Yʉanes 18 - Kálar Nzyɛ̌m : Ejwán é Sáá

Memɛ́ɛ́rá mé Yésʉs

¹ Jɔ̌ʼ Yésʉs á sil ejɨʼla nó yɨ́, bé le ompʉ́n bé, bê nzě laa, ntaŋɔɔ énó é Kédron, tóŋɔɔ kɔ́m nkɛ́ɛ́. Pemé bílɨ́ bí ólivier, yé á be ó gʉ̂. Bé le ompʉ́n bé, nzě tó diŋɔɔ tɨ̂.

² Yʉ́das, mʉr á bɛ́ma Yésʉs nyá, á be ó lɨ́ eboó gʉ́ǎ gúmo yaá, ebě, Yésʉs, bé le ompʉ́n bé, bé á be ó lɨ́ etʉ̂to gʉ̂.

³ Yʉ́das nzě dû bé gʉ̂, bé e sɔ́má bísója bí Rôm ndu e byúú bísója ójwɨ́ɨ o mpáh Nzyɛ̌m le oFarizyɛ̂n, bé á lómo bí. Bé á be ó e bisá bí dɔ̂m ndu e metwǐm me mpâh. Bâʼ e meláma.

⁴ Náǎ yé ó, mpʉ̌ Yésʉs á be lɨ́ egʉ́ǎ sá ngá pyâl nyé yɨ́, nye ntɔ̂ʼ tô nko bé á be yɨ́, nzě dî e bé ó: «Bɨ̌n sáá nzé?»

⁵ Bé e né ó: «Yésʉs, mʉr Nazarɛ̂t.» Yésʉs, nye e bé ó: «Me ó nyâ.» (Yʉ́das, mʉr á bɛ́ma nye nyá, náǎ ɨ́ sɔ́má.)

⁶ Jɔ̌ʼ Yésʉs á lɛ́ɛ e bé ó, “Me ó nyâ” yɨ́, bê nzě tulwa e mikoo, twe ɨ́ nkɨ́ŋlɨ́m.

⁷ Yésʉs nzě báʼǎ dî e bé ó: «Bɨ̌n sáá nzé?» Bé ó: «Yésʉs, mʉr Nazarɛ̂t.»

⁸ Yésʉs, nye e bé ó: «Me sí boó lɛ́ɛ bɨ́n ó, me ó nyâ. Yé bé me ó bɨ́n dí esáa nyá nó, bírɨ́ɨ́ gá baá bâ, bé tôʼ!»

⁹ Yé á syɛ́ɛ nó ó, mekǎn nyé á lɛ́ɛ má, mé díraa. Nye á lɛ́ɛ ó: “Dâ ɛ̌, me á bé adímle mʉ̂r ngwár ɨ́ sɔ́má bʉ̂r o gó á dwe me bá.”

¹⁰ Náǎ yé ó, Simon Pétrus á be ó e pɛl. Nye nzě gœ̂m yê, nzě syɛ̂h égwǎl lé éjʉ̂m e syɛ̂l mesâ me njwɨ́ɨ opara. (Díé é syɛ̂l mesâ waá, lé á be ó Málkus.)

¹¹ Yésʉs, nye e Pétrus ó: «Swamaa pâsoŋ gǒ lɨ́ ebɔ́m. Nzê gǒ jwɨ̌ʼ ó, me ánkɛ́ɛ mítúú Sɔ́ŋ wǎm dwé mé mîʼ ɛ̌?»

Bɨ́ tô e Yésʉs ɨ́ mpǒm mé Ánas

¹² Sɔ́má bísója bí Rôm, bé e njwɨ́ɨ wɔ́ɔ́ ti e bisója bí óYúden, bê nzě mɛ̂r Yésʉs, káʼɔɔ nyê.

¹³ Bê nzě nyɛɛ́ tô e né kwá mé Ánas, mʉr á be njwɨ́ɨ opara ɨ́ mbû waá nyá. (Náa yé ó, Ánas á be ó tǐ mé Kayɨáfa.)

¹⁴ Kayɨáfa waá ó b'á dwe oYúden metwɨ́ɨ́ ó: “Yé mbɨa ó, mʉr ngwár dwêʼ lɨ́ esú é kúl bʉ̂r yɨ́yɛ̂h” nyá.

Pétrus lɨ́ ekɛ́lǎ Yésʉs

¹⁵ Simon Pétrus, bé e nyʉ́ʉ́ mpʉ́n, bé á be ó lɨ́ edû Yésʉs. Njwɨ́ɨ opara nzě gʉ́a nyɨ́haá mpʉ́n. Sâ yaá ó bé á sâ ó, bé e Yésʉs níʼee jɔʼ gwár ɨ́ bíí mé njwɨ́ɨ opara yɨ́. Bé á tyɛ̂b ó, témé ebɛhɛɛ.

