Markus 3 - Kálara Zyɛ̌m Edwán é mpʉ̌n

Yesʉs lé etiʼ mʉr é moho saba

¹ Yesʉs ntɔʼ bâʼle ni é nuu mpah mɨnjwɨʼla. Tɨʼ yé a be ó e nuu mʉr a be e mbo é fwam-fwam ɨ.

² No ó, bʉr o b'a be tɨʼ ɨ, bé a be ó lé ebaʼ Yesʉs, lé ebono bee nkʉ nye ótiʼ mʉr waa é moho saba. Bé a sa no ó, lé ejɨ buʼo nye lɔb é mbi syɛɛla nye ósa ɛ.

³ Yesʉs ze lwib e mʉr a be e mbo é fwam-fwam nɨ ó: «Cyɛba teme bʉr ba.»

⁴ Nye ntɔʼ dî e be ó: «Zê embɨa, zê ebebe, etie ga lɨna, lé lé ekamle yé é moho saba ɛ? Zê etiʼ mʉr ɛ? Zê ejʉ mʉr ɛ? Yé ndɨ kɔmlʉ?» Bɨbɛh kʉ twe é leb.

⁵ No ó nye a ze to le edwɛʼ bɨbɛh e bebebebe mih. Leme we, wé a be ó lwɨŋla e l'empime é lurʉdʉ, ebe, mɨleme myɔɔ, myé a be ó é bul lele lé ebuʼla. Nye e syoblʉ ó: «Syɛmɨ mbo.» Syoblʉ ntɔʼ syɛm mbo. Mbo, wé ntɔʼ sa nye mbɨmbɨa.

⁶ No ó oFarizyɛŋ bé e bʉr o mpoʼo Erod, bé a ze pyal kʉl, ze to diŋɔ bʉm, bé ze dîila mpʉ bé jala le ejʉ Yesʉs ɨ.

Ntuntuma bʉr lé eto beɔ Yesʉs

⁷ Yesʉs bé e l'ompʉn be ntɔʼ tuŋlɔ monyʉl, toŋɔ nkpah maŋ, ntuntuma bʉr lé eze du nye é koo pihe, baʼ bʉr lé eduho lal Galɨle; bʉʉ duho é lal Yʉda;

⁸ bʉʉ Yerʉsalɛm; bʉʉ nteme lal Idume; bʉʉ duho é pɨn Yʉrdɛŋ nkɔm-nkɛɛ; bʉʉ nteme duho é bɨnkɔra bɨ nkana Tir ndwe é byaa bɨ nkana Sidɔn. Bé a be ó si joʼo lɔɔ bɨsyɛɛla nye a dɨ sa ɛ. No ó bé a ze boo nye é buobuo.

⁹ Nye ntɔʼ lɛɛ e l'ompʉn be ó, bé bɛa saa nye byɛl nye ódi tɨʼ ɨ, lé ekpɛɛ ó, ntuntuma bʉr, yé amu jaa mana nye.

¹⁰ Bé a bul ze boo nye ó, ebe, nye a si bul tiʼ bʉr, to pyal ó, mɨsyoblʉ mimyɛh, myé a be ó lé egwɨm kuna e nye.

¹¹ Bʉr o b'a sia e bɨbɨbla mɨsisim ɨ, é jɔʼ bé a bee-bee nye e, bé a be-be ó lé ebɨʼɔ mompom mɔɔ si, le ebɨʼla kʉ kʉ ó: «Go ó Mwan mo Zyɛm!»

¹² No ó nye a cyel be mpene, adwo ba ó, bé l'anyamle lɛɛ bʉr mbi mʉr nye ndɨ ɨ.

Yesʉs lé epɛh bʉr ewʉm e l'oba

¹³ Yesʉs ze bere é l'ecwɨʼ kʉ, ntɔʼ jebe bʉr, baa nye mʉr tɨʼ a gwɨm ó, bé toʼ nko nye a be e. Bé ntɔʼ bere, to kœb nye gʉ.

¹⁴ Pie tɨ, é sama yaa tʉŋlʉ, nye ze pɛh bʉr ewʉm e l'oba. Nye a pɛh be ó, bé diʼe kunokuno e nye, le nteme, bé óto-to nye é mɨlʉmlʉ, lé eto le elɛɛ lɔɔ Zyɛm

¹⁵ e nkul edwih bʉr moleme.

¹⁶ [Esama le ompʉn ewʉm e l'oba nye a pɛh ɛ,] bé ó ba: Pyɛr—yé ó njɨblɨ nye a jwɨr Simɔn ɨ—,

¹⁷ bé e Jacques, mwan mo Zebede, bé e ncyom we Yʉanes. Nye a jwɨr bɨbɛh oba die ó, Bɔanɛgɛs. No, yé ó «Bwan mo Nkɛl-jobo».

