اعمال 10 - پنجابی نواں عہد نامہ نظرثانی شدہ چھپائی

پطرس تے کُرنِیلِیُس

¹ قَیصریہ وِچ کُرنِیلِیُس کر کے اِک بندہ سی جیہڑا اِطالِیانی کر کے اِک پلٹن دا صُوبیدار سی۔

² اوہ اپنے سارے گھرانے سَنے دِیندار تے خُدا کولوں ڈردا سی۔ تے لوکاں نُوں بُہت خَیرات دیندا تے نِت خُدا کولوں دُعا منگدا سی۔

³ اوس رویا وِچ دِن دے ترِیجے پَہر صاف صاف ویکھیا۔ پئی خُدا دا اِک فرِشتہ اوہدے کول اندر آیا۔ تے اوہنوں آکھیا۔ اَے کُرنِیلِیُس۔

⁴ اوس اوہدے ولّ دھیان کر کے ویکھیا۔ تے ڈر کے آکھیا۔ اَے خُداوند کِیہ اے؟ اوس اوہنوں آکھیا۔ تیریاں عرضاں تے تیریاں خَیراتاں یادگیری لئی خُدا دی درگاہ وِچ اَپڑ گِئیاں نیں۔

⁵ سو ہُنے ای یافا نُوں بندے گھل تے شمعُون نُوں جیہڑا پطرس اکھواؤندا اے۔ سَدّ لے۔

⁶ اوہ شمعُون کر کے اِک چمرنگ دے کول۔ جِہدا گھر سمُندر دے کنڈھے اُتّے اے۔ پَروہنا اے۔

⁷ جد فرِشتہ جِس اوس دے نال گلّاں کِیتیاں سن ٹُر گیا۔ تاں اوس اپنے گھر دیاں نَوکراں وِچوں دو زنانِیاں نُوں تے اپنے اردلِیاں وِچوں اِک دِیندار بندے نُوں بُلایا۔

⁸ تے سارِیاں گلّاں اوہناں نُوں دسیاں۔ تے اوہناں نُوں یافا ولّ ٹور دِتّا۔

⁹ دُوجے دِن جدوں اوہ راہ وِچ لگے جاندے سن۔ تے شہر دے نیڑے اَپڑے۔ پطرس دوپہراں ویلے کوٹھے اُتّے دُعا منگن گیا۔

¹⁰ تے اوہنوں بُھکھ لگّی۔ تے دِل کِیتا پئی کُجھ کھاوے۔ پر جدوں اوہ تیار پئے کر دے سن۔ اوہنوں بے خود ہوگیا۔

¹¹ تے اسمان نُوں کھلا تے وڈّی چادر وانگُوں اِک شے نُوں چَوہاں پَلیاں توں زمین ولّ لمکدِی ویکھیا۔

¹² اوہدے وِچ وَن سَووَنے چَوکُھر تے زمین دے کِیڑے کاڑے تے وَا دے پنچھی سن۔

¹³ تے اوہنوں اِک اواز آئی۔ پئی اَے پطرس اُٹھ ہلال کر کے کھا۔

¹⁴ پطرس نے آکھیا۔ اَے خُداوند کدی وی نئیں۔ کیوں جو مَیں کوئی ناپاک تے پلِیت شے کدی نئیں کھادِی۔

¹⁵ تے دُوجی واری اوہنوں اواز آئی پئی جِہنُوں خُدا پاک کِیتا اے۔ تُوں ناپاک نا بنا۔

¹⁶ ایہہ تِنّ واری ہویا۔ تے اونویں اوہ شے اسمان اُتّے چُکی گئی۔

¹⁷ جد پطرس اپنے دِل وِچ بڑا حَیران پیا ہوندا سی پئی ایہہ رویا جیہڑی مَیں ویکھی اے کِیہ اے۔ تَد ویکھو اوہ بندے جِنہاں نُوں کُرنِیلِیُس گھلّیا سی۔ شمعُون دا گھر پُچھدیاں پُچھدیاں بُوہے دے اگّے آ کھلوتے۔

