Rôm 8 - Kálara Zyɛ̌m Edwán é mpʉ̌n

Tiʼ molu mo mpoʼ mɨmɛh Zyɛm lé edwe bʉr ɨ

¹ Banana, bʉr o ndɨ é zyɛŋa wɔɔ boo Yesʉs-Krɨst ɨ, Zyɛm, nye aka láa be bɨbaa bɨ ebebe byɔɔ, nkʉ kab be bɨntɨʼa ndɨ ejala e le e.

² Bɨna bé a be ga ó mɨmɛra é mpila mɨsyem. Mɨsyem myaa, myé ó b'a liŋ bɨna ga odwè é mih mo Zyɛm. Mbɨambɨa Sisim ze dwe bɨna ga tiʼ molu mo mpoʼ mɨmɛh é zyɛŋa ga wina boo Yesʉs-Krɨst.

³ Yé ó no! Ebe, yé a baabana ó, bɨna biʼe tiʼ molu mo mpoʼ mɨmɛh ebe mbi bɨna lé edu ga motie e, ebe, nyʉl bɨpuno ga wina a be ó é cyɛʼ. Sa motie mo Moyiz, mé a baakoʼo lé esa ɛ, Zyɛm nyɛɛ a si bana sa ye. Nye a si ntɨh Mwan we é si nwa, nyʉl we lé ekʉ nwɨɨla e waa ga wina, osyɛl o mɨsyem. Nye a ze é lɔb syem ga wina waa ó, nye ntaʼ, ze pɛʼ we. Zyɛm a si dwe Yesʉs mobe é lɔb syem waa.

⁴ Nye a jaʼra e bɨntɨʼa é nyʉl we ó, nye nkʉʼ du ocɨcyel o motie mɨmɛh Zyɛm a tiile bʉr ɨ. Bɨna bé ebi ga mopoʼ mo syɛɛla ye yaa ó, é jɔʼ bɨna lé ekœʼ ga ebò e cyen Mbɨambɨa Sisim lé etɨe bɨna ga ɛ, aka be lé edu bɨgwɨma bɨ nyʉl bɨpuno ga wina.

⁵ Baa lé edu njɨ bɨgwɨma bɨ nyʉl bɨpuno e, sa ndɨ epebre be é mɨleme e, yé é jɔʼ yiyɛh ó njɨ bɨgwɨma bɨ nyʉl bɨpuno wɔɔ. Baa lé edu motɨɨ mo Mbɨambɨa Sisim ɨ, sa lé epebre be é mɨleme e, yé ó sa Sisim waa lé ekpɛl ɨ.

⁶ Ebe, bʉr o ndɨ epahle njɨ bɨgwɨma bɨ nyʉl bɨpuno e, byé edaʼre ó efie é monyʉl mɔɔ. Gwɨma mo Mbɨambɨa Sisim yɛɛ, yé edwe bʉr tiʼ molu mo mpoʼ mɨmɛh ndwe e motala.

⁷ Baa ndɨ edu njɨ bɨgwɨma bɨ nyʉl bɨpuno e, bé ó bʉr o dɔm mo Zyɛm. Bé agum ka du motie Zyɛm a tiile bʉr ɨ. Bé ákwoʼ mɛʼle du me.

⁸ Baa lé edu-du bɨgwɨma bɨ nyʉl bɨpuno e, Zyɛm, nye ákwoʼ bee be mbɨmbɨa.

⁹ Bɨn bɛɛ, bé abe bʉr o ndɨ edu bɨgwɨma bɨ nyʉl bɨpuno win ɨ. Bɨn bɛɛ mu lé ejoʼo ó, njɨ e Mbɨambɨa Sisim, ebe, Sisim waa, wé ó ndɨ é bɨn. ǃƗ mʉr baabe é zyɛŋa wɔɔ boo Sisim mo Krɨst nɛʼɛ, lɛɛ ó, mʉr waa, nye abe mʉr mo Krɨst.