¹⁸ Nye a si cyel é l'esama laa nteme ó, Andreas bé e Filip e Bartelemi ndwe e Mataos bé e Tomas e Jacques, mwan mo Alfe, ndwe e Tade bé e Simɔn, mʉr Kanan,

¹⁹ ka kɛl Yʉdas Iskariot, mʉr a kɛha nye e.

Yesʉs, bé e Belzebul

²⁰ Yesʉs ze bâʼle bula mbɛr, ntuntuma bʉr, yé ntɔʼ fwal tɨ. Bé e l'ompʉn be, bé a baabe ba é jɔʼ ndɨ ó, bé bɔma mbo e nʉm.

²¹ No ó bʉr o bɛn ye, bé a ze pyal, lé eze nʉŋɔ nye e nkul, bɛɛ lé elɛɔ ó: «Pɨʼ, nyi dim nye é lʉ.»

²² Bʉʉ oyeʼle o motie, bé a duho Yerʉsalɛm ɨ, bɛɛ, bé a lɛɛ ó: «Nye esia e Belzebul!» Bé nteme, bé a lɛɛ ó: «Nye e nkul edwih bʉr moleme monɨ ó, dumo e Njwɨɨ moleme!»

²³ Nye ntɔʼ jebe be nko nye a be e, ze sa be kɨkɛna ó: «Satan, nye e nkul edwih Satan nyá ɛ?

²⁴ Jwɨ̀ʼa yiyɛh bʉr o tɨʼ lé elwimla paʼra wɔɔ ɛ, yé abe e nkul ejohlo.

²⁵ Mbɛr bʉr nteme, bʉr o tɨʼ lé elwimla paʼra wɔɔ ɛ, wé abe e nkul ejohlo, nkʉ cyɛb é bɛabɛa.

²⁶ ǃƗ Satan si bɔʼa monkɔm moba, nwaʼ nkɔm ntɔʼ sa mongan e nuu nɛʼɛ, lɛɛ ó, nye abe e nkul ejohlo. Lɛɛ nteme ó, esie le, lé mu ó é nere-nere.

²⁷ «Mʉr, nye abe e nkul eni mbɛr mo njɨh mʉr, dɛn nye bɨsa bye, alaa ó nye osi taare kaʼ nye nkara mobo mo nɔn. ǃNye si taare kaʼ nye nɛʼɛ, é jɔʼ yaa ó nye ndɨ e nkul esà mbɛr we e.

²⁸ «Me elɛɛ bɨn cyecye ó nɛɛ: mɨsyem bʉr lé esa ɛ, le mpyoo bé lé esa Zyɛm ɨ, Zyɛm óbɛm pɛʼ bɨbaa nye lé eniʼe é lɔb bɨsyɛɛla byaa ɛ.

²⁹ Sa gwar, ǃɨ mʉr si pyeh Mbɨambɨa Sisim nɛʼɛ, baa ebebe Zyɛm óniʼe nye é lɔb gwìh yaa ɛ, yé aŋa pɛʼɔ. Yé ódi ó, diʼe, amboʼlonkono.»

³⁰ Yesʉs a lɛɛ no ó, ebe, bé a lɛɛ ó: «Nye e bɨbla sisim!»

³¹ Bé dina tina nɛʼɛ, nyɔŋ mo Yesʉs bé e l'obɨɔ be, ntɔʼ ze pyal, cyɛbɔ kʉl, ntɔʼ lomɔ mʉr ó, nye toʼ, to jebe be Yesʉs.

³² Ntuntuma bʉr, yé a be ó ndindil, bʉmra nye é nka. Bé e Yesʉs ó: «Mbe: nyʉŋ bé e l'obɨʉ [ndwe e l'okɛlbo], bé ó kaʼ kʉl lé esaa go!»

³³ Yesʉs ntɔʼ bɨha e be ó: «Zé ndɨ nyɔŋ wam? Ozé ndɨ obɨɔ bam?»

³⁴ Nye ntɔʼ dwɛʼ bʉr o b'a be ondindil, bé a bʉmra nye é nka ɛ. Nye ó: «Mbe ga: baʼ ó ndɨ nyɔŋ wam e l'obɨɔ bam!

³⁵ Mʉr nyiwɛh lé esa sa Zyɛm lé egwɨm ɨ, nye ó ndɨ mɨɔ wam, kɛl wam ndwe e nyɔŋ wam.»