1 Pyɛr 5 - Kálara Zyɛ̌m Edwán é mpʉ̌n

Kobla ga daa e bɨntœme mo Zyɛm

¹ Ebe no, mɛm, Pyɛr, me ejwɨʼla e bɨn, ocyɛb be efoʼ o Mbɛr-Zyɛm bɨbɛh, mɛm mʉr ndɨ nteme cyɛb efoʼ e, bâʼle be nteme mboʼla a bee é jɔʼ Krɨst a sia e mɨtuu ɨ. Me nteme, me ó mboʼla óbi nkɔb é moncɛnba muno ze nyin é kpɛŋlɛm ɨ.

² Kobla ga daa e bɨntœme Zyɛm a timle bɨn ɨ, abe e moyemla nkʉ tina, njɨ ebe, mʉr tɨʼ, nye ekʉ gbaa. Saʼ ga no é pɛhla ó, bɨn bé esea ó Zyɛm syɛɛ. Mʉr beʼ l'abaʼle bʉr o Mbɛr-Zyɛm ebe bɨgwɨma bɨ ebi bɨsa tɨ. Nye saʼ no ebe mbɨambɨa gwɨma leme we.

³ Alɛʼle bʉr o b'a timlɔ bɨn ɨ, mpel é bebebebe. Dɨʼe kœʼ ga e be mpʉ yé lé ejala e be e.

⁴ É jɔʼ Kobla bɨntœme nɨnɨ óbâʼle nyin ɨ, nye ópaʼle bɨn syɛɛ yin yaa, le ebœr bɨn mopʉʼlʉ mo duu mɨn. Mé ódi-di ó, njɨ é ncyɛn-nti-ncyɛn, akuna-kuna.

⁵ Bɨn mɨsoho, yé ejala ó, bɨn filɨ monyʉl si é mih mo otamabʉr. Bɨn bɨbɛh, filɨ ga monyʉl si paʼra win, ebe, yé ó tila ó: «Zyɛm, nye esa bʉr o ndɨ enkɛɛ monyʉl mɔɔ ɛ, mongan. Baa ndɨ efil monyʉl si ɨ, bɛɛ ó ndɨ esʉŋɔ mocyɛʼ mo mpom.»

⁶ Ebe no, filɨ ga monyʉl si e Zyɛm, nye nkʉʼ bɨn bɨn kʉ é jɔʼ nye ópɛh ɛ.

⁷ Filɨ ga bɨdiledile mɨmbeʼ min mimyɛh é koo we, ebe, nye ejoʼo bɨn nkʉnkoo.

⁸ Mɛrɨ ga mɨleme. Diʼe ga nkehe. Mʉr lé epur bɨn ɨ, Njwɨɨ moleme, nye elie bɨn é mɨpaʼ mimyɛh é nka-nka-nka, mpʉ ngbampwɨɨ lé emuulo le esaa mʉr nye deʼ.

⁹ Saʼ ga nye mongan lé ecyɛb é nkʉʼʉ é buʼo ga yina. Bɨn bé à gʉa ó, obuʼla ndɨ é si nwaʼ nyiwɛh ɛ, bé edihbe mbi tuu ngwar waa.

¹⁰ Zyɛm, nye ó mʉr lé elɛʼle bɨna ga ncwɨncwɨa we é bɨjɔʼ bibyɛh ɛ. Nye nteme ó b'a jebe bɨna ga ó, bɨna toʼ, to di ga é moncɛnba me é zi mo Krɨst. Moncɛnba maa, mé ódi njʉmdia e njʉmdia. ǃBɨn si sia e mɨtuu, tɔɔ ba ma peh jɔʼ nɛʼɛ, Zyɛm óbâʼle komlo bɨn. Nye cyelɨ bɨn mokʉ si é kpɨɨɨ. Nye bâʼla gba bɨn nkul é monyʉl. Nye fuma bɨn si é piʼi.

¹¹ Nkul ndwe e jwɨɨ, byé dweŋɔ nye njʉmdia e njʉmdia. Amɛn.

Moswɨhlɨ

¹² Bɨh e Silas ó lé etile bɨn kalara nwaʼ titia mpʉ. Mbea wam, wé ó, nye ó mbuʼla ndɨ mʉr ebuʼla ɛ. Me etile bɨn ó e gwɨma egba bɨn nkul é monyʉl. Me eboʼlo nteme ó, buʼo bɨn mu e ye e, yé ó mpʉ Zyɛm lé elɛʼle ncwɨncwɨa ɛ. Cyɛba ga é nkʉʼʉ é ncwɨncwɨa waa.

¹³ Mbɛr Zyɛm ndɨ ɨ Babilɔn, waa Zyɛm a pɛh mpʉ nye a pa pɛh bɨn ɨ, wé esoho bɨn bɨbɛh. Mwan wam Markus, nye esoho bɨn.

¹⁴ Swɨhla ga paʼra win e leme ncwɨncwɨa, lé edwiila momuʼ. Motala, mé beʼ e bɨn bɨbɛh, bɨn bʉr o ndɨ é zyɛŋa wɔɔ boo Krɨst ɨ.