Mataos 15 - Kálara Zyɛ̌m Edwán é mpʉ̌n

Motum bɨmpam bɨ oYʉden

¹ É til molu yaa, oFarizyɛŋ bé e l'oyeʼle o motie, bé ze duho Yerʉsalɛm, ntɔʼ pyal gumo Yesʉs a be e. Bé ze dî e nye ó:

² «Ebe yé ompʉn bo ndɨ entaa mɨnjwɨr bɨmpam ga bina, byé a ntɛŋ bɨna mi ɛ? Ebe, bé abe lé etaare jwɨ̀ɨ mobo é jɔʼ bé lé ejɨ de e.»

³ Yesʉs ze bɨha e be ó: «Ebe yé bɨn ndɨ entaa motie mo Zyɛm ɨ? Ebe yé bɨn lé ebula du njɨ mɨnjwɨr bɨmpam bin byé a ntɛŋ bɨn ɨ?

⁴ Ebe, Zyɛm a lɛɛ ó: “Dwaaba sɔŋ e nyɔŋ go.” Nye a lɛɛ nteme ó: “Mʉr lé ekáale sɔŋ, nkʉ nyɔŋ ɨ, nye ejala ó jʉŋɔ.”

⁵ To kœb ó, bɨn bɛɛ, bé elɛɛ ó, mʉr nyiwɛh óbɛm lɛɛ e sɔŋ e nyɔŋ ó: “Sa bɨn ngbaa bi ó, yé diʼe bɨn e nyɔm ɨ, me ófuʼla dwe Zyɛm ya!”

⁶ É mbea win, waa si sa no e, nye abe e nkul eka gul sɔŋ e nyɔŋ e tɨ. No yé ó: é jɔʼ bɨn ndɨ adwaabe osɔŋ e l'onyɔŋ bɨn ɨ, bɨn bé egbɛɛ lɔɔ Zyɛm é l'efu le edu mɨnjwɨr bɨmpam bin byé a ntɛŋ bɨn ɨ!

⁷ Bɨn baanya-bɨkʉʉŋʉ ba, gʉŋa ga ó, Ezayi a be ó si kʉ gʉa gwih mɨlɔb min é jɔʼ nye a bɛa lɛɛ ó:

⁸ “Zyɛm, nye elɛɛ ó: ‘Kul yi, yé ekʉ dwiibɨ me ó, njɨ é bɨbɨʼ bɨ nʉm kʉl. To kœb ó, mɨleme myɔɔ, mi bul cɛra e me.

⁹ Mbi bʉr baa lé edwiibɨ me e, wé ó kʉ be tɨtoʼo, abe ba e nyɔm, ebe, sikʉlʉ bé lé edweela paʼra wɔɔ ɛ, yé ó njɨ yaa bʉr.’”»

Sa ndɨ elœʼ mʉr é mih mo Zyɛm ɨ

¹⁰ No ó Yesʉs a jebe ntuntuma bʉr, ze lɛɛ e be ó: «Mbɛngɛɛ, bɨn bé à kʉ gʉa joʼlo ga sa yi.

¹¹ Sa ndɨ elœʼ mʉr é mih mo Zyɛm ɨ, yé abe yaa mʉr lé ede e. Sa ndɨ elœʼ mʉr é mih me e, yé ó yaa lé eduho mʉr waa é nʉm ɨ.»

¹² Ompʉn mo Yesʉs ze dihle fum nye a be e. Bé e nye ó: «Zê gɨ gʉa ó, sa go lɛɛ oFarizyɛŋ nɨ, yé si bɨm be ebɔʼ é mɨleme ɛ?»

¹³ Nye ntɔʼ bɨha e be ó: «Mpœʼ yiyɛh Sɔŋ wam ndɨ é jobo kʉ ɨ, a baabè e, yé óduŋɔ ndwe e mɨkaale mye mimyɛh.

¹⁴ Birɨ ga be: bé ó ontim lé eliʼle bʉʉ bʉr é zi ɨ! ǃƗ ntim si liʼle nuu ntim é zi nɛʼɛ, bɨbɛh oba, bé ólʉŋa é bɨ.»

¹⁵ No ó Pyɛr a ze nʉa lwib. Nye e nye ó: «Pɛʼla bɨh kɨkɛna nɨ.»

¹⁶ Yesʉs ntɔʼ lɛɛ ó: «Zê bɨn dina ó mɨmiʼ ɛ?

¹⁷ Zê bɨn dina ó, apa gʉa ó, sa mʉr lé egba é nʉm ɨ, yé elaa ó, é mo tʉŋlʉ, pyal kʉl, ntɔʼ kur é duʼ ɛ?

¹⁸ To kœb ó, bɨsa lé eduho é nʉm ɨ, byé eduho ó, é leme mʉr tʉŋlʉ. Bɨsa byaa ó ndɨ elœʼ mʉr é mih mo Zyɛm.

¹⁹ Ebe, bɨsa bɨ ebebe bibyɛh, byé eduho ó, é leme. Byé ó: bɨbebebebe mɨpɛhla, ejwɨɨ e bʉr, mɨfyɛba, bɨmala, díbe, ebuʼo mɨɔ go mʉr mɨlɔb ndwe e movoʼ.

