Yʉanes 17 - Kálara Zyɛ̌m Edwán é mpʉ̌n

Yesʉs lé ejwɨʼla é l'efu le ompʉn be

¹ É jɔʼ Yesʉs a sil lwib no e, nye ze bɨn mih kʉ. Nye ó: «Da, ewala, lɨ pyal! Lɛʼla bʉr kum mo Mwan go, é mbi ndɨ ó, nye lɛʼla nteme bʉr kum go,

² ebe, go a si dwe nye nkul ejwɨʼ bʉr bɨbɛh. Nye e nkul edwe bʉr o go a ntɨh nye e, tiʼ molu mo mpoʼ mɨmɛh.

³ Tiʼ molu mo mpoʼ mɨmɛh, yé ó, bé gʉŋa go, ó go ó ndɨ mpaŋ Zyɛm ndɨ ngwar e ngwar ɨ. Bé gʉŋa nteme Yesʉs, mɛm, mʉr go a lœm mulo, waa go a ntɨh kaʼ ɛ.

⁴ Me a si lɛʼle bʉr kum go é si nwa. Mɨ fwahle syɛɛ go a dwe me ó, me ntaʼ, ze sea ɛ.

⁵ No ó, Da! Banana, dweʼ me kum mpʉ waa me a be e nye go ye, é jɔʼ kʉ e si, byé a baapa cyeŋɔ ɛ.

⁶ «É bʉr bɨbɛh, go a si pɛh bʉʉ, ze ntɨh me ba. Me ntɔʼ ze sa ó, bé gʉŋa go. Bé a bɛa be ó, bʉr bo, go ze ntɨh me ba. Ebe no nteme ó bé a du lwib yo e.

⁷ Bé mu ó si ka gʉa é bananaʼ ó, sa yiyɛh go a dwe me e, yé a duho ó go ye,

⁸ ebe, lwib go a lwib e me e, mɨ ntɛŋ be ya. Bé nteme, bɨ nʉa ye e duu. Bé a si kʉ gʉa cyecye ó, me a duho ó go ye. Bé nteme, bɨ kʉ buʼla ó, go ó b'a lomo me.

⁹ «Me ejwɨʼla e go é l'efu lɔɔ. Me ajwɨʼla é l'efu e bʉr o ndɨ egumo e si nwaʼ ɛ, njɨ é l'efu e bʉr go a ntɨh me e, ebe, bɨha, bé ó bo.

¹⁰ Sa yiyɛh me ndɨ e ye e, yé ó yo. Yaa yiyɛh go ndɨ e ye e, yé ó yam. Me e kum ó, ebe bʉr bam baa.

¹¹ «Me aka be kaʼ é si nwa. Bɛɛ ó dina é nye. Me mu ó lé eze nko go ndɨ ɨ. Sɔŋ wam, go ó ndɨ ti. Baʼla bʉr baa é nkul die lo go a dwe me e. Saʼ ó, bé diʼe sa gwar mpʉ bɨna e go ndɨ sa gwar ɨ.

¹² É jɔʼ bɨh e boo nɔɔ, bé a be-be e, me a dɨ baʼle be ó, é nkul die lo go a dwe me e. Me a si kʉ kamle e be! Abe e mʉr ngwar a dim é l'esama lɔɔ, alaa ó waa a bɛa be ó, nye lé ejala le edim ɨ. Yé a syɛɛlɨ no ó, lé edira lɔɔ ndɨ tila é Kalara Zyɛm ɨ.

¹³ «No ó, é jɔʼ yi, me muno ze bula, ze nko go ndɨ ɨ. Cye yiyɛh me dina kaʼ é si nwaʼ ɛ, me ejwɨʼla-jwɨʼla e go ó, ompʉn bam biʼe bɨsʉhʉ mpʉ me lé esoho e. Bɨsʉhʉ byɔɔ, byé óbe ó ntinɨ e ntinɨ.

¹⁴ Me a si ntɛŋ ompʉn bam lwib yo. Bʉr o si nwa, bé ze nwim be, ebe, ompʉn bam baa, bé aka be é nkɔb wɔɔ, mpʉ mɛm mʉr tɨʼ ndɨ abe é nkɔb wɔɔ ɛ.

¹⁵ Me ajwɨʼla ó, go pɛʼɛ be é si nwa. Me ekʉ ka jwɨʼla ó njɨ go kamla e be é nko paʼ mo Bɨbla-mʉr.

¹⁶ Bé aduho é si nwa, mpʉ mɛm nteme ndɨ aduho tɨʼ ɨ.

¹⁷ Saʼ ó, bé diʼe mɨsaŋ mɨ bʉr bo é l'ocyecye. Lwib yo, yé ó cyecye.

¹⁸ Mɨ lomo be é si nwaʼ mpʉ go nteme a ntɨh me kaʼ é si nwaʼ ɛ.

¹⁹ Me etimle go tiʼ yam yiyɛh ó, bé nkʉʼ be mɨsaŋ mɨ bʉr bo, é l'ocyecye tʉŋlʉ.

²⁰ «Me ajwɨʼla é l'efu lɔɔ, bé ome. Me ejwɨʼla nteme ó, é lɔb baa bé ójyɛʼ taa buʼo yɔɔ boo me ebe lɔɔ wɔɔ ɛ.

²¹ Da, me ejwɨʼla e go ó, bɨbɛh, bé diʼe sa gwar. Bé diʼe é zyɛŋa wina, mpʉ go ndɨ ɨ me, mɛm ɨ go e. No ó bʉr bɨbɛh, bé óka buʼla ó, go ó b'a lomo me e.

²² «É mpʉ bɨna di sa gwar ɨ, kum go a dwe me e, nye ó, ebe zyɛŋa waa. Ebe no, mɨ dwe be kum mpwar waa ó, bé diʼe sa gwar.

²³ Mɛm ɨ be; gwɔɔ ɨ me: no ó bé ódi njɨ sa gwar é mɨpaʼ mimyɛh ɛ. No nteme ó bʉr bɨbɛh, bé ógʉa é kpɛhla ó, go ó b'a lomo me e. Bé ógʉa nteme ó, go ekpɛl be mpʉ go lé ekpɛl me e.

²⁴ «Da, go a be ó si dwe me ba. Me ekpɛl ó, bé diʼe gumo me ódi ɨ. Bé óbee me é dia moncɛnba mam, dia go a bɛa dwe me ebe kpɛl yo, taare é jɔʼ kʉ e si, byé a baapa cyeŋɔ ɛ.

²⁵ Sɔŋ Ocɨcyel, bʉr o ndɨ egumo e si nwaʼ ɛ, bé agʉa go. Me ome ó lé egʉa go. Bʉr ba, bé mu si gʉa mbɨmbɨa ó, go ó b'a lomo me.

²⁶ Me a si lɛʼle be mpʉ go ndɨ ɨ. Me nteme óbâʼle lɛʼle be. Ebe no, kpɛl go lé ekpɛl me e, yé óntaa é be, ebe, me mʉr tɨ, me óbe ó é be.»