Yʉanes 6 - Kálara Zyɛ̌m Edwán é mpʉ̌n

Yesʉs lé edwe bʉr otɔɔyin otɛn mode

¹ Jɔʼ ze laa ba, Yesʉs ze ntaa maŋ mo Galɨle, to é l'ebʉm e maŋ e nkɔm-nkɛɛ. (Bé ejebe maŋ maa nteme ó, maŋ mo Tiberias.)

² Buobuo bʉr, bé a be ó lé edu nye, ebe, bé a be ó lé ebee bɨdweʼle bɨ nkul we nye a sa-sa lé etiʼ mɨsyoblʉ ɨ.

³ Yesʉs ze to bere é l'ecwɨʼ, bé e l'ompʉn be, ze diŋɔ si.

⁴ Paska, ebʉʼ le oYʉden, yé a be ó, yé mu kunokuno le epyal.

⁵ Ngbaa le eka be nɛʼɛ, Yesʉs, nyi syɛm mih, bee ó mpampaʼ bʉr lé eze boo nye. Nye ze dî e Filip ó: «Bɨna bé óbwam ga mode mo edwe bʉr baʼ bɨbɛh nko?»

⁶ (Nye a dî no ó, lé eboblo Filip, ebe, nye a be ó si bɛa gʉa sa nye muno ze sa ɛ.)

⁷ Filip, nye e nye ó: «Zê go agʉa ó, mode mé ójala e bim bʉr yiʼ ɨ, mé etwe mɨsaŋ mɨ odenie mɨnter mɨmba ɛ?»

⁸ Nuu mpʉn we, die Andreas, ncyom mo Simɔn Pyɛr, nye e nye ó:

⁹ «Nuu mancyom, nye ó wâʼ e bɨbler bɨ orge bɨtɛn e l'ofu oba. Bim yaa, yé ógul yé é bim bʉr ba?»

¹⁰ Yesʉs, nye e be ó: «Dilɨ ga bʉr bɨbɛh si.» Yé a be ó e bwaʼbwaʼ jahla, e bwa bɨka é lyoʼ-lyoʼ, ajaa kʉ. Ebe no ó bɨbɛh, bé a di si ɨ. É bʉr baa, bʉrʉm, bé a be ó kwoʼ be otɔɔyin otɛn.

¹¹ Yesʉs ze nʉa bɨbler byaa. É jɔʼ nye a be si dwe Zyɛm ekiba é lɔb bɨbler byaa ɛ, nye ntɔʼ ze kab bʉr bɨbɛh bé a be ondindil ɨ. Nye ze dwe be nteme ofu, bim yiyɛh bé a gwɨm de e.

¹² É jɔʼ bɨbɛh, bé a be si de é de de, díle e, Yesʉs, nye e l'ompʉn be ó: «Syɛŋɨ ga mompubuʼo mode ndɨ si kur si ɨ, é mbi ndɨ ó, sɔʼɔ, yé l'ayi dwè ntuʼ ɨ.»

¹³ Ebe no ó bé a syɛŋ bɨpeh bɨbler byé a buʼo é bɨbler bɨ orge bɨtɛn ɨ. Bibyɛh ze loŋlo bɨkar ewʉm e bɨba!

¹⁴ Ebe no, é jɔʼ bʉr, bé a bee dweʼle nkul Yesʉs a sa ɛ, bé ntɔʼ lɛɔ ó: «E! Mʉr nwa, nye ó bana kʉ be ngwiha mɨlɔb cyecye, waa a jala le eze kaʼ é si nwaʼ ɛ!»

¹⁵ Yesʉs ntɔʼ gʉa ó, bé a be ó lé egwɨm ze mɛr nye, lé eto cyelɔ nye njwɨɨbʉr lal wɔɔ. Nye ze bâʼle dulo nyʉl we, to é l'ecwɨʼ nye ome.

Yesʉs lé ekœʼ é modibe kʉ

¹⁶ É jɔʼ bii kʉʼ, yé a pyal ɨ, ompʉn be, ze to nkpah maŋ.

¹⁷ Bé ze kable é byɛl. Bé mu lé entaa maŋ, lé etoŋɔ nkana Kapernaʉm, é l'ebʉm e maŋ e nkɔm-nkɛɛ nɛʼɛ, edurʉ, lé ze mara be, bé dina teme maŋ! Tina, yé ó, Yesʉs a be ó, nye l'apa kœb be.

¹⁸ Bé ka bee nɛʼɛ, oboʼo o maŋ mu lé emuna, ebe, pubo, wé a be ó lé ekʉ kuulo e nkul.

¹⁹ Bé a be ó, bé osi duʼo, kwoʼ be okilmɨra otɛn, bé ka bee ó, Yesʉs lé eze kunokuno e byɛl, nyɛɛ lé ekœʼ é modibe kʉ! Bé ntɔʼ joʼo bʉa.

