2 Pyɛr 2 - Kálara Zyɛ̌m Edwán é mpʉ̌n

Mɨmpʉmpʉl mɨ oyeʼle, myé óze

¹ Molu pihe, mɨmpʉmpʉl mɨ ogwiha o mɨlɔb, myé a si pyal-pyal é l'esama e bʉr mo Zyɛm. É jwɨʼ gwar e gwar yaa ó mɨmpʉmpʉl mɨ oyeʼle, myé ódɨ pyal é l'esama lɨn ɨ. Bé ódwe-dwe bɨsikʉlʉ byɔɔ ó, é mofo, ó bé lɨrɨ buʼo yin. Bé ókɛla buʼo ga yina, le ekɛla ó, bé agʉa Tî ga wina, mʉr a jɛna bwaʼbwaʼ tɔɔ é jɔʼ nye a kʉr be e. Bé ódaʼre ebebe é monyʉl mɔɔ. Ebebe laa, lé ópyal be motwɨra, ntɔʼ dimle be.

² Bé ógomlo buobuo bʉr é bebebebe zi, ó bé saʼ bɨmala zam e l'ekomo. Bé ósa ó, bʉr fœʼœ sikʉlʉ é lɔb zi ocyecye bɨna lé edu ga ɛ.

³ Mɨmpʉmpʉl mɨ oyeʼle myaa, myé ókʉa bɨn e mokan bɨkʉʉŋʉ lé esaa ebi bɨsa é zi waa. Sa gwar, bɛa taare kɔm, tiʼà mɨlɔb wɔɔ, nyi bɛa tiʼe mɨlɔb myɔɔ, le egʉa bɨntɨʼa nye ókab be tɨʼ ɨ. Nye ó é doʼlo lé ebono be.

⁴ Ebe, jɔʼ beengles bé a sa syem ɨ, Zyɛm a baakamle e be. Nye a kʉ ka guho be ó njɨ é Bɨ-siʼe. Nye a dil be gʉʼ é mpila ó, lé ebono dobo le etiʼ e mɨlɔb.

⁵ Zyɛm a baakamle nteme e bʉr omya. Nye a si ntɨh mpɨɨ nɨnɨ é si nwaʼ lé ejʉ bʉr o b'a baadwaabe nye e. Nye a kʉ ka kamle ó njɨ e tiʼ mo Noe bé e bʉʉ bʉr tambɛl, ebe, nye ó b'a dwe-dwe bʉr bɨsikʉlʉ byé a be cɨcyel ɨ.

⁶ Zyɛm a si dwe bʉr o bɨnkana bɨ Sodɔm e Gomɔr mobe, nye ntɔʼ diʼ bye e siʼe. Nye a sa syɛɛla yaa ó, lé elɛʼle mpʉ bʉr o ndɨ adwaabe nye e, bé ófuʼla ɛ.

⁷ To kœb ó, nye a be ó si syɛb Lot, cɨcyel mʉr, é bim efie laa tʉŋlʉ. Mbea Lot a bee-bee ontɔɔ o motie lé esa bɨmala zam e l'ekomo e, nye a be ó e tuu é leme,

⁸ ebe, dobo lɨlɛh, cɨcyel mʉr waa, nye a tiʼe-tiʼe paʼra ontɔɔ o motie ó, lé ebee le ejoʼo bɨsyɛɛla byɔɔ. Byé a be nye ó, ebɔʼ nye a bɨm-bɨm é leme e.

⁹ Yé be ó, Da a be si syɛb Lot é mɨtuu nɛʼɛ, lɛɛ ó, nye nteme ógʉa mpʉ nye ódɨ tiʼ bʉr bɨbɛh ndɨ edwaabe nye e, é jɔʼ bé lé entaa mobʉbla ɛ. Nye egʉa nteme mpʉ nye ókab ozyɛhozyɛh o bʉr bɨntɨʼa, le emɛr be é mpila é dobo le etiʼ e mɨlɔb ɨ.

¹⁰ Nye ókʉ bul kab bɨntɨʼa ó, dwe bʉr o ndɨ edu bɨgwɨma bɨ nyʉl bɨpuno wɔɔ ɛ, bɛɛ nteme lé epyeh mojwɨ̀ʼa mo si le maa mo kʉ. Mɨmpʉmpʉl mɨ oyeʼle me lé etaŋle bɨn lɔb wɔɔ ɛ, myé ajoʼo bʉa dam be é jɔʼ bé lwɨɨ beengles ndɨ é lal bɨna ndɨ egumlo e.

Mɨmpʉmpʉl mɨ oyeʼle, myé e pyeh

¹¹ Beengles mo Zyɛm bɛɛ, bʉr o ndɨ elaa bɨbɛh é nkul ɨ, bé abe lé ekɛl molwɨɨ é jɔʼ bé lé epur be é mih mo Da ɛ.

