Rôm 9 - Kálara Zyɛ̌m Edwán é mpʉ̌n

OYʉden

¹ Me ekʉ lɛɛ ocyecye é zyɛŋa wih boo Yesʉs-Krɨst. Me alɛɛ mpʉl. Mɨpɛhla mɨ leme wam, myé ekʉ boʼlo lɔɔ waa é zi mo Mbɨambɨa Sisim.

² Leme wam, wé ó lwɨŋla e l'empime. Wé nteme, wé ekpaa me é jɔʼ yiyɛh.

³ Wé ekpaa me ó, lé ebee obɨɔ bam, bʉr o bɨh e boo nɔɔ bé a byɛl ɨ, bé mu é bɨkɔ́ɔlʉ tʉŋlʉ. Nkʉ Zyɛm be ó be, mɛʼle nɛʼɛ, mpa mɨ fuo ka lɛɛ ó, nye pɛʼɛ be bɨkɔ́ɔlʉ byɔɔ byaa, nye dihba káale yɛɛ me, dam be ó, bɨh e Krɨst, bé ófuo bɔʼa mpa.

⁴ Bɨɔ bam, bwa b'Ɨzraɛl, bé ó baa Zyɛm a pɛh ó, bé nkʉʼ cyelɔ é dia bwan o mobœʼa be. Bé ó b'a taare bee kum we. Nye a taare de mpʉn ó e be. Bé ó b'a joʼo motie nye a tiile e. Bé ó b'a taare lɛʼlɔ mpʉ bé lé ejala le edwiibɨ Zyɛm ɨ. Bé ó b'a taare bi monkɛʼ mo Zyɛm.

⁵ Bɛɛ ó ndɨ mpoŋbʉr mo Abraham, e Ɨzak ndwe e Yakɔb. Krɨst nye mʉr tɨʼ a byɛl mʉr ó, é kul bʉr yina nɨ. Nye ó ndɨ Zyɛm, njwɨɨ sa yiyɛh. Kum diʼe e nye njʉmdia e njʉmdia! Amɛn.

⁶ Mʉr beʼ l'alɛɛ yɛɛ ó, Zyɛm a baadira nkɛʼ we! Ntʉʼ mʉr nyiwɛh ndɨ mpoŋbʉr mo Ɨzraɛl ɨ, ndɨ Ɨzraɛl.

⁷ Ntʉʼ bʉr bɨbɛh ndɨ mpoŋbʉr mo Abraham ɨ, ndɨ bwan be. Yé ó mpʉ Zyɛm a lɛɛ Abraham ɨ. Nye a lɛɛ ó: «Bé óláa ó, mʉr, nye ó mʉr mpoŋbʉr go ó, nkʉ nye ó mpoŋbʉr mo Ɨzak.»

⁸ No, yé ó, é bim bwan Abraham a bya ɛ, ntʉʼ bɨbɛh ndɨ bwan mo Zyɛm. Zyɛm a láa ó, bʉr o mpoŋbʉr we, bé ó baa bé a byɛl, du mpʉ nye a kɛʼ Abraham ɨ.

⁹ Jɔʼ Zyɛm a liʼe nye e nkɛʼ ɛ, nye a lwib ó mbi wi: «Mya mbi epʉla lɨ, lé óbâʼle pyal ɨ, me óbula ze. Sara óbya mwan, ma mʉrʉm.»

¹⁰ Yé abe njɨ no, yé ome. Rebeka a nʉa ebum, ze bya mogbah ó, é jɔʼ nye a syɛŋa duo e njʉm we Ɨzak é jɔʼ gwar ɨ.

^11-12 Zyɛm a lɛɛ nye ó: «Tʉl óbe ó syɛl mosa mo ncyom we.» É jɔʼ Zyɛm a lɛɛ no e, lʉʉ egbah, lé a baapa byɛl, apa sa syɛɛla gwar, nkʉ mpaŋ syɛɛla ngwar, nkʉ syɛɛla ebebe gwar. Zyɛm a sa no ó, lé elɛʼle ó, nye esa bɨsa bye ó mpʉ nye lé ekpɛl ɨ. Nye epɛh mʉr, le ejebe nye ó, lé edu mɨtiʼa mɨ leme we nye mʉr tɨ. Nye apɛh mʉr é dɔɔ mɨmpaŋ bɨsyɛɛla mʉr waa a taare sa ɛ.

¹³ Yé ó mpʉ yé ndɨ tila é Kalara Zyɛm ɨ. Yé ó tila ó: «Me a kpɛl ó Yakɔb; nwim Eso.»

¹⁴ Yé be no nɛʼɛ, bɨna kaʼ lɛɛ ga é yé? Zê Zyɛm, nye lé esa bɨsyɛɛla ndɨ ozyɛhozyɛh ɛ? Hɨʼɨ, yé abe ba no,

¹⁵ ebe, nye a lɛɛ e Moyiz ó: «Me ójwɨʼ nkoo ó, waa nyiwɛh me ókpɛl jwɨʼ nkoo e. Me ójoʼo nkʉnkoo e waa me ndɨ e nkʉnkoo e nye e.»

¹⁶ No ó, é jɔʼ Zyɛm lé ejebe mʉr ɨ, nye ejebe nye ó, ebe, nye ejwɨʼ nye nkoo. Yé abe ebe gwɨma mʉr tɨʼ ndɨ e ye e, nkʉ ebe nye egba nyʉl lé esa mɨmpaŋ bɨsyɛɛla.

¹⁷ Yé ó tila é Kalara Zyɛm, tiibe e Faraɔŋ ó: «Me a cyel go é dia njwɨɨ, ka bir ó, go saʼ me pyeh, ó me nkʉʼ lɛʼle bʉr bɨbɛh nkul wam é zi go, ndwe nteme, bʉr toʼ é si nwaʼ nyiwɛh lé etuno lɔɔ lé etiibe e die lam ɨ.»

