یُوحنّا 18 - پنجابی نواں عہد نامہ نظرثانی شدہ چھپائی

یِسُوع دا پھڑیا جانا

¹ ایہہ گلّاں آکھ کے یِسُوع اپنے شاگِرداں نال قِدرون دے نالیوں پار گیا اوتھے اِک باغ سی جِہدے وِچ اوہ تے اوہدے شاگِرد جاوڑے۔

² تے یہُوداہ اوہدے پھڑان والے نُوں ایہہ تھاں معلُوم سی کیوں جو یِسُوع اکثر اپنے شاگِرداں نال اوتھے بُہت جاندا ہوندا سی۔

³ سو یہُوداہ سپاہیاں دی پلٹن تے سردار کاہِناں نیں فرِیسیاں ولّوں پیادے لے کے لالٹیناں تے مسالاں تے ہتّھیاراں سَنے اوتھے آیا۔

⁴ تَد یِسُوع جو کُجھ اوہدے اُتّے ہوناں سی جان کے باہر نِکلیا تے اوہناں نُوں آکھیا تُسی کِنوں لبّھدے ہو؟

⁵ اوہناں اوہنوں جواب دِتّا۔ یِسُوع ناصری نُوں۔ یِسُوع اوہناں نُوں آکھیا اوہ مَیں ای آں۔ تے یہُوداہ وی جِس اوہنوں پھڑ وایا اوہناں دے نال کھلوتا ہویا سی۔

⁶ تے جد اوس آکھیا مَیں ای آں اوہ پِچھّاں ہَٹ کے زمین اُتّے ڈِگّ پئے۔

⁷ ایس لئی اوس اوہناں توں فیر پُچھیا تُسی کِنوں لبّھدے ہو؟ اوہناں آکھیا یِسُوع ناصری نُوں۔

⁸ یِسُوع جواب دِتّا مَیں جو تُہانوں آکھیا پئی اوہ مَیں ای آں۔ سو جے کر تُسی مَینُوں لبّھدے ہو تاں ایہناں نُوں جان دیو۔

⁹ تاں جو اوہ گلّ جیہڑی اوس آکھی سی پُوری ہوئے پئی جِنہاں نُوں تُوں مَینُوں دِتّا اے اوہناں وِچوں مَیں اِک وی نا گوایا۔

¹⁰ تَد شمعُون پطرس تلوار جیہڑی اوہدے کول سی کھِچّی تے سردار کاہِن دے نوکر اُتّے چلائی تے اوہدا سَجّا کنّ وَڈّھ سُٹّیا۔ اوس نوکر دا ناں ملخُس سی۔

¹¹ تَد یِسُوع پطرس نُوں آکھیا تلوار نُوں میان کر۔ اوہ پیالہ جیہڑا باپ مَینُوں دِتّا اے کِیہ مَیں نا پئیاں؟

یِسُوع دی حنّا اگّے پیشی

¹² سپاہیاں دی پلٹن تے صُوبیدار تے یہُودِیاں دے پیادیاں رَل کے یِسُوع نُوں پھڑ لیا تے اوہنوں بَنّھ لیا۔

¹³ تے پہلاں اوہنوں حنّا کول لے گئے۔ کیوں جو اوہ کائفا دا سَوہرا سی جیہڑا اوس ورھے سردار کاہِن سی۔

¹⁴ تے کائفا اوہو سی جِہنے یہُودِیاں نُوں صلاح دِتّی پئی قوم دے بدلے اِک بندے دا مرنا چَنگا اے۔

پطرس یِسُوع دا اِنکار کر دا اے

¹⁵ تے شمعُون پطرس یِسُوع دے مگر ٹُر پیا تے دُوجا شاگِرد وی۔ تے اوہ شاگِرد سردار کاہِن دا واقف سی۔ تے اوہ یِسُوع دے نال ای سردار کاہِن دے ویہڑے دے اندر ٹُر گیا۔

¹⁶ پر پطرس باہر بُوہے کول کھلوتا رہیا۔ تَد دُوجا شاگِرد جیہڑا سردار کاہِن دا واقف سی باہر گیا تے دربانن نُوں آکھ کے پطرس نُوں اندر واڑ لیا۔

¹⁷ تَد اوہ ٹہلن جیہڑی دربانن سی پطرس نُوں آکھن لگّی تُوں وی ایس بندے دے شاگِرداں وِچوں ایں؟ اوس آکھیا مَیں نئیں آں۔

¹⁸ تے نوکر تے پیادے کولیاں دی اَگ بَھکھا کے پَے سیک دے سن کیوں جو پالا پَیندا سی۔ تے پطرس وی اوہناں دے نال کھلو کے پیا سیکدا سی۔

سردار کاہِن یِسُوع توں سوال پُچھدا اے

¹⁹ سو سردار کاہِن یِسُوع نُوں اوہدے شاگِرداں تے اوہدی تعلِیم دی بابت پُچھیا۔

²⁰ یِسُوع اوہنوں جواب دِتّا پئی مَیں کُھلّم کُھلا دُنیا وِچ گلّاں کِیتیاں نیں تے ہمیش عبادت خانے تے ہیکل وِچ جِتّھے سارے یہُودی اکٹّھے ہوندے نیں مَیں تعلِیم دِتّی۔ تے چُھپا کے مَیں کُجھ نئیں آکھیا۔

