Rôm 2 - Kálar Nzyɛ̌m : Ejwán é Sáá

Mpǎŋ tíʼá mpʉ́n

¹ Nó ó, gua, mʉr dí edwe bʉ̂r mebě nyá, gó abe e nkul ekar ɨ́ míh mé Nzyɛ̌m. Jɔʼ gó dwé bʉ̂r mebě yɨ́, num gô, wé lɨ́ edwe ntémé go mʉr tɨ̂ʼ mebě, ebě, gua yɨ́ɛ tîʼ milɔ̌b, gǒ jaá sâ ntémé ó, njɨ bisyɛ́ɛla bimpwár byaá.

² Mɨná bé lɨ́ ekʉ́ gʉ́a gá ɨ́ páʼ bʉ̂r o dí esâ mímbi bísyɛ́ɛla byaá bá ó, Nzyɛ̌m, nye lɨ́ edwe bé mebě tɨ̂. Nyě sá nó ó lɨ́ otyeetye.

³ Gua mʉr dí edwe bʉ́ʉ́ bʉ̂r mebě ɨ́ bisyɛ́ɛla bé dí esâ bí nyá, go ntémé jaá sâ ó njɨ bisyɛ́ɛla bimpwár byaá. Gǒ bee nyá? Nzê go ókɨ̂ŋ tíʼá mílɔ̌b mé Nzyɛ̌m?

⁴ Nzyɛ̌m nyɨɛ yɨ́ɛ sí lɛ̂ʼle gó mpam nyé ɨ́ ntʉʉʉ́. Nye ntémé á si bee misyóm myô, alwib. Nye á si bu dûhwo myê. Nzê go mû ó lɨ́ epyêh bísyɛ́ɛla byé byaá ɛ́? Nzê gó agʉ́ǎ bím émbɨa nyé á sâ go lɨ́ ɛ́? Embɨa lé, lé ɨ́ jala le edǐb lémé gô nzɨ̌ etúmǒ koo le mebébe mô, le edwirǎ léme.

⁵ Jɔʼ yɨ́yɛ̂h gó dí esâ élele é léme, nkʉ̂ bene édwirǎ léme yɨ́, go náǎ ó, lɨ́ ebul bíbaa bí ébébě Nzyɛ̌m ngá niniʼe gó bí. Byé ókǎ láŋɔɔ ó, ɨ́ móhó Nzyɛ̌m ólɛ̂ʼle bʉ̂r ɨ́ buo buo nkpaa nyé wɨ́. Dʉ́o laá ntémé ó nyé ngá lɛ̂ʼle mʉ̂r nyɨnyɛ̂h mpʉ nyé dí etíʼe bʉ̂r milɔ̌b lɨ́ otîtyěl yɨ́.

⁶ Nye ójána mʉ̂r nyɨnyɛ̂h ó, dû mpʉ bísyɛ́ɛla byé dí yɨ́.

⁷ Bâʼ bʉ̂r, bé sáá ó kûm, le dúu le twiʼ dí asíesie yɨ́. Bé lɨ́ edûhwǒ sɔ́ɔlʉ waá e bíhwó, lɨ́ esâ mímpaŋ bísyɛ́ɛla. Bé ó baá Nzyɛ̌m ngá dwě twǐʼ njʉ̌m dǐ bá.

⁸ Bʉ́ʉ́ bʉ̂r, bé lɨ́ epɨra páʼ nyɔ́ɔ́. Bé akam ótyeetye. Bé jaá dû ó, njɨ kʉ̌ tyen ónzyɛ́h ónzyɛ́h. Bɨ́haá, bé ó baá Nzyɛ̌m óbuú lɛ̂ʼle nkpáa nyé bá.

⁹ Bʉr bɨ́bɛ̂h o dí esâ syóm bá, bé ósia e mitúú e mindɛ̌l, táare le oYúden, kala e baá o dí abe óYúden bá.

