Lʉkas 17 - Kálara Zyɛ̌m Edwán é mpʉ̌n

Mobɔʼ mé óbɨm bʉr é mɨleme e

¹ No ó Yesʉs a lɛɛ e l'ompʉn be ó: «Yé óbe é jɔʼ yiyɛh ó e mozi bʉr, bé ódɨ jyɛl tɨʼ, ó bé saʼ mɨsyem ɨ. Sa gwar, a vwaʼ e mʉr ógomlo bʉʉ bʉr é zi waa ɛ!

² Laa ó, mʉr gomla mʉr twaʼa é baa bam é zi mɨsyem, yé a ngbaa mbɨa é paʼ mo zizii wam waa ó, bé tiila we bwaʼbwaʼ ekoʼ é twii, wé guhɔ é maŋ, dwè, abe ó, wé gomla mʉr twaʼa ngwar wam é zi mɨsyem waa.

³ Gʉa di ga ncye! ǃƗ mɨɔ go si sa syem nɛʼɛ, láŋa nye baa ebebe é lɔb syɛɛla ebebe ye yaa. ǃNye si gwɨma ye, ndwe le edwir leme nɛʼɛ, pɛʼɛ baa ebebe go láa nye e.

⁴ ǃNye si sa syem é paʼ go zɔʼ tambɛl é moho ngwar nɛʼɛ, é jɔʼ yiyɛh nye óbâʼle lɛɛ e go ó: “Mɨ gwɨma ebebe laa” ɛ, yé ekʉ jala ó, go pɛʼɛ baa ebebe go láa nye tɨʼ ɨ.»

Buʼo

⁵ Mɨlʉmlʉ mo Da, myé a lɛɛ e nye ó: «Bulɨ bɨh buʼo yih.»

⁶ Da ntɔʼ bɨha ó: «ǃBɨn si be e ma peh buʼo titia, dam be bim boho nʉo nɛʼɛ, bɨn bé óbɛm kʉ lɛɛ e lɨ sikomɔr yiʼ ó: “Muna wâʼ e mɨkaale myo mimyɛh. Go à to cyɛb é maŋ!” Yé nteme ntɔʼ sa bɨn mojoʼo.»

Osyɛl o mosa ndɨ ajala ɛ

⁷ «Bɨna paʼ jwɨʼ ga ó, mʉr sama yin, nye e syɛl mosa we lé eli nye bɨpeme, nkʉ koblo daa e bɨntœme le e. É jɔʼ nye lé ebee syɛl mosa waa lé eduho é bɨsyɛɛ ɛ, zê nye e nkul elɛɛ e nye ó: “Kpahba di si é teble, go deʼ” ɛ?

⁸ Tɨtoʼo! Nye ólɛɛ e nye ó: “Jama me mode, go òsiila mɨkan, go òsea e me jyɛm me dina lé ede mode le monwoʼ e. Go òbono ó, me paʼ taare sil. Pie tɨʼ ó go òka de e.”

⁹ Zê nye si dwe syɛl mosa we ekiba é lɔb bɨsa bibyɛh nye a lomo nye ó, nye saʼ ɛ? Tɨtoʼo!

¹⁰ «Jwɨʼ gwar e bɨn nteme: é jɔʼ bɨn bé ósil sa mɨlʉmlʉ mimyɛh ɛ, lɛŋɨ ga paʼra win ó: “Bɨna ga bé ó osyɛl o mosa o ndɨ ajala ɛ. Bɨna bé a kʉ ka sea ga ó njɨ bim syɛɛ nye a lomo bɨna ó, bɨna sea ga ɛ.”»

Mɨzɨzam ewʉm lé epɛʼɔ zam é monyʉl, sa yé a lœʼ be é mih mo Zyɛm ɨ

¹¹ É cyen Yesʉs a be lé eto Yerʉsalɛm ɨ, nye a be ó lé edu mpaʼa wé a be paʼra lal Samari le Galɨle e.

¹² É jɔʼ nye a pyal é nuu kwar ɨ, bʉrʉm ewʉm ze bɔma e nye, mɨzɨzam e mɨzɨzam. Myé a cyɛb ó, ba pɨnʉ,

¹³ ntɔʼ yɨmɔ motwii, le elɛɔ ó: «Yesʉs ɔɔ! Da ɔɔ! Jwɨʼɨ bɨh nkoo ɔɔ!»

¹⁴ Yesʉs ze bee be. Nye ó: «Toʼ, to lɛʼle ga opara mo Zyɛm monyʉl mɨn ɔɔ.» Bé dina lé eto no nɛʼɛ, zam ntɔʼ pʉʼa be é monyʉl, sa yé a lœʼ be é mih mo Zyɛm ɨ.

¹⁵ Nuu mʉr é sama yɔɔ, é jɔʼ nye a bee ó, nyi tiʼe e, nye ntɔʼ buulo ntuʼo, lé edwiibɨ Zyɛm e twii kʉ.

¹⁶ No ó nye a ze bɨʼ mpom we si é mih mo Yesʉs, lé edwe nye ekiba. To kœb ó, mʉr waa a be ó mʉr Samari!

¹⁷ Yesʉs ntɔʼ lɛɛ ó: «Bʉr ewʉm bɨbɛh, bé be ó si pɛʼɔ sa yé a lœʼ be é mih mo Zyɛm ɨ. A bʉʉ bʉr bu bɛɛ, bé mu nko ɛ?

