Yʉanes 21 - Kálar Nzyɛ̌m : Ejwán é SááYésʉs lɨ́ enyɨ̂n kwá ompʉ́n nzaangbá 1 Jɔʼ nzě bá laa. Yésʉs nzě báʼǎ pyâl gúmó ómpʉ́n bé, bé á be yɨ́, ɨ́ mâŋ bé á jɨjébe “Tiberiâs” má. Nye á kœb bé ó, mbi wɨ̂: ompʉ́n bé, bé á be ó sɔ́má gwár. Bé á be ó 2 Simon Pétrus, Thomas (waá bé jɨ́jébé “Égbâh” nyá), Natanaɛ̂l (mʉr Kanâ, sí Galilê), bwán mé Zebedê ndu e bʉ́ʉ́ ómpʉ́n mé Yésʉs obá. 3 Simon Pétrus, nye e bé ó: «Me mû ó lɨ́ etó syɛb ósû.» Bé e né ó: «Bɨ̌h ntémé bé ónze.» Bê nzě tó pyâl lɨ́ ebʉ́m é mâŋ, kalwɔɔ ɨ́ byɛ̂l. Pǔm nɨ̌ wɨ́wɛ̂h, bé á bé ajʉ̂ sɔ̂ʼ. 4 Ádwií ɨ́ melɔ́ma mé mɛ́n nɛ́ɛ: bê nzě beě Yésʉs lɨ́ etyɛ̂b lɨ́ ebʉ̂m laá. Sâ gwár, ompʉ́n bé, bé á bé adweʼe nyê. 5 Yésʉs, nye e bé ó: «Bwân ɔ́, bɨ̌n bé abe e mede, yé abe nó ɛ̌?» Bê nzě kam ó: «Eee!» 6 Nye ó: «Guhaa gá bé ontâm ɨ́ páʼ mbó éjʉ̂m. Bɨ̌n bé óbee.» Bê nzě guho óntâm. Bé á bé akǎ koʼo édulo wé ɨ́ medíbé, wé osí lóno lɨ́ osû. 7 Mpʉ́n Yésʉs á be ɨ́ buú kpɛl nyá, nye e Pétrus ó: «Tî Yésʉs ó nɨ̌!» Jɔ̌ʼ Pétrus á jóʼo ó, “Yé ó Tî Yésʉs” yɨ́, nye ntɔ̂ʼ bwâr kʉ̂r wé, ebě, nye á be ó suswáh. Nye nzě guho nyʉ̂l ɨ́ medíbé. 8 Bʉ́ʉ́ ómpʉ́n ntɔ̂ʼ dúʼo byɛ̂l, lɨ́ enze le edulo óntâm lwɨ́ŋlá le osû. (Bé á bé abuú cɛra le ebʉ̂m, bɛ̌m be óméra nter.) 9 Jɔʼ bé á sulo ɨ́ byɛ̂l, bére tín yɨ́, bé kœb ó, duró, le sû tɨ̂ʼ lɨ́ ebɨ́e ti e blêr. 10 Yésʉs, nye e bé ó: «Ntáʼ gá e bʉ́ʉ́ ósû ɨ́ baá bɨ̂n jʉ́ ónɨ̌.» 11 Simon Pétrus nzě kalwo ɨ́ byɛ̂l, dwih óntâm lwɨ́ŋlá le osú onɨ́nɨ́ɨ́ nter e mekám métɛ̂n le osú ólɛ̂l. Damá bě bím ósû baá, ontâm, wé á bé anyɛɛ. 12 Yésʉs, nye e bé ó: «Ntaá nzě de gâ.» Abe e mpʉ́n ngwár á dî e né ó: “Yê gua nzé?” Ebě, bé á be ɨ́ gʉ́a ó, yé ó Tî Yésʉs. 13 Yésʉs nzě nʉǎ blêr, pɛ̂ʼ bé yǎ, nzě dwe ntémé bé osû. 14 Yé á be ó jɔʼ lɛ̂l Yésʉs á pyâl gúmó ómpʉ́n bé, bé á be yɨ́, píe pahá nyé á pah ɨ́ soo wɨ́. Yésʉs, bé e Pétrus 15 Jɔʼ bé á sil ede yɨ́, Yésʉs, nye e Simon Pétrus ó: «Simon, mwân mé Yʉánɛs, nzê gʉ́ kpɛl mê, laǎ bím bʉ̂r bâʼ ɛ̌?» Nye