¹⁸ تے اواز مار کے پُچھیا پئی شمعُون جیہڑا پطرس اکھواؤندا اے ایتھے پَروہناں اے؟

¹⁹ جد پطرس اوس رویا دی سوچ وِچ سی۔ رُوح اوہنوں آکھیا۔ ویکھ تِنّ بندے تینُوں لبّھدے نیں۔

²⁰ پر تُوں اُٹھ تے اُتر جا تے اوہناں دے نال جا تے جھجھگ نا کر۔ کیوں جو اوہ میرے گھلّے آئے نیں۔

²¹ تَد پطرس اُٹھ کے اوہناں بندیاں نُوں آکھیا۔ جِہنُوں تُسی لبّھدے ہو ویکھو مَیں ای آں۔ تُسی کِس کر کے آئے ہو؟

²² اوہناں آکھیا پئی کُرنِیلِیُس صُوبیدار جیہڑا نیک تے خُدا کولوں ڈردا اے۔ تے یہُودِیاں دی ساری قوم وِچ نیک ناں اے اوہنوں اِک پاک فرِشتہ دی راہِیں حُکم مِلیا۔ پئی تینُوں اپنے گھر وِچ سَدّ لیا وے تے تَیتھوں گلّاں سُنے۔

²³ سو اوس اوہناں نُوں اندر لے جا کے سیوا کِیتی۔ تے دُوجے دِن اُٹھ کے اوہناں دے نال ٹُر پیا۔ تے یافا دے بھراواں وِچوں کئی اوہدے نال ٹُر پئے۔

پطرس دی منادی

²⁴ تے اگلے دیہاڑے اوہ قَیصریہ وِچ اَپڑے۔ تے کُرنِیلِیُس اپنے ساکاں انگاں تے گُوڑھیاں دوستاں نُوں اکٹّھے کر کے اوہناں دا راہ پیا ویکھدا سی۔

²⁵ تے جد پطرس اندر جان لگّا کُرنِیلِیُس اوہنوں آ مِلیا۔ تے اوہدی پَیرِیں پَے کے مَتّھا ٹیکیا۔

²⁶ پر پطرس اوہنوں اُٹھا کے آکھیا۔ اُٹھ کھلو۔ کیوں جو مَیں وی تے بندہ آں۔

²⁷ تے اوہدے نال گلّاں کر دا ہویا اندر گیا۔ تے بتھیرے لوک اکٹّھے ہوئے ویکھے۔

²⁸ تے اوہناں نُوں آکھیا تُسی آپ جان دے اوہ پئی دُوجی قوم والے نال سنگت کرنی یا اوہدے گھر وِچ جانا۔ یہُودی نُوں روا نئیں۔ پر خُدا مَینُوں وکھا لیا اے۔ پئی مَیں کِسے نُوں ناپاک یا پلِیت نا آکھاں۔

²⁹ ایس لئی مَیں تُہاڈے سَدّن اُتّے بے عُذر آگیا آں۔ ہُن مَیں پُچھنا آں۔ پئی مَینُوں کیہڑی گلّ لئی سدّیا اے؟

³⁰ تَد کُرنِیلِیُس نے آکھیا چار دِن ہوئے نیں پئی مَیں ایس ویلے تِیکر ترِیجے پَہر دی اپنے گھر وِچ دُعا پیا منگدا ساں۔ تے کِیہ ویکھنا آں پئی میرے سامھنے اِک بندہ چمکن والے کپڑے پائے ہوئے کھلوتا ہویا۔

³¹ آکھدا اے۔ اَے کُرنِیلِیُس تیری دُعا سُنی گئی۔ تے تیری خَیرات دی خُدا دی درگاہ وِچ یاد ہوئی۔

³² ایس لئی یافا وِچ کِسے نُوں گھل کے شمعُون نُوں جیہڑا پطرس اکھواؤندا اے۔ اپنے کول سَدّ۔ اوہ شمعُون چمرنگ دے گھر وِچ سمُندر دے کنڈھے اُتّے پَروہنا اے۔

³³ خَیر مَیں اوسے ویلے تیرے کول گھلّیا تے تُوں چَنگا کِیتا پئی آ گیا ایں۔ سو ہُن اسی سبھو خُدا دے اگّے حاضر ہاں۔ پئی جو کُجھ خُداوند ولّوں تینُوں حُکم مِلیا ہوئے سو سُنیے۔

