Yʉanes 11 - Kálara Zyɛ̌m Edwán é mpʉ̌n

Efie mo Lazar

¹ Nuu mʉr a be ó, die Lazar. Nye a be ó lé esyɛb. Nye a be ó mʉr Betani, kwar mo Maaria bé e tʉl we Marta.

² (Maaria waa ó ngo lœm mokʉ mo Da Yesʉs labina, pim me e mpuo lʉ we e.) No ó, mpʉ ntʉm we Lazar, a be lé esyɛb ɨ,

³ bʉba oba onɨ ze lomɔ mʉr ó, nye toʼ, to lɛɛ Yesʉs ó: «Da, fo go, nye ekʉ syɛb!»

⁴ É jɔʼ Yesʉs a joʼo mpaŋla waa ɛ, nye ó: «Esyɛb mo Lazar, lé ákwoʼ jʉ nye. Lé ókʉ ka sa ó njɨ bʉr dwiiba Zyɛm bé e Mwan we.»

⁵ Yesʉs a be ó lé ekpɛl Marta bé e ncyom we, ndwe e ntʉm wɔɔ Lazar.

⁶ É jɔʼ nye a sil joʼo mpaŋla é lɔb esyɛb laa ɛ, nye ze bâʼle lɛŋ molu moba gumo nye a be e.

⁷ Pie tɨ, nye ze lɛɛ e l'ompʉn be ó: «Bɨna fiʼɨ ga, to Yʉda!»

⁸ Ompʉn be, bé e nye ó: «Yeʼle, yé ó, apa bɛa, oYʉden, bé a be ó lé ejwɨʼla saa elumo go mokoʼ. Zê go lé egwɨm bâʼle to gʉʼ ɛ?»

⁹ Yesʉs, nye e be ó: «Zê moho, wé abe e mowala ewʉm e moba ɛ? ǃƗ mʉr si kœʼ é moho nɛʼɛ, nye abe e nkul ebɨm ebɔʼ, ntɔʼ duma, ebe, nye e myɛn lé epan é si nwaʼ ɛ. Nye nteme, nye egʉa bee.

¹⁰ Sa gwar, ǃɨ mʉr si ntime é l'edurʉ nɛʼɛ, nye óto le ebɨm mobɔʼ, ebe, nye ankɛɛ sa lé epɛn myɛn ɨ, é nye mʉr tɨ.»

¹¹ É jɔʼ nye a sil lɛɛ mokan maa ɛ, nye e be ó: «Fo ga wina Lazar, nye mu ó é dwo. Me to ó, to jɨm nye.»

¹² Ompʉn, bé e nye ó: «Da! Yé be ó, nye mu ó é dwo nɛʼɛ, gʉŋa ó, nyi tiʼe!»

¹³ (Sa gwar, Yesʉs a be ó lé egwɨm lɛɛ ó, Lazar, nyi dwè. No ó, ompʉn bɛɛ, bé a jwɨʼ ó, yé a be ó mpaŋ dwo ó nye a ja ɛ.)

¹⁴ Yesʉs ka ze lwib e be, é kpɛŋlɛm. Nye e be ó: «Lazar, nyi dwè.

¹⁵ Me ekʉ soho e bɨn, ebe, bɨna bé a baabe ga gʉ. Ebe no ó bɨn bé ógʉa jyɛʼ taa buʼo yin boo me e. Ncʉʼ ga, bɨna to ga nko nye ndɨ ɨ.»

¹⁶ No ó, Tomas bé lé ejebe ó, Egbah ɛ, a ze lɛɛ e bʉʉ ompʉn ó: «Ncʉʼ ga. Bɨna ga e boo nɔɔ to dwè ga gumo gwar!»

Yesʉs ó lé epɛ̀h bʉr é mofoo

¹⁷ No ó Yesʉs a ze pyal, é jɔʼ yaa, Lazar, nye osi debe e molu monâ.

¹⁸ Betani, yé ó kunokuno e Yerʉsalɛm, kwoʼ be okilmɨra olɛl.

¹⁹ Buobuo oYʉden, bé a be ó si ze, lé eze dwaŋle Marta bé e Maaria, mɨleme é l'efie e ntʉm wɔɔ.

²⁰ É jɔʼ Marta a joʼo lɔɔ ó, Yesʉs, nye eze ɛ, nye ntɔʼ to bɔma e nye, Maaria nyɛɛ liʼ mbɛr.