nzě kam ó: «Dâ ɛ̌, go lɨ́ egʉ́a ó, me lɨ́ ekpɛl gô.» Yésʉs, nye e né ó: «Baʼlaa bwá bínteme bâm.» 16 Nye nzě báʼǎ dî e né ɨ́ jɔʼ mbá ó: «Simon, mwân mé Yʉánɛs, nzê gʉ́ kpɛl mé ɛ̌?» Nye e né ó: «Eee, Dâ, go lɨ́ egʉ́a ó, me lɨ́ ekpɛl gô.» Yésʉs, nye e né ó: «Baʼlaa bínteme byâm.» 17 Píe tɨ̂, nye nzě báʼǎ dî e né ɨ́ jɔʼ lɛ̂l ó: «Simon, mwân mé Yʉánɛs, nzê gʉ́ kpɛl mé ɛ̌?» Pétrus nzě jóʼo ébúʼ ebě Yésʉs á baʼa dî e né ɨ́ jɔʼ lɛ̂l ó: “Simon, mwân mé Yʉánɛs, nzê gʉ́ kpɛl mé ɛ̌?” Nye e né ó: «Dâ ɛ̌, go lɨ́ egʉ́ǎ sá yɨ́yɛ̂h. Go lɨ́ egʉ́a ntémé ó, me lɨ́ ekpɛl gô.» Yésʉs, nye e né ó: «Baʼlaa bínteme byâm.» 18 Me lɨ́ elɛ́ɛ gó lɨ́ otyeetye, ɨ́ jɔʼ gó á be, go dína loʼo yɨ́, go mʉr tɨ̂ʼ ó b'á tityeele kaná gǒ, tô nko gó á kpɨkpɛl yɨ́. Sâ gwár, ɨ́ jɔʼ gó ngá jwɨm yɨ́, go óbɨ̂r mébô, mʉr swîh nzě tyeele gó kaná, tô e go nko gúa dí akpɛl étô yɨ́. 19 (Yésʉs á lwib nó ó, lɨ́ elɛ̂ʼlě mbi éswiě Pétrus ngá dwe wɨ́. Eswie laá, lé ódwě Nzyɛ̌m kûm.) Yésʉs, nye e né ó: «Dúʼóó mê.» Yésʉs, bé e mpʉ́n nyé á bu kpɛl nyá 20 Jɔ̌ʼ Pétrus á dwira píhe yɨ́, nye nzě bee mpʉ́n Yésʉs á be ɨ́ buú kpɛl nyá, lɨ́ enze píhe. (Nye ó b'á dyêʼ lʉ̂ wé ɨ́ bɨr mé Yésʉs ɨ́ jɔʼ bé á be lɨ́ ede ɨ́ nzɔɔ yɨ́. Nye ntémé ó b'á dî ó: “Dâ ɛ̌, nzé óbɛ́ma gô?”) 21 Pétrus nzě bee nyê. Nye e Yésʉs ó: «Dâ ɛ̌, yé yɨ́ɛ ngá pyâl waá nyâʼ ɛ̌?» 22 Yésʉs, nye e né ó: «Mé sí kpɛl ó, nye díʼee, tó pyâl ɨ́ jɔʼ mé óbáʼǎ nze yɨ́ nɛ́ɛ: gó e wáǎ lɔ̌b tɨ̂? Gua, dúʼóó mê.» 23 Táare ɨ́ jɔʼ yaá, lɔ́ɔ nzě myaŋla ɨ́ sɔ́má óbûʼla ó, mpʉ́n waá, nye ákǎ dwe. Tó kœb ó, Yésʉs á bé alɛ́ɛ̌ Pétrus ó: “Nye ákóʼó dwe.” Nye á lɛ́ɛ ó: “Mé sí kpɛl ó, nye díʼee, tó pyâl ɨ́ jɔʼ mé óbáʼǎ nze yɨ́ nɛ́ɛ: gó e wáǎ lɔ̌b tɨ̂?” 24 Mʉr dí eboʼlo le ecɛma bísá bîʼ nyá, nye ó mpʉ́n mé Yésʉs waá. Bɨ̌h bé lɨ́ ekʉ́ gʉ́a ó, bisá nyé dí eboʼlo bí, byé ó tyeetye. 25 Yésʉs á be ɨ́ sâ byúú bísyɛ́ɛla ɨ́ buo buo. Bé cɛ́má bíbyɛ̂h gúgwár gúgwár nɛ́ɛ: mé abûʼla ó, sí yɨ́yɛ̂h, yé e nkul ekoʼo ébɨ́ʼ é mékaná maá. |