1 Timotɛ 1 - Kálara Zyɛ̌m Edwán é mpʉ̌n

Moswɨhlɨ

¹ Mɛm Pol lʉmlʉ mo Yesʉs-Krɨst, ó lé etile go kalara nwa. Zyɛm, Tiʼbʉr ga wina, bé e Yesʉs-Krɨst, waa lé egba bɨna ga mbɛla é mɨleme e, bé ó b'a nʉa tiʼa ó, me diʼe lʉmlʉ.

² Me etile ó, gwɔɔ Timote, ndɨ me mwan é nko paʼ buʼo e. Mocyɛʼ mo mpom, njwɨʼa-nkoo ndwe e motala mo Zyɛm Sɔŋ bé e Tî ga wina Yesʉs-Krɨst, mé swɨŋɨ é go.

Diʼe ncye e mɨmpʉmpʉl mɨ oyeʼle

³ Diʼe Efɛɛz, mpʉ me a tɨe go é jɔʼ me a be, me mu kunokuno le eto Masedwan ɨ. Cyelɨ bʉr o mbɛr Zyɛm win mpene ó, bé l'anyamle bâʼle dwe guu mbi sikʉlʉ fih.

⁴ Bé ayi joʼlo bɨsa mɨlɔɔ, nkʉ bɨláa-ntan ndɨ abe e l'esie e. Bɨsa byaa ó lé edulo ziila motwii é Mbɛr-Zyɛm. Byé abe e nyɔm é nko paʼ eloŋlo syɛɛ mo Zyɛm. Bɨna bé esa ga nye syɛɛ yaa ó, é zi buʼo ga yina.

⁵ Motɨɨ go ódɨ dwe e, ndumlo tɨ, wé ó, bɨna kpɛlɨ ga Zyɛm, kpɛl yaa lé eduho bɨna é mɨmo si ɨ. Mɨpɛhla mɨleme ga mina, myé diʼe é pyɛɛɛ, mɨleme myɛɛ lwɨŋla e mpaŋ buʼo ndɨ abe mbaʼra e bɨkʉʉŋʉ ɨ.

⁶ Yé e bʉʉ bʉr o b'a sa ebebe é lɔb bɨsa byaa ɛ, ntɔʼ gʉmla é byʉʉ bɨbebebebe mozi lé ejoʼlo baambɛhambɛha o bɨlɛba.

⁷ Bé egwɨm ó, bé beʼ oyeʼle o motie, bɛɛ l'apa kʉ gʉa sa bé lé elɛɛ ɛ, nkʉ mɨlɔb bé lé eboʼlo e bʉr ó, myé ó tɨʼ ɨ.

⁸ Bɨna bɛɛ, bé egʉa ga ó, motie mo Moyiz, mé e nyɔm ó, é jɔʼ mʉr lé ebi motie maa mpʉ mé lé ejala le ebiŋɔ ɛ.

⁹ Bɨna bé egʉa ga nteme ó, motie, mé a baatiilɔ lé etoŋlo ocɨcyel o bʉr, njɨ ontɔɔ o motie, bé e bʉr o ndɨ esa ocyɛb be efoʼ bɔɔ ebɨh ɨ, bʉr o ndɨ adwaabe Zyɛm ɨ, osyɛl o mɨsyem, bʉr o lé epyeh Zyɛm ɨ, ndwe e baa ndɨ esa lɔɔ Zyɛm ebɨh ɨ, ojʉl be osɔŋ bɔɔ, ojʉl be onyɔŋ bɔɔ, ojʉl o bʉr,

¹⁰ osyɛl o bɨmala ndwe e mɨfyɛba, bʉrʉm ndɨ etɛbla paʼra wɔɔ ɛ, bʉr o ndɨ ecen bʉʉ bʉr é l'okomo e, mɨmpʉmpʉl ndwe e baa lé ebuʼo bʉʉ bʉr mɨlɔb ɨ. Zyɛm a tiile mʉʉ motie nteme ó, lé ekamle bʉr lé esa bɨsyɛɛla bibyɛh ndɨ ajala e mpaŋ sikʉlʉ bɨna lé ejwɨʼ ga ɛ.