¹⁰ Dam be ó, Krɨst, nye ó lé enyin cyecye é bɨtiʼ bin, monyʉl mɨn, mé dina ó mɨmuu é lɔb mɨsyem bɨn bé a sa ɛ. Sa gwar, mɨsisim min, mi tiʼe, ebe, Zyɛm, nyi láa ó, bɨn bé ó ocɨcyel o bʉr é mih me.

¹¹ No nteme, ǃɨ Mbɨambɨa Sisim, mʉr a pɛ̀h Yesʉs-Krɨst é foo e, di é bɨn nɛʼɛ, lɛɛ ó, nye ópɛ̀h monyʉl mɨn é foo, maa lé edwè e. Nye ódwe monyʉl mɨn tiʼ é zi Sisim we ndɨ é monyʉl mɨn ɨ.

¹² Obɨɔ ga bam aa! Yé be no nɛʼɛ, lɛɛ ó, bɨna ga bé e mpɔla nɨnɨ lé ejɛna. Sa gwar, nye abe mpɔla é nko paʼ nyʉl bɨpuno ga wina. Yé ajɨ nteme ó, bɨna duʼo ga bɨgwɨma bɨ nyʉl bɨpuno ga wina.

¹³ ǃBɨn si du bɨgwɨma bɨ nyʉl bɨpuno win nɛʼɛ, lɛɛ ó, bɨn bé ójala e l'ebebe laa. Sa gwar, ǃbɨn si lele nkul é zi Mbɨambɨa Sisim, ntɔʼ teʼle bɨsyɛɛla bɨ nyʉl bɨpuno nɛʼɛ, lɛɛ ó, bɨn bé óbi tiʼ molu mo mpoʼ mɨmɛh.

¹⁴ Baa bɨbɛh lé edu zi Sisim mo Zyɛm lé etɨe e, bé ó ndɨ bwan mo Zyɛm.

¹⁵ Sisim Zyɛm a ntɨh bɨn ɨ, wé abe lé edil bɨn é dia olʉa é l'efu ó, bɨn bâʼla joʼo bʉa. Wé etœʼ bɨn si, ze cyel bɨn é dia bwan o mobœʼa mo Zyɛm. Wé ó ndɨ esa ó, bɨna jeba ga Zyɛm kʉ kʉ ó: «Abba! Da!»

¹⁶ Sisim we, wé mʉr tɨ, wé eboʼlo é mɨleme ga mina tʉŋlʉ ó, bɨna ga bé ó bwan mo Zyɛm cyecye.

¹⁷ Yé be ó, bɨna ga mu ó bwan mo Zyɛm nɛʼɛ, kʉ gʉa ó, bɨna ó ngo bi ga monkɛʼ mo Zyɛm, jala e nkɔb ga wina. Bɨna bé óbi ga me ó, é zyɛŋa ga wina boo Krɨst. ǃBɨna ga e boo nɔɔ, bé óbe si sia e mɨtuu mɨmpwar nɛʼɛ, bɨna bé óbi ga nteme kum, é zyɛŋa ga wina boo nɔɔ.

Nkɛʼ bɨna lé ebono ga ó, Zyɛm ódira ɛ

¹⁸ Mbea wam, wé ó, mɨtuu bɨna lé ebɔma ga e mye é bananaʼ ɛ, myé ó sa ndɨ kʉ be mbɛh ɛ. Sa ndɨ é bwaʼ lɔb, laa mɨtuu myaa ɛ, yé ó kum Zyɛm ólɛʼle bɨna ga ɛ.

¹⁹ Ebe, mɨcyea bɨsa bibyɛh, byé egwɨm bee dobo Zyɛm ólɛʼle bye bwan be é pono e.

