یُوحنّا 20 - پنجابی نواں عہد نامہ نظرثانی شدہ چھپائی

خالی قبر

¹ ہفتے دے پہلے دِن مریم مگدلِینی وڈّے ویلے اجے ہنیرا ای سی قبر اُتّے آئی تے ویکھیا پئی قبروں پتّھر رہڑیا ہویا اے۔

² تَد اوہ شمعُون پطرس تے اوس دُوجے شاگِرد کول جِہنُوں یِسُوع پیار کر دا سی نٹّھی آئی تے اوہناں نُوں آکھن لگّی اوہناں خُداوند نُوں قبروں کڈھ لیا اے تے سانُوں پتا نئیں پئی اوہنوں کِتّھے رکھیا۔

³ تَد پطرس تے اوہ دُوجا شاگِرد نِکلے تے قبر اُتّے آئے۔

⁴ تے دونویں اکٹّھے بَھجّے تے دُوجا شاگِرد پطرس نالوں بَھجّن وِچ وَدّھ گیا۔ تے قبر اُتّے پہلاں اَپڑیا۔

⁵ تے جھاتی مار کے سُوتی کپڑیاں نُوں پیا ہویا ویکھیا۔ پر اوہ اندر نا وڑیا۔

⁶ تَد شمعُون پطرس وی اوہدے مگروں اَپڑ گیا تے قبر دے اندر وڑیا۔ تے سُوتی کپڑیاں نُوں پیا ہویا ویکھیا۔

⁷ تے اوس رُومال نُوں۔ جیہڑا اوہدے سِر دوالے سی سُوتی کپڑیاں دے نال نئیں۔ سگوں اِک تھاں وکھرا وھلیٹیا ہویا پیا سی۔

⁸ سو اوس ویلے دُوجے شاگِرد نیں وی جیہڑا پہلاں قبر اُتّے اَپڑیا اندر وڑ کے ویکھیا۔ تے یقِین کِیتا۔

⁹ ایس لئی پئی اجے تِیکر اوہ اوس نوِشتے نُوں نئیں سن سمجھدے پئی اوس ضرُور مُردیاں وِچوں جی اُٹھنا اے۔

¹⁰ سو شاگِرد اپنے گھر نُوں فیر مُڑ گئے۔

یِسُوع مریم مگدلِینی تے ظاہر ہوندا اے

¹¹ پر مریم باہر وار قبر دے کول کھلوتی۔ ہوئی روندی سی۔ تے روندیاں ہویاں جھاتی مار کے قبر دے اندر ویکھیا۔

¹² پئی دو فرِشتے چِٹّے کپڑے پائے ہوئے اِک سرہانے تے دُوجا پیندانے جِتّھے یِسُوع دی لوتھ پئی سی۔ بَیٹھے نیں۔

¹³ تے اوہ اوہنوں آکھن لگّے اَے عورت تُوں کیوں رونی ایں؟ اوس اوہناں نُوں آکھیا ایس لئی پئی میرے خُداوند نُوں چُک لے گئے نیں تے مَیں نئیں جاندی پئی اوہنوں کِتّھے رکھیا اے۔

¹⁴ ایہہ آکھ کے اوہ پِچھّاں مُڑی تے یِسُوع نُوں کھلوتا ویکھیا تے نا پہچانیا پئی ایہہ یِسُوع اے۔

¹⁵ یِسُوع اوہنوں آکھیا اَے عورت تُوں کیوں رونی ایں؟ تُوں کِنوں لَبّھنی ایں؟ اوس ایہہ سمجھ کے پئی مالی اے اوہنوں آکھیا اَے میاں جے تُوں اوہنوں لے گیا ایں تے مَینُوں دس پئی کِتّھے رکھیا اے تے مَیں اوہنوں لے جاواں گی۔

¹⁶ یِسُوع اوہنوں آکھیا اَے مریم! اوس پِچھّاں مُڑ کے عِبرانی بولی وِچ آکھیا ربونی یعنی اَے اُستاد۔