¹¹ Sikʉlʉ yaa, yé ó yaa lé eduho é Mbɨambɨa Lɔɔ ndɨ e kum ɨ. Zyɛm bɨna lé eseʼle e, a timle me lɔɔ waa ó, me baʼla we.

Ncwɨncwɨa Zyɛm a lɛʼle Pol ɨ

¹² Zyoo e Tî ga wina Yesʉs-Krɨst, ebe, nye a si dwe me nkul é syɛɛ yam yi. Nye a láa ó, me ó mʉr ebuʼla, nye ntɔʼ cyel me é syɛɛ ye,

¹³ mɛm yɛɛ mʉr a pyeh-pyeh Zyɛm é molu pihe e, le etíile bʉr be, ndwe le ebul pyeh bʉr. Dam be ó, me a si kʉ sa no, Zyɛm a si bana jwɨʼ me nkoo, nyɛɛ lé egʉa ó, bɨsyɛɛla me a sa-sa ɛ, byé a kʉ duho-duho ó, é l'egʉʼla lam, ndwe e l'abuʼla wam.

¹⁴ Ebe no ó Tî ga wina a sʉ me mocyɛʼ mo mpom, abe e tolɔɔ ɛ. Nye a si gba me nteme buʼo ndwe e kpɛl é leme. Byé ó, é l'efu e bʉr o ndɨ é zyɛŋa wɔɔ boo Yesʉs-Krɨst ɨ.

¹⁵ Lɔɔ wi, wé ó lɔɔ ebuʼla, waa bʉr bɨbɛh lé ejala le emɛʼle e: Yesʉs-Krɨst a ze kaʼ é si nwaʼ ó, nye ntaʼ, ze dwe osyɛl o mɨsyem tiʼ molu mo mpoʼ mɨmɛh. No ó, é sama osyɛl o mɨsyem yaa, mɛm ó b'a be si sahle!

¹⁶ Ebe no ó Zyɛm a jwɨʼ me nkoo e, ebe, me ó b'a bul sahle é nko paʼ esa mɨsyem. Yesʉs-Krɨst a taare lé elɛʼle mpuo bihbe we ó, é jɔʼ nye a dihbe me e. Yé ó dweʼle nye lé elɛʼle bʉr bɨbɛh bé ójyɛʼ taa buʼo yɔɔ boo nye é molu lé eze e. Bé ójyɛʼ taa buʼo yɔɔ boo nye, ntɔʼ bi tiʼ molu mo mpoʼ mɨmɛh.

¹⁷ Zyɛm ndɨ Njwɨɨbʉr njʉmdia e njʉmdia, waa ndɨ abe e nkul edwè, waa ndɨ anyin bʉr é mih, waa ndɨ Zyɛm nye ome e, duu ndwe e kum, byé diʼe é nye njʉmdia e njʉmdia. Amɛn.

¹⁸ Mwan wam Timote, me edwe go motɨɨ maʼ ó, lé edu lɛa ogwiha o mɨlɔb bé a lɛɛ, tiibe e go e. ǃGo si baʼle motɨɨ maa nɛʼɛ, go ógʉa lwimla dɔm.

¹⁹ Go óbaʼle buʼo yo e mɨpɛhla mɨ leme ndɨ é pyɛɛɛ ɛ. Bʉʉ bʉr, bé a si tine buʼo yina, buʼo yɔɔ yaa ntɔʼ lɨra, mpʉ titima lé edɨ é modibe, dim ɨ.

²⁰ É sama bʉr baa, yé ó Imenaus ndwe e Alɛksandros. Bé ó me a cen boo Satan ó, nye tura be mɨlʉ, bé nkʉʼ gwaʼ lé epyeh Zyɛm.