²⁰ Nye e be ó: «Yé ó me! Ajoʼo ga bʉa.»

²¹ Ebe no ó bé a mɛʼle lé ekɛl nye é byɛl ɨ. Le nye a kʉ bere ɨ byɛl, le byɛl mu bɛa be syela é pɨn, bé mu é l'ebʉm bé a be lé eto e!

Yesʉs, nye ó mode mo tiʼ

²² É mɛn tɨ, ntuntuma bʉr yé a liʼ é l'ebʉm e maŋ e nkɔm-nkɛɛ ɛ, bɨ ze bee ó, yé a be ó, njɨ byɛl ngwar é l'ebʉm, waa ompʉn mo Yesʉs, bé a to tɨʼ ɨ. Bé a be lé egʉa nteme ó, Yesʉs a baakable é byɛl waa; ompʉn be, bé a kable tɨʼ ó, bé ome.

²³ Mʉʉ mɛl ntɔʼ pyal, duho nkana Tiberias. Mɨ ze pyal kunokuno e gumo bé a de bler pie jɔʼ Da Yesʉs a dwe Zyɛm ekiba ɛ.

²⁴ É jɔʼ ntuntuma bʉr, yé a bee ó, taare é Yesʉs, to pyal é l'ompʉn bɨbɛh, bé aka be tɨʼ ɨ, bé ze kable é mɛl maa, ze toŋɔ Kapernaʉm, to le esaŋɔ nye gʉ,

²⁵ ze kœbɔ Yesʉs é l'ebʉm e maŋ laa. Bé e nye ó: «Yeʼle, go ka ze kaʼ é yáa jɔʼ?»

²⁶ Nye ze bɨha e be ó: «Me elɛɛ bɨn cyecye ó nɛɛ: bɨn bé esaa me ó, ebe, bɨn bé a si de bler, díle. Bɨn bé asaa me ebe bɨdweʼle bɨ nkul wam bɨn bé a bee e.

²⁷ Asea ga ebe mode lé elɨra ɛ. Sea ga ebe maa lé edi njʉmdia e njʉmdia ɛ. Mɛɛ, mé ó maa Mwan mo Mʉr ódwe bɨn ɨ, ebe, nye ó waa Zyɛm Sɔŋ a gba ejwɨʼ le e.»

²⁸ Bé ze dî e nye ó: «A bɨh saʼ nyá, ó bɨh loŋla mɨmpaŋ bɨsyɛɛla Zyɛm lé egwɨm ɨ?»

²⁹ Yesʉs, nye e be ó: «Mpaŋ syɛɛla Zyɛm lé egwɨm e bɨn ɨ, yé ó, bɨn jyɛʼɛ taa buʼo yin boo mʉr nye a ntɨh bɨn ɨ.»

³⁰ Bé e nye ó: «Yé be no nɛʼɛ, yáa dweʼle nkul go ndɨ si pa lɛʼle bɨh, ó bɨh beŋɨ, bɨh nkʉʼ jyɛʼ taa buʼo yih boo go ɛ? Yé go ndɨ si pa sa ɛ?

³¹ Bɨmpam ga bina, byé a si de manne é feha si. Yé ó tila é Kalara Zyɛm ó: “Nye a si dwe be mode, bler yé a duho é jobo kʉ ɨ.”»

³² Yesʉs, nye e be ó: «Me elɛɛ bɨn cyecye ó nɛɛ: ntʉʼ Moyiz a dwe bɨn mpaŋ mode mé a duho é jobo kʉ ɨ. Sɔŋ wam ó lé entɨh mpaŋ mode lé eduho é jobo kʉ ɨ,

³³ ebe, mode Zyɛm lé entɨh ɨ, mé ó mʉr a duho é jobo kʉ, ze é si nwaʼ ɛ. Nye ó mʉr lé etiʼ bʉr bɨbɛh ɛ.»

³⁴ Bé e nye ó: «Da, yé be no nɛʼɛ, dɨʼe dwe bɨh mode maa molu mɨmɛh!»

³⁵ Yesʉs, nye e be ó: «Me ó ndɨ mode lé etiʼ bʉr ɨ. Mʉr nyiwɛh lé eze boo me e, nye abe e nkul eka joʼo za. Mʉr nyiwɛh lé ejyɛʼ taa buʼo ye boo me e, nye abe e nkul eka joʼo dweh modibe.

³⁶ Me a si lɛɛ e bɨn ó, bɨn bɨ bee me. Bɨn bɛɛ bé ajyɛʼ taa buʼo yin boo me.

³⁷ Mʉr nyiwɛh Sɔŋ wam lé elomlo me e, nye óze boo me. Ndwe nteme, me abe e nkul ekubra waa nyiwɛh lé eze boo me e.

