1 Korɛnt 14 - Kálara Zyɛ̌m Edwán é mpʉ̌n

Bɨlɔblɔb

¹ Saŋa ga zi ekpɛla. Gwɨmɨ ga bɨntɔɔ Zyɛm lé ebɛa nol bwan be e, kʉ bul be é l'efu ó, bɨn gwihɨ mɨlɔb mye.

² Mʉr lé elwib bɨlɔblɔb ɨ, nye alwib e bʉr o bé e boo nɔɔ ndɨ ɨ. Nye elwib ó njɨ e Zyɛm, ebe, mʉr fih, nye ajoʼo sa nye lé elɛɛ ɛ. Nye elwib ó, lwib odim e nkul mo Mbɨambɨa Sisim.

³ To kœb ó, waa ndɨ egwih mɨfela mɨlɔb ɨ, nye elwib e bʉr o bé e boo nɔɔ ndɨ ɨ. Nye ó e nyɔm, ebe, nye egba be nkul é monyʉl le edwaŋle be mɨleme.

⁴ Mʉr lé elwib bɨlɔblɔb ɨ, nye egwɨl ó njɨ buʼo ye nye mʉr tɨ. To kœb ó, mʉr lé egwih mɨlɔb mo Zyɛm ɨ, nye egwɨl ó bʉr o Mbɛr-Zyɛm, lé esa ó, bé nʉŋa pim é buʼo.

⁵ Me ekpɛl ó, bɨn lwibɨ bɨlɔblɔb. No ó, me é bul kpɛl ó, bɨn gwihɨ mɨlɔb mo Zyɛm. Mʉr lé egwih mɨlɔb mo Zyɛm ɨ, nye ó e nyɔm, laa waa lé elwib bɨlɔblɔb ɨ, alaa ó mʉr mba beʼ nteme tɨ, waa ndɨ e nkul edwir sa nye lé elɛɛ é lwib yaa ɛ. No ó bʉr o Mbɛr-Zyɛm bɨbɛh, bé ónʉa pim é buʼo e.

⁶ Obɨɔ ga bam aa! Nkʉ me a be ó be, ze gʉʼ bɨn ye lé elɛʼle bɨn mpʉ me lé egʉa lwib bɨlɔblɔb nɛʼɛ, mpa me baagum be bɨn e nyɔm. Sa yé a kʉ jala e bɨn ɨ, yé a be ó, me ntaʼ, ze gʉʼ bɨn ye e mɨfela mɨlɔb mo Zyɛm, nkʉ e ngwɨa ngwiha mɨlɔb, nkʉ e ngwiha mɨfela bɨsɔʼɔ, nkʉ e yʉʉ sikʉlʉ fih.

⁷ Bɨna nʉŋa ga dweʼle e bɨbwɨmbwɨm mpʉ ndie nkʉ mper. ǃByé óbe l'agʉa pyɛl motwii mɔɔ nɛʼɛ, bʉr, bé ójoʼo twii lwib wɔɔ nyá ɛ?

⁸ ǃƗ mʉr si lʉo sebe, nye l'agʉa pyɛl twii sebe kʉ nɛʼɛ, zé ójoʼo, ntɔʼ di e mokʉa é bɨnya ɛ?

⁹ Jwɨʼ gwar e gwar yaa, bʉr, bé ó e nkul ejoʼo lwib yin nyá ɛ? Sa yiyɛh bɨn bé ólwib é jɔʼ bɨn lé elwib bɨlɔblɔb ɨ, yé be ó, yé abe é kpɛhla nɛʼɛ, kʉ gʉa ó, bé ákwoʼ joʼo ba sɔʼɔ. Bɨn bé ókʉ toʼwa-toʼwa toʼwa.

¹⁰ Bɨlwib, byé é si nwaʼ ó, mɨmbi mɨmbi. Abe e yʉʉ ndɨ abe lé elɛɛ simsim sɔʼɔ.

¹¹ Ebe no, ǃme baajoʼo lwib bé lé elwib e me nɛʼɛ, lɛɛ ó, mʉr lé elwib e me é lwib yaa ɛ, nye ó me mpʉ mʉr lwib fih; mɛm nteme nyɛɛ mpʉ mʉr lwib fih.

¹² No ó, mpʉ mɨleme, myé ó bɨn é ntɨɨɨŋ ó, bɨn diʼe e bɨntɔɔ Zyɛm lé enol-nol bwan be e, saŋa ga bye. Diʼe ga mɨlwɨŋla. Bul gwɨm ga yɛɛ bɨntɔɔ bɨ egba mɨmbɛr mɨ Zyɛm nkul é monyʉl ɨ.

¹³ Ebe no, mʉr lé elwib bɨlɔblɔb ɨ, nye ejala le ejwɨʼla e Zyɛm é l'efu le ó, nye biʼe pɨʼ edwir lwib bɨlɔblɔb byaa.

¹⁴ ǃMe si jwɨʼla é lwib bɨlɔblɔb nɛʼɛ, lɛɛ ó, sisim wam, wé ó é mɨnjwɨʼla. Sa gwar, pɨʼ wam, nye agumo ba mpumo, duho tɨ.

