Lʉkas 5 - Kálara Zyɛ̌m Edwán é mpʉ̌n

Yesʉs lé ejebe ompʉn be efoʼ be

¹ É lʉʉ dobo, Yesʉs a si to cyɛb é l'ebʉm e maŋ mo Genezarɛt. No ó ntuntuma bʉr, yé a ze mana nye. Bé a ze ó lé eze joʼo lɔɔ Zyɛm nye a dɨ lɛɛ ɛ.

² No ó nye a ze bee mɛl moba mɨsyela é pɨn. Olɛa be okʉa, bé a si fulo é mɛl maa. Bé a be ó, bé mu lé esyɛʼrɔ okʉa bɔɔ.

³ No ó Yesʉs a ze kable é guu byɛl, waa mo Simɔn. Nye ntɔʼ jwɨʼla e nye ó, bé cɛra ba e pɨn. Nye ntɔʼ di ndindil é byɛl, ze taare lé eyeʼle ntuntuma bʉr.

⁴ É jɔʼ nye a be si sil yeʼle be e, nye e Simɔn ó: «Dihla byɛl ba dolo, gumo ndɨ é dime e. Bɨn e bʉr o nduo yo, bɨn laʼ okʉa bɨn tɨ.»

⁵ Simɔn ntɔʼ bɨha e nye ó: «Da, bɨh bɨ bee tuu lé ela okʉa é modibe maŋ pum ntinɨ, luʼo le ebee fu ngwar lé ekwɨa tɨ. Dam be no, me paʼ bâʼle la be ebe lɛa go.»

⁶ Bé ze la okʉa, ofu kʉ ze kwɨa tɨʼ é buobuo, okʉa dɨ nyɛɛ.

⁷ Bé ntɔʼ kwab bʉr o nduo yɔɔ bé a be é guu byɛl ɨ, ó bé ntaʼ, ze kœb be lé edulo okʉa é modibe maŋ. Bé ze pyal, kœbɔ be. Ofu bé a pɛʼ é l'okʉa ɛ, bé a be ó si loŋlo mɛl moba maa. Mé ntɔʼ taare lé edɨ e modile mo mpuo ofu.

⁸ É jɔʼ Simɔn Pyɛr a bee syɛɛla yaa ɛ, nye ntɔʼ kur moboo si é mih mo Yesʉs. Nye e nye ó: «Da, diʼe é ncɛra e me, ebe, me ó mʉrʉm ndɨ syɛl mɨsyem ɨ.»

⁹ Simɔn a be ó lé ejehe bim ofu bé a jʉ ɨ, bé e bʉr o bé e boo nɔɔ, bé a be e.

¹⁰ Jacques bé e Yʉanes, bwan mo Zebede, ndwe e Simɔn, bé a be ó e mpaʼra wɔɔ. Bé nteme, bé a be ó é jehe. Yesʉs ze lɛɛ e Simɔn ó: «Ajoʼo bʉa. Taare é banana, go óka dulo ó bʉr.»

¹¹ No ó bé a ze syel mɛl mɔɔ é pɨn, ze liʼe bɨsa byɔɔ bibyɛh, ntɔʼ duŋɔ nye.

Yesʉs lé etiʼ zɨzam

¹² É jɔʼ Yesʉs a be é yʉʉ nkana ɛ, nye ze bɔma e nuu mʉr, zam é nyʉl é korodo. Mbea nye a kʉ bee Yesʉs ɨ, nye ntɔʼ bɨʼ mpom we si, ze jwɨʼla e nye ó: «Da, ǃgo si mɛʼle nɛʼɛ, go óbɛm pɛʼ me esyɛb lɨʼ é nyʉl, sa ndɨ elœʼ me é mih mo Zyɛm ɨ.»

¹³ Yesʉs ntɔʼ syɛm mbo, ntɔʼ kuna e nye. Nye e nye ó: «Mɨ mɛʼle! Sa ndɨ elœʼ go é mih mo Zyɛm ɨ, yi pʉʼa go.» Cye e cye yaa, zam ntɔʼ sie nye é nyʉl!