¹⁸ No ó, Zyɛm, nye ejwɨʼ nkoo ó, mʉr nye lé ekpɛl ɨ. Mʉr Zyɛm lé ekpɛl lɨl lʉ we e, nye elɨl we, lɨl lɨlɨ.

Zyɛm, nye ekʉ ka sa ó njɨ sa nye lé egwɨm ɨ

¹⁹ Bɨn bé óbɛm dî e me ó: «Yé be no nɛʼɛ, ebe yé Zyɛm lé eto dolo lé etɛɛ bɨna ga ɛ? Zé ndɨ e nkul esa Zyɛm mongan é jɔʼ nyi lɛɛ ó, nye ósa sa ndɨ edu gwɨma ye e?»

²⁰ Gwɔɔ mʉr lé edo e Zyɛm ɨ, go ebee ó, go ejala le entɛŋ nye motia, dɔɔ waa yé? Sa mʉr a me e deʼe e, zê yé e nkul ebɛʼ e mel ó: «Ebe yé go a me me mpʉnʉ nɨ» ɛ?

²¹ Hɨʼɨ, mel mompɨ, nye e nkul esa sa nye kpɛl ɨ, e deʼe le. Nye óbɛm nʉa buʼ deʼe, pɛʼ ye bɨpeh bɨba, nʉa wiʼ paʼ, me jaa daala e tɨ; nʉa guu paʼ nɛʼɛ, me yʉʉ sa daala yé óbiŋɔ-biŋɔ dobo lɨlɛh ɛ.

²² Zyɛm a sa syɛɛla yaa ó, nye lɛʼla bʉr bim nye lé ekpaa empime e be e, ndwe e mpwaʼ nkul we. Ebe no ó bɨn ndɨ ebee nye lé ebul dihbe bʉr o jala le ekpaŋɔ empime e. Bɛɛ bé ó baa bé ódim ɨ.

²³ Zyɛm, nye esa no, bʉr gʉŋa ó, nye e mpwaʼ kum. Nye ókab bɨna ga kum waa, bɨna ga, bʉr nye a kpɛl cwɨa e be e, ebe, bɨna ga ó ndɨ baa nye a bɛa cye ó, nye ókab be kum waa ɛ.

²⁴ Sama bʉr baa, bé ó baa Zyɛm a pɛh ɛ. Nye a baapɛh-pɛh njɨ é kul bʉr oYʉden tʉŋlʉ. Nye a pɛh bʉr ó, é bɨkul bɨfih!

²⁵ Yé ó mpʉ nye a lɛɛ é kalara Oze a tile e. Yé ó tila ó: «Bʉr o b'a baataare be kul bʉr yam ɨ, me óka gban be, le ejwɨr be ó “kul yam”. Waa a taare be apeɔ ɛ, me óka jebe nye ó, nkpɨʼ yam.»

²⁶ «Gumo me a lɛɛ e be ó: “Ntʉʼ bɨn ndɨ bʉr bam” ɨ, tɨʼ é gumo yaa, mɛm, Zyɛm, me óka gban be, le ejwɨr be die ó: “Bwan mo Zyɛm ndɨ kublakubla ɛ”.»

²⁷ Ezayi a si tuno, tiibe e bwa b'Ɨzraɛl, ó: «Bwa b'Ɨzraɛl, bé dam jah ndwe le epwɨɨ, laa bim mosɨa ndɨ é nkpah maŋ ɨ, njɨ ma dœh e bʉr, bé óliʼ mɨkubla.

²⁸ Da óze kam e kam, ze kab bʉr o si nwaʼ bɨntɨʼa nye a bɛa lɛɛ ó, nye ókab be e.»

²⁹ Ezayi a bɛa lɛɛ nteme ó: «Nkʉ Zyɛm Nkul nyiwɛh a be ó be, l'aliʼe bɨna ga e mpoŋbʉr nɛʼɛ, mpa bɨna bé a kʉ fuʼla ga ó, mpʉ Sodɔm, yé a be e; mpa bɨna bɨ kʉ nwɨɨla ga e Gomɔr.»

Mbɨambɨa Lɔɔ, wé elɛɔ nteme oYʉden

³⁰ Yé be no nɛʼɛ, bɨna kaʼ lɛɛ ga é yé, tiibe e bʉr o ndɨ abe oYʉden ɨ? Bʉr o b'a baasaa zi ebi mokebe é mih mo Zyɛm ɨ, bé ó b'a ka bi mokebe maa. Sa gwar, bé a bi me ó, ebe taa buʼo bé a jyɛʼ boo Krɨst ɨ.

³¹ Bwa b'Ɨzraɛl bɛɛ, bé a saa-saa ó, bé biʼe mokebe é mih mo Zyɛm ebe mbi bé a be lé edu motie e. To kœb ó, bé a baabi mokebe maa.

³² Ebe yé, bé a baabi mokebe é zi waa ɛ? Yé a be ó, ebe, bé a baajyɛʼ taa buʼo yɔɔ boo Zyɛm! Bé a kʉ ka jyɛʼ ye ó njɨ é bɨsyɛɛla byɔɔ. É mpʉ bé a du zi waa ɛ, bɨ ze to duma temezi. Bé a bɨm ebɔʼ ó, é l'ekoʼ.

³³ Yé ó tila ó: «Dwɛʼa ga: Mɨ gba ekoʼ lé edumo bʉr ɨ, é nkana Sion. Lé ó ebɔʼ me a kol, laa bé óbɨm é mɨleme e. No ó, mʉr nyiwɛh ójyɛʼ taa buʼo ye é l'ekoʼ laa ɛ, nye aŋa sɔma.»