Lʉkas 8 - Kálara Zyɛ̌m Edwán é mpʉ̌n

Bʉba bé eliʼle Yesʉs ɨ

¹ Pie tɨ, Yesʉs ze to le etiʼbe bɨnkana e bɨnkana byɛh e mokwar e mokwar mɛh, lé eto le elɛɛ Mbɨambɨa Lɔɔ lé etiibe e jwɨ̀ʼa mo Zyɛm ɨ.

² Esama e bʉr ewʉm e l'oba, bé e bʉba nye a dwih moleme ba ó nye a be-be. Bʉʉ, bé a be-be ó mɨsyoblʉ, nye ntɔʼ tiʼ be. É sama bʉba baa, yé a be ó e Maaria, sile Magdala, waa a dwihɔ moleme tambɛl ɨ,

³ bé e Yʉana, myaa mo Kuza, mbɔʼlʉ ekuro mo njwɨɨbʉr Erod Antɨpas. Yé a be nteme ó e Susana, le bʉʉ bʉba é buobuo bé a sea e bʉr o nduo yɔɔ e mobi mɔɔ ɛ.

Kɨkɛna mbèl mompœʼ

⁴ Bʉr, bé a be-be ó lé etɨbla é bɨnkana byɔɔ, lé eze bee Yesʉs. Mpʉ yʉʉ ntuntuma bʉr, yé a fwal no e, nye ze sa be kɨkɛna yi:

⁵ «Yé a ze be ó, nuu mbèl mompœʼ ze to myɛʼ mompœʼ é modiʼe mo peme ye. Mpʉ nye a to le emyɛʼ mompœʼ peme e peme e, wiʼ paʼ mompœʼ ze to le ekur é kakoo, bʉr ntɔʼ tíile me é mobò mɔɔ si, bɨnɔn fulo, ze sil tor mompœʼ maa.

⁶ Guu paʼ mompœʼ kur é bah ekoʼ. É jɔʼ mompœʼ maa, mé a pah ɨ, mé ze dwɛhla, ato ká ká, ebe, modibe, mé a baabe tɨ.

⁷ Guu paʼ mompœʼ nteme ze kur é mɨndwinʉ. Mompœʼ ze pah, bé e mɨndwinʉ ze gwɨe sama. Mɨndwinʉ ze kaʼ mɨpɛha mompœʼ myaa, myé ntɔʼ lire.

⁸ Dam be no, guu paʼ mompœʼ wɛɛ, wé a si kur é si mocyɛʼ. Mompœʼ maa ze gwɨe le egumo mpumo. Etin egwar gumo mpumo nter.» É jɔʼ Yesʉs a sil lɛɛ be no e, nye ze lwib e be lé eyɨm twii ó: «Mʉr ndɨ e mogwal mo ejoʼo e, nye joʼa naa.»

Ebe yé Yesʉs lé elwib é zi bɨkɨkɛna?

⁹ Ompʉn be ntɔʼ dî e nye ó: «Kɨkɛna nɨ, yé elɛɛ é yé?»

¹⁰ Yesʉs ntɔʼ bɨha ó: «Bɨn ó Zyɛm a gwih lwib odim lé etiibe e jwɨ̀ʼa ye e, ó bɨn gʉŋa ye é kpɛhla. Sa gwar, bʉr ofih bɛɛ, bé ekʉ ka gʉa joʼo ó njɨ é zi bɨkɨkɛna é l'efu ó, mokan mo Kalara Zyɛm, mé dira. Yé ó tila ó: “Bé ósyɛm mih é jɔʼ yiyɛh; sa gwar, bé aŋa gʉa bee. Bé óceŋle mogwal, abi ba pɨʼ.”

¹¹ «Kɨkɛna nɨ, yé elɛɛ ó é mbi wi: Mpœʼ, yé ó lɔɔ Zyɛm.

¹² Maʼ mompœʼ, mé a kur ó, é l'empàh e zi, sa nɨ lé edweʼle bʉr o b'a joʼo lɔɔ Zyɛm ɨ. Njwɨɨ moleme ntɔʼ ze, ze pɛʼ be wa é mɨleme, lé ekamle be lé ebuʼla we, nkʉ bi tiʼ molu mo mpoʼ mɨmɛh.

¹³ Mʉʉ mompœʼ, mé a kur ó, é bwah yé a be é bah ekoʼ kʉ ɨ, sa nɨ lé edweʼle bʉr o b'a joʼo lɔɔ Zyɛm e bɨsʉhʉ é jɔʼ bé a jà we e. Sa gwar, bé a baadib lɔɔ waa zi ó, wé niʼe be é mɨleme tʉŋlʉ. Bé a kʉ ka buʼla we ó njɨ é ma jɔʼ, bʉr, bé ze tíile be é lɔb buʼo yɔɔ, bé ntɔʼ kaŋa e lɔɔ waa.