²⁰ Sa gwar, byé mu lé egʉa ó, byé é tɨtoʼo, jɔʼ yiyɛh byé dina é dia yɔɔ ɛ. Sa gwar, ntʉʼ mbi waa byé a gwɨm di ɨ. Zyɛm nye mʉr tɨʼ ó b'a dil bye é dia tɨtoʼo yaa é til jɔʼ yi. Bɨna mu ó lé ekʉ bono e mbɛla é leme ó,

²¹ Zyɛm ópɛʼ mɨcyea bɨsa bibyɛh byaa é dia tɨtoʼo yaa, byé l'aka be sa lé ebo e. Byé óbe ó é dia otî, jwɨʼ gwar e bwan o mobœʼa mo Zyɛm bɨbɛh. Bé óbe ó e kum é dia otî yaa.

²² Ze pyal é muh é dobo lɨ, Zyɛm dina l'apa lɛʼle bwan o mobœʼa be onɨ. Bɨna bé egʉa ga ó, mɨcyea bɨsa bibyɛh, byé óto le ejaʼra, le ejoʼo mɨtuu mpʉ anya-ebum lé ejaʼra e min ɨ.

²³ Sa gwar, yé abe njɨ mɨcyea bɨsɔʼɔ ndɨ é tuu é banana. Yé ó ndwe e bɨna ga bʉr o tɨ, baa Zyɛm a taare lé elɛʼle dweʼle nkul mo Sisim we e. Bɨna ga ó ndɨ é tuu waa é mɨsisim ga mina tʉŋlʉ. Bɨna bé óto dolo lé esime no, cye yiyɛh bɨna dina lé ebono jɔʼ nye ódil bɨna ga é dia bwan o mobœʼa be e. Yé óbe ó é dobo nye ósil dwih monyʉl ga mɨna é mpila ebebe e.

²⁴ É jɔʼ Zyɛm a dwe bɨna ga tiʼ molu mo mpoʼ mɨmɛh ɛ, é jɔʼ yaa ó nye a loŋlo mɨleme ga mina e mbɛla waa ɛ. ǃƗ mʉr si bee bɨsa nye a taare bono nɛʼɛ, lɛɛ ó, mbɛla waa, wé aka be nye é leme. Wi laa, ebe, é jɔʼ mʉr mu si bee yʉʉ sɔʼɔ ɛ, nye abe e nkul ebâʼle be e mbɛla é leme ó, nye óbee ye.

²⁵ Sa bɨna l'apa bee ga ɛ, ǃɨ mɨleme ga mina si be e mbɛla ó, bɨna bé óbee ga ye nɛʼɛ, kʉ gʉa ó, bɨna bé ejala le edihbe ga mpono waa.

²⁶ Mbɨambɨa Sisim, nye nteme, nye eze bɨna ga e mɨngula é lɔb ecyɛʼ e nyʉl ga lɨna, ebe, bɨna ga bé agʉa mpʉ bɨna lé ejala le esa ga Zyɛm mɨnjwɨʼla ɛ. No ó, Mbɨambɨa Sisim nye mʉr tɨ, nye esa Zyɛm Sɔŋ mɨnjwɨʼla é modila ga mɨna. Nye esa mɨnjwɨʼla ó, e leme we wiwɛh, mpʉ sa lɛɛ ó, nye etime. Abe e l'ekan egwar ndɨ e nkul epɛʼle sa nye lé elɛɛ ɛ.

²⁷ Zyɛm, nye ebee sa ndɨ é mɨleme mɨ bʉr ɨ, le egʉa nteme sa Sisim we lé egwɨm ɨ. Nye esa nye mɨnjwɨʼla ó, é l'efu e mɨsaŋ mɨ bʉr mo Zyɛm é mbi ndɨ ejala ɛ.

²⁸ Bɨna bé egʉa ga ó, Zyɛm, nye ebɛa cye bɨsa bibyɛh ó, byé diʼe e nyɔm é l'efu e bʉr o ndɨ ekpɛl nye, baa nye a jebe, duho é tiʼa nye a nʉa ɛ.