¹⁶ Náǎ yé ó, Pétrus nyɨɛ á lîʼ ó kʉ̌l, bǎʼ le ebé lé ébɛhɛɛ. Nyʉ́ʉ́ mpʉ́n mé Yésʉs, waá njwɨ́ɨ opara á be lɨ́ egʉ́a nyá, nzě tô kʉ̌l, lwib e mʉmá á be lɨ́ edwéele ébê nyá. Mʉmá waá nzě níŋle ntémé Pétrus.

¹⁷ Mʉmá á be lɨ́ edwéele ébê nyá, nye e Pétrus ó: «Nzê gua ntémé, go ó nyʉ́ʉ́ mpʉ́n mʉr nyâʼ ɛ̌?» Pétrus, nye ó: «Abe mɛ̂m da!»

¹⁸ Mpʉ éjwóo lé á be lɨ́ ebuú sâ yɨ́, osyɛ̂l o mésâ ndu e bisója bí óYúden, bé á be ó si paʼra dúró, lɨ́ edwáblɔɔ̌ siʼe. Pétrus ntémé á be ó tɨ̂, lɨ́ edwáblě siʼe, bé e boo nɔ́ɔ́.

Njwɨ́ɨ opara lɨ́ edî Yésʉs metíá

¹⁹ Njwɨ́ɨ opara nzě táare édî Yésʉs metíá ɨ́ lɔ̌b ómpʉ́n bé ndu e milɛ́ʼlá nyé á dwidwe mí.

²⁰ Yésʉs, nye e né ó: «Me á jaa lwilwib ó, njɨ ɨ́ hwɨ́m, bʉr bɨ́bɛ̂h lɨ́ ejóʼo. Me á lɨlɛ̂ʼle bʉr ó, ɨ́ mempáh mínjɨʼla mɔ́ɔ́ ndu e mpáh Nzyɛ̌m, bigúmó óYúden bɨ́bɛ̂h dí egwɨ̂hlǎ jɔʼ yɨ́yɛ̂h bí. Me á bé alɛ́ɛ yʉ́ʉ́ sɔ̂ʼ mesǒ.

²¹ Gǒ báʼá dî mé metíá ɨ́ yé? Jíʼéé bʉ̂r o b'á jʉjóʼo lɔ́ɔ́ wâm bá. Bé ɨ́ gʉ́ǎ sá mé á lɨlɛ́ɛ yɨ́ mbɨ̂mbɨá.»

²² Jɔ̌ʼ Yésʉs á be lɨ́ elwib mpʉ́nʉ̌ yɨ́, nyʉ́ʉ́ mâ sója á bě bǎʼ e né nyá, kʉ́ nzě tʉ̂l nyé bɛ̂h lɨ́ emúʼ. Nye e né ó: «Nzê mpʉ́nʉ̌ ó gó dí eyala e njwɨ́ɨ opara yɨ́ ɛ́?»

²³ Yésʉs, nye e né ó: «Ááʼ! Gǒ bá ŋmɛ̂h mé mpʉ́nʉ̌ ɨ́ yé? Yé bé me sí jéʼe élwib nó, lɛ́ʼláá sá ébébe mê lɛ́ɛ́ yɨ́. Yé bé me bé ɨ́ lwib mbɨ̂mbɨá nó, go bé ajala le eŋmɛ̂h mê.»

²⁴ Ánas nzě báʼǎ tyen nyé nkará mebó mé nʉ̌n kwá mé Kayɨáfa, á be ntémé njwɨ́ɨ opara nyá.

Pétrus lɨ́ ebáʼǎ kɛ́lǎ Yésʉs

²⁵ Bím bé á didi náǎ yɨ́, Simon Pétrus nyɨɛ lɨ́ edwáblě siʼe. Bê nzě dî e né ó: «Nzê go ntémé, go ó mpʉ́n mʉr nyâʼ ɛ̌?» Pétrus nzě kɛ́la. Nye e né ó: «Abe mɛ̂m da! Mɛm mé abe nyê!»

²⁶ Nyʉ́ʉ́ syɛ̂l njwɨ́ɨ opara á be mbyɛ́l mʉ̌r Pétrus á tíʼe egwǎl nyá, nye e né ó: «Nzê me bé así bee gó, bɨ̌n le onɔ́ɔ́ kâʼ ɨ́ pemé ɛ́?»

²⁷ Pétrus nzě báʼǎ kɛ́la. Nye e né ó: «Yê bé abe mɛ̂m.» Tyé e tyé yaá, njʉ́m kúo ntɔ̂ʼ kwâʼ.