²¹ Marta, nye e Yesʉs ó: «Da, nkʉ go a be ó be, be wâʼ nɛʼɛ, mpa ntʉm wam a baadwè.

²² Sa gwar, me egʉa ó, dam be é banana, Zyɛm ódwe go sa yiyɛh go ódî nye e.»

²³ Yesʉs, nye e nye ó: «Ntʉm go ópàh.»

²⁴ Marta, nye e nye ó: «Me ekʉ gʉa ó, nye ópàh é foo é jɔʼ odwè, bé ópàh é moho epihe, ntible-bɨkaŋa.»

²⁵ Yesʉs, nye e nye ó: «Me ó waa lé epɛ̀h bʉr é mofoo, dwe be tiʼ molu mo mpoʼ mɨmɛh ɛ. Mʉr lé ejyɛʼ taa buʼo ye boo me e, nye dam dwè, nye óbâʼle tiʼe.

²⁶ Nteme, waa nyiwɛh lé etiʼe é zi wam le ejyɛʼ taa buʼo ye boo me e, nye ákwoʼ dwè. Zê go lé ebuʼla no ɛ?»

²⁷ Nye e nye ó: «Da, me ekʉ gʉa no. Mɨ buʼla ó, go ó ndɨ Lœma mulo mo Zyɛm le Mwan mo Zyɛm, mʉr a be ó, nye óze kaʼ é si nwaʼ ɛ.»

Yesʉs lé ejɨ

²⁸ É jɔʼ bé a sil lwib no e, Marta ze to jebe ncyom we Maaria. Nye e nye é l'efo ó: «Yeʼle be ó si pyal! Nye ejebe go!»

²⁹ É jɔʼ Maaria a joʼo no e, nye ze mʉa si é bʉ, ze to nko Yesʉs a be e.

³⁰ Yesʉs a baapa pyal é l'odumo o kwar. Nye a be ó gumo Marta a to bɔma e nye e.

³¹ Naa yé ó, Yʉden, bé a be ó si pyal boo Maaria, lé eze dwaŋle nye leme é l'efie e ntʉm. É jɔʼ bé a bee Maaria lé emʉa si, pyal kʉl kam e kam ɨ, bé ze du nye. Bé a jwɨʼ ó, nye eto ó nko foo, to jɨ gʉ.

³² É jɔʼ Maaria a to pyal nko Yesʉs a be e, nye ze bɨʼ mpom we si é mih mo Yesʉs. Nye e nye ó: «Da, nkʉ go a be ó be, be wâʼ nɛʼɛ, mpa ntʉm wam a baadwè.»

³³ É jɔʼ Yesʉs a dwɛʼ, bee nye lé ejɨ, bé e l'oYʉden, bé a du nye e, sisim we kʉ ze pɨʼba.

³⁴ Yesʉs ze dî ó: «Bɨn bé a dɨl muu we nko?» Bé e nye ó: «Da, ntaʼ, ze bee.»

³⁵ Yesʉs ntɔʼ jɨ.

³⁶ OYʉden, bé ó: «Mbe ga: nye a si bul kpɛl nye!»

³⁷ Bʉʉ bʉr o sama yɔɔ, bé ó: «Heeeʼ! Mʉr a bɛɛ ntim mih nwa, zê nye a baabe e nkul eka sa ó, Lazar beʼ l'adwè ɛ?»

Yesʉs lé epɛ̀h Lazar é foo

³⁸ Sisim mo Yesʉs kʉ ze bâʼle pɨʼba é nye mʉr tɨ. Nye ze to nko foo. Foo waa a be ó bah ekoʼ. Bé a dible nʉm foo ó e l'ekoʼ.

³⁹ Yesʉs, nye e be ó: «Pɛʼɛ ga ekoʼ.» Marta, kɛl mo ndwè, nye e nye ó: «Da, nye mu ó lé ebul numo! Nye mu ó si debe e molu monâ!»

⁴⁰ Yesʉs, nye e nye ó: «Zê me baalɛɛ e go ó, ǃgo si buʼla nɛʼɛ, go óbee moncɛnba mo Zyɛm ɛ?»

⁴¹ Bé ntɔʼ pɛʼ ekoʼ. Yesʉs ze bɨn mih kʉ. Nye ó: «Zyoo e go, Da, ebe, gɨ joʼo me.

⁴² Me egʉa ó, go ebɛa joʼo me. No ó, me elɛɛ go no ó, é l'efu e bʉr lé ebʉmra me wâʼ é nka ba, ó bé buʼla ó, go ó b'a lomo me.»

