Yʉanes 19 - Kálar Nzyɛ̌m : Ejwán é Sáá

¹ Pilátos ntɔ̂ʼ lómo bísója byé, dwe byé nkul ó, byé nʉ́aa Yésʉs, le eŋmɛ́hɔɔ nyé mingáhá.

² Bisója ntɔ̂ʼ tiɔɔ nyé káráá e mindwínɨ́nɨ́, swamɔɔ nyé yǎ ɨ́ lʉ̂. Byê nzě bórɔɔ nyé kán, e nyʉ̂l kaá e kaá.

³ Byé á be lɨ́ esîhle bǎʼ e né. Bé e né ó: «Njwɨ́ɨ oYúden, bɨ̌h bé lɨ́ ebâʼ e go.» Byé ntɔ̂ʼ ŋmɨŋmɛ̂h nyé mempɛ̂h.

⁴ Pilátos nzě báʼǎ tô kʉ̌l. Nye le entumo e bʉ̂r ó: «Jóʼláá gâ: mě nzé bɨ́n e mʉr nyâʼ kâʼ kʉ̌l ó, bɨ̌n gʉ́ŋaa ó, mɛm, mé abee ó, nyě e mebě ó, nye ɨ́ jala le edwe.»

⁵ Yésʉs nzě tô kʉ̌l e káráá, pená e mindwínɨ́nɨ́, ɨ́ lʉ̂ ndu e kán kaá e kaá ɨ́ nyʉ̂l. Pilátos, nye e bé ó: «Mʉr waá bê!»

⁶ Mbeá ójwɨ́ɨ o mpáh Nzyɛ̌m ndu e bisója bí óYúden, bé á bee nye yɨ́, bê nzě lwib kʉ́kʉ́. Bé ó: «Bomlaa nyé ɨ́ kolôs! Bomlaa nyé ɨ́ kolôs!» Pilátos, nye e bé ó: «Bɨ̌n bʉr o tɨ̂, nʉaa gá nye bé. Bɨ̌n a bómló nyé ɨ́ kolôs, ebě, ɨ́ wâm pâʼ, mé abee ó, nyě e mebě dí ó, nye ɨ́ jala le edwe tɨ̂ʼ má.»

⁷ OYúden, bé e né ó: «Bɨ̌h bé e lʉ́ʉ́ étié. Etié laá, lé lɨ́ elɛ̂ʼle ó, bɨ̌h jʉ́ʼoo nye, ebě, nye á be ó sí bánǎ lɛ́ɛ ó, nye ó Mwân mé Nzyɛ̌m.»

⁸ Jɔ̌ʼ Pilátos á jóʼo mekǎn maá yɨ́, ekɛ̂n kʉ́ nzě swɨɨ nyé ɨ́ nyʉ̂l,

⁹ nye nzě báʼǎ nî mbɛ̌r, tó dî e Yésʉs ó: «Go á pʉgʉ duho wó?» Yésʉs ayala.

¹⁰ Pilátos, nye e né ó: «Nzê gó akpɛl élwib e me ɛ̌? Gó agʉ́a ó, mě e nkul ebîr gó, nkʉ̂ ntémé lɛ́ɛ ó, bé bómlaa go ɨ́ kolôs kʉ́?»

¹¹ Yésʉs, nye e né ó: «Nzyɛ̌m óbe, adwe nkûl nó, gó abe e nkul esâ mé sɔ̂ʼ. Sâ gwár, mʉr bɛ́má mé nyá nyɨɛ, nye ólîʼ e mebyaʼ, laa gô.»

¹² Táare ɨ́ jɔʼ yaá, Pilátos nzě sáa ménzɨ̌ mé ébîr Yésʉs. OYúden bɨ́ɛ kʉ́ jaá bɨ̂r métyêl kʉ́kʉ́ ó: «Gó óbáná kʉ́ bîr mʉ̂r nɨ̌ nó, lɛ́ɛ́, gó akǎ be só mé njwɨ́ɨ gá wɨ́ná, Kɛ́ɛza! Mʉr nyɨnyɛ̂h dí elɛ́ɛ ó, nye ó njwɨ́ɨ nyá, nye ó ntɨ̂m e mbɨn mé Kɛ́ɛza.»

