Galásia 3 - Kálara Zyɛ̌m Edwán é mpʉ̌n

Pɛhɛ ga paʼra etiilɔ motie ndwe le ebi nkɛʼ

¹ Bɨn bʉr o Galat, bé ó kʉ be bɨgʉ. Zé a pa kʉ gomlo bɨn é bebebebe buʼo yɔɔ? Me a si kʉ gʉa lɛʼle bɨn, bɨn ze bee é sʉlʉlʉ mpʉ Lœma mulo mo Zyɛm, Yesʉs, a si bomlɔ e mosen, le ebɨnɔ é klos kʉ ɨ.

² Me ódî bɨn tia ngwar nwa: Zê Zyɛm a ntɨh bɨn Sisim we ó, ebe mbi bɨn lé edu motie wi ɛ? Zê nye a ntɨh bɨna ga wa ó, ebe buʼo bɨn bé a bi lé ejoʼo Mbɨambɨa Lɔɔ bé a lɛɛ bɨn wi ɛ?

³ Wáa mbi bɨgʉ bɨn ndɨ ɨ? Bɨn bɛɛ si pa taare lé ebi tiʼ molu mo mpoʼ mɨmɛh é zi Mbɨambɨa Sisim. No ó, zê bɨn mu ó lé eka kpɛl fwahle e nkul ndɨ eduho é nyʉl bɨpuno nwa ɛ?

⁴ Zê bɨn bé a si sia e buobuo mɨtuu mbɛh ɛ? Me abuʼla ó, myé ó mbɛh e mbɛh.

⁵ Ebe no, é jɔʼ Zyɛm lé entɨh bɨn Sisim we, le esa mosima paʼra win ɨ, zê nye lé esa no ó, ebe mbi bɨn lé edu motie wi ɛ? Zê yé a be ó, ebe, bɨn bé a si buʼla Mbɨambɨa Lɔɔ bɨn bé a joʼo e?

⁶ Dwɛʼa ga mpʉ yé ndɨ tila é Kalara Zyɛm ɨ. Yé ó tila ó: «Abraham a si jyɛʼ taa buʼo ye boo Zyɛm. Zyɛm ze bee buʼo ye mbɨmbɨa, nye ntɔʼ nʉa nye mpʉ cɨcyel mʉr.»

⁷ Gʉŋa ga be ó, bʉr o lé ejyɛʼ taa buʼo yɔɔ boo Zyɛm ɨ, bé ó ndɨ bwan mo Abraham.

⁸ Bé a si bɛa tile é Kalara Zyɛm ó, Zyɛm ódwe bʉr o bɨkul mokebe é mih me ó, ebe taa buʼo bé ójyɛʼ boo nye e. No ó, Mbɨambɨa Lɔɔ wi, wé a taare tunɔ ó, Abraham. Zyɛm a lɛɛ e nye ó: «Me ósʉ bɨkul bɨfih mocyɛʼ mo mpom ó, é zi go,»

⁹ Abraham ze jyɛʼ taa buʼo ye boo Zyɛm. Ebe no ó Zyɛm a sʉ nye mocyɛʼ mo mpom me e. Jwɨʼ gwar e gwar yaa nteme e bʉr bɨbɛh lé ejyɛʼ taa buʼo yɔɔ boo nye e: Zyɛm ósʉ be mocyɛʼ mo mpom me.

¹⁰ Ebe, ǃɨ mʉr si buʼla ó, Zyɛm ódwe nye mokebe ebe mbi nye lé edu motie nɛʼɛ, nye e bɨkɔ́ɔlʉ, ebe, yé ó tila é l'okalara o motie mo Moyiz ó: «Mʉr nyiwɛh ndɨ adu motie mɨmɛh ndɨ mɨtila wâʼ ɛ, nye e bɨkɔ́ɔlʉ.»