¹⁴ Mʉʉ mompœʼ nteme, mé a kur ó, é bwah yé a be e mɨndwinʉ ɨ, sa nɨ lé edweʼle bʉr o b'a joʼo lɔɔ Zyɛm ɨ. Sa gwar, bé a be ó lé eyeʼbe bɨsa bɨ jobo yi, le okum e l'ogbaa ndwe e bɨgwɨma bɨ tiʼ yi. Bɨsa byaa, byé a be ó be é mɨleme é larada, bé l'abe e nkul eka gumo mɨmpaŋ mɨ mpumo é bɨtiʼ byɔɔ.

¹⁵ No ó mʉʉ mompœʼ mɛɛ, mé a kur ó, é si mocyɛʼ, sa nɨ lé edweʼle bʉr o b'a be e mɨmpaŋ mɨleme. É jɔʼ bé a joʼo lɔɔ Zyɛm ɨ, bé a si baʼle we é mɨleme myɔɔ le egumo mpumo é bɨtiʼ byɔɔ, ndwe le esa bihbe.»

Kɨkɛna elama

¹⁶ «Mʉr, nye abe lé etumo elama é l'efu le ebur le é kaʼ tʉŋlʉ. Mʉr, nye abe e nkul eto cyel twima elama é duo si. Nye ócyel le ó, é cye elama kʉ é l'efu ó, bʉr bé óni tɨʼ ɨ, diʼe é myɛn.

¹⁷ Yé abe e sa ndɨ fela ɛ, yé óbe, agwiha kʉl. Yé abe e sa ndɨ mʉr é mo si ɨ, yé óbe, agʉŋɔ, ntɔʼ nyin é bʉr é kpɛŋlɛm ɨ.

¹⁸ Ebe no, gʉa dwɛʼ ga mbi bɨn ndɨ ejoʼlo e. Mʉr ndɨ e tɨʼ ɨ, nye óbâʼle bul dweŋɔ. To kœb ó, waa ndɨ tɨtoʼo e, nye ópɛʼɔ ma bim nye ndɨ egʉa ó, nye e tɨʼ ɨ.»

Nyɔŋ ndwe e l'obɨɔ mo Yesʉs

¹⁹ É lʉʉ dobo, nyɔŋ mo Yesʉs bé e l'obɨɔ be, bé a si to lé eto bee nye, ntɔʼ kœbɔ nye. Bé a be yɛɛ ó, akumo nko nye a be e, é lɔb mpuo bʉr.

²⁰ Bʉr ntɔʼ lɛɛ Yesʉs ó: «Mbe: nyʉŋ le obɨʉ, bé ó kaʼ kʉl lé egwɨm bee go.»

²¹ Yesʉs ntɔʼ lɛɛ e bʉr bɨbɛh ó: «Nyɔŋ wam bé e l'obɨɔ bam, bé ó baa lé ejoʼo lɔɔ Zyɛm le edu we e.»

Yesʉs lé ebâm e nkuo

²² É lʉʉ dobo, Yesʉs bé e l'ompʉn be, ze kable é byɛl. Nye ó: «Ncʉʼ ga. Bɨna ntaŋa ga maŋ, to é l'ebʉm e maŋ e nkɔm-nkɛɛ.» Bé ze tɨ cyen.

²³ É jɔʼ bé a be lé eto le ekœʼ cyen é byɛl ɨ, Yesʉs ze to é dwo. Nkuo kʉ ze taare lé ekuulo é maŋ. Byɛl wɔɔ ntɔʼ taare lé eloŋlo e modibe, wé mu lé edɨ. Bé a be ó é nkpah ebebe.

²⁴ Ompʉn be, ntɔʼ dihle nko nye a be e, jɨmɔ nye. Bé e nye ó: «Da, Da! Bɨna muno ze dwè ga!» Yesʉs ze mʉa si, bâm e nkuo e l'oboʼo o maŋ. Byé ze tala. Tɨʼ mu é myeeŋ.

²⁵ Yesʉs, nye e l'ompʉn be ó: «Buʼo yin, yé nko?» Bé ze joʼo bʉa le ejehe nye é buobuo, ntɔʼ lɛɛla paʼra wɔɔ ó: «Wáa mbi mʉr wi, waa ndɨ, ǃnye si gba twii mojwɨʼa nɛʼɛ, nkuo le modibe mo maŋ, byé ebana sa nye mojoʼo nwa?»

Yesʉs lé efo moleme

²⁶ Bé ze kœʼ cyen é byɛl, to kumo é lal Gerazen. (Ebʉm e lal waa, lé ó mbɨembɨe e laa é lal Galɨle.)

