اعمال 28 - پنجابی نواں عہد نامہ نظرثانی شدہ چھپائی

مِلتِے وِچ

¹ جدوں اسی بچ نِکلے تاں معلُوم کِیتا پئی ایہہ ٹاپُو مِلتِے اکھواؤندا اے۔

² تے اوس تھاں اوپرے لوکاں ساڈے اُتّے بڑی مِہربانی کِیتی۔ پئی اوہناں مینہ دی جھڑی تے پالے دے سبّب اَگ بالی۔ تے ساڈے سبھناں دی خاطر کِیتی۔

³ جد پَولُس نے لکڑیاں کٹھِیاں کِیتیاں۔ تے اَگ اُتّے رَکھیّاں۔ تَد اِک سَپّ سیک نال نِکلیا۔ تے اوہدے ہتّھ نُوں چَمّڑ گیا۔

⁴ جدوں اوہناں اوپریاں کِیڑے نُوں اوہدے ہتّھ نال لمکیا ہویا ویکھیا تے آپو وِچ آکھن لگّے۔ بے شک ایہہ خُونی بندہ اے۔ بھانویں سمُندروں بچ گیا۔ فیر وی انصاف اوہنوں جیون نئیں دیندا۔

⁵ تَد اوہنے کِیڑے نُوں اَگ وِچ چھنڈ دِتّا تے کُجھ نُقصان نا ہویا۔

⁶ تے اوہ ویکھدے سن پئی ہُن سُج جائے گا۔ یا اِک دم مر کے ڈِگّ پَوے گا۔ پر جدوں اوہناں بُہت چِر اُڈِیک کِیتی تے ویکھیا پئی اوہدا کُجھ نئیں وِگڑیا۔ تاں اوہناں دا ہور خیال ہویا تے آکھن لگّے۔ پئی ایہہ کوئی دیوتا اے۔

⁷ تے اوس تھاں دے نیڑے ٹاپُو دے سردار پُبلِیُس دی ملکیّت سی۔ اوس سانُوں اپنے گھر کھڑ کے تَرے دِہاڑے ساڈی بڑی خاطر تواضع کِیتی۔

⁸ تے اینج ہویا پئی پُبلِیُس دا پئیو تاپ تے مروڑے نال ماندا پیا ہویا سی۔ اوہدے کول جا کے پَولُس دُعا منگی۔ تے اپنے ہتّھ اوہدے اُتّے رکھ کے اوہنوں ولّ کِیتا۔

⁹ تے ایس حال دے ہون نال ٹاپُو دے ہور لوک وی جیہڑے روگی سن آئے تے چنگے کِیتے گئے۔

¹⁰ تے اوہناں ساڈی بُہت ای عِزّت کِیتی۔ تے جِس ویلے اسی ٹُرن لگّے تاں جیہڑیاں شیواں دی سانُوں لوڑ سی اوہناں جہاز اُتّے لَدّ دِتّیاں۔

مِلتِے توں رُوم نُوں روانگی

¹¹ تے تِنّاں مہِینیاں پِچّھوں اسی اِسکندریہ دے اِک جہاز اُتّے ٹُرپَئے جِہدا نِشان دِیُسکُوری سی تے جِس اوسے ٹاپُو وِچ سِیال کَٹیا ہویا سی۔

¹² تے سرَکُوسہ وِچ اُتر کے اسی تِنّ دِن رہے۔

¹³ اوتھوں وَلا پا کے ریِگیُم وِچ اَپڑے تے اِک دِن پِچّھوں دَکھّن دی وَا وَگ پئی تے دُوجے دِن اسی پُتیُلِی وِچ اَپڑے۔

¹⁴ اوتھے سانُوں بھرا مِلے۔ جِنہاں ساڈی مِنّت کِیتی۔ پئی اِک ہفتہ ساڈے کول رہ جاؤ۔

¹⁵ تے اسی ایسے طرح رُومہ وِچ اَپڑے۔ اوتھوں وی بھرا ساڈی خبر سُن کے اَپّیُس دے چَوک تے تَرے سراواں تِیکر ساڈے مِلن نُوں اگّوں والی آئے۔ اوہناں نُوں ویکھ کے پَولُس خُدا دا شُکر کِیتا تے اوہنوں تسلّی ہوئی۔

رُوم وِچ

¹⁶ تے جدوں اسی رُومہ وِچ اَپڑے پَولُس نُوں ایہہ اجازت مِلی۔ پئی اوس سپاہی نال اکلّا رہے جیہڑا اوہدی راکھی کر دا سی۔