¹¹ Bɨna mu ó si gʉa ga é kpɛhla ó, yé abe e mʉr ndɨ e nkul ekebe é mih mo Zyɛm ebe mbi nye lé edu motie e, ebe, yé ó tila é motie mo Moyiz é lɔb waa ó: «Mʉr ndɨ e tiʼ molu mo mpoʼ mɨmɛh ɛ, nye ó njɨ waa a bi mokebe é mih mo Zyɛm ebe taa buʼo nye a jyɛʼ boo nye e.»

¹² Mʉr, nye adu motie ebe taa buʼo nye lé ejyɛʼ boo Zyɛm ɨ, ebe, yé ó tila é motie mo Moyiz ó: «Waa nyiwɛh lé edu motie e, nye óbi tiʼ ó, ebe mbi nye lé edu motie waa ɛ.»

¹³ Yesʉs-Krɨst a si jɛna mobyaʼ ga mɨna, lé epɛʼ bɨna ga é sama bʉr o b'a jala le ekáalɔ ɛ. Nye a nʉa bɨkɔ́ɔlʉ bibyɛh byaa ó, é l'efu ga lɨna, ebe, yé ó tila é motie mo Zyɛm ó: «Mʉr nyiwɛh a cyèlɔ é lɨ kʉ ɨ, nye ó ndɨ waa Zyɛm a káale e.»

¹⁴ Yesʉs-Krɨst a dwih bɨna ga é mpila ebebe no ó, é l'efu e bɨkul bɨfih. Nye mu ó lé eze ntɛŋ bɨn mocyɛʼ mo mpom Zyɛm a kɛʼ Abraham ɨ. Nye a dwih bɨna ga nteme é mpila mɨsyem ó, Zyɛm nkʉʼ dira nkɛʼ we é l'efu ga lɨna, lé entɨh bɨna ga Mbɨambɨa Sisim. Nye entɨh nye ó, ebe taa buʼo bɨna lé ejyɛʼ ga boo nye e.

Nkɛʼ Zyɛm a liʼe bɨna e wa ɛ

¹⁵ Obɨɔ ga bam aa! Sa yi, yé ó kʉ be syɛɛla bʉr lé esa-sa ɛ. É jɔʼ mʉr si tile kalara bɨliʼ ɨ, abe e mʉr óka gbɛɛ mɨtila myaa, nkʉ ko lʉʉ ekan tɨ.

¹⁶ Mbi ngwar e ngwar waa ó Zyɛm a kɛʼ Abraham ndwe e mʉr mpoŋbʉr we mɨmpaŋ bɨsɔʼɔ ɛ. Yé abe tila é Kalara Zyɛm ó: «bʉr o mpoŋbʉr». Yé a kʉ ka tilɔ ó njɨ mʉr ngwar é mpoŋbʉr we. Nye a lɛɛ ó: «Me edwe ó, bɨn e mʉr mpoŋbʉr go.» No, yé ó, mʉr mpoŋbʉr mo Abraham waa ó ndɨ Yesʉs-Krɨst!

¹⁷ Me elɛɛ ó, Zyɛm a si liʼe Abraham e nkɛʼ. Pie e mɨmbu mɨnter mɨnâ e mɨmbu mowʉm molɛl (430), Zyɛm ze tiile oYʉden motie. Motie maa, mé a baabe e nkul egbɛɛ mpʉn Zyɛm a bɛa de e Abraham ɨ. Mé a baabe e nkul elɨr nkɛʼ nye a bɛa liʼe nye e wa ɛ.

¹⁸ Nkʉ Zyɛm a be ó be, dwe bʉr tiʼ molu mo mpoʼ mɨmɛh ebe mbi bé lé edu motie nɛʼɛ, mpa nye asa be no ebe nkɛʼ we. To kœb ó, Zyɛm a dwe Abraham tiʼ molu mo mpoʼ mɨmɛh ó, ebe nkɛʼ nye a taare liʼe nye e wa ɛ.