¹⁸ Zê nuu mʉr é sama yɔɔ, nye atoŋlo ba ebula, ó nye ntaʼ, ze dwe Zyɛm kum ɛ? Mʉr sa no e, yé be ó ndìndìl wiʼ wé ome!»

¹⁹ No ó Yesʉs a lɛɛ e nye ó: «Mʉŋa si, laŋa. Buʼo yo, yi tiʼ go!»

Jwɨ̀ʼa mo Zyɛm

²⁰ É yʉʉ jɔʼ, oFarizyɛŋ, bé a ze dî e Yesʉs ó: «É yáa jɔʼ Zyɛm ópa kʉ cyel jwɨ̀ʼa ye cyecye ɛ?» Nye e be ó: «Zyɛm, nye aŋa cyel jwɨ̀ʼa ye é mpʉ mih mo bʉr, mé óbe lé ebono bee e.

²¹ Bé aŋa lɛɛ bɨn ó: “Yé ó yi”, “Beŋɨ ga ye” nkʉ nteme ó: “Nye ó ndɨ kaʼ nwa!” Bɨn bé ejala le egʉa ó, jwɨ̀ʼa mo Zyɛm, yé mu ó cyela é mɨleme min tʉŋlʉ.»

Mpʉ Mwan mo Mʉr óbula ze e

²² No ó nye a lɛɛ e l'ompʉn be ó: «Yé ópyal jɔʼ bɨn bé ógwɨm di e Mwan mo Mʉr sama ɛ, dam be moho ngwar. Sa gwar, yé aŋa ka bana.

²³ ǃƗ bʉr si lɛɛ e bɨn ó: “Dwɛʼa ga ka”, nkʉ nteme ó: “Dwɛʼa ga wâʼ” nɛʼɛ, mʉr ayi to gʉ, nkʉ du be,

²⁴ ebe, mpʉ ndweh mpie lé edweh é jobo, bʉr bɨbɛh lé ebee we é keb-keb ɨ, no nteme ó Mwan mo Mʉr ósa é dobo nye óbula ze e. Nye óbeɔ ó, é mɨpaʼ mɨ si mimyɛh!

²⁵ Yé ejala yɛɛ ó, nye taara sia e mɨtuu é buobuo. Bʉr o mya wi, bé ópyeh nye nteme.»

Zé óbe lé ebono nye é l'esie e mbi jɔʼ yi?

²⁶ «Mpʉ bɨsɔʼɔ byé a syɛɛlɨ é jɔʼ mo Noe e, jwɨʼ gwar e gwar yaa nteme ó ngo syɛɛ é dobo Mwan mo Mʉr óbula ze e.

²⁷ Bʉr o jɔʼ yaa, bé a dɨ sa ó, de mode, le enyʉl monwoʼ. Bé a dɨ sa nteme ó, baʼ lé eba bʉba; bʉʉ lé ecenɔ mɨsile myɔɔ é moba, to pyal é dobo Noe a ni é byɛl tʉŋlʉ ɨ. Mpɨɨ nɨnɨ ntɔʼ ni ndwe le ejʉ bɨbɛh.

²⁸ Jwɨʼ gwar yaa, é jɔʼ mo Lot, baʼ bʉr, bé a be ó lé ede-de mode le monwoʼ, bʉʉ, lé ebwam bɨsɔʼɔ le ebâʼle bɛma. Bé a be nteme ó lé eli bɨpeme le efumo mɨmbɛr.

²⁹ É moho Lot a mʉa ɨ Sodɔm ɨ, siʼe ndwe e pir, byé a si duho é jobo kʉ, swɨɨ bɨbɛh é monyʉl mpʉ moto mo mpie, dimle bɨbɛh.

³⁰ Yé óbe nteme ó, jwɨʼ gwar e gwar yaa é dobo Mwan mo Mʉr óbâʼle nyin ɨ.

³¹ «É dobo laa, mʉr óbe é mie kʉ ɨ, nye l'aka to mbɛr, to kaale mobi me ndɨ é mbɛr tʉŋlʉ ɨ. Jwɨʼ gwar e gwar yaa, waa óbe é peme e, nye l'aka nyamle bula kwar, to nʉa yʉʉ sɔʼɔ.

³² Paʼ toŋlo ga myaa mo Lot!

³³ Mʉr lé ejwɨʼla saa ekamle e tiʼ ye e, nye ódimle ye. Waa lé emɛʼle ó, nye fuo dimle tiʼ ye e, nyiha óbaʼle ye.

³⁴ Me elɛɛ bɨn ó: é pum waa, bʉr oba, bé óbe ó é duo gwar: nwaʼ ónʉŋɔ; nuu liʼ.

³⁵ É bʉba oba bé óbe lé esie mpumo bler ɨ, nwaʼ ónʉŋɔ; nuu liʼ. [

³⁶ É jɔʼ yaa, é bʉrʉm oba bé óbe é peme e, nwaʼ ónʉŋɔ; nuu liʼ.]»

³⁷ No ó ompʉn be, bé a dî e nye ó: «Da, sa yaa, yé ósyɛɛ nko?» Nye ntɔʼ bɨha ó: «Gumo muu tir ndɨ ɨ, tɨʼ ó mɨngbaŋ lé efwal ndwe le elie e.»