²⁷ Pie Yesʉs a kʉ fulo é byɛl, cyɛb é pɨn, nuu mʉr nkana yaa ntɔʼ to bɔma e nye, mʉr waa e moleme. Nyɛɛ a di-di ó, abe e kan nkʉ ndwe, adi nteme é mɨmbɛr mɨ bʉr. Nye a di-di ó, njɨ mbaa mofoo.

²⁸ No ó mbea nye a bee Yesʉs ɨ, nye ntɔʼ bahle nkœme, to bɨʼ mpom we si é mih me, ntɔʼ behe Yesʉs. Nye ó: «Yesʉs, Mwan mo Zyɛm ndɨ Lʉ bɨsa bibyɛh nya ɔɔ! Go esaa yé e me ɛɛ? Me ejwɨʼla e go: adwe me ntɨʼa ɔɔ!»

²⁹ (Nye a lwib no ó, ebe, Yesʉs a be ó si lɛɛ bɨbla sisim yaa ó, yé duha mʉr waa é nyʉl. Yé a be ó lé ebɛa mɛr nye zɔʼ e zɔʼ. Bʉr o kwar waa bɛɛ, bé a be ó lé ekaʼ-kaʼ nye mobo e mokʉ e mɨkʉkob, lé egwɨm baʼle nye. Dam be no, nye a be ó lé ebana tɨ-tɨ mɨkʉkob myaa. Eleme laa ze to le edaʼre nye é bɨlʉn.)

³⁰ Yesʉs ntɔʼ dî e nye ó: «Die lo, lé zé?» Nye ntɔʼ bɨha e nye ó: «Daa-e-moleme!» (Nye a lwib no ó, ebe, moleme é buobuo, mé a si bɛa ni nye é nyʉl.)

³¹ Moleme maa ze jwɨʼla e Yesʉs ó, nye l'aka gba twii mojwɨʼa, ó mé kaʼ to ó é Bɨ-siʼe.

³² Naa yé a be ó e daa le onkʉ, lé a be lé eto le ede mode mɔɔ é l'ecwɨʼ ɨ. Moleme maa ntɔʼ jwɨʼla e Yesʉs ó, nye mɛʼla ó, mé toʼ, to ni é monyʉl mo onkʉ baa tʉŋlʉ. Nye ntɔʼ mɛʼle ó, mé saʼ no.

³³ No ó moleme, mé a ze duho é nyʉl mo mʉr waa, ntɔʼ to ni é monyʉl mo onkʉ. Daa le onkʉ ze fulo ecwɨʼ. Ecwɨʼ laa, lé a be nteme ó akoo. Mpululu, to lʉŋa é maŋ, bɨbɛh sie lé edwè.

³⁴ É jɔʼ obɔʼlʉ be onkʉ, bé a bee syɛɛla yaa ɛ, bé ntɔʼ kpɛɛ, to e lɔɔ waa nkana, e mompɔ́ɔ́ e mompɔ́ɔ́ mɛh.

³⁵ Bʉr ntɔʼ tɨbla é mokwar mɔɔ, lé eze beɔ sa syɛɛlɨ ɨ. É jɔʼ bé a pyal gumo Yesʉs a be e, bé a kʉ kœb ó, mʉr a dwihɔ moleme e, nye mu ndindil e mɨkan é nyʉl, e pɨʼ we nyiwɛh. Nye a be ó é nkpah mokʉ mo Yesʉs. Bʉr o b'a ze e, kʉ ze jehɔ nye.

³⁶ Bʉr o b'a bee syɛɛla yaa ɛ, ze taŋle baa b'a ka dɨ pyal ɨ, mpʉ mʉr a taare sia e moleme waa ɛ, a ka tiʼe e.

³⁷ No ó, bʉr o lal Gerazen bɨbɛh ze jwɨʼla e Yesʉs ó, nye duha é fum bé a be e, ebe, bɨbɛh, bé a be ó si bil ekɛn é syɛɛla yaa. Yesʉs ntɔʼ kable é byɛl, ó nye fiʼ be.

³⁸ Mʉrʉm Yesʉs a dwih moleme é nyʉl ɨ, ze jwɨʼla e Yesʉs ó, bé e boo nɔɔ, bé kaʼ di-di sama. No ó Yesʉs a ze buulo nye. Nye e nye ó:

³⁹ «Toʼ kwar go. Go à taŋle sa yiyɛh Zyɛm sa go e.» No ó mʉr nɨ a ka ze to le elɛɛ lɔɔ waa é nkana yaa yiyɛh, le etaŋle sa yiyɛh Yesʉs a sa nye e.

Yesʉs lé etiʼ mwan mo Yarwis

⁴⁰ É mpula lal Gerazen nɛʼɛ, ntuntuma bʉr, yé ze nʉa nye e bɨsʉhʉ, ebe, yé a be ó lé ebono nye.

