Lʉkas 22 - Kálara Zyɛ̌m Edwán é mpʉ̌n

Bʉm ejʉŋɔ Yesʉs

¹ No ó ebʉʼ e Bɨbler ndɨ ebubɔ, agbaŋɔ levure ɨ, laa ndɨ e die ó, Paska ɛ, lé a be ó, lé mu kunokuno le epyal.

² Ojwɨɨ be opara bé e l'oyeʼle o motie, bé a be ó lé ebà bɨjwɨʼ bɨ ejʉ Yesʉs. Sa gwar, abe é kpɛŋlɛm, ebe, bé a be ó lé ekpɛɛ bʉr o lal.

³ Yʉdas a be ó é l'Esama le ompʉn ewʉm e l'oba, nyɛɛ mʉr a jebɔ-jebɔ ó, Iskariot ɨ. Satan ze ni nye é leme.

⁴ Nye ze to boo ojwɨɨ be opara bé e l'ojwɨɨ o bɨpulʉm bɨ Mpah Zyɛm, ó nye kɛha ó be Yesʉs. Bé e boo nɔɔ ze di bʉm, bòno pɨʼ é mpʉ nye a jala le esa ɛ.

⁵ No ó bé a ze bul soho. Bé ntɔʼ di twii ó, bé ójɛna nye syɛɛla yaa, dwe nye mɔn.

⁶ Yʉdas nyɛɛ ntɔʼ mɛʼle, ze taare lé esaa mpaŋ jɔʼ ekɛha Yesʉs. É mbea we, mpaŋ jɔʼ, yé e nkul ebe ó, njɨ é jɔʼ ntuntuma bʉr, yé óbe, apa fwal gumo Yesʉs óbe e.

Nkomlo mode mo Paska

⁷ Yé a be ó, yé mu moho ebʉʼ bwa b'Ɨzraɛl, bé a dɨ de bɨbler ndɨ ebubɔ, agbaŋɔ levure ɨ. Dobo laa ó bé a dɨ jʉ bwa o bɨntœme bɨ Paska tɔɔ motwina ɛ.

⁸ Yesʉs ze lomo Pyɛr bé e Yʉanes. Nye ó: «Toʼ, to komlo bɨna ga mode mo Paska bɨna bé óde ga ɛ.»

⁹ No ó bé a ze dî e nye ó: «Go ekpɛl ó, bɨh komla mode maa nko?»

¹⁰ Yesʉs, nye e be ó: «Mbe ga: bɨn bé óto nkana. É jɔʼ bɨn bé ópyal ɨ, bɨn bé óbɔma e mʉr lé enkɛɛ kaʼ modibe. Duʼo ga nye, to pyal é mbɛr nye óni ɨ.

¹¹ Bɨn bé òlɛɛ e mʉr mbɛr ó: “Yeʼle dî ó: Tiʼe ojyoo bɨh e l'ompʉn bam, bé óde mode mo Paska tɨʼ ɨ, yé nko?”

¹² Nye ólɛʼle bɨn toloŋo mbɛr we, e tiʼe é bwaʼbwaʼ é cye mba. Bɨn bé ókœb ó, yé mu kwɨmla, e l'oteble le bɨdia tɨʼ mɨcyela. Tɨʼ ó bɨn bé ókomlo mode mo Paska ɛ!»

¹³ Bé ntɔʼ to, to kœb sa yiyɛh mpʉ nye a lɛɛ be e, ntɔʼ komlɔ mode mo Paska.

Mode Da Yesʉs lé edwe ompʉn be e

¹⁴ É jɔʼ ewala le edɨɨ, lé a pyal ɨ, Yesʉs bé e mɨlʉmlʉ mye ze diŋɔ si é teble.

¹⁵ Yesʉs ntɔʼ lɛɛ e be ó: «Me ebul laŋle gwɨm ó, bɨna deʼ ga mode mo Paska maʼ gumo gwar, cye yiyɛh me l'apa sia e mɨtuu ɨ,

¹⁶ ebe, me elɛɛ bɨn ó nɛɛ, me aŋa ka bâʼle de me ndɨa fih, to pyal é jɔʼ ndɨa lé etaare é muh é dobo lɨʼ ɨ, wé ólwɨŋlɨ é jwɨ̀ʼa mo Zyɛm ɨ.»