²⁹ Ebe, baa Zyɛm a bɛa gʉa ɛ, nye a bɛa tiile é leme ó, bé ódɨ kœʼ ebò e cyen mpʉ mo Mwan we. ǃBé si nʉa dweʼle tiʼ mo Mwan we nɛʼɛ, Mwan waa ófuʼla mwa modweʼe, e l'oncyom e l'okɛl é buobuo.

³⁰ Baa nye a bɛa tiile é leme ó, bé ópɛhɔ ɛ, bé ó nye a jebe e. Baa nye a jebe e, bé ó nye a dwe mokebe é mih me e. Bʉr nye a dwe mokebe e, bé nteme ó nye a kab kum we e.

Kpɛl mo Zyɛm

³¹ Yé be no nɛʼɛ, bɨna kaʼ lɛɛ ga é yé? ǃƗ Zyɛm be é nkɔm ga wina nɛʼɛ, wáa mʉr ócyɛb bɨna ga é nkɔm nkɔm-nkɛɛ e?

³² Zyɛm nyɛɛ a baakamle e Mwan we. Nye a dwe tiʼ Mwan we ó, é ziila e bɨna ga bɨbɛh. Zyɛm pa taare dwe bɨna ga Mwan we, a dwɛʼra e bɨsa bɨfih bibyɛh! Nye óbana dwe bɨna ga bya nteme, mpʉ nye a taare dwe bɨna ga Mwan we e.

³³ Zé ndɨ e nkul epur mɨpɛha mɨ bʉr mo Zyɛm? Zyɛm nyɛɛ, nye abe e nkul esa no, ebe, nye mʉr tɨʼ ó b'a sa ó, bɨna biʼe ga mokebe é mih me!

³⁴ Zé óláa mɨpɛha mɨ bʉr be bɨbaa bɨ ebebe, le ekab be bɨntɨʼa bɨ tɨ? Abe e mʉr! Yesʉs-Krɨst a si dwè, jala e bɨna ga. Yé abe njɨ no. Nye a si pàh, to é dia taʼa, é mbo ejʉm mo Zyɛm Sɔŋ. Nye mu nteme ó mʉr ndɨ esa mɨnjwɨʼla é l'efu ga lɨna ɛ.

³⁵ Zé ókoʼo lé ebɛʼ paʼra ga wina boo Yesʉs-Krɨst, mʉr a bul kpɛl bɨna ga ɛ? Zê mɨtuu e mɨndɛl, nkʉ mokɔbla? Zê tíila ɛ? Zê za ɛ? Zê sɔɔlʉ mompor ɛ? Zê dɔm, nkʉ fòŋ ɛ? Abe e sɔʼɔ!

³⁶ (Yé ó mpʉ yé ndɨ tila é Kalara Zyɛm ɨ. Yé ó tila ó: «Ebe, é lɔb go, gwɔɔ Zyɛm, bɨh bé é dobo lɨlɛh ó, odwè. É mih mo bʉr, bɨh bé ó mpʉ bɨtab jala le eto tiʼɔ ɛ.»)

³⁷ Dam be mobebe mɨmɛh ndɨ epyal bɨna ga monɨ, bɨna ga bé ó bɨnkɔɔ dumo e Krɨst, mʉr lé ekpɛl bɨna ga ɛ.

³⁸ Eee, mɨ kʉ gʉa ó, dam be efie, dam be tiʼ, dam be beengles, dam be mɨsisim mɨ apum, dam be mɨtuu mɨ banana, dam be myaa bɨjɔʼ lé eze e, dam be mɨnjɨh,

³⁹ dam be bɨsa ndɨ é jobo kʉ, nkʉ byaa ndɨ é si tʉŋlʉ ɨ, dam be wáa mbi cyea sɔʼɔ, abe e sa gwar, yé ókoʼo lé ebɛʼ paʼra ga wina boo Zyɛm, waa lé elɛʼle kpɛl ye é zi mo Tî ga wina Yesʉs-Krɨst ɨ.