Yʉanes 10 - Kálara Zyɛ̌m Edwán é mpʉ̌n

Kɨkɛna mpaŋ kobla bɨntœme

¹ «Me elɛɛ bɨn cyecye ó nɛɛ: waa nyiwɛh ndɨ acwɨɨ é l'ebe e nkal bɨntœme lé eni tɨʼ, waa ndɨ ebula to ntaa ekɔʼ é nko paʼ fih ɨ, nye ó ndɨ ndiblʉ, nkʉ zilngan.

² Waa lé eni é l'ebe e, nye ó ndɨ kobla bɨntœme.

³ Mʉr lé ecyɛb é vaa ɛ, nye edib ebe ó kobla bɨntœme. Bɨntœme, byé edweʼe ecel le. Nye ejebe bɨntœme bye ó, behe ntœme yiyɛh e mpaŋ die le, bé e boo nɔɔ ntɔʼ pyal kʉl.

⁴ É jɔʼ nye óbe si pyɛl byaa bye bibyɛh kʉl ɨ, nye mʉr tɨʼ ó lé ecyɛb bye zi dolo, bɨntœme byɛɛ lé edu nye, ebe, byé egʉa ecel le.

⁵ Byé abe e nkul edu mʉr byé ndɨ adweʼe ecel ɨ. Byé ókpɛɛ nye ó, kpɛɛ kpɛŋɨ, ebe, byé adweʼe ecel mo nyiha mʉr.»

⁶ Yesʉs a lɛɛ be mokan monɨ ó, bɨntuntu, bɛɛ l'ajoʼo sa nye a lɛɛ be tɨʼ ɨ.

⁷ Yesʉs a ze bâʼle lɛɛ e be ó: «Me elɛɛ bɨn cyecye ó nɛɛ: me ó ebe e nkal bɨntœme.

⁸ Baa bɨbɛh bé a ze efoʼ e me e, bé ó mɨndiblʉ ndwe e bɨzilngan. Sa gwar, bɨntœme, byé a baajoʼo be.

⁹ Me ó ebe. Mʉr nyiwɛh lé eni é me e, nye óbi tiʼ molu mo mpoʼ mɨmɛh. Nye óni-ni lé ecwɨɨ é l'ebe, bâʼle pyal-pyal kʉl. Nye ókœb mode me.

¹⁰ Ndiblʉ, wé eze ó, lé eze díbe, le ejʉ, le egbah. Mɛm a ze ó, bʉr biʼe tiʼ molu mo mpoʼ mɨmɛh, ndwe nteme ó, bé buʼba é bɨtiʼ byɔɔ é me.

¹¹ «Me ó mpaŋ kobla bɨntœme. Mpaŋ kobla bɨntœme, nye edwe tiʼ ye é ziila e bɨntœme bye.

¹² Mʉr lé esea é l'efu e mɔn ɨ, nye abe mbi kobla bɨntœme waa. Bɨntœme nye ndɨ ebaʼle e, byé abe byaa bye. ǃNye si bee tir monyan nɛʼɛ, nye ókpɛɛ, liʼe bɨntœme, é mbi ndɨ ó, tir waa, nye e nkul emɛr biʼ bɨntœme, gbah byʉʉ!

¹³ Nye ekpɛɛ ó, ebe, nye esea ó njɨ mɔn. ǃƗ ebebe si pyal é bɨntœme nɛʼɛ, yé alɛɛ nye sɔʼɔ.

^14-15 Me ó mpaŋ kobla bɨntœme. Mpʉ Sɔŋ wam lé egʉa me e, me egʉa nye. Ebe no ó me lé egʉa bɨntœme byam, bɨntœme byam gʉa me e. Me edwè, jala e bɨntœme byam byaa.

¹⁶ Me e byʉʉ bɨntœme l'apa ni é nkal bɨntœme nwaʼ ɛ. Yé ekʉ jala ó, me toʼ, to nʉa bye, niŋle bye é nkal. Byé ójoʼo ecel lam. Bɨn e boo nɔɔ, bé óbe ó daa egwar, kobla bɨntœme ngwar.

¹⁷ «Me edwè, jala e bye. Ebe no ó Sɔŋ wam ndɨ ekpɛl me e. Me ótaare dwè; me òka nʉa tiʼ yam.

¹⁸ Mʉr, nye aŋa nʉa me tiʼ yam. Me edwe ye ó dweʼ, e nkul wam me mʉr tɨ. Me e nkul edwe ye, bula nʉa. Yé ó syɛɛla Sɔŋ wam a dwe me nkul ó, me saʼ ɛ.»

¹⁹ OYʉden ze bâʼle bɔʼa motwii é jɔʼ bé a joʼo lwib nɨ ɨ.

²⁰ Buobuo bʉr o sama yɔɔ, bé a lɛɛ ó: «Nye e l'eleme! Nye ó gʉ! Ebe yé bɨn lé ejoʼlo nye e?»

