1 Korɛnt 4 - Kálara Zyɛ̌m Edwán é mpʉ̌n

Mɨlʉmlʉ mo Krɨst

¹ Bɨn bé ejala le enʉa bɨh bɛɛ mɨlʉmlʉ mo Krɨst mpʉ osyɛl o mosa be. Bɨh bé ó baa ndɨ egʉa ebaʼle lwib odim mo Zyɛm ɨ.

² Sa bé lé ejɨ bee boo mbɔʼlʉ ekuro e, yé ó, nye diʼe mʉr ebuʼla.

³ Me asyɛl ba e me mʉr tɨ, tiibe e lɔb wam, le mpʉ bɨn bé óbɛm lwib we e, nkʉ nteme, mpʉ nuu mpah mɨlɔb fih ólwib we e. Mɛm nteme, me atiʼe lɔb wam me mʉr tɨ.

⁴ Mɨpɛhla mɨ leme wam, myé adwe me mobe. No yé alɛʼle ó, mɛm, me ó cɨcyel mʉr. Da Yesʉs ó ndɨ elwib lɔb wam.

⁵ No ó, atiʼe ga lɔb mo nuu mʉr cye yiyɛh yé l'apa pyal jɔʼ elab ɨ. Bona ga ó, Da, nye ntaʼ. Nye ópyɛl sa ndɨ é l'edurʉ ɨ, cen ye é myɛn. Nye ógwih bɨjwɨʼ bʉr lé ebà é mɨmo si ɨ. É jɔʼ yaa ó Zyɛm óseʼle bʉr be, dwe mʉr nyiwɛh kum ójala e nye e.

⁶ Obɨɔ ga bam aa! Kalara me mu lé etile bɨn nwaʼ ɛ, nye e nyɔm é l'efu lɨn. Me etile wâʼ ó, é lʉ wih boo Apolos, lé enʉa bɨh mpʉ dweʼle, sa lé elɛʼle bɨn ó, mʉr, nye ajala le enkɛɛ nyʉl, nkʉ seʼle mʉr fih mʉr kɛ̀l. Me esa no ó, bɨn jwɨʼɨ sa kɨkɛna yiʼ lé elɛɛ ó: «Mʉr antaa ga sa ndɨ tila é Kalara Zyɛm» ɛ.

⁷ Ebe, zé a bɨr gwɔɔ kʉ, laa bʉr bɨbɛh? Yé go ndɨ e ye, yaa go a baabi ɨ? Yé be ó, go a bi ye ó bi biʼe nɛʼɛ, ebe yé go lé edoʼo e ye e? Go esa mpʉ sa lɛɛ ó, yé abe etʉm go a ntɨhɔ ɛ!

⁸ Bɨn mu ó e sa yiyɛh bɨn bé a gwɨm-gwɨm ɨ. Bɨn mu ó é dia mopoʼ. Bɨn mu ó si cyelɔ é dia mɨnjwɨɨbʉr, bɨh bɛɛ l'apa be mye. A jɨ bee bɨn mu si dwibra mɨmpaŋ mɨ ojwɨʼa, bɨna ga bɨbɛh nkʉʼ di ga be ee!

⁹ Ebe, mbea wam, wé ó, Zyɛm a si cyel bɨh, mɨlʉmlʉ mye, é cye bʉr o jala le epyaŋɔ, baa bé lé ekpɛl jʉ teme bʉr ɨ. Bɨh mu ó si cyelɔ é mih mo bʉr mpʉ bʉr o jala le edwɛʼɔ ɛ, taare é bʉr o si nwa, to pyal é beengles.

¹⁰ Bɨh mu ó bɨgʉ é l'efu mo Krɨst; bɨn bɛɛ, bé ó mɨpɨpɨʼ é nye. Bɨh bé ó bɨcyɛʼ-bol; bɨn bɛɛ, mɨnjɨh mɨ bʉr. Bɨh bé epyehɔ; bɨn bɛɛ, bé edweŋɔ duu.

¹¹ Ze pyal é banana, bɨh bé edwè é za ndwe e dweh modibe. Yé esaa bɨh mompor. Bé ebî bɨh le epɛʼ bɨh é yiʼ gumo, cen é yʉʉ.

¹² Bɨh bé esea syɛɛ ndɨ é lele lele e, lé esaa tiʼ yih, bɨh bʉr o tɨ. É jɔʼ bé lé elwɨɨ bɨh ɨ, bɨh bɛɛ, bé esʉ be ó, mocyɛʼ mo mpom. É jɔʼ bé lé etíile bɨh ɨ, bɨh bé edihbe tíila yɔɔ.

¹³ É jɔʼ bé lé efœʼ bɨh ɨ, bɨh bɛɛ, bé ebɨha e be ó, e leme é piiia. Bɨ cyɛl bɨh, le enʉa bɨh mpʉ ekunu e si nwa, nkʉ sa mobomo, ze pyal é banana.

¹⁴ Me atile bɨn mpʉnʉ e pɛhla ó, me gba ó bɨn fwon é nyʉl. Me ebal bɨn ó, bala, jwɨʼ gwar mpʉ me a ngbaa bal bwan o kpɛl bam ɨ.

¹⁵ Dam be ó bɨn mu ó, e l'obœʼa otɔɔyin ewʉm é tiʼ yin boo Krɨst, bɨn bé ó njɨ e sɔŋ ngwar. Mɛm, me ó ndɨ sɔŋ win a bya bɨn ɨ. É nko paʼ tiʼ yin boo Yesʉs-Krɨst, ebya laa, lé a be ó, lé ecwɨɨ é zi elɛɛ bɨn Mbɨambɨa Lɔɔ.

¹⁶ No ó, me ejwɨʼla e bɨn ó, bɨn nʉŋa dweʼle tiʼ yam.

¹⁷ Ebe no ó me a lomlo bɨn Timote, mwan kpɛl wam ɨ. Nye nteme ó é zyɛŋa wɔɔ boo Tî ga wina, le mʉr ebuʼla. Nye ó ngo jɨm bɨtoŋla bin é lɔb ebò e cyen me lé ekœʼ é zyɛŋa wih boo Yesʉs-Krɨst ɨ. Me edwe mɨmbɛr mɨ Zyɛm mimyɛh sikʉlʉ yaa ó, bé kœʼœ ebò e cyen egwar laa.

¹⁸ Bʉʉ bʉr o mbɛr Zyɛm win, bé mu ó lé enkɛɛ monyʉl, bɛɛ lé ejwɨʼ ó, me aŋa ka ze bee bɨn.

¹⁹ Sa gwar, ǃɨ Da si kpɛl nɛʼɛ, me óze gʉʼ bɨn ye kam e kam. É jɔʼ yaa ó me óze gʉa, abe njɨ bɨlwib bin, bʉr o ndɨ ebul nkɛɛ monyʉl ɨ. Me óze gʉa nteme bim nkul bɨn ndɨ e nye e.

²⁰ Ebe, bɨsyɛɛla bɨ jwɨ̀ʼa mo Zyɛm, byé adu bɨlɛba. Byé ebul dwɛʼ ó, mbi nkul mʉr ndɨ e nye e.

²¹ Bɨn bé ekpɛl yɛɛ yé? Zê bɨn bé lé egwɨm bee mpʉ me ndɨ e nkul eze gʉʼ bɨn ye e ngaha é mbo e? Zê bɨn bé lé egwɨm bee me lé eze gʉʼ e leme ncwɨncwɨa ndwe e talatala njwɨr wam ɨ?