¹³ Jɔ̌ʼ Pilátos á jóʼo nó yɨ́, nye nzě pyêl Yésʉs kʉ̌l, nzě di ɨ́ diá tîʼ milɔ̌b ɨ́ gúmó bé á jɨjébe “Ebɛhɛɛ e Mékóʼ” yɨ́. (Ɨ́ lwǐb ébrœ̂, yé ó “Gabáta”.)

¹⁴ Yé á be ó, nzɔɔ Páska, nyé osí lîʼ móhó ngwár, kúnókúno e témé móhó. Pilátos, nye le oYúden ó: «Beyɨɨ gá njwɨ́ɨ wɨ́n ɛ̌?»

¹⁵ Bê nzě báʼǎ táare ébʉ̂ bítím. Bé ó: «Jʉ́ʼóó nyê! Jʉ́ʼóó nyê! Bomlaa nyé ɨ́ kolôs!» Pilátos, nye e bé ó: «Nzê ó, me bómlaa njwɨ́ɨ wɨ́n ɨ́ kolôs ɛ̌?» Ojwɨ́ɨ o mpáh Nzyɛ̌m, bé ó: «Bɨ̌h bé abe e nyʉ́ʉ́ njwɨ́ɨ píe koo mé Kɛ́ɛza.»

¹⁶ Pilátos ntɔ̂ʼ dwe bé Yésʉs, ó bé tô bomlo nyé ɨ́ kolôs.

Yésʉs lɨ́ ebomlɔɔ ɨ́ kolôs

¹⁷ Bisója nzě nʉǎ Yésʉs, bé le onɔ́ɔ́ ntɔ̂ʼ duhǒ nkana, Yésʉs mʉr tɨ̂ʼ lɨ́ enkɛ́ɛ̌ kolôs yé. Bé le onɔ́ɔ́ nzě tóŋɔɔ̌ gúmó bé á jɨjébe “Bʉ̌n Lʉ̂” yɨ́. (Ɨ́ lwǐb ébrœ̂, yé ó “Golgotâ”.)

¹⁸ Ɨ́ gʉ̂ʼ ó, bísója, byé á to bomlo Yésʉs e binzâŋ, bɨ́nɔɔ nyé ɨ́ kolôs kʉ́ yɨ́. Byé á si bomlo ntémé bʉ́ʉ́ bʉ̂r obá ɨ́ bikolôs biswîh bibá: nyâ, ɨ́ wɨ̂ʼ pâʼ; nyʉ́ʉ́, ɨ́ gúú pâʼ; Yésʉs témé tɨ̂.

¹⁹ Pilátos nzě nʉa ébɔ́m, cɛma tɨ̂, nzě pɛn lé ɨ́ kolôs mé Yésʉs. Lé á be e micɛmá ó: Yésʉs, mʉr Nazarɛ̂t, Njwɨ́ɨ oYúden.

²⁰ OYúden ɨ́ buo buo, bé á be ó lɨ́ eláa mícɛmá myaá, ebě, gúmó bé á bomlo Yésʉs e binzâŋ ɨ́ kolôs, bɨ́nɔɔ nyé kʉ́ yɨ́, yé á be ɨ́ kúnwo e nkana, le ntémé ó, micɛmá myaá, myé á be ó lɨ́ lwǐb ébrœ̂, le lwǐb latɛ̂n ti e lwǐb grɛ̂k.

