Jacques 2 - Kálara Zyɛ̌m Edwán é mpʉ̌n

Agba ga mɨmbɛʼ paʼra bʉr e bʉr!

¹ Obɨɔ ga bam aa! É mpʉ bɨn lé ejyɛʼ taa buʼo yin boo Tî ga wina Yesʉs-Krɨst, Njwɨɨ ga wina ndɨ é kum ɨ, dɨʼe sa no abe lé edwaabe bʉr é lɔb mompom mɔɔ,

² ebe, é jɔʼ bɨn lé esa bɨgwɨhla bin ɨ, bɨn bé esa-sa nyá ɛ? Bɨn bé esa ó: ǃɨ bʉr oba si pyal é mbɛr Zyɛm win, nwaʼ e bɨlono bɨ gol é mpine ndwe e mbɨambɨa mompor, nuu e bɨnyɛɛla mɨkan é nyʉl nɛʼɛ,

³ bɨn bé elɛɛ e mʉr ndɨ ebwar mbɨambɨa mompor ó: «Da, mbɨambɨa dia yo ó ndɨ wâʼ ɛ,» ka lɛɛ e l'anteʼenteʼe mʉr nyɛɛ ó: «Wɛɛ! Cyɛba tina cɨcyel,» nkʉ ntɔʼ ó: «Diʼe wâʼ si kunokuno e cyela mokʉ yam.»

⁴ Bɨn bé asi gba mɨmbɛʼ paʼra win ɨ? Syɛɛla yin yaa, yi lɛʼle ó, bɨn bé epahle mɨlɔb ó e bɨbebebebe mɨpɛhla, mpʉ bɨbɨbla bɨ otiʼà o mɨlɔb lé esa-sa ɛ.

⁵ Obɨɔ o kpɛl bam aa! Lɛŋɨ ga me: zê Zyɛm a baapɛh baanteʼenteʼe é si nwaʼ ó, bé diʼe obil é nko paʼ buʼo, é mbi ndɨ ó, bé nʉŋa bɨdia é jwɨ̀ʼa ye ɛ? Nye a baasi bul kɛʼ be bɨdia é jwɨ̀ʼa ye, bé e mʉr nyiwɛh lé ekpɛl nye e?

⁶ To kœb ó, bɨn bɛɛ, bé epyeh baanteʼenteʼe baa! Ntʉʼ obil o bɨsa onɨ lé etíile bɨn ɛ? Bé nteme ó lé eto pur bɨn é mompah mɨlɔb!

⁷ Bɛɛ nteme ó ndɨ epyeh mbɨambɨa die mo Yesʉs-Krɨst, nyɛɛ mʉr bɨn mu lé egumo e nye e.

⁸ ǃBɨn si du etie ndɨ etilɔ é Kalara Zyɛm ó: «Kpɛlɨ mɨɔ go mʉr mpʉ go lé ekpɛl go mʉr tɨʼ» nɛʼɛ, lɛɛ ó, bɨn bɨ gʉa sa, ebe, etie laa, lé ó laa Tî ga wina a tiile e!

⁹ No ó, yé be ó, bɨn bé eto dolo lé edwaabe bʉr é lɔb mompom mɔɔ nɛʼɛ, lɛɛ ó, bɨn bɨ sa syem! Bɨn mu ó ontɔɔ o motie é jɔʼ yaa, ebe, etie laa, lɨ mɛr bɨn.

¹⁰ Mʉr dam du motie mo Zyɛm mɨmɛh, ǃnye si ka ntaa etie egwar nɛʼɛ, nye e mobe jwɨʼ gwar e gwar mpʉ waa a ntaa mɨmɛh ɛ.

¹¹ Ebe, mʉr a lɛɛ ó: «Asa mɨfyɛba» ɛ, nye nteme ó b'a lɛɛ ó: «Ajʉ mʉr» ɨ. No ó, ǃgo baasa mɨfyɛba, jʉ yɛɛ mʉr nɛʼɛ, gɨ bana di ntɔɔ motie mo Zyɛm.

¹² Ebe no, é jɔʼ bɨn mu lé ekpɛl pyɛl ekan efih ekan e kɛ̀l ɨ, nkʉ ó, bɨn bé ósa yʉʉ syɛɛla nɛʼɛ, bɨn bé à gʉa ó, Zyɛm ótiʼe bɨn mɨlɔb ó, pahle mokan mɨn ndwe e bɨsyɛɛla bin byaa. Nye ópahle bye lé edu etie ndɨ esa ó, bʉr diʼe é dia otî ɨ.

¹³ Mʉr ndɨ ajwɨʼ bʉr nkoo e, nye nteme, nye aŋa jwɨʼɔ nkoo é dobo Zyɛm ótiʼe lɔb we e. Njwɨʼa-nkoo, wé ekʉ doʼo é mih mo tiʼ mɨlɔb.