³⁴ تَد پطرس نے مُنھ کھول کے آکھیا۔ سَچ مُچ مَیں جان لیا پئی خُدا کِسے دا لحاظ کرن والا نئیں۔

³⁵ پر ہر قوم وِچ جیہڑا اوہدے توں ڈردا تے نیکی کر دا اے۔ اوہنوں منظُور اے۔

³⁶ اوہ کلام جیہڑا اوس یِسُوع مسِیح دی راہِیں (جیہڑا سبھناں دا خُداوند اے۔) بنی اِسرائیل دے کول صُلح دی خُوشخبری سُنا کے گھلّیا۔

³⁷ اوس گلّ نُوں تُسی جان دے اوہ۔ جیہڑی یُوحنّا دے بپتِسمہ دی منادی دے پِچّھوں گلِیل توں شُروع کر کے سارے یہُودیہ وِچ کھِلّر گئی۔

³⁸ یعنی یِسُوع ناصری دی بابت پئی خُدا نے پاک رُوح تے قُدرت نال اوہنوں کِیویں مسَح کِیتا۔ اوہ تاں بھلیائی کر دا تے ابلیس دے سارے قابُو کِیتیاں ہویاں نُوں چَنگا کر دا پِھریا۔ کیوں جو خُدا اوہدے نال سی۔

³⁹ اسی اوہناں ساریاں کمّاں دے گواہ آں جیہڑے اوس یہُودیہ دے دیس تے یرُوشلِیم وِچ کِیتے۔ اوہنوں اوہناں صلِیب اُتّے ٹنگ کے مار وی سُٹّیا۔

⁴⁰ پر خُدا نے ترِیجے دِہاڑے اوہنوں فیر جوالیا تے اوہنوں ظاہر ہون دِتّا۔

⁴¹ ساری قوم اُتّے نئیں پر اوہناں گواہاں اُتّے جیہڑے اگیترے خُدا دے چُنے ہوئے سن یعنی ساڈے اُتّے جِنہاں اوہدے مُردیاں وِچوں جی اُٹھن دے مگروں اوہدے نال کھادا پِیتا۔

⁴² تے اوس سانُوں حُکم دِتّا پئی لوکاں نُوں منادی کرو۔ تے گواہی دیو پئی ایہہ اوہو اے جیہڑا خُدا ولّوں مُقرّر ہویا پئی جِیوندیاں تے مُردیاں دا انصاف کرن والا ہوئے۔

⁴³ سارے نبی اوہدے اُتّے گواہی دیندے نیں۔ پئی جو کوئی اوہدے اُتّے اِیمان لیاوے۔ اوہدے ناں اُتّے اپنے گُناہاں دی مُعافی پاوے گا۔

غیر قوماں اُتّے رُوحُ القُدس دا اُترنا

⁴⁴ پطرس ایہہ گلّاں اجے پیا آکھدا ای سی پئی کلام دے ساریاں سُنن والیاں اُتّے پاک رُوح اُتریا۔

⁴⁵ تے سُنتی بَیٹھے ہویاں اِیمانداراں وِچوں جِنّے پطرس دے نال آئے سن حَیران ہوگئے۔ پئی غیر قوماں دے وِچ وی پاک رُوح دا اِنعام جاری ہو گیا۔

⁴⁶ کیوں جو اوہ اوہناں نُوں کئی طرح دی بولیاں بولدے تے خُدا دی وڈیائی کر دیاں پئے سُندے سن۔ تَد پطرس آکھیا۔

⁴⁷ کِیہ کوئی بندہ پانی نُوں روک سکدا اے۔ پئی جِنہاں نُوں پاک رُوح مِلیا اے جیویں سانُوں وی مِلیا سی بپتِسمہ نا دِتّا جائے؟

⁴⁸ تَد اوس حُکم دِتّا پئی یِسُوع مسِیح دے ناں اُتّے اوہناں نُوں بپتِسمہ دِتّا جاوے۔ فیر اوہناں اوہدی مِنّت کِیتی پئی کُجھ دِن ساڈے کول رہو۔