¹⁷ تے اینج ہویا پئی تِنّ دِن پِچّھوں اوس یہُودِیاں دے وڈّے وڈّے بندیاں نُوں سدّیا تے جدوں اوہ اکٹّھے ہوئے اوس اوہناں نُوں آکھیا۔ بھراؤ! بھانویں مَیں اپنی قوم دے یا پئیو دادیاں دِیاں رسماں دے اُلٹ کُجھ وی نئیں کِیتا۔ تَد وی یرُوشلِیم توں قیدی ہو کے مَیں رُومِیاں دے ہتّھ پھڑوایا گیا۔

¹⁸ جدوں ایہناں تحقیقات کِیتی۔ مَینُوں چھڈ دینا چاہندے سن کیوں جو میرے وِچ کوئی مَوت دا سبّب نئیں سی۔

¹⁹ تے جدوں یہُودی ایس گلّ دے خلاف بولے مَیں مجبُور ہو کے قَیصر دی دوہائی دِتّی۔ پر ایس لئی نئیں پئی مَیں اپنی قوم اُتّے کُجھ فریاد کرنی سی۔

²⁰ ایسے واسطے مَیں تُہانوں سدّیا پئی تُہانوں مِلاں تے گلّ بات کراں۔ کیوں جو اِسرائیل دی آس دے سببّوں مَیں ایس سَنگل نال بَدّھا ہویا ہاں۔

²¹ تَد اوہناں اوہنوں آکھیا نا سانُوں یہُودِیاں ولّوں تیری بابت چِٹّھیاں مِلیاں۔ تے نا بھراواں وِچوں کِسے آ کے تیری کوئی خبر دِتّی نا بُرائی دسی۔

²² پر اسی چاہنے آں پئی تیرے کولوں سُنیے۔ پئی تیرے کِیہ خیال نیں۔ کیوں جو ایس فِرقے دی بابت اسی جاننے آں۔ پئی سبھنیں تھائِیں اوہنوں بُرا آکھدے نیں۔

²³ تے جد اوہناں اوہدے لئی اِک دِن مُقرّر کِیتا۔ بتھیرے اوہدے ڈیرے اُتّے اوہدے کول آئے اوہناں نُوں اوس کھول کے سکھالیا تے خُدا دی بادشاہی دی گواہی دِتّی تے سویرے توں لے کے شام تِیکر مُوسیٰ دی توریت تے نبیاں دِیاں کِتاباں وِچوں یِسُوع دی بابت دلِیلاں کڈھ کے دسیاں۔

²⁴ تے بعضیاں اوہناں گلّاں نُوں جیہڑیاں اوس آکھیاں سن مَن لیا۔ تے بعضیاں نا مَنّیا۔

²⁵ تے جد اوہناں دی آپو وِچ اِکّو صلاح نا بنی۔ تَد پَولُس دے ایہہ گلّ آکھدیاں سار ای اوہ ٹُر گئے۔ پئی پاک رُوح نے یسعیاہ نبی دی زبانی تُہاڈے پئیو دادیاں نُوں چَنگا آکھیا۔

²⁶ پئی تُوں ایس قوم دے کول جا کے آکھ پئی تُسی کنّاں نال سُنو گے پر کَدے نئیں سمجھو گے۔ تے اَکھّیاں نال ویکھو گے پر کدی نئیں پہچانو گے۔

²⁷ کیوں جو ایس قوم دا دِل موٹا ہو گیا اے۔ تے اوہناں دے کنّ اُچّے سُندے نیں تے اپنیاں اَکھّیاں اوہناں مِیٹِیاں ہویاں نیں۔ کِتے اجیہا نا ہوئے پئی اوہ اپنیاں اَکھّیاں نال پہچانن۔ تے اپنے کنّاں نال سُنن۔ تے دِل نال سمجھن۔ تے مُڑ جان۔ تے مَیں اوہناں نُوں ولّ کراں۔

²⁸ سو تُسی جان لو پئی خُدا دی ایس نجات دی خبر غیر قوماں ولّ گھلّی گئی اے۔ تے اوہ اوہنوں سُن وی لین گِیاں۔

²⁹ [جدوں اوس ایہہ آکھیا تے یہُودی آپو وِچ بحث کر دے ہوئے چلّے گئے۔]

³⁰ اوہ پُورے دو ورھیاں تِیکر اپنے کرائے دے گھر وِچ رہیا سبھناں نُوں جیہڑے اوہدے کول آوندے سن اوہناں نُوں مِلدا رہیا۔

³¹ تے پُوری دلیری نال خُدا دی بادشاہی دی منادی کر دا تے خُداوند یِسُوع مسِیح دی بابت سِکھالدا رہیا تے کوئی اوہنوں روکدا نئیں سی۔