⁴³ É jɔʼ nye a sil lwib no e, nye ntɔʼ ze behe. «Lazar ɔɔ! Pyala kʉl ɔɔ!»

⁴⁴ Lazar ntɔʼ pyal kʉl, mobo e mokʉ mɨkɛʼa e mɨmyɔʼ mɨ dɨla. (Mɨmyɔʼ myaa, myé a be ó mɨsɛa e ndomo kan é pumo-pumo. Mpom we a be ó ndîbla e peh kan.) Yesʉs, nye e be ó: «Tiŋɨ ga nye bɨsa bɨnɨ. Birɨ ga nye, nye toʼ.»

Bʉm ejʉŋɔ Yesʉs

⁴⁵ É sama oYʉden bé a ze bee Maaria ɛ, buobuo bʉr, bé a si jyɛʼ taa buʼo yɔɔ boo Yesʉs é jɔʼ bé a bee sa nye a sa ɛ.

⁴⁶ Sa gwar, bʉʉ bʉr é sama oYʉden yaa, bé ze to bee oFarizyɛŋ, ze pʉrɔ be syɛɛla Yesʉs a sa ɛ.

⁴⁷ OFarizyɛŋ bé e l'ojwɨɨ be opara ze gwɨhla é Bʉm Nɨnɨ yɔɔ. Bé ó: «Bɨna bé ósa ga nyá ɛ? Ebe, mʉr nɨ, nyi bul sa bɨdweʼle bɨ nkul we.

⁴⁸ ǃBɨna si bir ga nye nɛʼɛ, bʉr bɨbɛh, bé ójyɛʼ taa buʼo yɔɔ boo nye! É jɔʼ yaa, bʉr o Rom, bé òze, ze bʉ Mpah Tî ga wina, le elwimla dɔm e kul ga yina!»

⁴⁹ Nuu mʉr a be ó é sama yaa, die le Kayɨfa. Nye ó b'a be njwɨɨ opara é mbu waa. Nye ó: «Bɨn bé apahle sɔʼɔ!

⁵⁰ Bɨn nteme bé abe e pɨʼ. Bɨn bé abee ó, yé é mbɨa ó, mʉr ngwar dwèʼ, jala e kul ga yina? É mbi waa ó kul ga yina, yé óbe, adim yiyɛh ɛ.»

⁵¹ (Nye a baalɛɛ ekan laa ebe gwɨma ye. Sa yé a sa ó, nye lɛŋɨ le e, yé a be ó, ebe, nye a be ó njwɨɨ opara é mbu waa. Ebe no ó yé a jala ó, nye gwihɨ ó, yé é mbɨa ó, Yesʉs dwèʼ é l'efu e kul oYʉden ɨ.

⁵² Abe njɨ é l'efu e bʉr o kul gwar yaa bé ome. Nye nteme a dwè ó, é l'efu e bwan mo Zyɛm bɨbɛh! Mpʉ bɨ myɛma é mɨlal myoonkan ɨ, nye ónʉa be, ntɔʼ syɛŋ be, ó bé diʼe njɨ sa gwar.)

⁵³ É moho waa ó bé a bòno pɨʼ ó, bé jʉ ó Yesʉs ɨ.

⁵⁴ Ebe no ó Yesʉs a gwaʼ lé eduula é pono é mih mo oYʉden ɨ. Nye ze laa, to é guu lal fih, kunokuno e feha si. Bé e l'ompʉn be, ze to di gʉʼ é nkana bé lé ejebe ó, Efrayɨm ɨ.

⁵⁵ Ebʉʼ e Paska oYʉden, lé a be ó, lé mu kunokuno le epyal. Buobuo bʉr o lal ze taare lé eto Yerʉsalɛm, to puba jyɛm lé a be, lé l'apa taare e.

⁵⁶ Bé a be ó lé esaa Yesʉs é jahla bii mo Zyɛm, lé eto le edîila paʼra wɔɔ ó: «Bɨn bé epahle sa yiʼ nyá ɛ? Zê nye aŋa ka ze é l'ebʉʼ ɛ?»

⁵⁷ Ojwɨɨ be opara bé e l'oFarizyɛŋ, bé a bɛa tiile tiila ó, ǃɨ mʉr si fuuba gʉa gumo Yesʉs ndɨ nɛʼɛ, nye lɛŋɨ bʉr. Bɛɛ bé òka to naʼ nye mobo é nyʉl.