Yʉanes 16 - Kálara Zyɛ̌m Edwán é mpʉ̌n

¹ «Me si lwib e bɨn é mbi nɨ ó, lé esa ó, bɨn l'ayi bɨm ebɔʼ é mɨleme, laa lé ódumo bɨn ɨ.

² Bɨn bé ócyelɔ é pɨŋ, aka mɛʼlɔ é mompah mɨnjwɨʼla. Ewala, lé ópyal nteme, jɔʼ bʉr, bé ójʉ bɨn ɨ, bé ókʉ toŋlo ó, bé esa Zyɛm mɨmpaŋ bɨsyɛɛla é zi ejwɨɨ e bʉr laa.

³ Bé ódɨ sa no ó, ebe, bé a baagʉa, dam be Sɔŋ wam, dam be me.

⁴ Mɨ bal bɨn ó nɨ, ebe, é jɔʼ ewala laa, lé óbe si pyal ɨ, bɨn nkʉʼ toŋlo ó: “Eee, yé ó bana kʉ be sa nye a bɛa lɛɛ bɨna ga ɛ!”» «Me a baataare lɛɛ bɨn lɔb nɨ ó, ebe, bɨna ga ó b'a be.

Syɛɛ Mbɨambɨa Sisim lé esea ɛ

⁵ Banana, me muno ze bere nko mʉr a ntɨh me e, ndɨ ɨ. Dam be no, mʉr é l'esama lɨn, nye adî e me ó: “Go lé eto nko?”

⁶ Dam be no, bɨn bɨ joʼo mompime ebe lwib me lwib e bɨn ɨ.

⁷ Me elɛɛ bɨn cyecye ó nɛɛ: embɨa, lé é nko paʼ win ó, me toʼ. ǃMe baato nɛʼɛ, mʉr ndɨ ekamle e bɨn ɨ, nye aŋa ze kœb bɨn. ǃMe si ka to nɛʼɛ, me ntɨh bɨn nya.

⁸ É jɔʼ nye ópyal ɨ, nye ódwe bʉr bɨbɛh mobe bé ndɨ e me ebe syem wɔɔ ɛ. Nye ólɛʼle be nteme ó, bé agʉa mbɛʼ paʼra sa ndɨ ocɨcyel ɨ, le yaa ndɨ ozyɛhozyɛh ɛ. Nye ólɛʼle be nteme ó, mpʉ Zyɛm ódwe bʉr mobe e.

⁹ Nye ólɛʼle bʉr syɛɛla ndɨ syem ɨ. Syɛɛla yaa, yé ó, bé ajyɛʼ taa buʼo yɔɔ boo me.

¹⁰ Nye ólɛʼle be sa ndɨ ocɨcyel ɨ, ebe, me ebula ó, to nko Sɔŋ wam ndɨ ɨ. Bɨn bé aŋa ka bee me.

¹¹ Nye ólɛʼle be mpʉ Zyɛm lé edwe bʉr mobe e, ebe, nyi bɛa dwe Njwɨɨ mbi jɔʼ yiʼ mobe.

¹² «Me dina ó, é buo bɨsa bɨ elɛɛ bɨn. Sa gwar, bɨn bé apa be e nkul ejoʼo bye é banana.

¹³ É jɔʼ Sisim Ocyecye, wé ópyal é bɨn ɨ, wé ólɛʼle bɨn ocyecye wiwɛh. Wé aŋa lwib njɨ e nkul we. Wé ólɛɛ sa wé a pa joʼo e. Wé nteme, wé ólɛɛ bɨn sa muno ze syɛɛlɨ ɨ.

¹⁴ Wé ódwe me kum, ebe, wé ólɛɛ bɨn mɨlɔb lé etiibe e me e.

¹⁵ Sa yiyɛh Sɔŋ wam ndɨ e ye e, yé ó sa yam. Ebe no, me a lɛɛ e bɨn ó nɛɛ: Mbɨambɨa Sisim ólɛɛ bɨn mɨlɔb lé etiibe e me e.»

Empime lɨn, lé ólihba bɨsʉhʉ.

¹⁶ «Yi liʼ njɨ ba ma jɔʼ, bɨn bé aŋa ka bee me. Yé óbâʼle lɛŋ ma jɔʼ, bɨn bé òbula bee me.»

¹⁷ Bʉʉ ompʉn ze taare lé edîila motia paʼra wɔɔ. Bé ó: «No yɛɛ, yé epa kʉ lɛɛ é yé? Ó “Yi liʼ njɨ ba ma jɔʼ, bɨn bé aŋa ka bee me. Yé óbâʼle lɛŋ ma jɔʼ, bɨn bé óbula bee me.” Nye ekpɛl lɛɛ yé é jɔʼ nye lé elɛɛ ó: “Yé ó, ebe, me ebula, to nko Sɔŋ wam ndɨ ɨ”?»