⁴¹ Nuu mʉr a be die ó, Yarwis ɨ, a be ó tamamʉr é mpah mɨnjwɨʼla wɔɔ. Nye ze pyal, ntɔʼ bɨʼ mpom we si é mokʉ mo Yesʉs, ze jwɨʼla e nye ó, bé e boo nɔɔ toʼ mbɛr we,

⁴² ebe, esehe le, mɨmbu ewʉm e mɨmba, lé a be nye etiʼe e mwan ɨ, lé a be ó, lé mu tiʼ le efie. Bé e Yesʉs mu lé eto nɛʼɛ, ntuntuma bʉr, yé kʉ ze mana nye é mompàh mo nyʉl.

⁴³ ǃBé mu zi e zi nɛʼɛ, nuu mʉma ntɔʼ pyal. Nye a be ó syoblʉ, motié lé esolo-solo nye é nyʉl. Yé a be ó, nye osi baran e l'esyɛb laa tɔɔ mɨmbu ewʉm e mɨmba ɛ, si sil mobi me mɨmɛh é pe lé esaa dʉm, akœb mʉr tiʼ nye.

⁴⁴ Nye ntɔʼ pyal Yesʉs pie koo, ze dihle kunokuno e nye, cen mbo, kuna e mozeʼle mo kan we. Cye e cye yaa, esyɛb laa, lé ntɔʼ sie lɨlɛh é jɔʼ gwar.

⁴⁵ Yesʉs ntɔʼ dî ó: «Eʼ! Zé kuna e me?» Bʉr bɨbɛh ntɔʼ kɛla. Pyɛr, nye e nye ó: «Da, mpuo bʉr lé ebʉmra go é nka nwa, nye emana go é mɨpaʼ mimyɛh!»

⁴⁶ Yesʉs ntɔʼ lɛɛ ó: «Nuu mʉr be ó si kʉ kuna e me, ebe, mɨ jʉʼra nkul lé eduho me é nyʉl.»

⁴⁷ Mʉma waa, mpʉ nye a gʉa ó, nyi gwiha ɛ, nye ntɔʼ ze, le esaʼ é ngba-ngba-ngba, ze bɨʼ mpom we si é mih mo Yesʉs. Nye ntɔʼ gwih é kpɛŋlɛm é mih mo bʉr bɨbɛh sa yé a sa ó, nye kuna e nye e, le elɛɛ be é mbi esyɛb le, lé a sie é kɛŋ ɨ.

⁴⁸ Yesʉs ntɔʼ lɛɛ e nye ó: «Mwan wam, buʼo yo, yi tiʼ go! Toʼ é motala.»

⁴⁹ Yesʉs dina lé elwib no nɛʼɛ, nuu mwa mɨlʉmlʉ ntɔʼ pyal, duho mbɛr mo Yarwis, njwɨɨ mpah mɨnjwɨʼla. Nye e Yarwis ó: «Sile go, wi dime mih. Aka ntɨʼ yeʼle mbɛh.»

⁵⁰ Mpʉ Yesʉs a be si joʼo sa mʉr waa a lɛɛ ɛ, no ó nye a ze lɛɛ e Yarwis ó: «Ajoʼo bʉa. Toʼ dolo njɨ lé ebuʼla. Mwan go ótiʼe.»

⁵¹ Pyala bé a pyal mbɛr ɨ, Yesʉs ntɔʼ kamle bʉr lé eni mbɛr. Nye a kʉ ka niŋle ó njɨ Pyɛr, Yʉanes, Jacques, ndwe e sɔŋ e nyɔŋ mo mwan waa.

⁵² Bʉʉ bʉr bɛɛ, bé a be ó lé ebʉ modwe le ebʉ bɨtim é l'efie laa. Yesʉs ntɔʼ lɛɛ e be ó: «Daʼ jɨ ga, ebe, nye adwè. Nye é dwo.»

⁵³ Bé kʉ ze dwo nye é cacaca le esoŋlɔ nye, ebe, bé a be ó si kʉ gʉa ó, nyi dwè cyecye.

⁵⁴ Yesʉs ntɔʼ mɛr mwan waa é mbo, ndwe le elwib e nye lé eyɨm twii ó: «Ma esehe, mʉŋa si.»

⁵⁵ Sisim mo mwan, wé ntɔʼ to bula, bâʼle ze nye é nyʉl. Cye e cye yaa, nye ntɔʼ mʉa si. Yesʉs ntɔʼ lɛɛ ó, bʉr dweʼ nye sa ede.

⁵⁶ Obyɛl be kʉ ze jehe syɛɛla yaa. Yesʉs ntɔʼ cyel be mpene ó, bé l'alɛɛ mʉr sa syɛɛlɨ ɨ.