¹⁷ Yesʉs ze nʉa bele monwoʼ mo rezɛŋ, ntɔʼ dwe Zyɛm ekiba é lɔb monwoʼ maa. Nye ze lɛɛ e be ó: «Nʉŋa ga bele yi. Bɨn bé à kabla monwoʼ mo tɨ, bɨn bɨbɛh,

¹⁸ ebe, me elɛɛ bɨn cyecye ó nɛɛ: me aŋa ka nyʉl monwoʼ ma, taare é banana, to pyal é jɔʼ Zyɛm ócyel jwɨ̀ʼa ye cyecye e.»

¹⁹ Nye ze nʉa bler, ntɔʼ dwe Zyɛm ekiba é lɔb we, ze pɛ̂ʼ ye bɨpeh, dwe be bya. Nye e be ó: «Nyʉl wam ó nwa, waa mu si dweŋɔ, jala e bɨn ɨ. Bɨn bé óto le esa syɛɛla yiʼ bɨjɔʼ bibyɛh, lé etoŋlo me.»

²⁰ Jwɨʼ gwar yaa, é jɔʼ bé a sil de e, nye ntɔʼ bâʼle dwe be bele monwoʼ mo rezɛŋ. Nye ó: «Bele monwoʼ yi, yé elɛʼle edwan e mpʉn Zyɛm lé ede e bʉr é zi motié mam, maa lé eswɨɨ si ebe bɨn ɨ.

²¹ To kœb ó, mʉr lé ekɛha me e, nye ó ndɨ waa bɨh e nɔɔ lé ede wâʼ é teble e.

²² Yé ó no: Mwan mo Mʉr ódwè mpʉ Zyɛm a bɛa tiile, tiibe e nye e. Sa gwar, a vwaʼ e mʉr ókɛha nye e!»

²³ Bé ze to le etimle lɔb waa paʼra wɔɔ, lé esaa egʉa mʉr sama yɔɔ a be ó, bɛm sa mbi syɛɛla yaa ɛ.

Filɨ ga monyʉl si paʼra win

²⁴ Mɨlʉmlʉ mo Yesʉs ntɔʼ taare lé epɨra mokan paʼra wɔɔ, lé edɨ gʉa mʉr a be lé elaa bʉʉ bɨbɛh é mpwaʼ nkʉŋ ɨ.

²⁵ Yesʉs ntɔʼ lɛɛ e be ó: «Bʉr o ndɨ mɨnjwɨɨbʉr é byʉʉ bɨkul ɨ, bé elɛʼle bʉr mpel é bebebebe. Dam be no, bʉr onɨ, bé ebana seʼlɔ, bʉr dɨ lɛɛ ó, bɛɛ ó lé efuʼo lal.

²⁶ Sa gwar, paʼra win, mʉr lé elaa bɨn bɨbɛh ɛ, nye abe no. Laa ó, nye lɛʼla mpel, nye fuo di yɛɛ ó mpʉ mancyom. Bʉr o ndɨ ejwɨʼ bɨn ɨ, bé ejala le enyin mpʉ baa lé esea e bʉʉ ɨ.

²⁷ Le mʉr ndɨ ndindil lé ede e, le waa lé ekab bʉr mode e, zé lé elaa nuu? Yé ó njɨ waa ndɨ ndindil lé ede e! To kœb ó, mɛm, me é l'esama lɨn ó, waa lé esea e bɨn ɨ!

²⁸ Bɨn bé a baabɔʼa e me é bɨjɔʼ me a sia e mobʉbla ɛ.