¹⁰ Bʉr bɨ́bɛ̂h o dí esâ émbɨa bá bɨɛ, Nzyɛ̌m ódwe bé kûm le dúu. Nye ógbâ bé mepyɛbla ɨ́ miléme. Nye ódwe ó, táare le oYúden, tó kala e baá o dí abe óYúden bá.

¹¹ Ebě, Nzyɛ̌m, nyé abe lɨ́ edwáawo bʉ̂r mempǒm.

¹² Osyɛ̂l o mísyóm o b'á be atyélɔɔ metié mé Moyɨ̂z bá, bé ódîm ɨ́ nkɔb bʉr. Sâ gwár, bé ádwe ɨ́ lɔ̌b métié Moyɨ̂z á tyêl lɨ́ esú lé óYúden má. OYúden bɨ́ɛ, bʉr o b'á bi metié mé Moyɨ̂z bá, bé ódweŋɔɔ mébě ó, dû mpʉ métié maá dí etɨ́e yɨ́.

¹³ Mʉr ábi nkâm ɨ́ míh mé Nzyɛ̌m ɨ́ lɔ̌b njóʼá métié wé omér. Waá dí esâ mpʉ métié maá dí etɨ́e yɨ́ nyá, nyɨ́haá ó ngá bi nkâm ɨ́ míh mé Nzyɛ̌m.

¹⁴ Ɨ́ nkǒ páʼ bʉ̂r o dí abe óYúden, baá o dí agʉ́a métié mé Moyɨ̂z bá, bɨ́ɛ bé ósâ mpʉ métié maá dí etɨ́e yɨ́ nó, yé óbe bé ó, mpʉ̌ sá lɛ́ɛ́, bé e metié maá micɛmá ɨ́ milémé myɔ́ɔ́ tʉ́ŋlʉ̌.

¹⁵ Jɔʼ bé dí esâ nó yɨ́, bé lɛ́ʼlé ó, sá métié dí etɨ́e yɨ́, yé ó cɛmá ɨ́ milémé myɔ́ɔ́. Mipahlá mílémé myɔ́ɔ́, myé lɨ́ eboʼlo ntémé nó. Myé nwáhlé ɨ́ bîʼ bíjɔʼ ó, bé á si jéʼe esâ. Ɨ́ byúú bíjɔʼ, myé lɛ́ʼlé bé ó, bé á si gʉ́a esâ.

¹⁶ Sá mé dí elwib wâʼ yɨ̂, yé ónyɨ̂n ɨ́ ponó, ɨ́ móhó Nzyɛ̌m ngá tíʼe bʉ̂r milɔ̌b wɨ́. Nye ósâ nó ó, ɨ́ nzɨ̌ mé Yésʉs-Krîst. Bisâ bi dí bʉr baá solá ɨ́ miléme bí, nye ólɛ̂ʼle byé ɨ́ kpɛŋlɛm. Mbɨambɨa Lɔ́ɔ mé dí etúno wɨ́, wé ó nó.

¹⁷ Yê nyá, gua, mʉr dí ejébɔɔ Yúden nyá? Gǒ dídyɛ́ʼwó ó e metié. Gǒ jaá nkʉ́nǎ njɨ ó, go ó dí mʉr mé Nzyɛ̌m.

¹⁸ Guá lɨ́lɛ́ɛ́ ó mpʉ métié maá, mé á bu tɨ́e go yɨ́, go mû ó lɨ́ ekʉ́ gʉ́ǎ sá Nzyɛ̌m dí egwɨ̂m ó, go sâʼ yɨ́. Yé lɨ́ edwe gó nzɨ̌ epɛ̂h sá yɨ́yɛ̂h dí ɨ́ mbɨa yɨ́.

¹⁹ Go jwɨʼ ó, go ó jálá le elɛ̂ʼle báántím nzɨ̌. Nkʉ̂ ó, go ó jálá le ekʉn bʉ̂r o dí lɨ́ edúrʉ́ʉ́ bá nzɨ̌.