²⁰ Bɨsa bɨnɨ bibyɛh ó ndɨ elœʼ mʉr é mih mo Zyɛm! Ntʉʼ lɔb ede apa jwɨ̀ɨ mobo ndɨ elœʼ mʉr é mih me.»

Mʉma bɨkul lé ejyɛʼ taa buʼo ye boo Yesʉs

²¹ No ó Yesʉs a duho é gumo yaa, ze to é nkɔra nkana Tir e nkana Sidɔn.

²² Ngbaa le eka be nɛʼɛ, nuu mʉma Kanan ze duho kwar waa, ze lwib lé eyɨm twii ó: «Da ɔɔ! Mwan mo David ɛɛ! Jwɨʼɨ me nkoo! Sile wam, wi bul sia e l'eleme!»

²³ Yesʉs a baabɨha e nye. Ompʉn be ze dihle kunokuno e Yesʉs. Bé e nye ó: «Lɛŋɨ nye ó, nye toʼ, ebe, nye edu bɨna ga e bɨtim.»

²⁴ Yesʉs ze bɨha e be ó: «Me a kʉ ka lomɔ ó njɨ é l'efu e bɨntœme bɨ lal Ɨzraɛl mu si pɔhba, to dim ɨ.»

²⁵ Mʉma waa, ntɔʼ bɨʼ mpom we si é mih me. Nye e nye ó: «Da, kɛmɨ me.»

²⁶ Yesʉs ntɔʼ bɨha e nye ó: «Yé ambɨa ó, mode lé ejala le edweŋɔ bwan ɨ, mé bula dweŋɔ bwa ompye.»

²⁷ Mʉma, nye e nye ó: «Da ɛɛ, yé ó no! Dam be no, bwa ompye, bé esa nteme ó, de bɨtwiʼ mode lé ekur si teble é mbɛr mo sɔŋ wɔɔ ɛ.»

²⁸ Yesʉs ntɔʼ lɛɛ e mʉma waa ó: «Mʉma nwa, gɨ kʉ jyɛʼ taa buʼo yo boo me! Yé saŋɔ go mpʉ gwɨma yo ndɨ ɨ!» Taare é jɔʼ gwar yaa, sile we, wé ntɔʼ tiʼe.

Yesʉs lé etiʼ mɨsyoblʉ é nkpah maŋ mo Galɨle

²⁹ Yesʉs ntɔʼ duho é gumo yaa, ze to nkpah maŋ mo Galɨle. Nye ntɔʼ bere é l'ecwɨʼ kʉ, di si.

³⁰ Ntuntuma bʉr, yé ntɔʼ fwal gumo nye a be e, e mɨsyoblʉ é buobuo: baa b'a be lé etɨa ɛ, ontim, baa b'a be e bɨjyɛm ɨ, bɨgʉ́ʼ, le myʉʉ mɨsyoblʉ é buobuo. Bʉr o b'a ze e mɨsyoblʉ myaa ɛ, bé a fil-fil mye ó, é mokʉ me si, nye ze tiʼ-tiʼ mye.

³¹ Ntuntuma bʉr, yé ze jehe lé ebee bɨgʉ́ʼ mu lé elwib; baa b'a be e bɨjyɛm ɨ, mu mbɨmbɨa; baa b'a be lé etɨa ɛ, mu ó lé ekœʼ mbɨmbɨa nteme; ontim mu ó lé ebee. Bé ntɔʼ dwiibɨ Zyɛm mpoʼo Ɨzraɛl.

Yesʉs lé edwe bʉr otɔɔyin onâ mode

³² Yesʉs ze jebe ompʉn be, ntɔʼ lɛɛ e be ó: «Me ejwɨʼ bʉr baʼ nkoo, ebe, bɨna ga e boo nɔɔ, bɨ di molu molɛl. Bé aka be e sa ede. Bé mu nteme ó, si cyɛʼ e za. No ó, me akpɛl ó, bé fiʼɨ no. Nuu mʉr amu jaa to nkaŋa si temezi é l'eguu e za.»

³³ No ó ompʉn be, bé a dî e nye ó: «A bɨh bé ópa kʉ kœb bim mode dwe bim ntuntuma bʉr yiʼ nko? É lʉn bɨna ga ndɨ yi?»

³⁴ Yesʉs ze dî e be ó: «Bɨn bé e bɨbler bɨntɨɛ?» Bé ntɔʼ bɨha ó: «Tambɛl, ka kɛl bwa ofu abuo.»

³⁵ Nye ntɔʼ lɛɛ e ntuntuma bʉr ó, bɨbɛh diʼe si.

³⁶ Nye ntɔʼ nʉa bɨbler tambɛl byaa le bwa ofu baa, dwe Zyɛm ekiba, ntɔʼ pɛ̂ʼ bye bɨpeh, to le edwe ompʉn be bya. Bé ze nʉa, kab bʉr bɨbɛh.

³⁷ Bʉr bɨbɛh ze de, díle, kar mode. Mompubuʼo mode ompʉn, bé a to le etʉʼla ɛ, mé a si kaalɔ é mokuro tambɛl!

³⁸ Bʉr o b'a de e, bé a be ó: bʉrʉm e bʉrʉm, otɔɔyin onâ, aláa bʉba le bwɔɔncyom.

³⁹ Jɔʼ nye a sil buulo ntuntuma bʉr yaa ɛ, Yesʉs ze kable é byɛl, to lal Magadan.