²¹ تُوں مَیتھوں کیوں پُچھناں ایں؟ اوہناں سُنیا اے اوہناں کولوں پُچھ لے پئی مَیں اوہناں نُوں کِیہ آکھیا۔ ویکھ جو کُجھ مَیں آکھیا سو اوہ جان دے نیں۔

²² تے جد اوس ایہہ آکھیا پیادیاں وِچوں اِک نیں جیہڑا کول کھلوتا ہویا سی یِسُوع نُوں ایہہ آکھ کے دھپّا ماریا پئی سردار کاہِن نُوں تُوں ایس طرح جواب دینا ایں؟

²³ یِسُوع اوہنوں جواب دِتّا جے مَیں بُرا آکھیا تے اوس بُریائی دی گواہی دے۔ پر جے چَنگا آکھیا تے تُوں مَینُوں کاہِنُوں مارنا ایں۔

²⁴ تَد حنّا نے کائفا سردار کاہِن کول اوہنوں بَدّھیاں بَدّھایاں گھل دِتّا۔

پطرس یِسُوع دا دُوجی وار اِنکار کر دا اے

²⁵ تے شمعُون پطرس کھلو کے اَگ پیا سیکدا سی تَد اوہناں اوہنوں آکھیا تُوں وی اوہدے شاگِرداں وِچوں ایں؟ اوہ مُکّر پیا تے آکھیا مَیں نئیں آں۔

²⁶ سردار کاہِن دے نَوکراں وِچوں اِک نیں جیہڑا اوہدا ساک سی جِہدا کنّ پطرس وَڈّھ سُٹّیا سی آکھیا مَیں تینُوں اوہدے نال باغ وِچ نئیں سی ویکھیا؟

²⁷ تَد پطرس فیر مُکّر گیا تے جھٹ کُکّڑ نیں بانگ دِتّی۔

یِسُوع دی پِیلاطُس اگّے پیشی

²⁸ تَد اوہ یِسُوع نُوں کائفا کولوں کچہری وِچ لے گئے تے سویر دا ویلا سی۔ تے اوہ آپ کچہری دے اندر نا وڑے پئی کِتے پلِیت نا ہو جان پر فسح کھا سکن۔

²⁹ سو پِیلاطُس اوہناں دے کول باہر نِکل آیا تے آکھن لگّا تُسی ایس بندے اُتّے کِیہ جُرم لاندے ہو؟

³⁰ اوہناں اوہنوں جواب دِتّا جے ایہہ بدکار نا ہوندا تے اسی اوہنوں تیرے حوالے نا کر دے۔

³¹ سو پِیلاطُس اوہناں نُوں آکھیا تُسی اوہنوں لے جاؤ تے اپنی شریعت دے سببّوں اوہدا فیصلہ کرو۔ یہُودِیاں اوہنوں آکھیا پئی ساڈے واسطے روا نئیں پئی کِسے نُوں مار دئیے۔

³² تاں جو یِسُوع دی ایہہ گلّ جیہڑی اوس اِشارے نال آکھی سی پُوری ہوئے پئی مَیں کیہڑی مَوت نال مراں گا۔

³³ تَد پِیلاطُس فیر کچہری دے اندر گیا تے یِسُوع نُوں سَدّ کے اوہنوں آکھیا تُوں ای یہُودِیاں دا بادشاہ ایں؟

³⁴ یِسُوع اوہنوں جواب دِتّا تُوں اپنے ولّوں ایہہ گلّ آکھنا ایں۔ یا ہورناں تینُوں میرے ولّوں آکھیا اے؟

³⁵ پِیلاطُس جواب دِتّا مَیں کوئی یہُودی آں؟ تیری ای قوم تے سردار کاہِناں تینُوں میرے حوالے کِیتا اے۔ تُوں کِیہ کِیتا اے؟

³⁶ یِسُوع جواب دِتّا میرا راج ایس دُنیا دا نئیں اے جے میرا راج ایس دُنیا دا ہوندا تے میرے پیادے لڑائی کر دے تاں جو مَیں یہُودِیاں دے حوالے نا کِیتا جاندا۔ پر اجے تے میرا راج ایتھوں دا نئیں اے۔

³⁷ تَد پِیلاطُس اوہنوں آکھیا۔ تے فیر تُوں بادشاہ ایں؟ یِسُوع جواب دِتّا تے آکھیا تُوں آپی آکھنا ایں پئی مَیں بادشاہ آں۔ مَیں ایس گلّ لئی جمّیا تے ایس گلّ لئی دُنیا وِچ آیا آں پئی مَیں سچیائی اُتّے گواہی دیاں۔ ہر اِک جیہڑا سچیائی دا اے میری اواز سُندا اے۔

یِسُوع نُوں مَوت دی سزا دیتی جاندی اے

³⁸ پِیلاطُس اوہنوں آکھیا۔ سچیائی کِیہ ہوندی اے؟ تے آکھ کے اوہ فیر یہُودِیاں کول باہر گیا تے اوہناں نُوں آکھن لگّا مَینُوں اوہدے وِچ کُجھ جُرم نئیں لَبّھدا۔

³⁹ پر تُہاڈی رِیت اے پئی مَیں عید فسح اُتّے تُہاڈے لئی کِسے اِک نُوں چھڈ دیاں سو تُسی چاہندے ہو پئی تُہاڈے لئی مَیں یہُودِیاں دے بادشاہ نُوں چھڈ دیاں؟

⁴⁰ تَد اوہناں اُچّی اُچّی آکھیا پئی اوہنوں نئیں پر برابّا نُوں۔ تے برابّا اِک ڈاکُو سی۔