²¹ Bʉʉ, bé ó: «Mʉr ndɨ esia e moleme e, nye abe e nkul elwib mpʉnʉ. Zê mʉr ndɨ esia e moleme e, nye e nkul ebɛɛ ontim mih ɛ?»

OYʉden, bɨ bene Yesʉs

²² Yé a be ó jɔʼ kolo. Bʉr o Yerʉsalɛm, bé a be ó lé efwal lé eze bwalɔ ebʉʼ le Epub e Mpah Zyɛm.

²³ Yesʉs ze to le ekœʼ é sikuo yé a be mbɨembɨe é jahla bii mo Zyɛm, yaa yé a jwɨrɔ die ó, Sikuo mo Salomɔŋ ɨ.

²⁴ OYʉden ze to kɛb nye. Bé ze dîŋɔ ó: «Go óka fil bɨh mɨleme si é yáa jɔʼ? Yé be ó, go ó ndɨ Lœma mulo mo Zyɛm nɛʼɛ, lɛŋɨ bɨh no, anyam nʉm.»

²⁵ Yesʉs, nye e be ó: «Me a si bɛa lɛɛ bɨn ya, bɨn bɛɛ l'abuʼla. Bɨsyɛɛla me lé esa é nkul die mo Sɔŋ wam ɨ, byé ó ndɨ eboʼlo mbi mʉr me ndɨ ɨ.

²⁶ Bɨn di, abuʼla me ó, ebe, bɨn bé abe é daa e bɨntœme lam.

²⁷ Bɨntœme byam, byé ejoʼo ecel lam. Me egʉa bye. Byé nteme, byé edu me é koo pihe.

²⁸ Me edwe bye tiʼ molu mo mpoʼ mɨmɛh. Byé ákwoʼ dim é nkɔb bʉr. Abe e mʉr ópɛʼ me bya é mobo.

²⁹ Sɔŋ wam, mʉr a ntɨh me bya ɛ, nye e nkul, laa bʉr bɨbɛh. No ó, mʉr, nye abe e nkul edɛʼ sɔʼɔ é mbo we.

³⁰ Bɨh e Sɔŋ wam, bé ó sa gwar.»

³¹ OYʉden ze bâʼle nkɛɛ mokoʼ ó, bé lumo ó nye.

³² Yesʉs, nye e be ó: «Me a si lɛʼle bɨn buobuo mɨmpaŋ bɨsyɛɛla Sɔŋ wam a lɛɛ ó, me saʼ ɛ. Lɛŋɨ ga me: bɨn lumo me mokoʼ ebe yaa yáa?»

³³ OYʉden, bé e nye ó: «Bɨh bé agwɨm lumo go mokoʼ ebe yʉʉ mpaŋ syɛɛla yo. Yé ó, ebe, go epyeh Zyɛm! Gwɔɔ mʉr, go ejwɨʼa e Zyɛm.»

³⁴ Yesʉs, nye e be ó: «Zê yé abe tila é l'okalara o motie win ó: “Zyɛm a lɛɛ ó, bɨn bé ó ozyɛm” ɛ?

³⁵ Bɨn bé egʉa ó, bɨna ga bé abe e nkul edimle sɔʼɔ é bim bɨsa ndɨ tila é Kalara Zyɛm ɨ. Zyɛm a jebe ó, ozyɛm ó, baa nye a ntɨh lɔɔ we e.

³⁶ A, ebe yé bɨn lé elɛɛ ó, me epyeh nye e? Zê yé ó, ebe, me si gwih bɨn ó, me ó Mwan we ɛ? Me ó kʉ be waa Zyɛm Sɔŋ a pɛh, ntɨh kaʼ é si nwaʼ ɛ.

³⁷ ǃMe baasa bɨsyɛɛla mo Sɔŋ wam nɛʼɛ, abuʼla ga me.

³⁸ Sa gwar, ǃme si sa bɨsyɛɛla bye nɛʼɛ, dam ka be ó, bɨn bé abuʼla me, jyɛʼɛ ga taa buʼo yin boo me ebe bɨsyɛɛla byam byaa. É zi waa ó bɨn bé ófuʼla gʉa ó, Sɔŋ wam, nye etiʼe ó é me e; me ó é zyɛŋa wih boo nɔɔ ɛ.»

³⁹ Bé ntɔʼ kʉ bâʼle saa ó, bé naʼ ó nye mobo é nyʉl. Nye ze fɛbra be.

⁴⁰ Yesʉs ze bâʼle to pɨn dibe Yʉrdɛŋ nkɔm-nkɛɛ, nko Yʉanes a dù-dù bʉr ɨ, to di gʉ.

⁴¹ Buobuo bʉr ze to kœb nye gʉ. Bé ó: «Yʉanes a be ó, asa dweʼle nkul we gwar. Sa gwar, sa yiyɛh nye a lɛɛ-lɛɛ, tiibe e mʉr nwaʼ ɛ, yé ó bana kʉ be cyecye.»

⁴² Buobuo bʉr ntɔʼ kʉ ze jyɛʼ taa buʼo yɔɔ boo Yesʉs.