²¹ Nó ó, ojwɨ́ɨ o mpáh Nzyɛ̌m, bé á nze lɛ́ɛ e Pilátos ó: «Ayɨ́ cɛmǎ njɨ ó: “Njwɨ́ɨ oYúden.” Kʉ́ gwá cɛma ntémé mbɨ̂mbɨá ó: “Mʉr nyâʼ á bana kʉ lɨlɛ́ɛ ó: «Me ó Njwɨ́ɨ oYúden.»”»

²² Pilátos, nye e bé ó: «Sá mɛ̂m mû sí cɛma yɨ́, mɨ́ cɛma!»

²³ Jɔʼ bísója, byé á sil ebomlo Yésʉs ɨ́ kolôs yɨ́, byê nzě nʉa míkán myé, nzě kabɔɔ ménkɔb menâ, sója yɨ́yɛ̂h lɨ́ ebi nyé nkɔ̂b. Byê nzě nʉǎ dur yé. Yé á bé abě lɛrá. Yé á be ó kán ntinɨ̂, tiá táare kʉ́, pyâl sí.

²⁴ Jɔʼ yaá ó bé á nze lɛ́ɛ ó: «Mɨná bé ayɨ́ nya gá dur yɨ̂. Mɨná dôʼ gá yé ebya, mɨná nkʉ̂ gʉ́a gá mʉr ngá nʉa yé nyá.» (Yé á syɛ́ɛ nó ó, sá dí cɛmá ɨ́ Mekaná mé Nzyɛ̌m yɨ́, yé díraa. Yê cɛmá ó: Bé á si kabla mikán myâm páʼ nyɔ́ɔ́. Bê nzě dǒ dur yâm ebya. ) Ntɔ̂ʼ nzě sáŋɔɔ ntémé nó.

²⁵ Bǎʼ e kolôs mé Yésʉs, nyɔ̌ŋ wé á be ó tɨ̂, bé e mɨ́ɔɔ́ ti e Maria, mʉmá mé Klopâs, bé e Maria, silě Magdalâ.

²⁶ Yésʉs nzě bee nyɔ́ŋ lɨ́ etyɛ̂b bǎʼ e né, bé e mpʉ́n nyé á bu kpɛl nyá. Nye e nyɔ̌ŋ wé ó: «Mʉmá, bee mwánǒ?»

²⁷ Nye e mpʉ́n wé ó: «Bee nyʉ́ŋ ɨ́?» Táare ɨ́ jɔʼ yaá ó mpʉ́n waá á nze nʉa nye, dil nyé ɨ́ mbɛ̌r wé yɨ́.

Eswie mé Yésʉs

²⁸ Píe tɨ̂, mpʉ̌ Yésʉs á gʉ́a ó, sá yɨ́yɛ̂h, yé á be ó, yé mû sí síe yɨ́, nye ntɔ̂ʼ lɛ́ɛ ó: «Me lɨ́ ejóʼǒ dwéh médíbé.» Nye á lɛ́ɛ nó ó, sá dí cɛmá ɨ́ Mekaná mé Nzyɛ̌m yɨ́, yé díraa.

²⁹ Mpɨ̌ á be ó tɨ̂ʼ e kɛ̌ʼla ményoʼ. Bisója nzě nʉa éponge, dubɔɔ ɨ́ menyoʼ maá, pɛnɔɔ yé ɨ́ mâ lɨ́ ésɔp, nzě tyenɔɔ nyé yǎ bǎʼ e num, ó nye dúʼoo mê.

³⁰ Jɔ̌ʼ Yésʉs á sil edû bikɛ̌ʼla ményoʼ byaá yɨ́, nye ó: «Sá yɨ́yɛ̂h, yɨ́ lwɨ́ŋlɨ!» Nye nzě gœ̌r lʉ̂ sí, nzě dwě Nzyɛ̌m sísǐm wé.

Mʉr bisója lɨ́ elúmǒ Yésʉs ekʉá ɨ́ bimpah

³¹ Yé á be ó móhó ti-tír. Nó ó, oYúden, bé á bé akpɛl ó, bʉr líʼɔɔ ɨ́ bikolôs ɨ́ móhó sábat. Bê nzě tó díŋɔɔ̌ Pilátos ó, bé tô búʼo bʉ̂r baá mekʉ̌. Bé opɛʼ bé ɨ́ bikolôs.