¹⁵ Yé be no nɛʼɛ, me ósa nyá ɛ? Me ójwɨʼla-jwɨʼla e Zyɛm é zi sisim wam lé elwib bɨlɔblɔb. Me nteme, me ójwɨʼla e nye ó, é zi pɨʼ wam. Me ójɛɛ osam é zi sisim wam. Me ójɛɛ osam nteme ó, é zi pɨʼ wam.

¹⁶ Bɨna paʼ jwɨʼ ga é mbi wi: gwɔɔ, mʉr lé edwe Zyɛm ekiba é zi lwib bɨlɔblɔb ɨ, mbi go lé edwe nye ekiba ɛ, wé agʉa jwɨ̂ʼ bʉr é mogwal. Yé é bul laŋle no ó, boo mʉr l'apa ntaa cye mbuʼla ɛ. ǃƗ mbi mʉr waa si joʼo ndwɛa ekiba go nɛʼɛ, wé alɛɛ nye sɔʼɔ. Nye abe e nkul elɛɛ «Amɛn!» pie mɨnjwɨʼla myo myaa.

¹⁷ Go dam dwe Zyɛm ekiba é mbi waa, abe e mʉr ónʉa pim é buʼo é zi mɨnjwɨʼla myo.

¹⁸ Zyoo e Zyɛm, ebe, me é bul lwib bɨlɔblɔb, laa bɨn bɨbɛh.

¹⁹ Sa gwar, é jɔʼ bɨh e bʉʉ bʉr o Mbɛr-Zyɛm lé egwɨhla ɛ, me ekpɛl ó, me lwibɨ mokan motɛn lé eduho é pɨʼ wam, maa bʉr ndɨ e nkul ejoʼo e, abe ó, me lwibɨ ozabra o mokan é lwib bɨlɔblɔb. É mbi waa ó me óyeʼle bʉʉ bʉr mɨlɔb mo Zyɛm ɨ.

²⁰ Obɨɔ ga bam aa! Daʼ pahle ga mpʉ bwɔɔncyom! Diʼe ga mpʉ bwɔɔncyom é nko paʼ ebɨ-leme. Sa gwar, é nko paʼ mɨpɛhla min, biʼe ga pɨʼ otamabʉr,

²¹ ebe, yé ó mpʉ yé ndɨ tila é motie mo Moyiz ɨ. Yé ó tila ó: «Me ólwib e bʉr baʼ ó, é bɨlwib byoonkan. Dam be no, bé aŋa kpɛl joʼo me. Lwib mo Da ó nɨ.»

²² No, yé elɛʼle ó, é jɔʼ Zyɛm lé enol bʉr bɨntɔɔ bɨ elwib bɨlɔblɔb ɨ, yé ó dweʼle, sa lé elɛʼle ó, nye mu ó lé elwib e bʉr o ndɨ etumo nye koo e. Baa nye a nol bɨntɔɔ byaa ɛ, nye acen be boo obuʼla. É jɔʼ Zyɛm mu lé enol bʉr bɨntɔɔ bɨ egwih mɨlɔb mye e, yé ó dweʼle, sa lé elɛʼle ó, nye mu ó lé elwib e l'obuʼla. Baa nye a nol bɨntɔɔ byaa ɛ, nye acen be boo bʉr o ndɨ etumo nye koo e.

²³ Ebe no, ǃɨ bʉr o Mbɛr-Zyɛm bɨbɛh si gwɨhla, nuu ze taare lé elwib bɨlɔblɔb nɛʼɛ, yé ófuʼla yé? ǃƗ mʉr l'apa gʉa buʼo ga yina é kpɛhla ɛ, nkʉ waa ndɨ abuʼla ɛ, si ni mbɛr, kœb bɨn teme elwib bɨlwib byaa nɛʼɛ, mʉr waa amu jaa pahle syɛɛla yin yaa, ntɔʼ kœb ó, bɨn mu ó lé ekaa ogʉ!

²⁴ To kœb ó, ǃbɨn bɨbɛh si be lé egwih-gwih mɨlɔb mo Zyɛm nɛʼɛ, bʉr o ndɨ abuʼla ɛ, nkʉ mɨnjeʼe-Zyɛm, si ni wa, bé ójoʼo bɨn lé egwih mɨlɔb myɔɔ mimyɛh é kpɛŋlɛm. Bé òmɛʼle ó, bé ó osyɛl o mɨsyem. Bɨn bé ólwib mɨlɔb myɔɔ.

²⁵ Bɨjwɨʼ byé a be be é mɨmo si ɨ, byé ógwiha kʉl. Bé óbɨʼ mompom mɔɔ si é mih mɨn, lé edwiibɨ Zyɛm. Bé ólɛɛ ó: «Zyɛm, nye ó kʉ be é l'esama lɨn cyecye!»