³⁸ Me a baaduho é jobo kʉ, lé eze sa gwɨma yam, njɨ gwɨma mo mʉr a ntɨh me e.

³⁹ To kœb ó, mʉr a ntɨh me e, nye egwɨm ó, me l'ayi dimle mʉr ngwar é sama bʉr nye a ntɨh me e. Nye egwɨm ó, me pɛ̀hɛ be é mofoo é moho epihe, ntible-bɨkaŋa,

⁴⁰ ebe, Sɔŋ wam, nye egwɨm ó, bʉr bɨbɛh bé óbee Mwan mo Zyɛm, jyɛʼ taa buʼo yɔɔ boo nye e, bé biʼe tiʼ molu mo mpoʼ mɨmɛh. Mɛm, me ópɛ̀h be é mofoo é moho epihe, ntible-bɨkaŋa.»

⁴¹ OYʉden ze taare lé etʉʼra é lʉ mo Yesʉs, ebe, nye a lɛɛ ó, nye ó ndɨ mode, maa mé a duho é jobo kʉ ɨ.

⁴² Bé ntɔʼ dîila ó: «Ntʉʼ Yesʉs, mwan mo Yoseb nwaʼ ɛ? Bɨna bé ekʉ gʉa ga sɔŋ we bé e nyɔŋ we. Wáa mbi nye lé elɛɛ e bɨna ga bananaʼ ó, nye a duho ó kʉ ɨ?»

⁴³ Yesʉs ze bɨha e be ó: «Daʼ to le etʉʼra ga paʼra win.

⁴⁴ ǃƗ Sɔŋ wam, mʉr a lomo me e, si bene lé edulo mʉr nɛʼɛ, mʉr waa l'aze boo me. To kœb ó, waa ódulɔ ɛ, me ópɛ̀h nye é foo é moho epihe, ntible-bɨkaŋa.

⁴⁵ Ogwiha o mɨlɔb, bé a tile é Kalara Zyɛm ó: “Zyɛm ó ngo yeʼle bɨbɛh.” Me elɛɛ ó, mʉr nyiwɛh ójoʼo Zyɛm Sɔŋ, le ejwɨʼ sikʉlʉ nye lé edwe e, nye óze boo me.

⁴⁶ Yé alɛʼle ó, nuu mʉr a be ó si bee Zyɛm Sɔŋ. Njɨ waa ndɨ waa mo Zyɛm ɨ, ó b'a bee Zyɛm Sɔŋ.

⁴⁷ Me elɛɛ bɨn cyecye ó nɛɛ: mʉr lé ejyɛʼ taa buʼo ye boo me e, nyi bi tiʼ molu mo mpoʼ mɨmɛh.

⁴⁸ Mɛm ó ndɨ mode mo tiʼ!

⁴⁹ Bɨmpam bin, bʉr o b'a de manne é feha si ɨ, bɨbɛh, bé a si sie lé edwè é feha si waa tʉŋlʉ.

⁵⁰ Sa gwar, mode lé eduho é jobo kʉ ɨ, mɛɛ, mé ó mbi monyɔmlʉ ndɨ: ǃɨ mʉr si de me nɛʼɛ, nye ákwoʼ ka dwè.

⁵¹ Me ó ndɨ kublakubla mode, maa mé a duho é jobo kʉ, ze kaʼ é si nwaʼ ɛ. ǃƗ mʉr si de mode maa nɛʼɛ, gʉŋa ó, nyi bi tiʼ molu mo mpoʼ mɨmɛh. Mode me ódwe nye e, mé ó bɨpuno byam! Me edwe bʉr bɨbɛh bya ó, é l'efu ó, bé biʼe tiʼ molu mo mpoʼ mɨmɛh.»

⁵² É jɔʼ oYʉden bé a joʼo no e, kʉ ze taarɔ lé etʉʼra paʼra wɔɔ. Bé ó: «Mʉr nwa, nye e nkul edwe bɨna ga bɨpuno bye ó, bɨna deʼ ga bye nyá ɛ?»

⁵³ Yesʉs, nye e be ó: «Me elɛɛ bɨn cyecye ó nɛɛ: ǃɨ mʉr baade bɨpuno bɨ Mwan mo Mʉr le ebɛble motié me nɛʼɛ, gʉŋa ó, nyiha mʉr, nyi fib tiʼ molu mo mpoʼ mɨmɛh.

⁵⁴ Mʉr nyiwɛh lé ede bɨpuno byam le ebɛble motié mam ɨ, nye ó ndɨ ebi tiʼ molu mo mpoʼ mɨmɛh. Me ópɛ̀h nye é foo é moho epihe, ntible-bɨkaŋa,

⁵⁵ ebe, bɨpuno byam, byé ó mpaŋ nyɔmlʉ; motié mam, mé ó mpaŋ monyʉla.