¹² Oyeʼle baa bɛɛ, bé epyeh ó, sa bé ndɨ agʉa ɛ. Bé ó mpʉ otir o montiʼ, luʼo pɨʼ. To kœb ó, tir, nye ekʉ byɛl njɨ ó, nye mɛrɔ; nye òjʉŋɔ. Jwɨʼ gwar e gwar yaa ó bʉr baa, bé ópɛʼɔ modwɛʼla ɛ.

¹³ Bé óbi myɛna mo bɨsyɛɛla bɨ ebebe byɔɔ. Bé emɨɨla-mɨɨla ó, lé elɔʼba lé ebwalɔ mozɔɔ teme moho. É jɔʼ bɨn e boo nɔɔ, bé epuhba mobo e, nkʉ bɨn bé ó mpʉ nyʉl ngwar, bɛɛ ó ndɨ mobar mo nyʉl waa! Bé esahle lé ede, lé ekʉ ka du ó njɨ bɨgwɨma byɔɔ,

¹⁴ mih mɔɔ lé esaa bʉba bé saʼ mɨfyɛba e be e. Bé agbala ba lé esa mɨsyem. Bé ekwab bʉr o ndɨ é pɨŋla é l'ebò e cyen lɔɔ ɛ. Bɨ gba nyʉl lé ejwɨʼ edu bɨgwɨma bɨ nyʉl bɨpuno wɔɔ é dwiii. Zyɛm, nyi káale be.

¹⁵ Bé a si liʼe cɨcyel zi, gʉmla é bebebebe zi, ntɔʼ dim lé edu zi mo Balam, mwan mo Bosɔr. Nye ó b'a kpɛl myɛna nye a bi pie bɨsyɛɛla bɨ ozyɛhozyɛh nye a dɨ sa ɛ.

¹⁶ Jakah, sa ndɨ abe lé elwib ɨ, yé ntɔʼ taare lé elwib e twii mʉr, ntɔʼ bana bâm e ngwiha mɨlɔb waa, le ekamle nye lé esa syɛɛla ebebe nye a ngbaa sa é l'ogʉ we e.

¹⁷ Bʉr baa, bé enwɨɨla ó e mono mo dibe ndɨ ejwɨl-jwɨl ɨ. Bé ó mpʉ mɨnkur nkuo lé etine e. Zyɛm, nyi bɛa komlo be dia ó, é l'edurʉ le ankom-nkom.

¹⁸ Bé elwib-lwib ó e mokan mo jaale, maa ndɨ mbɛh ɛ. Bé ekwab bʉr o b'a ngbaa pʉʼa é sama bʉr o bé e boo nɔɔ, bé a dɨ sa syem ɨ. Bé ekwab be no ó, lé elɛʼle be egba monyʉl mɔɔ lé esa bɨmala zam e l'ekomo.

¹⁹ Bé ekɛʼ be ó, bé ópɛʼ be é dia olʉa, dil be é dia otî, bɛɛ yɛɛ njɨ molʉa mo pɨʼ ontʉlontʉl, ebe, sa yiyɛh mʉr lé ebaran e ye, yɛɛ lé entaa nye é nkul ɨ, mʉr waa, nye ó elʉa é l'efu e sa yaa.

²⁰ ǃƗ mʉr si gʉa Tî ga wina le Tiʼbʉr ga wina Yesʉs-Krɨst, le esyɛhle bɨbol bɨ si nwaʼ nɛʼɛ, ǃnye si bâʼle kʉ bir pie tɨʼ ó, ebebe laa, lé bâʼla mara nye wa, tiʼ ye, yé óka bebe, ntaa njɨ, laa mpʉ yé a taare be e,

²¹ ebe, yé a ngbaa bul mbɨa é nko paʼ wɔɔ ó, mpa bé a baataare kœʼ é zi lé elɛʼle bʉr ebò e cyen ndɨ cɨcyel ɨ, abe, bé osi kœʼ tɨ, é kœʼ kœʼ nɛʼɛ, bé ntɔʼ ka bula tumo koo e motie ndɨ ti, maa Zyɛm a bɛa tiile be e.

²² Sa yé a pyal be e, yé ebɔma e mokan bɨntuntu moba ma. Mé elɛɛ é l'ocyecye ó: «Mpye, nye efiʼ ó, bula to de bɨjʉʉlʉ bye.» Lʉʉ ekan e tɨ, lé elɛɛ ó: «Pie bɨ sil jwɨ̀ɨ nkʉ, nye ntɔʼ laa, bula to biila é bɨjyɛn.»