Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

2 Korɛnt 9 - Kálara Zyɛ̌m Edwán é mpʉ̌n

1 Yé abe ba bɨn e nyɔm ó, me bâʼla tile é lɔb mɨsaŋ mɨ bʉr ndɨ é Yʉda ɛ, le é lɔb ngula bɨna bé lé ejala le eto ga be e wa ɛ,

2 ebe, me ebɛa gʉa ó, mɨleme, myé ó bɨn é ntɨɨɨŋ ó, bɨn gulɨ be. Me edoʼo e bɨn é mih mo bʉr o Masedwan, lé elɛɛ be ó: «Bʉr o mbɛr Zyɛm ndɨ ɨ Akayi ɨ, bé a bɛa taare mɔɔ mozyɛŋ ó, é mbu pihe!» É jɔʼ me lé elwib e be no e, buobuo bʉr, bé esa zyee lé egul be nteme.

3 No ó mɨ lomo bʉʉ obuʼla bɨn ye. Me esa no ó, bɨlwib me a lwib é jɔʼ me a doʼo e bɨn ɨ, byé l'ayi ka nyin ó, byé abe ocyecye. Me ekpɛl ó, bɨn diʼe mɨkwɨmla mpʉ me a lɛɛ-lɛɛ bʉr ó, bɨn mu ó mɨkwɨmla ɛ.

4 Yé ajala ó, é jɔʼ bɨh e bʉr o Masedwan bé ópyal bɨn ye e, bɨh kœbɨ bɨn lé ejabla, bɨh ntɔʼ sɔma é mih mɔɔ. (Me agum lɛɛ bɨn bɛɛ!) Bɨh bé amu bil fwon, ebe, bɨh bé a si buʼla bɨn é nko paʼ jwɨʼ yin yaa.

5 Ebe no, me a gʉa ó, yé a kʉ jala ó, me lɛŋɨ obuʼla baa ó, bé samla, to bɨn ye. Me ekpɛl ó, bɨn dira nkɛʼ bɨn bé a taare liʼe bɨh e ma ɛ, ó bɨn bé ósa mɨngula mɨ mɔn. Myé diʼe koma é l'ekʉm. Sa yaa, yé ólɛʼle é jɔʼ yaa ó, bɨn bé esʉ bʉr mocyɛʼ mo mpom é zi mɨngula myaa. Yé aduho é tina bʉr lé etine bɨn ɨ.

6 Ebe, yé ó: «Mʉr lé ebè mompœʼ abuo e, nye nteme ópɛʼ ó, bwa mode abuo. Mʉr lé ebè mompœʼ é buobuo e, nye ó ngo ka pɛʼ mode twiha.»

7 Yé ejala ó, mʉr nyiwɛh dweʼ Zyɛm mɨndwɛa lé edu tiʼa nye a bɛa nʉa ɛ. Adwe ga nye mɨndwɛa bɨn bé óliʼ lé egwɨma pie tɨʼ ɨ, nkʉ ebe tina. Dweʼ ga mɨndwɛa min e bɨsʉhʉ, ebe, mʉr Zyɛm lé ekpɛl ɨ, nye ó waa lé edwe mɨndwɛa mye e bɨsʉhʉ ɨ.

8 Zyɛm, nye ó e nkul esʉ bɨn mocyɛʼ mo mpom mɨmbi mimyɛh ó, bɨn diʼe é jɔʼ yiyɛh e sa yiyɛh bɨn bé ójɨ ɨ. No ó bɨn bé óbe é tɨʼlɨ é l'efu ó, bɨn sea bɨsyɛɛla bɨ ncwɨncwɨa mɨmbi mimyɛh ɛ.

9 Yé ó mpʉ yé ndɨ tila é Kalara Zyɛm ɨ. Yé ó tila ó: «Nye a si dwe baanteʼenteʼe bɨsa bye é ntuʼ-ntu-ntuʼ. Ocɨcyel nye ndɨ e we e, wé ódi ó, njʉmdia e njʉmdia.»

10 Zyɛm ó ndɨ mʉr lé edwe bʉr mompœʼ mo ebè e. Nye nteme ó ndɨ ekab bʉr mode bé óde e. Nye ódwe bɨn mompœʼ é ntuʼ-ntu-ntuʼ, sa nteme ó, mé bua. Nye ósa ó, bʉr é buobuo, bé nkʉʼ biʼ e bɨn ebe bɨsyɛɛ bɨn lé esea é l'ocɨcyel ɨ.

11 É jɔʼ yaa ó bɨn bé ódi obil o bɨsa é mozi mɨmɛh é l'efu ó, bɨn diʼe odwɛna é l'efu e bʉʉ bʉr ɨ. É mbi ndɨ ó, bʉr é buobuo, bé ódwe Zyɛm ekiba, duho é mɨndwɛa min, bɨh bé óto ntɛŋ be e.

12 Ebe, é jɔʼ bɨn lé esea be syɛɛ yaa ɛ, yé abe njɨ é l'efu ó, bɨn gulɨ mɨsaŋ mɨ bʉr mo Zyɛm ndɨ é l'enteʼe e. Hɨʼɨ, yé ósa nteme ó, buobuo bʉr dweʼ Zyɛm ekiba.

13 Syɛɛ bɨn lé esea ɛ, yé ó bwaʼbwaʼ dweʼle, sa lé elɛʼle bʉr ó, bɨn bé ó obuʼla ɛ. Taare é jɔʼ bɨn bé a mɛʼle Mbɨambɨa Lɔɔ mo Krɨst ɨ, ze pyal é muh é dobo lɨ, bɨn bɨ fil monyʉl si, lé esa Zyɛm mojoʼo. Ebe no ó bʉr, bé ódwe Zyɛm kum ɨ, é jɔʼ bé óbee mpʉ bɨn lé egul be e mobi mɨn, kumo e bʉr bɨbɛh ɛ.

14 ǃBé si bee bɨn lé egul bʉr nɛʼɛ, bé óbul kpɛl bɨn, le ejwɨʼla e Zyɛm é l'efu lɨn é buobuo ebe mpwaʼ ncwɨncwɨa nye a lɛʼle bɨn ɨ.

15 Bɨna dweʼ ga Zyɛm ekiba é lɔb etʉm nye a ntɨh bɨna ga ɛ. Mombɨa ndɨ tɨʼ ɨ, mé abe e tolɔɔ.

© 2002, Wycliffe Bible Translators, Inc. All rights reserved.

ကြှနျုပျတို့နောကျလိုကျပါ:



ကြော်ငြာတွေ