2 Tesalonika 2 - Kálara Zyɛ̌m Edwán é mpʉ̌n

¹ Obɨɔ ga bam aa! Bɨh bé ejɨ tɨe bɨn yʉʉ sɔʼɔ. Yé etiibe ó, e Tî ga wina Yesʉs-Krɨst, é mpʉ nye ópyal, ntɔʼ syɛŋ bɨna ga é mih me e.

² Bɨh bé elɛɛ bɨn ó nɛɛ: aka twɨra ga. ǃBɨn si joʼo ó, Da Yesʉs, nyi bâʼle pyal nɛʼɛ, sɨa yaa l'atɨ bɨn mokʉ si. Mʉr waa dam lɛɛ ó, lɛa we waa, wé ó fela sɔʼɔ me a gwih ɨ, yé abe no. Nye dam lɛɛ ó, yé ó ekan me a lɛɛ nye e. Yé nteme, yé abe no. Nye dam ka boʼlo ó, lɛa waa, wé eduho é kalara a duho é bɨh ɨ, yé abe no.

³ Mʉr beʼ l'agomlo bɨn é bebebebe zi é zi lwib bɨkʉʉŋʉ ye, ebe, esie e mbi jɔʼ yi, lé ákwoʼ pyal no, bʉr, l'apa kaŋa e Zyɛm é buobuo. Ntɔɔ motie ócyɛb é lyanbe é mih mo bʉr é pyɛldweh é jɔʼ yaa. Nye ó ndɨ cyɛb efoʼ é sama bʉr bé ódim njʉmdia e njʉmdia ɛ.

⁴ Nye ókaŋa e sa yiyɛh ndɨ ejebɔ ó, zyɛm ɨ. Bɨsa bʉr ndɨ edwiibɨ ɨ, nye ósa bye mongan. Nye ófuʼla gbana Mpah Zyɛm, di tɨʼ, le edoʼo, lé elɛɛ é kpɨbɨbɨ ó, nye ó ndɨ Zyɛm.

⁵ Zê bɨn bé atoŋlo ó, yé ó sa me a bɛa lɛɛ e bɨn é l'etɔɔrʉ é jɔʼ bɨna bé a be ga gumo gwar ɨ?

⁶ Ebe no ó bɨn lé egʉa nteme sa dina lé ekamle mʉr waa lé epyal é bananaʼ ɛ. Yé esa no ó, nye pyala njɨ é jɔʼ Zyɛm a bɛa tiʼe ó, nye ópyal ɨ.

⁷ No ó, ontɔɔ o motie mo Zyɛm, bé esea syɛɛ ye yaa é bananaʼ ó, e nkul ndɨ anyin bʉr é mih ɨ. Yé ejala ó, mʉr lé ekamle nye lé esa ebebe le e, nye taara laa. É jɔʼ yaa, nye ódwe nye zi ɨ.

⁸ É jɔʼ yaa ó mʉr ndɨ entaa motie mo Zyɛm ɨ, nye òka nyin é kpɛŋlɛm, Da Yesʉs ntɔʼ jʉ nye e ngul nʉm we e. Nye óteʼle mʉr waa ó, é zea nye óze é moncɛnba ɛ.

⁹ Mbi zea nye óze e, wé ólɛʼle bʉr ó, nye e nkul mo Satan. Nye ósa mosima mɨmbi mɨmbi e bɨdweʼle bɨ nkul we, ka kɛl bɨsa bɨ jehe ndɨ byaa bɨkʉʉŋʉ ɨ.

¹⁰ Nye óbɨlan e bɨsyɛɛla bɨ ozyɛhozyɛh bibyɛh é l'efu ó, nye gomla bʉr é bebebebe zi ɨ. Bé ó bʉr o b'a bɛa gʉmla é bebebebe zi waa ɛ. Bé a si bene lé ebuʼla ocyecye. Nkʉ bé a be ó be, kpɛl we nɛʼɛ, mpa wi sa ó, bé biʼe tiʼ molu mo mpoʼ mɨmɛh.

¹¹ Ebe no ó Zyɛm óze sa ó, bé buʼla bɨkʉʉŋʉ ndɨ é bul nyan ɨ. Nye a sa no ó, bé buʼla mɨlɔɔ mɨ mpʉl.

¹² No ó, bʉr o ndɨ abuʼla ocyecye, bula mɨɨla njɨ lé esa bɨsyɛɛla bɨ ozyɛhozyɛh. Bɨbɛh, bé ódweŋɔ mobe tɨ, ndwe le ekabɔ bɨntɨʼa.

Cyɛba ga é nkʉʼʉ

¹³ Obɨɔ ga bam, baa Da Yesʉs lé ebul kpɛl ba ɛ! É nko paʼ wih, yé ejala ó, bɨh dweʼ Zyɛm ekiba é bɨjɔʼ bibyɛh é lɔb win, ebe, nyi pɛh bɨn mpʉ mʉr lé epɛʼ tom é peme ye e, ó bɨn biʼe tiʼ molu mo mpoʼ mɨmɛh é zi Sisim we, wé a pubo bɨn ɨ. Bɨn mu ó lé ebi tiʼ molu mo mpoʼ mɨmɛh é zi taa buʼo bɨn lé ejyɛʼ boo nye é l'ocyecye e.

¹⁴ Zyɛm a si jebe bɨn é zi syɛɛ bɨh bé a sa lé elɛɛ bɨn Mbɨambɨa Lɔɔ ɛ. Nye a sa no ó, bɨn nkʉʼ dwiibɔ, duu yaa lé ejala e nkɔb win, é jɔʼ Tî ga wina Yesʉs-Krɨst ónyin é dia taʼa ye e.

¹⁵ Ebe no, obɨɔ ga bam aa! Cyɛba ga é nkʉʼʉ. Duʼo ga mɨnjwɨr bɨh bé a ntɛŋ bɨn ɨ, dam be é zi lwib, nkʉ é zi kalara bɨh bé a tile e.

¹⁶ Tî ga wina Yesʉs-Krɨst nye mʉr tɨʼ bé e Zyɛm Sɔŋ ga wina, waa a lɛʼle bɨna ga kpɛl, waa lé egba bɨna ga nkul é monyʉl, waa ndɨ asie-sie, waa lé elɛʼle bɨna ga ncwɨncwɨa, le egba bɨna ga mbɛla é mɨleme e, nye gbaʼ bɨn nkul é monyʉl.

¹⁷ Nye cyɛba bɨn é mɨleme, ó bɨn saʼ bɨsyɛɛla bɨ ncwɨncwɨa, le elɛɛ mɨlɔɔ mɨmpa, mɨmbi mimyɛh.