Mpʉ fula lé ejala syɛɛlɨ ɨ

²⁶ Obɨɔ ga bam aa! Yé be no nɛʼɛ, bɨna kaʼ sa ga yé? É jɔʼ bɨn lé egwɨhla-gwɨhla é fula ɛ, nwaʼ mʉr, nye e jɛɛ nye ójɛɛ ɛ. Nuu, e sikʉlʉ nye ódwe e. Nuu, nye ógwih guu fela sɔʼɔ. Nuu, nye e lɔɔ elɛɛ é lwib bɨlɔblɔb. Nuu, nye egʉa edwir lwib bɨlɔblɔb yaa. Yé ejala ó, syɛɛla yaa yiyɛh gbaʼ mɨmbɛr mɨ Zyɛm nkul é monyʉl.

²⁷ ǃBé si fuuba lwib yɛɛ bɨlɔblɔb nɛʼɛ, bʉr o lwib bɨlwib byaa ɛ, bé diʼe njɨ bʉr oba, nkʉ bʉr olɛl. Mʉr nyiwɛh ólwib lwib bɨlɔblɔb ye yaa ó, é jɔʼ ye. Nuu mʉr óka dwir bɨlwib bɨlɔblɔb byaa.

²⁸ Yé si ka pyal ó, ndwira bɨlɔblɔb, nye abe tɨʼ é l'esama lɨn nɛʼɛ, mʉr é l'esama lɨn lé elwib-lwib bɨlɔblɔb ɨ, nye diʼe titil é bɨgwɨhla bɨ Mbɛr-Zyɛm tʉŋlʉ. Nye lwibɨ njɨ é leme we tʉŋlʉ, Zyɛm nye ome lé ejoʼo.

²⁹ Ogwiha o mɨlɔb, bé lwibɨ oba, nkʉ olɛl. Bʉʉ bʉr ofih bɛɛ, bé òka pahle é l'efu le egʉa mɨlɛa myɔɔ myaa.

³⁰ Sa gwar, ǃɨ Zyɛm si lɛʼle nuu mʉr sa nye jala le egwih bʉr o Mbɛr-Zyɛm nɛʼɛ, waa a be cɨcyel lé elwib ɨ, nye diʼe titil, joʼlo sa mʉr waa a be ó, nye ólɛɛ ɛ.

³¹ Dɨʼe sa ga no, ebe, bɨn bé ó e nkul egwih mɨlɔb mo Zyɛm mʉr ngwar ngwar é l'efu ó, bʉr bɨbɛh, bé jwɨʼɨ, mʉr nyiwɛh lé egbaŋɔ nkul é nyʉl,

³² ebe, ogwiha o mɨlɔb baa, bé e nkul ejwɨʼ mɨsisim myɔɔ, myé di titil, aka lwib.

³³ Zyɛm a baajebe bɨna ga ó, bɨna tiʼa ga é l'oleŋeleŋe tʉŋlʉ. Nye a jebe bɨna ga ó, bɨna tiʼa ga é motala. É bɨfum bibyɛh mɨmbɛr mɨ Zyɛm mimyɛh lé egwɨhla ɛ,

³⁴ yé ejala ó, bʉba diʼe otitil é mɨmbɛr mɨ Zyɛm tʉŋlʉ. Bé abe e nkul lwib. Bé ejala le edi ó, njɨ é jwɨ̀ʼa mo bʉʉ bʉr, mpʉ motie mo Zyɛm lé elɛɛ ɛ.

³⁵ ǃƗ mʉma si gwɨm dweŋɔ yʉʉ sikʉlʉ nɛʼɛ, nye dîʼe njʉm we é mbɛr wɔɔ. É sa fwon lé ebee mʉma lé elwib é gwɨhla Mbɛr-Zyɛm tʉŋlʉ.

³⁶ Zê bɨn ó b'a taare tuno bʉr ofih bɨbɛh lɔɔ Zyɛm ɛ? Zê mɨlɔb myaa, myé a kʉ ka tunɔ ó njɨ é bii yin ɛ?

³⁷ ǃƗ mʉr si bee ó, nye ó ngwiha mɨlɔb nɛʼɛ, nkʉ ntɔʼ ó, ǃnye si bee ó, nye ó e mɨndwɛa Mbɨambɨa Sisim a dwe nye wa, nye à gʉa nteme ó, sa me tile bɨn wâʼ kʉ ɨ, yé ó etie Da Yesʉs nye mʉr tɨʼ a tiile bɨna ga ɛ.

³⁸ ǃƗ mʉr si jeʼe lɛa wam nɨ nɛʼɛ, Zyɛm, nye agʉa nteme nye.

³⁹ No ó, obɨɔ ga bam aa! Gwɨma yin, yé diʼe njɨ ó, bɨn gwihɨ mɨfela mɨlɔb. Sa gwar, akamle ga bʉr lé elwib bɨlɔblɔb.

⁴⁰ Sa yiyɛh, yé diʼe e l'ekɛn, lé etaʼ bɨsyɛɛla bɨ tɨ mpʉ byé ndɨ ejala le etaʼɔ ɛ.