¹⁸ Bé ze lɛɛla nteme ó: «Ekan e “ma jɔʼ” lɨnɨ, lé elɛɛ é yé? Bɨna bé aka gum joʼo ga sa tuʼ nye lé elɛɛ ɛ!»

¹⁹ Yesʉs ntɔʼ gʉa ó, bé a be ó lé egwɨm dî nye motia. Nye ó: «Me si gwih bɨn ó, yi liʼ ba ma jɔʼ, bɨn bé aŋa ka bee me. Yé óbâʼle lɛŋ nuu ma jɔʼ, bɨn bé òbula bee me. Zê é lɔb waa ó bɨn lé edîila motia paʼra win ɛ?

²⁰ Me elɛɛ bɨn cyecye ó nɛɛ: bɨn bé óbʉ modwe, bʉr o ndɨ egumo e si nwaʼ ɛ, bɛɛ lé esʉna. Bɨn bé óbil myoo. Sa gwar, myoo win waa, wé ólihba ó bɨsʉhʉ.

²¹ «É jɔʼ mʉma mu lé eze bya mwan ɨ, leme, wé e l'empime, ebe, jɔʼ min, yi pyal nye. É jɔʼ mwan waa óbe si byɛl ɨ, nyɔŋ, nye ejɨha mokpaa me, ebe, nye mu ó lé esoho edwan e mʉr lwanbe byɛl é si nwaʼ ɛ.

²² Jwɨʼ gwar e gwar yaa, banana, bɨn bɨ joʼo mompime ebe mpɔʼa ga wina. To kœb ó, me óbâʼle bee bɨn. Bɨn bé òjoʼo bɨsʉhʉ. Abe e mʉr óka pɛʼ bɨn bya é mɨleme.

²³ «É jɔʼ moho waa, wé ópyal ɨ, bɨn bé aŋa ka dî me yʉʉ sɔʼɔ. Me elɛɛ bɨn cyecye ó nɛɛ: Sɔŋ wam ódwe bɨn sa yiyɛh bɨn bé ódî le ejaʼ nye, pere e die lam ɨ.

²⁴ Ze pyal é banana, bɨn bé apa dî le ejaʼ Sɔŋ wam sɔʼɔ, pere e die lam. Jaʼa ga, bɨn nkʉʼ bi. Bɨsʉhʉ bin, byé nkʉʼ di ntinɨ e ntinɨ.»

Yesʉs, nyi ntaa bebebebe si nwaʼ é nkul

²⁵ «Me be lé elɛɛ bɨn bɨsa bɨnɨ bibyɛh é mokan bɨntuntu. Ewala, lé ópyal, jɔʼ me óbe, aka lwib e bɨn no e. Me óka lwib-lwib e bɨn, tiibe e Sɔŋ wam ó, anyam nʉm!

²⁶ É jɔʼ moho waa, wé óbe si pyal ɨ, bɨn bé ódî le ejaʼ Sɔŋ wam, pere e die lam. No ó, me alɛɛ ó, me nteme ódî nye bya é l'efu lɨn,

²⁷ ebe, Sɔŋ wam nye mʉr tɨ, nye ekpɛl bɨn. Nye ekpɛl bɨn ó, ebe, bɨn bɨ kpɛl me. Bɨn bɨ buʼla nteme ó, me a duho ó nye ye.

²⁸ Me a si kʉ duho nye ye, ze pyal kaʼ é si nwa. Me óbula mʉa, liʼe si nwa, bere nko Sɔŋ wam ndɨ ɨ.»

²⁹ Ompʉn be, bé e nye ó: «A dwɛʼa ba: gɨ lwib banana, pɛʼle mokan, abe mokan bɨntuntu!

³⁰ Banana, bɨh bɨ gʉa ó, gɨ gʉa sa yiyɛh, ndwe nteme, yé ajɨ ó, mʉr dîʼe go tia. Ebe no ó bɨh lé ebuʼla ó, go a kʉ duho ó boo Zyɛm ɨ.»

³¹ Yesʉs ze lɛɛ e be ó: «Bɨn bɨ ka buʼla lɔɔ wam!

³² Dwɛʼa ga: ewala, lé eze—lé mu ó si pyal—jɔʼ bɨn bé ómyɛma, mʉr nyiwɛh lé eto fol nyʉl é mbɛr we e. Bɨn bé óliʼe me me ome. Me ákwoʼ be yɛɛ me ome, ebe, bɨh e Sɔŋ wam ó ndɨ.

³³ Me elɛɛ bɨn mɨlɔb mɨnɨ ó, bɨn nkʉʼ di é zyɛŋa ga wina, bɨn nkʉʼ di é motala. Bɨn bé ósia e mɨtuu lé edi é bebebebe si nwa. Dam be no, tʉmɨ ga monyʉl. Mɛm, mɨ ntaa nye é nkul!»