Filipi 3 - Kálara Zyɛ̌m Edwán é mpʉ̌n

Mpʉ bʉr lé ebi mokebe é mih mo Zyɛm ɨ

¹ Obɨɔ ga bam aa! Sa me lé eka tile bɨn é l'epihe e, yé ó nɛɛ: soha ga é zyɛŋa win boo Da Yesʉs. Yé akɔbla me ó, me bâʼla tile sa me taare tile bɨn ɨ. Yé nteme ó me muno ze sa ebe nyɔm win ɨ.

² Cɨa ga bɨbɨbla bɨ osyɛl o mosa baa. Cɨa ga ompye onɨ. Cɨa ga bʉr o ndɨ esa bʉr mpʉn é l'ebebe e.

³ Bɨna ga bɛɛ ó ndɨ e mpaŋ sɛa mpʉn. Bɨna ga ó lé edwiibɨ Zyɛm é zi Sisim we. Bɨna bé edoʼo ga ó, njɨ e lɔb mo Yesʉs-Krɨst. Bɨna bé ajyɛʼ ga taa buʼo yina é bɨpuno ga bina.

⁴ Me a be ó si ngbaa jyɛʼ taa buʼo yam é me mʉr tɨ. Yé be ó, yé e nuu mʉr ndɨ ebee ó, nye óbɛm jyɛʼ taa buʼo ye é nye mʉr tɨʼ nɛʼɛ, lɛɛ ó, me ó ndɨ elaa nye.

⁵ Me ó mbyɛla mʉr Ɨzraɛl, é l'eveh mo Benjamin. Me ó mpɛh Ebrœ. Me a saŋɔ mpʉn ó, pie molu mwom, me osi byɛl. Me a si ni é nkɔm oFarizyɛŋ, lé esa zyee lé edu motie mo Moyiz.

⁶ Me a si bul laŋle tíile bʉr o Mbɛr-Zyɛm. É nko paʼ motie, me a si kœʼ mbɨambɨa ebò e cyen, alɨŋa ba.

⁷ Bɨsa me a taare gʉa ó, byé óbe me e mpi ɨ, me a ka ze fuʼla láa ó, mɨ lɔh lé edu bye. Krɨst ó ndɨ me e mpi, laa bye.

⁸ Yé ó no! É mpʉ mɨ gʉa Tî wam Yesʉs-Krɨst ɨ, me mu lé enʉa bɨsa bɨfih bibyɛh mpʉ sa ndɨ mbɛh ɛ. Mɨ dimle bɨsa bibyɛh ó, me nkʉʼ jyɛʼ taa buʼo yam boo nye. Mɨ ka nʉa bye ó, mpʉ sa lé ejala le emyahɔ é diʼ ɨ. Me ekʉ tìne bye ó, me nkʉʼ bi nkul di é zyɛŋa wih boo Krɨst!

⁹ Me egwɨm ó, Zyɛm beŋɨ njɨ ó, me ó é zyɛŋa wih boo nɔɔ. Me agwɨm bi mokebe é mih me ebe mbi me lé edu motie e. Me egwɨm ó, nye dweʼ me mokebe ebe taa buʼo me lé ejyɛʼ boo Krɨst ɨ.

¹⁰ Sa me lé egwɨm ɨ, yé ó, me gʉŋa Krɨst é kpɛhla. Me egwɨm nteme ó, Zyɛm sea é me, mpʉ nye a sea e nkul é jɔʼ nye a pɛ̀h Yesʉs-Krɨst é foo e. Me biʼe mɨtuu mɨmpwar Krɨst a bi ɨ, efie lam nkʉʼ nwɨɨla nteme e laa le.

¹¹ Ebe, leme wam, wi loŋlo e mbɛla ó, me nteme, me ópàh, bi tiʼ molu mo mpoʼ mɨmɛh.

Kam, to pyal é l'odumo

¹² Me apa be e nkul elɛɛ ó, kam wam, wi pyal é l'odumo, nkʉ nteme, mɨ kumo é l'ombɨmbɨa é mɨpaʼ mimyɛh. Sa gwar, me eto dolo lé egba nyʉl, ó me nkʉʼ bi myɛna mo kam, ebe, Yesʉs-Krɨst mu ó si bɛa sa ó, me diʼe waa we.

¹³ Obɨɔ ga bam aa! Me apa buʼla ó, mɨ nʉa myɛna me lé egwɨm ɨ. Sa me lé ekʉ dweh e, yé ó, me jɨha bɨsa me a dɨ sa é molu pihe e, ka cen leme nko bɨsa dina me dolo e.

¹⁴ Me egba nyʉl lé eto dolo, to pyal é l'odumo. Me egwɨm mompɔʼ mo Zyɛm. Nye ejebe bɨna ga ó, bɨna toʼ, to bi ga mompɔʼ me é zi mo Yesʉs-Krɨst. Mɛɛ, mé ó koma é jobo kʉ.

¹⁵ Bʉr o ndɨ e pɨʼ otamabʉr ɨ, bé ejala le edi e mbi mbea nɨ. Yé be ó, bɨn bé ejala le ebee yʉʉ sɔʼɔ é guu mbi mbea nɛʼɛ, Zyɛm nteme ólɛʼle bɨn sa yaa.

¹⁶ Sa ndɨ tɨʼ yé ó, bɨna toʼ ga dolo lé ekœʼ ebò e cyen egwar bɨna ga ndɨ e le é bananaʼ ɛ.

¹⁷ Obɨɔ ga bam aa! Nʉŋa ga dweʼle tiʼ yam mpʉ bʉʉ bʉr mu lé esa ɛ. Bɨh bɨ lɛʼle bɨn ebò e cyen tɔɔ dweʼle. No ó, bɨʼɨ ga mih mɨn é bʉr o ndɨ ekœʼ ebò e cyen laa ɛ.

¹⁸ Me ebal bɨn é lɔb sa gwar nɨ é jɔʼ yiyɛh. Banana, me mu ó lé ebâʼle yɨm nkpaa tɨʼ e myɛɛle é mih. Yé é buobuo bʉr o ndɨ ekœʼ ebò e cyen ndɨ elɛʼle ó, bé ó bʉr o dɔm mo Krɨst, a dwè é klos ɨ.

¹⁹ Bé ófuʼla ó, dim cyecye. Bɨsa bɨ ozyɛm bé lé edwiibɨ ɨ, byé ó mɨmo myɔɔ. Bé ekʉ ka gumlo ó njɨ bɨsa ndɨ ebul samle be e, toŋlɔ-toŋlɔ njɨ bɨsa bɨ jobo yi.

²⁰ É paʼ ga wina, bɨna ga bɛɛ, bé ó bʉr o ndɨ egumo e jobo kʉ ɨ. Bɨna mu ó lé ebono ga Tiʼbʉr ga wina, Da Yesʉs-Krɨst. Nye óduho é jobo kʉ, ze kaʼ é si nwa,

²¹ ntɔʼ dwir bɨsa monyʉl ga bina bi. Monyʉl ga mɨna, mé òka nwɨɨla e nyʉl we ndɨ e kum ɨ. Nye e buobuo nkul ndɨ esa ó, bɨsa bibyɛh, byé saʼ nye mojoʼo e.