۱-کُرِنتھِیوں 1 - پنجابی نواں عہد نامہ نظرثانی شدہ چھپائی

¹ پَولُس ولّوں جیہڑا خُداوند دی مرضی نال یِسُوع مسِیح دا رسُول ہون لئی سدّیا گیا تے بھرا سوستِھینس ولّوں۔

² خُدا دی اوس کلِیسیا نُوں جیہڑی کُرِنتِھس وِچ اے۔ یعنی اوہناں نُوں جیہڑے مسِیح یِسُوع دی راہِیں پاک کِیتے گئے تے پاک لوک ہون دے لئی سَدّے گئے نیں تے اوہناں ساریاں نُوں وی جیہڑے سبھنیں تھائِیں ساڈے تے اپنے خُداوند یِسُوع مسِیح دا ناں لَیندے نیں۔

³ ساڈے باپ خُدا تے خُداوند یِسُوع مسِیح ولّوں تُہانوں فضل تے تسلّی مِلدی رہے۔

مسِیح دے ولّوں برکتاں

⁴ مَیں تُہاڈے لئی خُدا دے اوس فضل دے سببّوں جیہڑا مسِیح یِسُوع دی راہِیں تُہاڈے اُتّے ہویا۔ سدا اپنے خُدا دا شُکر کرنا آں۔

⁵ پئی تُسی اوہدے وِچ ہو کے کلام تے عِلم دی ہر طرح دی دَولت نال دَولتمند ہوگئے اوہ۔

⁶ سو مسِیح دی گواہی تُہاڈے وِچ قیم ہوئی۔

⁷ ایتھوں توڑی پئی تُسی کِسے نِعمت وِچ ہورناں نالوں گھٹ نئیں تے ساڈے خُداوند یِسُوع مسِیح دے ظاہر ہون دی اُڈِیک وِچ اوہ۔

⁸ جیہڑا تُہانوں اوڑک تِیکر قیم وی رکھّے گا۔ تاں جو تُسی ساڈے خُداوند یِسُوع مسِیح دے دِن بے عیب ٹھیرو

⁹ خُدا سَچّا اے۔ جِس تُہانوں اپنے پُتر ساڈے خُداوند یِسُوع مسِیح دی سنگت لئی سدّیا اے۔

کلِیسیا وِچ تفرِقے

¹⁰ ہُن بھراؤ! مَیں یِسُوع مسِیح دا جیہڑا ساڈا خُداوند اے ناں یاد دوا کے تُہاڈے اگّے مِنّت کرنا آں۔ پئی اِکّو جِہی گلّ آکھو تے تُہاڈے وِچ دُوجا پن نا ہوئے۔ سگوں آپو وِچ اِک دِل تے اِک صلاح ہو کے کامِل بنے رہو۔

¹¹ کیوں جو بھراؤ! تُہاڈی بابت مَینُوں خلوئے دے کئیاں توں پتا لگّا۔ پئی تُہاڈے وِچ جھگڑے ہوندے نیں۔

¹² میرا مطلب ایہہ اے پئی تُہاڈے وِچوں کوئی تے اپنے آپ نُوں پَولُس دا آکھدا اے۔ کوئی اُپلّوس دا کوئی کیفا دا۔ کوئی مسِیح دا۔

¹³ کِیہ مسِیح وَنڈیا گیا؟ یا پَولُس تُہاڈے لئی صلِیب دِتّا گیا؟ یا تُساں پَولُس دے ناں اُتّے بپتِسمہ لیا اے؟

¹⁴ مَیں خُدا دا شُکر کرنا آں پئی کرِسپُس تے گَیُس دے بِناں مَیں تُہاڈے وِچوں کِسے نُوں بپتِسمہ نئیں دِتّا۔

¹⁵ متے کوئی ایہہ آکھے پئی تُساں میرے ناں اُتّے بپتِسمہ لیا۔

¹⁶ ہاں ستِفناس دے ٹبّر نُوں وی مَیں بپتِسمہ دِتّا تے اوہناں دے بِناں مَینُوں نئیں پتا۔ پئی مَیں کِسے ہور نُوں بپتِسمہ دِتّا ہوئے۔

¹⁷ کیوں جو مسِیح مَینُوں بپتِسمے لئی نئیں سگوں خُوشخبری سُنان لئی گھلّیا اے تے اوہ وی کلام دی دنائی نال نئیں۔ تاں جو مسِیح دی صلِیب بے اثر نا ہو جائے۔

مسِیح خُدا دی قُدرت تے دنائی

¹⁸ کیوں جو صلِیب دی منادی ناس ہون والیاں واسطے تے مُورکھ اے۔ پر ساڈے نجات لین والیاں واسطے خُدا دی قُدرت اے۔

¹⁹ کیوں جو لِکھیا اے۔ پئی مَیں سیانیاں دی دنائی دا ناس تے عقل والیاں دی عقل نُوں رَدّ کر دیاں گا۔

²⁰ کِتّھوں دا سیانا۔ کِتّھوں دا منشی۔ کِتّھوں دا ایس دُنیا دا بحث کرن والا۔ کِیہ خُدا نے دُنیا دی دنائی نُوں مُورکھ نئیں کِیتا؟

²¹ ایس لئی پئی جد خُدا دی دنائی دے سببّوں دُنیا اپنی دنائی نال خُدا نُوں نا سہاتا۔ تَد خُدا نُوں ایہہ چَنگا لگّا۔ پئی ایس منادی دی مُورکھ دی راہِیں اِیمان لیاؤن والیاں نُوں نجات دیوے۔

²² جیویں یہُودی نِشان منگدے نیں۔ تے یُونانی دانائی دی کھوج کر دے نیں۔

²³ پر اسی اوس صلِیب دِتّے ہوئے مسِیح دی منادی کرنے آں۔ جیہڑا یہُودِیاں لئی ٹھوکر تے غیر قوماں بھانے مُورکھ اے۔

²⁴ پر جیہڑے سَدّے ہوئے نیں یہُودی ہون بھانویں یُونانی۔ اوہناں بھانے مسِیح خُدا دی قُدرت تے خُدا دی حِکمت اے۔

²⁵ کیوں جو خُدا دی مُورکھ بندیاں دی حِکمت نالوں چنگی اے تے خُدا دی کمزوری بندیاں دے زور نالوں زور والی اے۔

²⁶ بھراؤ! اپنے سَدّے جان اُتّے تے دھیان کرو پئی تُہاڈے وِچوں دُنیا دے بتھیرے حکِیم۔ بتھیرے اختیار والے۔ بتھیرے اشراف نئیں سَدّے گئے۔

²⁷ سگوں خُدا نے دُنیا دے مُورکھاں نُوں چُن لیا۔ پئی حکیماں نُوں شرمندیاں کرے۔

²⁸ تے خُدا نے دُنیا دیاں ماڑیاں نُوں چُنیا پئی تگڑیاں نُوں شرمندیاں کرے۔

²⁹ تے کوئی بندہ خُدا دے اگّے فخر نا کرے۔

³⁰ پر تُسی اوہدے ولّوں یِسُوع مسِیح وِچ ہو جیہڑا ساڈے لئی خُدا ولّوں حِکمت ہویا یعنی راستبازی تے پاکیزگی تے مُکتی۔

³¹ تاں جو جیویں لِکھیا اے۔ اوسے طرح ای ہوئے پئی جیہڑا فخر کرے اوہ خُداوند اُتّے فخر کرے۔