عِبرانیوں 7 - پنجابی نواں عہد نامہ نظرثانی شدہ چھپائی

کاہِن مَلکِ صدق

¹ ہُن ایہہ مَلکِ صدق سالِم دا بادشاہ خُدا تعالیٰ دا کاہِن سدا کاہِن رہندا اے جد ابرہام بادشاہاں نُوں مار کے مُڑیا آؤندا سی۔ تے اوہ اوہنوں اگّوں مِلیا تے اوہنوں برکت دِتّی۔

² اوہنوں ای ابرہام سارِیاں شیواں دا دسوواں حِصّہ دِتّا۔ تے ایہہ پہلاں تے اپنے ناں دے معنے دے سببّوں نیکی دا بادشاہ اے تے فیر سالِم پئی صُلح دا بادشاہ۔

³ اوہدا نا پئیو تے نا ماں تے نا شجرہ اے۔ نا مُڈھ مول تے نا انت۔ سگوں خُدا دے پُتر وانگر بنیا۔

⁴ سوچ لوؤ پئی ایہہ کیڈا بزُرگ سی جِہنُوں قوم دے بزُرگ ابرہام لُٹ وِچوں چنگے توں چنگے مال دا دسواں حِصّہ دِتّا۔

⁵ ہُن لاوی دی نسل وِچوں جیہڑے کاہِن دا عُہدہ پاندے نے اوہناں نُوں حُکم اے۔ پئی اُمّت لئی اپنے بھراواں کولوں بھانویں اوہ ابرہام دی نسل وِچوں ہون شریعت دے سببّوں دسوواں حِصّہ لین۔

⁶ پر جِہدا شجرہ اوہناں توں وکھرا اے اوس ابرہام کولوں دسوواں حِصّہ لیا۔ تے جِہدے نال وعدے کِیتے گئے سن اوہنوں برکت دِتّی

⁷ ایہدے وِچ شک نئیں پئی نِکّا وڈّے کولوں برکت لَیندا اے

⁸ تے ایتھے تے مرن والے بندے دسواں حِصّہ لَیندے نیں۔ پر اوتھے اوہ ای لَیندا اے جِہدی بابت ایہہ گواہی دِتّی جاندی اے۔ پئی جِیوندا اے۔

⁹ اسی آکھ سکنے آں۔ پئی لاوی وی جیہڑا دسوواں حِصّہ لَیندا اے اوس ابرہام دی ہتّھِیں دسوواں حِصّہ دِتّا۔

¹⁰ ایس لئی پئی جِس ویلے مَلکِ صدق اوہنوں اگّوں والی مِلیا اوہ اپنے پئیو دی پِٹھ وِچ سی۔

¹¹ ہُن جے لاویاں دی کہانت توں پُوری پَیندی (کیوں جو اوہناں دی راہِیں اُمّت نُوں شریعت جو مِلی سی) تے فیر کِیہ لوڑ سی پئی دُوجا کاہِن مَلکِ صدق دے طریقے اُتّے اُٹھے۔ تے ہارُون دے طریقے دا نا گِنیا جائے؟

¹² تے جد کاہِناں دا طریقہ بدل گیا۔ تے شریعت دا وی بدلناں ضرُور اے۔

¹³ ایس لئی پئی جِہدی بابت ایہہ گلّاں آکھیاں گِئیاں سن اوہ دُوجے فِرقے وِچوں اے۔ جِہدے وِچوں کِسے قُربان گاہ دی خِدمت نئیں کِیتی۔

¹⁴ کیوں جو صاف پتا اے۔ پئی ساڈا خُداوند یہُوداہ توں جمّیا تے ایس فِرقے دی بابت مُوسیٰ کاہِناں دا ذِکر کوئی نئیں کِیتا۔

مَلکِ صدق وانگُوں اِک ہور کاہِن

¹⁵ ایس طرح ایہہ دعویٰ ہور وی صاف ظاہر ہوگیا جے مَلکِ صدق وانگر اِک ہور اِنج سردار کاہِن اُٹھن والا اے۔

¹⁶ جیہڑا جِسمانی حُکماں دی شریعت پِچّھے نئیں سگوں سدا دی زِندگی دی قُوّت دے سببّوں مُقرّر ہوئے گا۔

¹⁷ کیوں جو اوہدی بابت ایہہ گواہی دِتّی گئی اے۔ پئی تُوں مَلکِ صدق دے طریقے اُتّے اوڑک تِیکر کاہِن ایں۔

¹⁸ ایس لئی پئی پہلا حُکم کمزور تے نکمّا ہون دا سبّب ڈھایا گیا۔

¹⁹ (کیوں جو شریعت کِسے شے نُوں کامِل نئیں کِیتا۔) تے اوہدے تھاں اِک چنگی آس پَیدا ہوئی۔ جِہدی راہِیں اسی خُدا دے نیڑے جا سکنے آں۔

²⁰ جیویں مسِیح سَونہہ توں بغیر قیم نئیں ہویا۔

²¹ (کیوں جو اوہ تے بغیر سَونہہ توں کاہِن بنے پر اوہ سَونہہ دے نال اوہدے ولّوں ہویا جِس اوہدی بابت آکھیا خُداوند سَونہہ کھادِی اے تے نئیں مُڑے گا پئی تُوں اوڑک تِیکر کاہِن ایں۔)

²² اونویں یِسُوع اِک بہتر عہد دا ضامن ہویا۔

²³ نالے اوہ کاہِن تے بُہت بنے سن۔ ایس لئی پئی مَوت مارِیاں رہ نئیں سن سکدے۔

²⁴ پر ایس لئی پئی اوہ ہمیشہ تِیکر جِیوندا رہے گا۔ اوہدے کاہِن ہون وِچ کدی فرق نئیں آوے گا۔

²⁵ ایس واسطے جیہڑے اوہدے راہِیں خُدا کول آوندے نیں اوہ اوہناں نُوں پُوری نجات دے سکدا اے۔ کیوں جو اوہ اوہناں دی سفارِش لئی ہمیشہ جِیوندا اے۔

²⁶ کیوں جو سانُوں ایس طرح دا سردار کاہِن پھبدا سی جیہڑا پاک تے صاف دِل تے بے داغ تے گُنہگاراں توں وکھرا تے اسماناں توں اُچّا کِیتا گیا ہوئے۔

²⁷ تے اوہناں سردار کاہِناں وانگر ایس گلّ دی اوہنوں لوڑ نا ہوئے۔ پئی روز دیہاڑی پہلاں اپنے گُناہاں تے فیر اُمّت دے گُناہاں دے لئی قُربانِیاں چاہڑے کیوں جو ایہہ اوس اِکّو واری کِیتا۔ جد اپنے آپ نُوں قُربان کِیتا۔

²⁸ کیوں جو شریعت تے کمزور بندیاں نُوں سردار کاہِن بناندی اے۔ پر اوس سَونہہ دا کلام جیہڑی شریعت دے پِچّھوں کھادِی گئی اوس پُتر نُوں جیہڑا ہمیشہ تِیکر کامِل کِیتا گیا سردار کاہِن بناندا اے۔