¹⁴ Yesʉs ntɔʼ cyel nye mpene ó, nye l'anyamle lɛɛ mʉr mpʉ nye a tiʼe e. Nye e nye ó: «Toʼ, to lɛʼle para nyʉl go, mpʉ nye mu ɨ. Go toʼ, to dwe mɨndwɛa Moyiz a lɛɛ ó, go lɛʼla be, bé nkʉʼ pubo go e. Yé ósa ó, bʉr gʉŋa ó, gɨ tiʼe.»

¹⁵ Dam be mpʉ Yesʉs a lwib no e, lɔɔ we ntɔʼ ze myɛma, to pyal é jɔʼ ntuntuma bʉr, yé a fwal, lé eze joʼlo lwib mo Yesʉs, le eze jʉmba mosyɛb mɔɔ ɛ.

¹⁶ Sa gwar, Yesʉs a be ó si dulo nyʉl we, ze to é lʉn, to jwɨʼla e Zyɛm.

Yesʉs lé etiʼ mbʉmbʉʼ

¹⁷ É lʉʉ dobo, Yesʉs a be ó lé eyeʼle ntuntuma bʉr. OFarizyɛŋ bé e l'oyeʼle o motie, bé a be ó tɨʼ nteme é ntuntuma bʉr yaa, ondindil. Bʉr onɨ, bé a duho ó, é mokwar mɨmɛh mo Galɨle le Yʉda; baʼ duho nteme Yerʉsalɛm. Yesʉs a be ó e nkul mo Da é l'efu ó, nye tiʼɨ mɨsyoblʉ.

¹⁸ No ó bʉʉ bʉrʉm, bé a ka ze pyal nye e mbʉmbʉʼ mʉr, wé ndɨ mbwamle é tɔɔ. Bé ze jwɨʼla saa ekpahla e syoblʉ wɔɔ é mih mo Yesʉs, é saa saa, abee.

¹⁹ No ó mpʉ bé a baabee gumo bé cwɨŋɨ é lɔb mpuo bʉr ɨ, bé ntɔʼ ze bere é mie kʉ, é mbɛr Yesʉs a be e, tubɔ egʉa é mie, ntɔʼ filɔ tɔɔ syoblʉ wɔɔ tɨʼ é l'egʉa laa. Syoblʉ wɔɔ ze fulo é ntiii, pyal é mih mo Yesʉs, kʉ be teme bʉr.

²⁰ Mpʉ Yesʉs a bee mpʉ bé a jyɛʼ taa buʼo yɔɔ boo nye e, nye e nye ó: «Wɛɛ, bɨbaa bɨ ebebe byo, bi pɛʼɔ!»

²¹ No ó, oyeʼle o motie bé e l'oFarizyɛŋ ze taare lé elwibla é mɨleme myɔɔ ó: «Mʉr waa lé ekʉ pyeh Zyɛm nwa, nye zé? Zé ndɨ e nkul epɛʼ bɨbaa Zyɛm lé eniʼe bʉr é lɔb mɨsyem myɔɔ ɛ? Njɨ Zyɛm nye ome!»

²² Sa gwar, Yesʉs a be ó lé edweʼe bɨjwɨʼ bé a be e bye é mɨmo si ɨ. No ó nye a nʉa lwib, ze dî e be ó: «Wáa mbi mosono ndɨ bɨn é mɨleme bim yiʼ mpʉʼ ɨ?

²³ Yé ndɨ é kunbo lé esa? Zê yé é kunbo ó, go lɛŋɨ mʉr ó: “Bɨbaa bɨ ebebe byo, bi pɛʼɔ” ɛ? Zê yé é kunbo ó, go lɛŋɨ nye ó: “Mʉŋa si, laŋa” ɛ?

²⁴ Sa gwar, me muno ze lɛʼle bɨn dweʼle ó, Mwan mo Mʉr ó ndɨ e nkul mojwɨ̀ʼa é si nwaʼ é l'efu ó, nye pɛʼɛ bʉr bɨbaa Zyɛm lé eniʼe é lɔb mɨsyem myɔɔ ɛ.» Nye ze lɛɛ e mbʉmbʉʼ ó: «Me lɛɛ e go ó: Mʉŋa, nkɛŋɨ tɔɔ go. Go à to kwar go.»

²⁵ Cye e cye yaa, mʉr nɨ ze mʉa si, bʉr bɨbɛh lé ebee, ntɔʼ nkɛɛ tɔɔ nye a dɨ nkɛɔ tɨʼ ɨ, ntɔʼ to mbɛr we, to le edwiibɨ Zyɛm.