²⁰ Gǒ lɛ́ɛ́ ntémé ó, go ó jálá le etwîn bígʉ́ʼ milʉ̂, le elɛ̂ʼle bwá ó ntwǒm. Gǒ lɨ́lɛ́ɛ́ ó, ngwɨ́á métié maá, wɨ́ dwe gó ocwóó le otyeetye wɨ́wɛ̂h.

²¹ Gua yɨ́ɛ lɨ́ ekʉ́ dwe bʉ́ʉ́ bʉ̂r milɛ́ʼlá, á go ókǎ kâr élɛ̂ʼle gó mʉr tɨ̂ʼ sɔ̂ʼ ɨ́ yé ɛ́? Gǒ túnó ɨ́ bijɔʼ bíbyɛ̂h ó, bʉr gwáʼaa díbe. Á go mʉr tɨ̂ʼ díbé ɨ́ yé?

²² Gǒ lɨ́lɛ́ɛ́ ó: «Asâ gá medyɛ̂n.» Á guǎ sɨ́sá mé ɨ́ yé? Gua mʉr dí ebene bíkpɛʼkpɛ̂ʼ bí ónzyɛ̌m nyá, go lɨ́ eninî ɨ́ nzaá bikpɛʼkpɛ̂ʼ bí ónzyɛ̌m, le edíbe míndwéá bʉ̂r dí edwe byé mí ɨ́ yé ɛ́?

²³ Gua mʉr dí ebuú nkʉ́na ɨ́ mpʉ gó á tyélɔɔ metié yɨ́ nyá, gǒ kǎ gbah métié maá ɨ́ yé? Gua yɨ́ɛ lɨ́ esâ Nzyɛ̌m bisá bí ésɔ́m!

²⁴ Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: «Bʉr o dí abe ɨ́ kúl óYúden bá, bé sá Nzyɛ̌m nkěh ó ɨ́ lɔ̌b wɨ́n.»

²⁵ Tíʼá mpʉ́n, wé e nyɔm ó, njɨ lɨ́ esú é mʉ̂r dí ebaʼle métié nyá. Mʉ̂r gbáh métié maá nó, tíʼá mpʉ́n wé, wé l'akǎ be e nyɔm. Nye mʉr tɨ̂, nyɨ́ dwirǎ mpʉ mʉ̂r á be apǎ tíʼɔɔ mpʉ́n nyá.

²⁶ Mʉ̂r á be apǎ tíʼɔɔ mpʉ́n nyá, nyé báʼlé métié nó, Nzyɛ̌m óbee nyé ó, mpʉ̌ sá lɛ́ɛ́, nye ó tíʼá mpʉ́n.

²⁷ Mʉr bikûl dí abě tíʼá mpʉ́n ɨ́ nkǒ páʼ nyʉ̂l nyá, nyé báʼlé yɨ́ɛ metié nó, nye ódwe gó mebě, gua Yúden. Go á si ntɨhɔɔ mekaná métié. Go ntémé tíʼɔɔ mpʉ́n. Píe tɨ̂, go nzě gbah métié maá.

²⁸ Mpǎŋ Yúden, nyé abe waá dí enyɨ̂n njɨ̌ kʉ̌l nyá. Mpǎŋ tíʼá mpʉ́n, wé abe waá tíʼɔ́ɔ́ ɨ́ nyʉ̂l, dí ebeɔɔ̌ kʉ̌l wɨ́.

²⁹ Mpǎŋ Yúden, nye ó waá dí ɨ́ léme tʉ́ŋlʉ̌ nyá. Mpǎŋ tíʼá mpʉ́n, wé ó waá Sísǐm mé Nzyɛ̌m dí etíʼe ɨ́ lémé mʉ̂r wɨ́. Wé atíʼɔɔ ɨ́ lɔ̌b métié mé Moyɨ̂z. Mʉr dí e tíʼá mpʉ́n waá nyá, ntʉ bʉ̂r ngá gúmlo nyê. Kûm nyé, nye óduho ó kwá mé Nzyɛ̌m.