²⁹ Mpʉ Sɔŋ wam a dwe me nkul mojwɨ̀ʼa é nko paʼ jwɨ̀ʼa ye e, mɛm nteme mu ó lé ekab bɨn nkul mojwɨ̀ʼa é jwɨ̀ʼa gwar yaa,

³⁰ é l'efu ó, bɨn deʼ mode le monwoʼ é teble wam, é jwɨ̀ʼa me ójwɨɨ ɨ. Bɨn bé ódi é bɨdia bɨ taʼa bin, lé etiʼe moveh mo bwa b'Ɨzraɛl ewʉm e moba mɨlɔb.»

Yesʉs lé ebɛa lɛɛ ó, Pyɛr ókɛla ó, nye agʉa nye

³¹ Yesʉs ntɔʼ lɛɛ Pyɛr ó: «Simɔn, Simɔn! Paʼ bee: Satan, nyi gban bɨn! Nye elɛɛ ó, nye óboblo bɨn. Nye egwɨm syɛʼre bɨn mpʉ mʉma lé esyɛʼre fufu ble e.

³² Sa gwar, me a si jwɨʼla e Zyɛm é l'efu lo, ó buʼo yo, yé beʼ l'akur. É jɔʼ nye ósa no e, ǃgo nteme bâʼle ze boo me nɛʼɛ, go à gba obɨɔ bo nkul é monyʉl.»

³³ Pyɛr ntɔʼ lɛɛ e nye ó: «Da, mɨ kʉmsa ó, me toʼ gumo yiyɛh go óto e, dam be é mbʉʼ, dam be é l'efie.»

³⁴ Yesʉs, nye e nye ó: «Pyɛr, me elɛɛ go ó: muh, zʉm kuo l'apa kwaʼle, go ókɛla bɨjɔʼ bɨlɛl ó, go agʉa me!»

Mɨmyah mode, mpɨʼ mɔn e fòŋ

³⁵ No ó Yesʉs a lɛɛ e be ó: «Toŋla ga jɔʼ me a cen bɨn é mɨlʉmlʉ myam ɨ. Bɨn bé a to é cyen yaa ó, mʉr anʉa mpɨʼ mɔn, nkʉ myah mode, nkʉ opia be osilpah oba. É jɔʼ yaa, zê bɨn bé a si luʼo yʉʉ sɔʼɔ ɛ?» Bé ntɔʼ bɨha e nye ó: «Tɨtoʼo!»

³⁶ No ó nye a lɛɛ e be ó: «É jɔʼ yi, mʉr ndɨ e mpɨʼ mɔn ɨ, nye nʉŋa we. Waa ndɨ e myah mode e, nye nʉŋa. Mʉr ndɨ abe e fòŋ ɨ, nye ejala le ebɛma len kʉr we, nye à bwam fòŋ,

³⁷ ebe, me elɛɛ bɨn ó nɛɛ: sa bé a tile, tiibe e me e, yé ósyɛɛ, lé edira lɔɔ ndɨ tila é Kalara Zyɛm ó: “Bé a nʉa nye ó, mpʉ sa lɛɛ ó, nye ó syɛl ebebe.” Bɨsyɛɛla bi, byé ósyɛɛ lé edira mɨlɔɔ bé a tile é lʉ wam ɨ.»

³⁸ No ó bé a lɛɛ e nye ó: «Da, paʼ bee: bɨh bé e mɨfòŋ mɨmba wâ.» No ó nye a ze lɛɛ e be ó: «Bim nɨ, yi jala!»

Yesʉs lé ejwɨʼla e Sɔŋ we é l'Ecwɨʼ le olivye

³⁹ Yesʉs ze mʉa, to é l'ecwɨʼ bé lé ejebe ó, Ecwɨʼ le olivye e, ebe, nye a be ó lé ebɛa sa-sa no. Ompʉn be, ze du nye gʉ.

⁴⁰ É jɔʼ nye a pyal gumo yaa ɛ, nye ntɔʼ lɛɛ e be ó: «Saʼ ga mɨnjwɨʼla. Bé amu jaa boblo bɨn, bɨn duma.»

⁴¹ No ó nye a liʼe be, ze to ba dolo, cye mʉr ndɨ e nkul eguho ebaale e. Nye ntɔʼ kur moboo si, sa mɨnjwɨʼla.