²⁶ Bʉr bɨbɛh, bé a si jehe syɛɛla yaa, ntɔʼ dwiibɨ Zyɛm, le ebil ekɛn. Bé ó: «Bɨna bɨ bee ga bɨsa bɨ jehe muh!»

Yesʉs lé ejebe Levi

²⁷ Pie tɨ, Yesʉs ze fuuba e nuu nwɨa tœa ndindil é gumo nye a dɨ nʉa tœa ɛ, die le Levi. Nye e nye ó: «Duʼo me.»

²⁸ Levi ntɔʼ mʉa si, liʼe bɨsa bye bibyɛh, ntɔʼ taare lé edu nye.

²⁹ No ó Levi a ze cyel sa nɨnɨ dina lé esoho Yesʉs é mbɛr we. Nye a si baŋle buobuo onwɨa o tœa bé e bʉʉ bʉr ofih. Bé a be ó lé ede, bé e boo nɔɔ.

³⁰ OFarizyɛŋ bé e l'oyeʼle o motie bé e boo nɔɔ, bé a be nkɔm ngwar ɨ, bé ze taare lé etooro ompʉn mo Yesʉs, le elɛɛ ó: «Ebe yé bɨn lé emɛʼle lé ede mode le enyʉl monwoʼ, bɨn lé epuhba mobo e l'onwɨa o tœa ndwe e bʉr o ndɨ é bul jwɨ̂ʼlɨ e mɨsyem ɨ?»

³¹ Yesʉs, nye e be ó: «Mɨnjɨh, myé ajɨ ejʉmba boo dɔbra. Mɨsyoblʉ myé ome ó lé ejɨ dʉm.

³² Me a baaze jebe ocɨcyel o bʉr. Me a ze jebe ó osyɛl o mɨsyem, ó bé gwɨma mobebe mɔɔ, le edwir mɨleme.»

Eti mode

³³ Bʉʉ bʉr, bé a si dî e Yesʉs ó: «Ompʉn mo Yʉanes bé e l'oFarizyɛŋ, bé etil-ti mode ndwe le ejwɨʼla e Zyɛm. Sa gwar, baa bo, bé ede mode le monwoʼ, ati mode.»

³⁴ Yesʉs, nye e be ó: «É jɔʼ mbœm mʉma lé ecyel zɔɔ ɛ, zê bɨn bé lé ejwɨʼ ó, bɨn bé óbɛm til ofo mo mbœm mʉma mode, nye dina tɨʼ é duò zɔɔ ɛ? Tɨtoʼo!

³⁵ Yé ópyal jɔʼ ndɨ ó, mbœm mʉma óze pɛʼɔ é sama yɔɔ ɛ. É molu maa ó bé óti mode e.»

Kɨkɛna edwan e kan ndwe e modwan monwoʼ

³⁶ No ó nye a lwib e be é zi bɨkɨkɛna. Nye ó: «Kan dwan, wé abe lé enyaŋɔ é l'efu ó, mʉr nʉŋa peh kan dwan waa, ntɔʼ larɔ é mbor kan. ǃƗ mʉr ósa no nɛʼɛ, nye óbe ó si lɨr kan dwan waa. Njʉ̌m kan, wé aŋa jʉʼa e l'ebaga lé a duho é kan dwan ɨ.

³⁷ «No nteme, bé abe lé elwan modwan monwoʼ é mɨnjʉ̌m bɨntaʼ ndɨ mɨsɛa e bɨkʉr bɨ otir ɨ. ǃBé si sa no nɛʼɛ, é jɔʼ monwoʼ maa, mé ógubla ɛ, mɨnjʉ̌m bɨntaʼ byaa, byé ódɨ tʉl, monwoʼ swɨɨ si, bɨntaʼ dwè ntuʼ.

³⁸ Bé elwan modwan monwoʼ ó, é bɨntaʼ ndɨ modwan ɨ.

³⁹ Mʉr mu si nyʉl monwoʼ momya ɛ, nye ákwoʼ ka kpɛl de maa modwan. Nye ólɛɛ ó: “Maa momya ó ndɨ é mbɨa.”»