¹⁹ Yé be no nɛʼɛ, ebe yé Zyɛm a pa kʉ tiile motie maa ɛ? Nye a tiile me ó, ebe bʉr o b'a ntaa motie e, é l'efu e ma jɔʼ, to fiʼ é jɔʼ nta mo Abraham waa óze e. Nye ó b'a ze, lé edira nkɛʼ mo Zyɛm ɨ. Zyɛm a tiile bʉr ma ó, nye osi ntɨh beengles be; bɛɛ ka ze ntɨh mosàa-mɔm.

²⁰ Mosàa-mɔm, nye eduula é jɔʼ yiyɛh ó, paʼra monkɔm moba. Sa gwar, Zyɛm a sea ó nye ome.

²¹ Yé be no nɛʼɛ, zê yé lé elɛɛ ó, motie le nkɛʼ mo Zyɛm waa, byé e ziila? Hɨʼɨ, yé abe ba no! Ziila, nye abe tɨ. Nkʉ yé a be ó be, be e lʉʉ etie lé edwe bʉr tiʼ molu mo mpoʼ mɨmɛh nɛʼɛ, mpa bʉr mu ó lé ebi mokebe é mih mo Zyɛm é zi etie laa.

²² Ebe, yé ó tila é Kalara Zyɛm ó, bʉr o si nwaʼ bɨbɛh, bé ó, é mpila mɨsyem myɔɔ. Mɨsyem myɔɔ, myé a si kaʼ bɨbɛh monkara. Sa gwar, Zyɛm, nye ekɛʼ ó, baa bɨbɛh lé ejyɛʼ taa buʼo yɔɔ boo Yesʉs-Krɨst ɨ.

Bwan mo Zyɛm

²³ Molu pihe, Zyɛm a baapa dib bʉr zi ó, bé jyɛʼɛ taa buʼo yɔɔ boo Yesʉs-Krɨst. É jɔʼ yaa, bɨna bé a be ga ó, é monkara mo mɛra motie, to pyal é jɔʼ Zyɛm a ka dib bɨna ga zi ejyɛʼ taa buʼo yina boo Yesʉs-Krɨst ɨ.

²⁴ Motie maa, mé a be-be ó mbɔʼlʉ ga wina a liʼle bɨna ga boo Krɨst ɨ. Yé a syɛɛlɨ no ó, bɨna nkʉʼ pʉʼa ga é nkar, sɔba é feerɨ é zi buʼo.

²⁵ Banana, mpʉ Zyɛm mu si dib bɨna ga zi ejyɛʼ taa buʼo yina boo Yesʉs-Krɨst ɨ, bɨna bé aka be ga é jwɨ̀ʼa mo mbɔʼlʉ waa.

²⁶ Bɨn bɨbɛh mu ó bwan mo Zyɛm, ebe, bɨn bé a si jyɛʼ taa buʼo yin boo Yesʉs-Krɨst.

²⁷ Ebe, mʉr nyiwɛh é l'esama lɨn a nʉa ndubo é modibe, ntɔʼ di é zyɛŋa wɔɔ boo Krɨst ɨ, nyi «bwar» Krɨst é nyʉl!

²⁸ Ziila, nye aka gʉa be paʼra Yʉden bé e mʉr kul fih. Yé aka gʉa be ziila paʼra elʉa bé e mʉr ndɨ é dia otî ɨ, nkʉ paʼra mʉma bé e mʉrʉm, ebe, bɨn bɨ di é zyɛŋa win boo Yesʉs-Krɨst. Bɨn bɨbɛh mu ka di ó é dia mʉr ngwar: Yesʉs-Krɨst.

²⁹ Yé be ó, bɨn bé ó baa mo Krɨst nɛʼɛ, lɛɛ ó, bɨn nteme bé ó bwa onta mo Abraham. Bɨn nteme ó ngo bi ga monkɛʼ mo Zyɛm, jala e monkɔb mɨn.