Lʉkas 14 - Kálara Zyɛ̌m Edwán é mpʉ̌n

Yesʉs lé etiʼ syoblʉ é moho saba

¹ É guu moho saba, Yesʉs a be ó si to puhba mobo bé e tamamʉr é nkɔm oFarizyɛŋ. Bʉr o b'a be tɨʼ ɨ, bé a be ó lé edwɛʼ nye é bagaga.

² Guu syoblʉ wé a be tɨʼ ɨ, ntɔʼ ze nko Yesʉs a be e, e nyʉl é nkaŋle nkaŋle.

³ Yesʉs ntɔʼ dî e l'oyeʼle o motie bé e l'oFarizyɛŋ ó: «Zê yé ó kɔmlʉ ó, mʉr joma bʉr é moho saba ɛ?»

⁴ Bɨbɛh é jwɨm. Yesʉs ntɔʼ jebe syoblʉ le etiʼ we, ntɔʼ bir ó, wé fiʼɨ.

⁵ Nye ntɔʼ dî e be ó: «Bɨna paʼ jwɨʼ ga ó, nuu mʉr é sama yin, nye e mwan, nkʉ ntɛɛ; mwan waa nkʉ ntɛɛ yaa to lʉŋa é bɨ. Zê mʉr waa óbe, akpahbe to pɛʼ ye é bɨ yaa é moho saba ɛ? Tɨtoʼo!»

⁶ Bé a baagʉa ebɨha tia waa.

Yesʉs lé edwe sikʉlʉ é lɔb efil nyʉl si

⁷ Yesʉs a si bee mpʉ bʉr o b'a baŋlɔ é dina waa ɛ, bé a gbana bɨdia bɨ efoʼ e. No ó nye a ze sa be kɨkɛna yiʼ ó:

⁸ «É jɔʼ mʉr baŋle go lé ede dina lé esoho eba le e, apɛh mpaŋ dia. Yʉʉ jɔʼ, nuu mʉr lé elaa go é mpwaʼ nkʉŋ ɨ, nye óze é dina ngwar waa, le ekœb ó, gɨ bɛa gban mpaŋ dia.

⁹ Mʉr a jebe bɨn e nɔɔ ɛ, nye ólɛɛ e go ó: “Mʉŋa naa. Paʼ dwe tamamʉr dia nɨ.” Go óto di é dia ndɨ é bul pyehɔ ɛ, go osi bil fwon.

¹⁰ No ó, é jɔʼ go to di é dina ɛ, go à nʉa dia ndɨ ká pihe e, ebe, yé ó e nkul epyal go ó, cyela dina óze lɛɛ e go ó: “Fo wam, agum di wâ. Ncʉʼ, me lɛʼla go mpaŋ dia yo kaʼ dolo.” Yé ósa ó, go biʼe mpaŋ kum é mih mo bʉr o nwan yo lé ede mode maa ɛ.

¹¹ Ebe, mʉr lé enkɛɛ nyʉl ɨ, nye ófilɔ si; waa lé efil nyʉl si ɨ, nye óbɨnɔ kʉ.»

Kɨkɛna é lɔb cyela dina

¹² Yesʉs ntɔʼ lɛɛ e cyela dina ó: «É jɔʼ go lé ejam bʉr mode le ecyel dina ɛ, abaŋle ofo bo, nkʉ obɨɔ bo, nkʉ mɨmbyɛl myo, nkʉ obil o bɨsa bɨn e boo nɔɔ ndɨ mobeŋ mo mbɛr ɨ, lé ekpɛɛ ó, bé amu baŋle go ó, go toʼ, to de nteme mode é myɔɔ mɨmbɛr. ǃGo si sa no nɛʼɛ, myɛna mo, mé ófiʼ ó tɨ, é jɔʼ go lé eto de mode mɔɔ ɛ.

¹³ Saʼ ó, é jɔʼ go muno ze cyel dina ɛ, baŋla baanteʼenteʼe, baanya-bɨjyɛm, bʉr lé etɨa ɛ, ndwe e l'ontim.

¹⁴ ǃGo si sa no nɛʼɛ, go ósʉŋɔ mocyɛʼ mo mpom, ebe, bé abe e nkul ebuulo go embɨa lo enɨ. Embɨa laa, lé óka buulɔ ó, é moho ocɨcyel o bʉr, bé ópàh ɛ.»

¹⁵ É mpʉ nuu mʉr a joʼo Yesʉs lé elwib no e, nye ze lɛɛ e nye ó: «Mocyɛʼ mo mpom, mé ó e mʉr óde dina é jwɨ̀ʼa mo Zyɛm ɨ!»

¹⁶ Yesʉs ntɔʼ lɛɛ e nye ó: «Yé a ze be ó, nuu mʉr ze cyel dina, ze baŋle bʉr é buobuo, ó bé toʼ, to de.

¹⁷ Nye ze lomo syɛl mosa we é jɔʼ dina a jala le etaare e, ó nye lɛŋɨ e bʉr o b'a bɛa baŋlɔ ó, bé kaʼ ze, ebe, bɨsa bibyɛh, byé a be ó kwɨmla.