³² Ɨ́ bʉr obá bé á be mimbomlá ɨ́ bikolôs kʉ́, bé e boo Yésʉs bá, bisója ntɔ̂ʼ búʼɔɔ mʉ̂r esôʼ mekʉ̌ ti e waá nyʉ́ʉ́.

³³ Jɔʼ byé á ka pyâl gúmó Yésʉs á be yɨ́, byé kǎ kœb ó, nyé osí boó dwe. Sâ yaá ó, byé á be akǎ búʼo nyé mekʉ̌ yɨ́.

³⁴ Damá jóʼo nó, yʉ́ʉ́ sója, yé á si lúmo nye ekʉá ɨ́ bimpah. Tólɔ́m métié ndu e medíbé ntɔ̂ʼ sâh.

³⁵ (Mʉr dí eboʼlo bísyɛ́ɛla bínɨ̌ nyá, nye ó mʉr á bě sí kʉ́ bee byé nyá. Sá nyé dí eboʼlo yɨ́, yé kʉ́ be ó tyeetye. Nye ntémé, nye lɨ́ egʉ́a ó, nyě lɛ́ɛ́ ó otyeetye, ó bɨ̌n bûʼlaa.

³⁶ Bisyɛ́ɛla bínɨ̌, byé á syɛ́ɛ nó ó, péh Mékaná mé Nzyɛ̌m, yé díraa. Yê cɛmá ó: Bé ákóʼó búʼo nyê, damá bě dwehé gwár.

³⁷ Yê cɛmá ntémé ɨ́ Mekaná mé Nzyɛ̌m ó: Bé ógwá bee mʉ̂r bé á lúmo ekʉá, ekʉá kpâhla nyá. )

Dɨlá mé Yésʉs

³⁸ Píe tɨ̂, Yóseb, mʉr Arimatê, nzě dî e Pilátos mʉ́ʉ́ mé Yésʉs, ó nye tôʼ dɨl wé ɨ́ soo. (Yóseb á be ó mpʉ́n mé Yésʉs, á dyɛ̂ʼwo e né ɨ́ mesǒ nyá, ebě, nye á be ó lɨ́ ekpɛ́ɛ óYúden.) Pilátos nzě kam. Yóseb ntɔ̂ʼ nkɛ́ɛ̌ múú mé Yésʉs, tô e wê.

³⁹ Nikodɛ́mos, mʉr á nyɛɛ to bee Yésʉs ɨ́ pum nyá, nzě nʉa múló bé dí elœm mímúu má. Yé á be ó okílo ó mirrhe nzyɛŋá le aloɛ̂s, kúnókúno e mekám ménâ e metɛ̂n.

⁴⁰ Bé e Yóseb nzě nkɛ́ɛ̌ múú mé Yésʉs, lœmɔɔ wé mǐr waá, le edíblɔɔ myé ɨ́ mimyɔʼ mí dɨlá. (Mimyɔʼ myaá, myé á be ó misɛ́á e ndɔ́má kán ɨ́ pumopumo. Bé á sâ nó ó, lɨ́ edû métum mé óYúden, ɨ́ mbi bé dí esâ dɨlá wɨ́.)

⁴¹ Gúmó bé á bomlo Yésʉs ɨ́ kolôs yɨ́, pemé, yé á be ó tɨ̂. Ɨ́ pemé yaá, yé á be ó, le edwán é sóo, gúú múu dína apǎ debe tɨ̂.

⁴² Mpʉ yé á be, móhó nzɔ́ɔ, wé osí lîʼ élû egwár yɨ́, bê nzě tó dɨlɔɔ̌ múú mé Yésʉs ɨ́ soo nyaá, á be kúnókúno nyɨ́.