1 Tesalonika 5 - Kálara Zyɛ̌m Edwán é mpʉ̌n

Dobo Da Yesʉs óbula ze e

¹ Obɨɔ ga bam aa! É nko paʼ bɨjɔʼ e mowala, yé abe e sa mʉr kaʼ tile bɨn,

² ebe, bɨn bʉr o tɨ, bé ekʉ gʉa é kpɛhla ó, é dobo Da Yesʉs óbula ze e, nye ópyal bʉr ó, motwɨra, mpʉ mɨndiblʉ ndɨ ebɛa pyal-pyal bʉr é mɨpum ɨ.

³ Bʉr, bé ólɛɛla paʼra wɔɔ ó: «Sa yiyɛh mu ó bɨna ga mbɨmbɨa. Sa ebebe, yé abe e nkul eka sa bɨna ga.» É jɔʼ yaa, ebebe, lé ópyal be motwɨra, ntɔʼ dimle bɨbɛh. Si óliʼ tɨtoʼo. Bé aŋa be e nkul esyɛhle mobebe maa. Bé óbe ó mpʉ anya-ebum. É jɔʼ min lé emɛr nye e, nye abe e nkul esyɛhle mokpaa mo min.

⁴ Obɨɔ ga bam aa! Bɨn bé abe é l'edurʉ. Bɨn bé aŋa twɨra dobo Da Yesʉs óbula ze e. Lé aŋa pyal bɨn mpʉ ndiblʉ.

⁵ Bɨn bé ó mpʉ baa lé ekœʼ é myɛn, é jɔʼ yé ndɨ moho e. Bɨna bé abe ga bʉr be apum, nkʉ baa ndɨ entime é l'edurʉ ɨ.

⁶ Ebe no, bɨn bé ajala le eja bɨdwo mpʉ bʉʉ bʉr lé esa-sa ɛ. Diʼe ga nkehe. Mɛrɨ ga mɨleme,

⁷ ebe, baadwo-bɨlɛr onɨ, bé eja ó, é mɨpum. Mɨnunwoʼ, myé efwaʼ-fwaʼ monwoʼ ó, é mɨpum.

⁸ Sa gwar, bɨna ga bé ó bʉr o moho. Bɨna bé ejala le emɛr ga mɨleme. Diʼe ga nteme e buʼo ndwe e kpɛl tɔɔ bɨnkoho bɨnkɔɔ lé ebuuro mompɨr e tɨʼ ɨ. Dɨʼe baʼle ga mbɛla é mɨleme ó, bɨn bé óbi tiʼ molu mo mpoʼ mɨmɛh. Mbɛla waa, wé diʼe tɔɔ kʉŋʉ dɔm lé ekamle e lʉ nkɔɔ ɛ.

⁹ Ebe, Zyɛm a baatiile é leme we ó, nye kpaŋa empime e bɨna ga. Nye a pɛh bɨna ga ó, bɨna biʼe tiʼ molu mo mpoʼ mɨmɛh, dumo e Tî ga wina Yesʉs-Krɨst.

¹⁰ Nye ó b'a jala e bɨna ga. Nye a sa no ó, bɨna biʼe ga tiʼ molu mo mpoʼ mɨmɛh. No ó, bɨna dam di ga é tiʼ si nwa; nkʉ ó, bɨna dam dwè ga, é jɔʼ nye óze e, bɨna bé ódi ga sama, bɨna ga e boo nɔɔ.

¹¹ No ó, gbaʼ bʉr nkul é monyʉl é zi motɨɨ monɨ. Dɨʼe gba ga nkul é nyʉl mo mɨɔ nyiwɛh paʼra win, ó nye biʼe nkul waa, mpʉ bɨn lé ebɛa sa-sa ɛ.

Motɨɨ mo epihe ndwe e moswɨhlɨ

¹² Obɨɔ ga bam aa! Bɨh bé ejwɨʼla e bɨn ó, bɨn dwaaba baa lé esea lelelele syɛɛ é l'esama lɨn ɨ. Bé ó baa Da Yesʉs a cyel ó, bé kœʼœ e bɨn, le ebal bɨn ɨ.

¹³ Bɨn bé ejala le edwaabe be, le ekpɛl be ebe syɛɛ yɔɔ bé lé esea ɛ. Tiʼa ga é motala paʼra win.

¹⁴ Obɨɔ ga bam aa! Bɨh bé ejwɨʼla e bɨn ó, bɨn bɛa bal bʉr o ndɨ esa epɨh ɨ. Baa ndɨ e l'ecyɛʼ é monyʉl ɨ, lɛŋɨ ga ó, bé tʉmɨ nyʉl. Dihba ga bʉr bɨbɛh.

¹⁵ Mʉr abuulo ebebe e l'ebebe. Saʼ ga bɨsyɛɛla bɨ ncwɨncwɨa paʼra win boo bʉr bɨbɛh.

¹⁶ Soha ga é jɔʼ yiyɛh.

¹⁷ Jwɨʼla ga e Zyɛm é bɨjɔʼ bibyɛh.

¹⁸ É jɔʼ yiyɛh, dweʼ ga Zyɛm ekiba é lɔb bɨsa bibyɛh, ebe, Zyɛm a gwɨm ó, bʉr o ndɨ é zyɛŋa wɔɔ boo Yesʉs-Krɨst ɨ, bé ódɨ sa no.

¹⁹ Ajwɨʼla saa ekamle Mbɨambɨa Sisim lé esa bɨsyɛɛla nye lé ejala le esa é bɨn ɨ.

²⁰ Alɨha ga mɨlɛa mɨ ogwiha o mɨlɔb.

²¹ Timla ga bɨsa bibyɛh. Sa ndɨ é mbɨa ɛ, mɛrɨ ga ye é kpɨɨɨ.

²² Diʼe ga é l'ecyooŋʉ, lé esyɛhle lɔb esa bɨsyɛɛla bɨ ebebe bibyɛh.

²³ Mʉr lé esa ó, bʉr tiʼa é motala ɛ, nye mʉr tɨ, nye puba bɨn é mɨpaʼ mimyɛh. Nye baʼla mɨsisim min e mɨleme min, ndwe e monyʉl mɨn. Ebò e cyen lɨn, lé diʼe no, alɨŋa ba, to pyal é dobo Tî ga wina Yesʉs-Krɨst óbula ze e.

²⁴ Mʉr lé ejebe bɨn ɨ, nye ó mʉr ebuʼla. Nye ó ngo sea syɛɛ yaa, sil.

²⁵ Obɨɔ ga bam aa! Saʼ ga Zyɛm mɨnjwɨʼla é l'efu lɨh.

²⁶ Soha ga obuʼla bɨbɛh. Bara ga paʼra win, lé edwiila momuʼ ndwia ndɨ ti ɨ.

²⁷ Me ejwɨʼla e bɨn é zyɛŋa wih boo Da Yesʉs ó, bɨn láŋa kalara nwaʼ é mosama mo obuʼla bɨbɛh.

²⁸ Ncwɨncwɨa mo Da Yesʉs-Krɨst, nye diʼe e bɨn.