Yésʉs ɨ́ mpǒm mé Pilátos

²⁸ Bê nzě búla e Yésʉs kwá mé Kayɨáfa, nzě tóŋɔɔ e né mbɛ̌r me njwɨ́ɨ sí yaá. Yé á be ó, yé mû ɨ́ dwiné mɛ́n. OYúden, bé á bé anî mbɛ̌r me njwɨ́ɨ, lɨ́ ekpɛ́ɛ ó, bé ámû lœʼ ményʉ́l mɔ́ɔ́, bé ntɔ̂ʼ kǎ sû méde me nzɔ́ɔ Páska.

²⁹ Sâ yaá ó Pilátos á tô kʉ̌l, tô nko bé á be yɨ́. Nye nzě dî e bé ó: «Bɨ̌n pur mʉ̂r nyâʼ ɨ́ yé ɛ́?»

³⁰ Bé e né ó: «Yé bé nye bé abě bɨ́bla mʉ̂r nó, lɛ́ɛ́, bɨ̌h bé anze e né nko gó dí yɨ́.»

³¹ Pilátos, nye e bé ó: «Bɨ̌n bʉr o tɨ̂, nʉaa gá nye. Tó tíʼe gá lɔ̌b wé mpʉ métié mɨ́n dí ekam yɨ́.» OYúden, bé e né ó: «Metié mɨ́n, mé adwe nkûl ó, bɨ̌h jʉ́ʼoo mʉr.»

³² (Yé á syɛ́ɛ nó ó, mekǎn nyé á lɛ́ɛ má, mé díraa. Nye á be ɨ́ boó lɛ̂ʼle bé mbi éswie nyé ngá dwe wɨ́.)

³³ Pilátos nzě báʼǎ nî mbɛ̌r wé tʉ́ŋlʉ̌. Nye nzě jébě Yésʉs, dî e né ó: «Nzê go ó dí njwɨ́ɨ oYúden ɛ̌?»

³⁴ Yésʉs nzě yala e né ó: «Nzê gǒ lɛ́ɛ́ nó ó, ebě, yé ó pahlá gô, go mʉr tɨ̂ʼ ɛ̌? Nzê yé ó ebě bʉ́ʉ́ bʉ̂r, bé á si lɛ́ɛ go lɔ̌b wâm ɛ̌?»

³⁵ Pilátos, nye e né ó: «Nzê me ó Yúden ɛ̌? Bʉr ó sí yô le ojwɨ́ɨ o mpáh Nzyɛ̌m bô, bé ô ntɨ̌h gó wâ. Go á pʉgʉ sâ yé ɛ́?»

³⁶ Yésʉs nzě yala ó: «Jwɨ́ɨ́ yâm, yé abe yaá sí yɨ̂. Yé bé me á be ó njwɨ́ɨbʉ̌r sí yɨ̂ʼ nó, lɛ́ɛ́, osyɛ̂l o mésâ bâm, bɨ́ lwímla dɔ̂m lɨ́ ekamle bʉ̂r lɨ́ ebɛ́ma mé kwá ojwɨ́ɨ́ bé óYúden. Sâ gwár, yé abe nó. Jwɨ́ɨ́ yâm, yé abe kâ.»

³⁷ Pilátos, nye e né ó: «Nó ó, go ó njwɨ́ɨbʉr ɨ́?» Yésʉs nzě yala ó: «Yé ó mpʉ gô lɛ́ɛ́ nɨ̌. Me ó Njwɨ́ɨbʉr. Me á byɛ̂l, nze ɨ́ sí yɨ̂ʼ ó, lɨ́ enzě lɛ́ɛ bʉ̂r otyeetye. Mʉr nyɨnyɛ̂h dí egúmo e mʉr dí le otyeetye nyá, jóʼó ó, sá mé dí elɛ́ɛ yɨ́.»

³⁸ Pilátos nzě dî e né ó: «Otyeetye wɨ́ɛ, wé pʉgʉ́ be yé?» Mpʉ̌ Pilátos á sil elwib nó yɨ́, nye nzě báʼǎ tô kʉ̌l, tô nko óYúden, bé á be yɨ́. Nye ó: «Ɨ́ wâm pâʼ, mé abee nyé e mebě ó, nye ɨ́ jala le edwe.

Bé lɨ́ etíʼě lɔ̌b mé Yésʉs

³⁹ Sâ gwár, bɨ̌n bé e tum ó, me bírɨɨ mbʉʼ ngwár ɨ́ nzɔɔ Páska. Nzê bɨ̌n kpɛl ó, me bírɨɨ bɨ̌n njwɨ́ɨ wɨ́n ɛ̌?»

⁴⁰ Bɨ́bɛ̂h nzě lwib kʉ́kʉ́. Bé ó: «Heʼé, abe nyɨ́nɨ̌! Bɨ̌h gwɨ́m ó, Barábas. Nó ó, Barábǎs nɨ̌ á be náǎ ó nzilngǎn.»