1 Tesalonika 4 - Kálara Zyɛ̌m Edwán é mpʉ̌n

Ebò e cyen empa

¹ Ebe no, obɨɔ ga bam aa! Sa me lé eka tile bɨn é l'epihe e, yé ó nɛɛ: bɨh bé a si tɨe bɨn mpʉ bɨn lé ejala le ekœʼ ebò e cyen Zyɛm lé ekpɛl ó, bʉr kœʼœ œ. Bɨn nteme mu ó lé esa no. Dam be no, bɨh bé ejwɨʼla e bɨn, le etɨe bɨn é die mo Da Yesʉs ó, bɨn toʼ le esa no é buobuo.

² Bɨn bé egʉa sikʉlʉ bɨh bé a dwe bɨn é die mo Da Yesʉs ɨ.

³ Ebe, sa Zyɛm lé egwɨm e bɨn ɨ, yé ó bɨn diʼe mɨsaŋ mɨ bʉr. Ebe no, mbuʼla nyiwɛh, nye ejala le edi é l'ecyooŋʉ, lé esyɛhle lɔb esa bɨmala e mɨfyɛba.

⁴ Nye gʉŋa mpʉ nye lé ejala le ejwɨʼ nyʉl we e. Nye baʼla nye mʉr tɨʼ ti, le egba nyʉl we modile.

⁵ Nye amu jyɛnba lé ecen mih é monyʉl mo bʉʉ bʉr, mpʉ sa lɛɛ ó, nye ejeʼe Zyɛm.

⁶ Mʉr beʼ l'antaa etie, nkʉ gwìh e mɨɔ we mʉr é mbi waa. Bɨh bé a si bɛa bal bɨn ó, Da Yesʉs, nye ó mokuna-bʉr é mɨlɔb mɨnɨ mimyɛh. Yé ó sa bɨh bé a bɛa lɛɛ bɨn, lé eyɨm nkpaa.

⁷ Zyɛm a jebe bɨna ga ó, bɨna diʼe ga bʉr o ndɨ ti ɨ, abe baa ndɨ elama fwon njɨ lé edu bɨjyɛʼ byɔɔ ɛ.

⁸ No ó, baa lé elɨha motɨɨ maʼ ɛ, bé apyeh mʉr. Bé pyeh ó Zyɛm, waa lé entɨh bɨna ga Sisim we e.

⁹ É lɔb kpɛl ndɨ paʼra obuʼla ɛ, yé abe e sa me gum ka tile bɨn, ebe, Zyɛm, nyi bɛa dwe bɨn sikʉlʉ tɨʼ é lɔb waa.

¹⁰ Obɨɔ ga bam aa! É mbi waa ó bɨn lé ekpɛl obuʼla ndɨ é lal Masedwan wiwɛh ɛ. Sa gwar, bɨh bé etɨe bɨn ó nɛɛ: toʼ ga dolo lé ekpɛla paʼra win.

¹¹ Cyelɨ ga efoʼ ó, bɨn tiʼa é motala tʉŋlʉ. Mʉr dwɛʼa njɨ bɨsyɛɛ bye nye mʉr tɨ. Nye sea bɨsyɛɛ bye e mobo me é dwiii. No ó me a lɛɛ bɨn ɨ.

¹² Kœʼœ ga mpaŋ ebò e cyen, laa mɨnjeʼe-Zyɛm, myé óbee mbɨmbɨa ɛ. Mʉr beʼ l'adɨ bono okɛma é jɔʼ yiyɛh.

Epyal mo Da Yesʉs

¹³ No ó, obɨɔ ga bam aa! Me ekpɛl ó, bɨn gʉŋa efehle e bʉr mu si dwè e, é kpɛhla. Me akpɛl ó, bɨn bilɨ myoo mpʉ bʉʉ bʉr, bé lé ebil-bil myoo e, bɛɛ l'abe e buʼo é mɨleme.

¹⁴ É mpʉ bɨna lé ebuʼla ga ó, Yesʉs a si dwè, ntɔʼ bula pàh ɛ, no nteme ó bɨna lé ebuʼla ga ó, Zyɛm ópɛ̀h bʉr é mofoo é zi mo Yesʉs, ntɔʼ daʼre be e boo nɔɔ jwɨʼ gwar.

¹⁵ Sa bɨh lé elɛɛ bɨn, duho é nʉm mo Da Yesʉs nye mʉr tɨʼ ɨ, yé ó: é dobo nye óbula ze e, bɨna ga, bʉr o bé óbe, bé dina kʉ ɨ, bɨna bé aŋa samle, liʼe odwè pihe é mofoo.

¹⁶ Ebe, bɨna ga e boo nɔɔ, bé ójoʼo twii mojwɨʼa. Njwɨɨ beengles ólwib, Da Yesʉs nye mʉr tɨʼ ófulo, duho é jobo kʉ, sebe lé elwɨɨ é l'ejyoo. Odwè ndɨ é zyɛŋa wɔɔ boo Yesʉs-Krɨst ɨ, bé ótaare pàh.

¹⁷ Pie tɨ, bɨna ga, bʉr o ndɨ e tiʼ, baa bé óliʼ mɨkubla é jɔʼ nye óze e, bɨna bé óbere ga é mɨnkur tʉŋlʉ, to fwalɔ gumo gwar. Zyɛm ósyɛŋ bɨna ga e boo nɔɔ gʉ. Bɨna ga e boo nɔɔ, bé óbɔma e Da Yesʉs é l'ejyoo kʉ. Bɨna ga e boo nɔɔ, bé ódi ga gumo gwar, njʉmdia e njʉmdia.

¹⁸ Ebe no, gbaʼ ga bɨn bʉr o tɨʼ nkul é monyʉl, lé elɛɛla mɨlɔb mɨnɨ paʼra win.