Buʼo le bɨsyɛɛla

¹⁴ Obɨɔ ga bam aa! ǃƗ nuu mʉr si lɛɛ ó, nye ejyɛʼ taa buʼo ye boo Zyɛm, nye l'apa kʉ sa ba mpʉ Zyɛm lé elɛɛ nɛʼɛ, lɛa we waa, wé ó nye e wáa nyɔm? Nye ákwoʼ bi tiʼ molu mo mpoʼ mɨmɛh ebe sa buʼo ye.

¹⁵ Yé be ó, mɨɔ win, nkʉ mʉma, nkʉ mʉrʉm, nye ó é sɔɔlʉ, aka be e sa ebwar, nkʉ sa ede dobo lɨlɛh nɛʼɛ,

¹⁶ ǃɨ nuu mʉr é l'esama lɨn si ka jɛna e nye ó: «Toʼ é motala. Ajoʼo ejyoo. Ajoʼo za,» sa gwar, adwe nye bɨsa ndɨ ekʉ jala nɛʼɛ, nyi lɛɛ nye sa lɛa ndɨ abe e nyɔm ɨ.

¹⁷ Ebuʼla Zyɛm, lé ó no. Yé be ó, mʉr, nye ejyɛʼ taa buʼo ye boo Zyɛm, buʼo ye l'anyin bɨsyɛɛla nɛʼɛ, lɛɛ ó, buʼo ye yaa, yé ó muu, ebe, yé ó yé ome.

¹⁸ Mʉr óbɛm lɛɛ ó: «Baʼ bʉr, bé ejyɛʼ taa buʼo boo Zyɛm. Bʉʉ bɛɛ, bé esa mɨmpaŋ bɨsyɛɛla.» No ó, me ebula lɛɛ e mʉr nɨ ó: «Wáa mbi go ndɨ e nkul elɛʼle bʉr buʼo yo ndɨ anyin mɨmpaŋ bɨsyɛɛla nɨ? Mɛm ólɛʼle nye yaa yam é zi mɨmpaŋ bɨsyɛɛla byam, ó nye beŋɨ ó, mɨ jyɛʼ taa buʼo yam boo Zyɛm.»

¹⁹ Gwɔɔ lɛɛ ó, Zyɛm, nye ó njɨ ngwar. Go ntɔʼ lɛɛ ó, lɔɔ waa, wé ó ndɨ elɛʼle ó, gʉ jyɛʼ taa buʼo yo boo Zyɛm. Yé ó mbɨmbɨa! Dam be moleme, mé egʉa nteme no. Ebe no ó mé ndɨ esaʼ é ngba-ngba-ngba e bʉa ɛ.

²⁰ Sa mbɛh mʉr aa! Zê go lé egwɨm gʉa ó, buʼo ndɨ anyin bɨsyɛɛla ɛ, yé abe e nyɔm ɛ?

²¹ Ebe yé Zyɛm a nʉa sɔŋ mpam ga wina Abraham mpʉ cɨcyel mʉr ɨ? Yé a be ó ebe syɛɛla nye a sa é jɔʼ nye a nʉa mwan we Ɨzak ó, nye tiʼe ó nye, dwe Zyɛm nya é taa mɨndwɛa ye e.

²² Bɨna bé ekʉ bee ga ó, Abraham a si buʼla, buʼo ye lé ebaʼra e bɨsyɛɛla. Bɨsyɛɛla bye, byé ntɔʼ sa ó, buʼo ye, yé kuma é l'ombɨmbɨa é mɨpaʼ mimyɛh.

²³ Yé a syɛɛlɨ no ó, lé edira lɔɔ ndɨ tila é Kalara Zyɛm ó: «Abraham a si jyɛʼ taa buʼo ye boo Zyɛm. Zyɛm ze bee buʼo ye mbɨmbɨa, nye ntɔʼ nʉa nye mpʉ cɨcyel mʉr.» Nye ze liʼ e mosʉm ó, «fo mo Zyɛm».

²⁴ No ó, bɨn bɨ bee: sa yé a lɛʼle Zyɛm ó, Abraham a be cɨcyel mʉr ɨ, yé a be ó bɨsyɛɛla nye a be lé esa ɛ. Yé a baabe ebe buʼo lé edi yé ome e.

²⁵ Toŋla ga nteme Rahab, a be mbambama ɛ. É jɔʼ bwa b'Ɨzraɛl, bé a lomo bʉr é Kanan ó, bé byamla lal waa ɛ, nye a si bana bɨlan e be. Pie tɨ, nye ze lɛʼle be nuu zi ó, bé kpɛŋɨ. Ebe no ó nye a be mʉr ngwar é nkana yaa a nyin e l'ocɨcyel é mih mo Zyɛm ɨ.

²⁶ Yé ó jwɨʼ gwar e gwar yaa nteme e nyʉl mʉr: é jɔʼ mʉr ndɨ si pʉʼa sisim e nyʉl ɨ, nye mu ó muu. Buʼo ndɨ anyin bɨsyɛɛla ɛ, yé nteme, yé ó muu.