¹⁷ یِسُوع اوہنوں آکھیا مَینُوں نا چُھو کیوں جو اجے مَیں باپ کول اُتانہہ نئیں گیا آں۔ پر میرے بھراواں دے کول جا۔ تے اوہناں نُوں آکھ پئی مَیں اپنے باپ تے تُہاڈے باپ کول تے اپنے خُدا تے تُہاڈے خُدا کول اُتانہہ جانا آں۔

¹⁸ مریم مگدلِینی آ کے شاگِرداں نُوں دسیا پئی مَیں خُداوند نُوں ویکھیا اے تے اوس مَینُوں ایہہ گلّاں آکھیاں نیں۔

یِسُوع اپنے شاگِرداں تے ظاہر ہوندا اے

¹⁹ فیر اوسے دِن جیہڑا ہفتے دا پہلا دِن سی شاماں ویلے جیہڑے تھاں یہُودِیاں دے ڈر دے مارِیاں شاگِرداں بُوہے مارے ہوئے سن یِسُوع وِچکار آکھلوتا تے اوہناں نُوں آکھیا تُہاڈی سلامتی ہوئے۔

²⁰ تے ایہہ آکھ کے اوہناں نُوں اپنے ہتّھ تے وَکھّی وکھالی۔ تَد شاگِرد خُداوند نُوں ویکھ کے خُوش ہوئے۔

²¹ تَد یِسُوع اوہناں نُوں فیر آکھیا تُہاڈی سلامتی ہوئے۔ باپ نیں جیویں مَینُوں گھلّیا اے اوسے طرح مَیں تُہانوں گھلّنا آں۔

²² تے ایہہ آکھ کے اوہناں اُتّے پُھوک ماری تے اوہناں نُوں آکھیا پاک رُوح لوؤ۔

²³ جِنہاں دے گُناہاں نُوں تُسی بخشو اوہناں دے بخشے گئے نیں تے جِنہاں دے تُسی قیم رکھو اوہناں دے قیم رکھّے گئے نیں۔

یِسُوع تے تُوما

²⁴ پر جدوں یِسُوع آیا تَد اوہناں باراں وِچوں اِک جَنا تُوما جِہنُوں جوڑا آکھدے نیں اوہناں دے نال نئیں سی۔

²⁵ دُوجے شاگِرداں آکھیا اساں خُداوند نُوں ویکھیا اے۔ پر اوس اوہناں نُوں آکھیا جِنّاں چِر مَیں اوہدے ہتّھاں وِچ کِلاّں دے چھیک نا ویکھیاں تے کِلاّں دے چھیکاں وِچ اپنی اُنگلی نا پاں تے نا اوہدی وَکھّی وِچ اپنا ہتّھ پاں اوناں چِر مَیں کَدے نا منّاں گا۔

²⁶ تے اَٹھاں دِناں پِچّھوں فیر اوہدے شاگِرد اندر سن تے تُوما اوہناں دے نال سی۔ بُوہے وَجّے ہوئے سن یِسُوع آیا تے وِچکار کھلو کے آکھیا تُہاڈی سلامتی ہوئے۔

²⁷ تَد اوس تُوما نُوں آکھیا اپنی اُنگل اُراں کر تے میرے ہتّھاں نُوں ویکھ تے اپنا ہتّھ اُراں کر تے میری وَکھّی وِچ پا تے بےاعتبار نا ہو پر اعتبار کر۔

²⁸ تُوما اوہنوں آکھیا اے میرے خُداوند اے میرے خُدا۔

²⁹ یِسُوع اوہنوں آکھیا ایس کر کے پئی تُوں مَینُوں ویکھیا اے تُوں اِیمان لیاندا اے۔ مُبارک اوہ نیں جِنہاں ویکھیا نئیں تَد وی اِیمان لیاندا۔

ایس کتاب دا مقصد

³⁰ تے بُہت ہور وی کراماتاں یِسُوع شاگِرداں دے سامھنے کِیتیاں جیہڑیاں ایس کتاب وِچ نئیں لِکھیاں گِئیاں۔

³¹ پر ایہہ لِکھیاں گِئیاں نیں تاں جو تُسی اِیمان لیاؤ پئی یِسُوع جو اے اوہو مسِیح خُدا دا پُتر اے۔ تے اِیمان لیا کے اوہدے ناں توں تُہانوں زِندگی مِلے۔