1 Korɛnt 13 - Kálara Zyɛ̌m Edwán é mpʉ̌n

¹ Me dam lwib bɨlwib bɨ bʉr, nkʉ byaa beengles. ǃMe baabe e kpɛl nɛʼɛ, kʉ gʉa ó, me mu ó mpʉ tuʼ engʉŋa lé eduo e, nkʉ mpʉ bɨnkala lé elwaŋla ɛ.

² Me óbɛm nolɔ bɨntɔɔ bɨ egwih mɨlɔb myé ósyɛɛlɨ ɨ, le byaa bɨ epɛʼle lwib odim yiyɛh, le byaa bɨ egʉa sa yiyɛh. Me óbɛm be e buʼo é mbi ndɨ ó, me pɛʼɛ mocwɨʼ é bɨcye byɔɔ ɛ. Sa gwar, ǃme baabe e kpɛl nɛʼɛ, gʉa ó, me abe sɔʼɔ.

³ Me óbɛm kab mobi mam mɨmɛh, nkʉ kɛha nyʉl wam. ǃMe si sa no, me l'abe e kpɛl nɛʼɛ, me l'adira ba nyɔm e bɨsyɛɛla bɨnɨ.

⁴ Kpɛl, yé e bihbe le ncwɨncwɨa. Kpɛl, yé abe e l'egu. Yé ákwoʼ seʼle yé mʉr tɨ. Yé abe e nkɛa nyʉl.

⁵ Yé asa ó, mʉr lama fwon. Yé asaa sɔʼɔ, njɨ nyɔm we. Yé abe é bul duo leme. Yé ákwoʼ niʼe bɨbaa bɨ ebebe, ntɔʼ baʼle é leme we.

⁶ Mʉr ndɨ e kpɛl ɨ, nye abe lé esʉna é jɔʼ nuu mʉr lé esa bɨsyɛɛla bɨ ozyɛhozyɛh ɛ. Nye ekʉ ka mɨɨla ó njɨ e bɨsyɛɛla bɨ ocyecye.

⁷ Kpɛl, yé edime mih e bɨsa bɨ ebebe bibyɛh. Mʉr ndɨ ekpɛl bʉʉ bʉr ɨ, nye ó ndɨ e nkul ebuʼla bɨsa byɔɔ bibyɛh. Leme we, wé lwɨŋla e mbɛla ó, é jɔʼ yiyɛh. Kpɛl, yé edihbe sa yiyɛh.

⁸ Kpɛl, yé ásie. Mɨlɛa mɨ ogwiha o mɨlɔb myɛɛ, myé ósie. Bʉr o mu lé elwib bɨlɔblɔb ɨ, bé ógwaʼ lé esa no. Ngwɨa bʉr, bé a taare be e we e, wé ósie.

⁹ Ebe, bɨna bé ekʉ gʉa ga ó, njɨ peh. Bɨna bé egwih ga mɨlɔb mo Zyɛm ó, njɨ peh, asil.

¹⁰ É jɔʼ bɨsa bibyɛh, byé óbe si kumo é l'ombɨmbɨa é mɨpaʼ mimyɛh ɛ, nye ópɛʼ yaa yé a be-be peh e.

¹¹ É jɔʼ me a be mancyom ɨ, taare é bɨlwib byam, ndwe e bɨjwɨʼ byam, to pyal é mɨpɛhla myam, byé a be-be ó byaa bɨ oncyom. É jɔʼ me a duho é cye mancyom, nʉa cye tamamʉr ɨ, yé ó me a ka ze bir bɨsyɛɛla bɨ oncyom byaa ɛ.

¹² No ó, banana, sa bɨna lé ebee ga ɛ, yé é mih ga mɨna ó, é dimlɨ-di-dimlɨ. Yé ó mpʉ dweʼle lé enyin é l'enyin ɨ. É jɔʼ sa ndɨ ntinɨ mu si pyal ɨ, bɨna bé óbɛɛla ga mompom. Banana, me dina lé egʉa ó ba bim. É jɔʼ yaa ó me ófuʼla gʉa sa yiyɛh é kpɛhla ɛ, du mpʉ Zyɛm lé ebɛa gʉa me é kpɛhla ɛ.

¹³ No ó, banana, buʼo e mbɛla ndwe e kpɛl, byé ó tɨ: bɨsa bɨlɛl. É bɨsa bɨlɛl byaa, yaa lé elaa bibyɛh ɛ, yé ó kpɛl.