Ebrœ̂ 3 - Kálara Zyɛ̌m Edwán é mpʉ̌n

Nkʉŋ mo Yesʉs, ndwe e waa mo Moyiz

¹ Ebe no, obɨɔ ga bam, mɨsaŋ mɨ bʉr mo Zyɛm, baa mu si jebɔ, njɨblɨ wɔɔ lé eduho é jobo kʉ ɨ, toŋla ga mpʉ Yesʉs ndɨ ɨ: nye ó mwa mɨlʉmlʉ mo Zyɛm, ndwe e njwɨɨ opara ga wina, waa bɨna ndɨ ekʉ mɛʼle ga ɛ.

² Zyɛm ó b'a cyel Yesʉs é dia njwɨɨ opara ga wina. No ó, Yesʉs a be ó mʉr ebuʼla é mih me, jala e Moyiz a be nteme mʉr ebuʼla, waa a cyelɔ é dia é mbɛr bʉr mo Zyɛm tʉŋlʉ ɨ.

³ Yesʉs nyɛɛ ó ndɨ ejala e kum é buobuo, laa Moyiz, jwɨʼ gwar e gwar e mpʉ fim mbɛr lé ebul gumlɔ, laa mbɛr we e.

⁴ Abe e mbɛr ndɨ e nkul edi, fim mbɛr abe. To kœb ó, Zyɛm ó b'a fumo sa yiyɛh!

⁵ Moyiz a be ó mʉr ebuʼla é nko paʼ bɨsa bibyɛh lé edwɛʼ mbɛr mo Zyɛm ɨ. Nye a cyelɔ syɛl mosa ó, nye boʼla, tiibe e sa yiyɛh Zyɛm nyɛɛ a bɛa be ó, nye lɛŋɨ bʉr ɨ.

⁶ To kœb ó, Krɨst nyɛɛ a si cyelɔ é dia Mwan a jala le edi lʉ mbɛr bʉr waa ɛ. Mbɛr bʉr waa, wé ejoʼo nteme ó e nye. ǃƗ mɨleme ga mina si loŋlo e mbɛla, le ekʉ gʉa sa bɨna lé ebuʼla ga, abaawe sɔʼɔ e bʉr nɛʼɛ, bɨna ga ó ndɨ bʉr o mbɛr bʉr we waa.

Gumo egbala mo Zyɛm ndɨ ɨ

⁷ Ebe no ó Mbɨambɨa Sisim, nye lé elɛɛ é Kalara Zyɛm ó: «ǃBɨn si joʼo twii mo Zyɛm muh nɛʼɛ,

⁸ mʉr alɨha motɨɨ me, nkʉ sa elele e lʉ mpʉ bɨmpam bin byé a sa é jɔʼ byé a kaŋa e Zyɛm, le eboblo nye é feha si ɨ.»

⁹ Zyɛm a lɛɛ ó: «Bɨmpam bin, byé a si boblo me é feha si, lé esaa egʉa nkʉ me ó bɛm be mpaŋ Zyɛm. Bé a be yɛɛ ó, si bee bɨsyɛɛla byam tɔɔ mɨmbu mowʉm monâ!

¹⁰ É mpʉ bé a boblo me no e, me ntɔʼ ze kpaa empime e mya bʉr waa. No ó me a lɛɛ ó: “Bé ebɛa lɨŋa é buʼo. Bé dina ó lé ekʉ jeʼe edu zi me lé etɨe be e.”

¹¹ É l'empime lam, me ze de mɨnkɛla, le elɛɛ ó: “Me ópa bee nkʉ bʉr onɨ, bé óka ni é l'egbala me lé edwe bʉr bam ɨ!”»

¹² Obɨɔ ga bam aa! Gʉa di ga ncye! Mʉr é mbɛr Zyɛm win aka nyamle be e leme ndɨ é lele lé ebuʼla ɛ. Nye l'aka nyamle kaŋa e Zyɛm ndɨ kublakubla ɛ.

¹³ É jɔʼ bɨn dina muh sama ɛ, yé é mbɨa ó, bɨn dɨʼe gba nkul é nyʉl mo mɨɔ nyiwɛh paʼra win, moho wiwɛh. Ebe no ó bɨn bé óbe, aka du bɨkʉʉŋʉ lé etine bɨn ó, bɨn saʼ syem ɨ, bɨkʉʉŋʉ byaa nkʉʼ be nteme alɨl bɨn mɨlʉ.

¹⁴ Sa ndɨ tɨʼ ɨ, yé ó: ǃbɨna bé ódi ga e buʼo efoʼ, apɨŋla é buʼo, to pyal é l'efie nɛʼɛ, bɨna bé ódi ga bʉr o ndɨ e nkɔb é Krɨst ɨ.

¹⁵ Ebe, yé ó tila ó: «ǃBɨn si joʼo twii mo Zyɛm muh nɛʼɛ, mʉr alɨha motɨɨ me, nkʉ sa elele e lʉ mpʉ bɨmpam bin, byé a sa é jɔʼ byɛɛ, byé a kaŋa e Zyɛm ɨ.»

¹⁶ Ozé bé a joʼo twii mo Zyɛm, ntɔʼ kaŋa e nye e? Yé a be ó bʉr o b'a duho é Egipten ɨ, bé e Moyiz!

¹⁷ É mɨmbu mowʉm monâ myaa, Zyɛm a kpaa empime e l'ozé? Nye a kpaa empime ó e bʉr o b'a sa syem ɨ! Bɨha ó b'a dwè, ntɔʼ debe é feha si.

¹⁸ Zyɛm a káale ó: «Bɨh bé ópa bee nkʉ bʉr, bé óka bâʼle ni é l'egbala lam!» Bʉr o nye a lwib, tiibe e be e, bé ozé? Bé ó baa b'a sa nye ebɨh ɨ!

¹⁹ Ebe no ó bɨna ndɨ ebee ga ó, bé a baani é l'egbala le e. Yé a be ó, ebe, bé a baajyɛʼ taa buʼo yɔɔ boo nye.