اوہدے کول لیائے۔

⁴ تے جد اوہ بِھیڑ دے سبّب کر کے اوہدے نیڑے نا آسکے۔ تَد اوہناں اوس چھت وِچ جِتّھے اوہ سی مگّھ کِیتا۔ تے جدوں اُدھیڑ چُکے تے اوس مَنجی نُوں جِہدے اُتّے مفلُوج پیا سی اُتار دِتّا۔

⁵ تے یِسُوع اوہناں دا اِیمان ویکھ کے اوس مفلُوج نُوں آکھیا۔ بچّیا! تیرے گُناہ مُعاف کِیتے گئے۔

⁶ پر کئی فقِیہ اوتھے بَیٹھے اپنے مَن وِچ وچار کر دے سن پئی۔

⁷ ایہہ کیوں ایس طرح بولدا اے؟ کُفر بَکدا اے۔ اِک خُدا باہجوں کون گُناہ مُعاف کر سکدا اے؟

⁸ تے اوسے ویلے یِسُوع اپنے رُوح نال معلُوم کر کے پئی اوہ اپنے مَناں وِچ ایویں وچار کر دے نیں۔ اوہناں نُوں آکھیا۔ تُسی کاہِنُوں اپنے دِل وِچ اجیہا وچار کر دے اوہ؟

⁹ ایس مفلُوج نُوں کِیہ آکھنا سوکھا اے۔ ایہہ پئی تیرے گُناہ مُعاف ہوئے یاں ایہہ آکھنا۔ پئی اُٹھ تے اپنی مَنجی چُک تے ٹُر پھر؟

¹⁰ پر ایس لئی پئی تُسی جانو۔ پئی اِبنِ آدم نُوں زمین اُتّے گُناہ مُعاف کرن دا اختیار اے۔ (اوہنے اوس مفلُوج نُوں آکھیا۔)

¹¹ مَیں تینُوں آکھنا آں۔ اُٹھ اپنی مَنجی چُک کے اپنے گھر نُوں ٹُر جا۔

¹² تے اوہ اُٹھیا تے مَنجی چھیتی نال چُک کے اوہناں سبھناں دے سامھنے نِکل گیا۔ تَد سارے حَیران ہوگئے۔ تے خُدا دی وڈیائی کر کے آکھن لگّے پئی اساں ایس طرح دی گلّ کدی نئیں ویکھی۔

یِسُوع لاوی نُوں بُلاندا اے

¹³ تے اوہ فیر سمُندر دے کنڈھے اُتّے گیا تے ساری بِھیڑ اوہدے کول آئی۔ تے اوس اوہناں نُوں تعلِیم دِتّی۔

¹⁴ تے جاندے ہوئے اوس حلفئی دے پُتر لاوی نُوں محصُول دی چَوکی اُتّے بَیٹھیاں ویکھیا۔ تے اوہنوں آکھیا پئی میرے پِچّھے ٹُر آ۔ سو اوہ اُٹھیا تے اوہدے پِچّھے ٹُر پیا۔

¹⁵ تے ایویں ہویا پئی جدوں اوہدے گھر وِچ روٹی کھان بَیٹھا۔ تے بتھیرے محصُولئے تے گُنہگار یِسُوع تے اوہدے شاگِرداں نال بَہہ گئے۔ کیوں جو اوہ بتھیرے سن۔ تے اوہدے مگر ٹُر آئے سن۔

¹⁶ تے جد فرِیسیاں دے فقِیہاں نیں اوہنوں محصُولِیاں تے گُنہگاراں نال کھاندیاں ویکھیا۔ تَد اوہدے چیلیاں نُوں آکھیا پئی اوہ محصُولِیاں تے گُنہگاراں دے نال کھاندا پَیندا اے۔

¹⁷ تے یِسُوع سُن کے اوہناں نُوں آکھیا۔ پئی تگڑیاں نُوں حکِیم دی لوڑ نئیں پر روگِیاں نُوں لوڑ اے۔ مَیں نیکاں نُوں نئیں پر گُناہِیاں نُوں سَدّن آیا آں۔

روزہ دے بارے سوال

¹⁸ تے یُوحنّا دے شاگِرد تے فریسی روزہ رکھدے سن۔ تے اوہناں آ کے اوہنوں آکھیا پئی یُوحنّا دے شاگِرد تے فرِیسیاں دے شاگِرد کیوں روزہ رکھدے نیں۔ پر تیرے شاگِرد نئیں رکھدے؟

¹⁹ تے یِسُوع اوہناں نُوں آکھیا۔ پئی جد تِیکر لاڑا جانجیاں دے نال اے۔ اوہ روزہ رکھ سکدے نیں؟

²⁰ پر اوہ دِن آؤن گے جد لاڑا اوہناں توں اَڈ کِیتا جائے گا۔ تَد اوس دِن اوہ روزہ رکھن گے۔

²¹ پرانے کپڑے نُوں کورے کپڑے دی ٹاکی کوئی نئیں لاندا۔ جے لاوے وی تے اوہ لائی ہوئی ٹاکی اوس توں کُجھ کھِچّ لَیندی اے یعنی نَوِیں پرانے توں تے لنگار وَدّھ جاندا اے۔

²² تے نَوِیں انگور دے رَس نُوں پرانیاں مشکاں وِچ کوئی نئیں بھردا۔ جے بھرے وی تے رَس مشکاں نُوں پاڑ دے گا۔ تے انگور دا رَس تے مشکاں دوہاں دا ناس ہو جاندا اے۔ پر نَوِیں انگور دے رَس نُوں نَوِیاں مشکاں وِچ بھر دے نیں۔

سبت دے بارے سوال

²³ تے ایویں ہویا پئی اوہ سبت دے دِن پَیلِیاں وِچوں لنگھ دا پیا سی۔ تے اوہدے شاگِرد راہ وِچ سِٹّے توڑن لگّے۔

²⁴ تے فرِیسیاں نیں اوہنوں آکھیا۔ ویکھ۔ ایہہ سبت دے دِن کیوں اوہ کمّ کر دے نیں جِہدا کرنا روا نئیں اے؟

²⁵ تے اوس اوہناں نُوں آکھیا۔ تُساں کدی نئیں پڑھیا پئی جدوں داؤد نُوں لوڑ پئی۔ تے اوہنوں تے اوہدے سَنگیاں نُوں بُھکھ لگّی۔ تے اوس کِیہ کِیتا۔

²⁶ پئی اوہ کِیویں سردار کاہِن اَبیاتر دے ویلے خُدا دے گھر وِچ گیا۔ تے چڑھاوے دِیاں روٹِیاں کھا لئیاں۔ جِنہاں دا کھانا کاہِناں دے بِناں ہور کِسے نُوں روا نئیں سی۔ تے اپنے سَنگیاں نُوں وی دِتّیاں؟

²⁷ تے اوس اوہناں نُوں آکھیا۔ پئی سبت دا دِن اِنسان دے لئی بنیا اے۔ نا اِنسان سبت دے لئی۔

²⁸ ایس لئی اِبنِ آدم سبت دے دِن دا وی مالک اے۔