¹⁸ Bɨbɛh, ntɔʼ taare lé epɨra mocel. Waa efoʼ a lɛɛ e syɛl mosa ó: “Me si bwam peme. Yé ejala ó, me toʼ, to bee ye. Me ejwɨʼla e go ó, go duʼo me.”

¹⁹ Waa mba a lɛɛ ó: “Me si bwam bɨntɛɛ ewʉm bé lé elɛɛ ó, byé edihbe syɛɛ peme e. No ó me paʼ to jwɨʼla sea e bye. Me ejwɨʼla e go ó, go duʼo me.”

²⁰ Waa lɛl, nye ó: “Me lwanbe kʉ ba mʉma! Ebe no, me abe e nkul eze.”

²¹ Syɛl mosa waa ntɔʼ fiʼ, to lɛɛ sɔŋ we mɨnkar myɔɔ mimyɛh. Mʉr mbɛr ntɔʼ kpaa empime. Nye ó: “Kpahba to é mɨmpaʼa ndwe e mozi mo nkana, lé eto le ejebe baanteʼenteʼe bé e baanya-bɨjyɛm, ontim ndwe e baa lé etɨa ɛ. Go ntaʼ e bɨbɛh wâ.”

²² Pie tɨ, syɛl mosa wé ntɔʼ bâʼle lɛɛ e nye ó: “Da, mɨ sa mpʉ go lɛɛ ó, me saʼ ɛ. Sa gwar, byʉʉ bɨdia, byé dina ó otɨtoʼo.”

²³ Nye e syɛl mosa waa ó: “Duha nkana. Go à to é bwa mozi le é nkpah bɨpeme, bɨgumo go ófuuba e bʉr ɨ. Bɨn bé ejala le etine be ó, bé ntaʼ, ze ni ɨ modwii mam. Mbɛr wam, wé loŋla e bʉr!

²⁴ Ebe, me elɛɛ bɨn ó: é sama bʉr me a taare baŋle e, abe e mʉr ngwar óka boblo mode mo dina wam!”»

«Me du ó Yesʉs» nye ó, go nkɛŋɨ klos yo

²⁵ É mpʉ mpampaʼ bʉr, yé a to le edu Yesʉs ɨ, nye ze dwibra, lɛɛ e be ó:

²⁶ «Mʉr óze boo me le edi mpʉn wam ó, nye osi kpɛl me, laa mpʉ nye lé ekpɛl sɔŋ we le nyɔŋ we, myɛl we e bwan be, obɨɔ be le okɛl be, dam be tiʼ ye nye mʉr tɨʼ ɨ.

²⁷ Waa ndɨ ankɛɛ klos ye, du me e, nye ákwoʼ di mpʉn wam.

²⁸ Wáa mʉr ndɨ etaare lé ekan toloŋo mbɛr, nye l'apa láa bim mɔn nye óbɛm dimle tɨʼ ɨ? Zê nye ótaare syɛɛ fumo yaa, nye osi bee ó, mɔn nye ndɨ e ye e, yé aŋa jala e syɛɛ? Tɨtoʼo!

²⁹ ǃƗ nkul mobi ósie nye, nkan liʼ é ntuubo nɛʼɛ, bʉr bé óbee nkan e nkan ɨ, bé ódwo nye le ekpeʼle nye tɨ.

³⁰ Bé ólɛɛ-lɛɛ ó: “Atɔlɔ, nyi nyaʼ é mbʉŋʉ!”

³¹ «ǃƗ guu njwɨɨbʉr si gwɨm ó, wé to ó, to lwimla e guu nɛʼɛ, wé etaare di si, pahle nkʉ bɨzima otɔɔyin ewʉm bye, byé óbɛm ntaa bɨzima otɔɔyin mowʉm moba guu njwɨɨbʉr lé entɨh é dɔm ɨ.

³² Yé be ó, byé abe e nkul waa nɛʼɛ, wé óbɛa lomo bʉr nko mʉr dɔm we ndɨ ɨ, nye dina jaabe, le edî nye ó, sa yé ósa ó, mɨlɔb, myé kwɨmlɨ paʼra wɔɔ ɛ.

³³ Jwɨʼ gwar yaa, é sama yin, bɨn bɨbɛh, abe e mʉr ndɨ e nkul edi mpʉn wam, nkʉ nye apa nkɛɛ klos ye.»

Kɨkɛna ekpa

³⁴ «Ekpa, lé ó sa ndɨ é mbɨa ɛ. Sa gwar, ǃɨ ekpa, lé si dimle mojómo me nɛʼɛ, bé óka bula dwe le mojómo nyá ɛ?

³⁵ Ekpa laa, lé aka be mʉr e nyɔm. Lɨ ka liʼ ó, sʉŋɔ kʉl. Lé ajala le esʉŋɔ é mompœʼ, nkʉ é l'ekunu.» Nye ze ko tɨʼ ó: «Mʉr ndɨ e mogwal mo ejoʼo e, nye joʼa naa.»