⁴² Nye e nye ó: «Da, yé be ó, gɨ gwɨm pɛʼ me é mɨtuu miʼ nɛʼɛ, yé é mbɨa! Yé óbe l'abe no nɛʼɛ, yé diʼe abe mpʉ mɛm lé egwɨm ɨ, njɨ mpʉ gwɔɔ lé egwɨm ɨ.» [

⁴³ Nye ze bee engles a duho é jobo kʉ ɨ. Engles waa ze bâʼle dwe nye nkul.

⁴⁴ No ó, mpʉ nye a be lé ekʉ jʉʼra mɨtuu ɨ, nye ze gba nyʉl é mɨnjwɨʼla. Didiʼ ze pyal nye é mpom, dɨ taba si mpʉ motié.]

⁴⁵ É jɔʼ nye a sil sa mɨnjwɨʼla ɛ, nye ze gbabla, to nko ompʉn be, bé a be e, ze kœb bɨbɛh é bɨdwo é tuʼ, ebe empime lé a be be é mɨleme lwɨŋla ɛ.

⁴⁶ Nye ze jɨm be, le elɛɛ e be ó: «Ebe yé bɨn lé eja bɨdwo e? Mʉŋa ga si, saʼ ga mɨnjwɨʼla. Bé amu jaa boblo bɨn, bɨn duma.»

Yesʉs, nyi mɛrɔ

⁴⁷ Yesʉs dina lé elwib, ka twɨra nɛʼɛ, ntuntuma bʉr, yi ze pyal é kpɨm. Mʉr a cyɛb be zi dolo e, a be die ó Yʉdas, mʉr ngwar é l'Esama le ompʉn ewʉm e l'oba! Nye ntɔʼ dihle nko Yesʉs a be e, ó nye duʼo emuʼ le.

⁴⁸ Yesʉs ntɔʼ dî e Yʉdas ó: «Zê go kɛha Mwan mo Mʉr é ndwia emuʼ ɛ?»

⁴⁹ É jɔʼ ompʉn mo Yesʉs, bé a dweʼe sa muno ze pyal be e, bé ntɔʼ dî e nye ó: «Da, zê bɨh saʼ duʼo e mɨfòŋ ɛ?»

⁵⁰ Agum le ebɛa nɛʼɛ, nuu mpʉn, nyi bɛa gœm fòŋ we é pɔb, syɛh syɛl mosa mo njwɨɨ opara egwal le ejʉm é bem.

⁵¹ Yesʉs ntɔʼ lɛɛ ó: «Cyelɨ ga duʼo. Yé diʼe bim nɨ.» Nye ntɔʼ kuna e l'egwal mo mʉr waa é mbo, lé ntɔʼ sa mbɨmbɨa.

⁵² Yesʉs ntɔʼ lɛɛ ojwɨɨ be opara bé e l'ojwɨɨ o bɨpulʉm bɨ Mpah Zyɛm, ndwe e l'otamabʉr o lal bé a ze lé eze mɛr nye ó: «Bɨn bé si jeʼe esa, lé eze mɛrɔ me e mɨfòŋ e mɨmbɨŋ é mobo. Yé ó mpʉ bé lé emɛr-mɛr bɨzilngan ɨ.

⁵³ Bɨna bé a be ga ó, dobo lɨlɛh é jahla bii mo Zyɛm. Bɨn bé a baakɛl me mbo é nyʉl. Bɨn bé emɛr mé é bananaʼ ó, ebe, ewala lɨ, lé mu ó jɔʼ yin, bɨn boo Satan!»

Pyɛr lé ekɛla ó, nye agʉa Yesʉs

⁵⁴ No ó bé ntɔʼ naʼ Yesʉs mobo é nyʉl, toŋɔ e nye é bii mo njwɨɨ opara. Pyɛr a be ó lé eto le edu nye ká pihe.

⁵⁵ Bé a be ó si tira duro é bii ye, bʉr ze bʉmra le é nka, lé edwablɔ siʼe. Pyɛr nteme ntɔʼ di si é sama yaa.