⁵⁶ Mʉr nyiwɛh lé ede bɨpuno byam le ebɛble motié mam ɨ, nye etiʼe ó, é zyɛŋa wina boo nɔɔ. Me ódɨ kœʼ e nye.

⁵⁷ Sɔŋ wam, mʉr a ntɨh me e, nye ó ndɨ kublakubla. Me etiʼe ó ebe nye. Jwɨʼ gwar yaa, mʉr nyiwɛh lé ede me e, nye ó ndɨ ebi tiʼ molu mo mpoʼ mɨmɛh é zi wam.

⁵⁸ Mode ma, mé ó mode mé a duho é jobo kʉ ɨ. Mé anwɨɨla e maa bɨmpam bin, byé a de, bibyɛh sie lé edwè e. Mʉr nyiwɛh óde mode maʼ ɛ, nyi bi tiʼ molu mo mpoʼ mɨmɛh.»

⁵⁹ Yesʉs a dwe be sikʉlʉ é lɔb nɨ ó, é mpah mɨnjwɨʼla tʉŋlʉ, waa nkana Kapernaʉm.

⁶⁰ É jɔʼ ompʉn be, bé a joʼo sikʉlʉ Yesʉs a dwe be e, buobuo ompʉn be, bé ze lɛɛla paʼra wɔɔ ó: «É ka bul kɔbla yɛɛ sikʉlʉ yiʼ lé ejoʼo. Zé nyɛɛ ndɨ e nkul ejoʼo ye ɛ?»

⁶¹ Mpʉ Yesʉs a gʉa ó, ompʉn be, bé a be ó lé eto le etʉʼra paʼra wɔɔ é lʉ we e, nye ze dî e be ó: «Zê sikʉlʉ me dwe bɨn nɨ, yé ó bɨn ebɔʼ é mɨleme?

⁶² A yé óka sa bɨn nyá é jɔʼ bɨn bé óbee Mwan mo Mʉr lé ebula, fiʼ, to nko nye a taare be e?

⁶³ Mbɨambɨa Sisim ó ndɨ edwe bʉr tiʼ molu mo mpoʼ mɨmɛh. Mʉr ákwoʼ dira nyɔm e bɨsyɛɛla bɨ nyʉl bɨpuno. Bɨlwib me lé elwib e bɨn bi, byé eduho ó boo Mbɨambɨa Sisim. Byé nteme, byé ó lé edwe bɨn tiʼ molu mo mpoʼ mɨmɛh.

⁶⁴ Sa gwar, bʉʉ bʉr o sama yin, bé ajyɛʼ taa buʼo yɔɔ boo me.» (Yesʉs a lɛɛ no ó, ebe, nye a be ó lé ebɛa gʉa, duho é l'etɔɔrʉ, baa b'a baajyɛʼ taa buʼo yɔɔ boo nye e, ndwe e waa a be ó, nye ókɛha nye e.)

⁶⁵ Nye ntɔʼ bâʼle lɛɛ e be ó: «Ebe no, me elɛɛ e bɨn ó nɛɛ: mʉr, nye abe e nkul eze boo me, nyɛɛ l'apa bi nkul boo Sɔŋ wam.»

⁶⁶ Dobo laa ó buobuo ompʉn be, bé a taare lé ebula é gœʼra-gœʼra e mocyɛʼ mo nyʉl, aka duŋɔ nye e.

⁶⁷ Yesʉs ze dî e l'Esama le ompʉn ewʉm e l'oba ó: «Zê bɨn bɛɛ nteme muno ze bula pihe ɛ?»

⁶⁸ Simɔn Pyɛr, nye e nye ó: «Da, bɨh bé óka to boo zé fih? Go ó ndɨ e motɨɨ lé edwe bɨh tiʼ molu mo mpoʼ mɨmɛh ɛ.

⁶⁹ Banana, bɨh bɨ buʼla le egʉa é kpɛhla ó, go ó ndɨ Mʉr mo Zyɛm ndɨ ti ɨ!»

⁷⁰ Yesʉs, nye e be ó: «Ntʉʼ mɛm mʉr tɨʼ a pɛh bɨn, Esama le ompʉn ewʉm e l'oba ɛ? Dam be no, nuu mʉr é l'esama lɨn, nye ó waa mo Njwɨɨ moleme!»

⁷¹ Nye a lwib no ó, tiibe e Yʉdas, mwan mo Simɔn Iskariot. Dam be mpʉ Yʉdas a be é l'Esama le ompʉn ewʉm e l'oba ɛ, nye ó b'a be nteme mʉr a be ó, nye ókɛha nye e.