⁵⁶ Nuu syɛl mosa ze bee nye é l'epem e duro. Mʉma waa ze dwɛʼ Pyɛr é tʉʉʉŋ. Nye e nye ó: «Mʉr nwaʼ nteme, nye ó mʉr nduo we!»

⁵⁷ Pyɛr ze kɛla. Nye e mʉma ó: «Mɛm, me agʉa nye.»

⁵⁸ Yé a si laa ma jɔʼ. Nuu mʉr ze bee nteme nye. Mʉr nɨ ntɔʼ lɛɛ ó: «Go nteme, go ó mʉr ngwar é bʉr o nduo ye.» Pyɛr ntɔʼ bɨha e mʉr waa ó: «Wɛɛ! Me abe nye.»

⁵⁹ Kwoʼ be ewala egwar, lé osi laa nɛʼɛ, nuu mʉr ntɔʼ pyal, ze bâʼle boʼlo nye. Nye ó: «É l'ocyecye, mʉr nwaʼ a kʉ be ó é sama ye, ebe, nye nteme, nye ó mʉr Galɨle.»

⁶⁰ Pyɛr ntɔʼ lɛɛ e nye ó: «Wɛɛ! Me apa kʉ gʉa sa go lé egwɨm lɛɛ ɛ.» Bé dina lé elwibla nɛʼɛ, zʉm kuo ze kwaʼle.

⁶¹ No ó Da a ze dwibra, to le edeŋle. Bé e Pyɛr ntɔʼ bɔma mih. Pyɛr ntɔʼ toŋlo mokan Da a lɛɛ nye ó: «Muh, zʉm kuo l'apa kwaʼle, go ókɛla bɨjɔʼ bɨlɛl ó, go agʉa me!»

⁶² É jɔʼ yaa, Pyɛr ntɔʼ pyal kʉl, ntɔʼ tʉl e l'edwe.

Bʉr, bé ezyɛm Yesʉs

^63-64 Bʉr o b'a dɨ baʼle nye e, bé a be ó lé ekʉ kpeʼle nye. Buurɔ nye mih e peh kan, ŋmɛhɔ nye, dɨ lɛɛ e nye ó: «Yé be ó, go ó ngwiha mɨlɔb nɛʼɛ, tubla mʉr ŋmɛh go e, die.»

⁶⁵ Pie tɨ, bé ntɔʼ bâʼle to dolo lé elwɨɨ nye.

Yesʉs é mih mo Bʉm Nɨnɨ oYʉden

⁶⁶ É jɔʼ mɛn, wé a lama ɛ, otamabʉr o lal bé e l'ojwɨɨ be opara, ndwe e l'oyeʼle o motie bɨbɛh ntɔʼ syɛŋa gumo gwar. Bé ntɔʼ zeŋɔ e Yesʉs é mih mo Bʉm Nɨnɨ yɔɔ,

⁶⁷ ze dîŋɔ e nye ó: «Lɛŋɨ bɨh nkʉ go ó Lœma mulo mo Zyɛm.» Nye ntɔʼ bɨha e be ó: «ǃMe si lɛɛ bɨn ya nɛʼɛ, bɨn bé aŋa mɛʼle.

⁶⁸ ǃMe si bula dî bɨn tia nɛʼɛ, bɨn bé aŋa bɨha me nya.

⁶⁹ Dam be no, pie jɔʼ yi, Mwan mo Mʉr óka nyin ó “ndindil é nko paʼ mbo ejʉm mo Zyɛm Nkul nyiwɛh.”»

⁷⁰ No ó bɨbɛh, bé a ze lɛɛ ó: «No, yé ó, go ó Mwan mo Zyɛm ó tɨʼ ɨ!» Nye ó: «Yé ó mpʉ bɨn lé elɛɛ nɨ!»

⁷¹ Bé ntɔʼ lɛɛ ó: «Bɨna bé aka saa ga bʉʉ oboʼla ofih. Bɨna bʉr o tɨʼ bɨ joʼo ga mokan me monɨ!»