အွန်လိုင်း သမ္မာကျမ်းစာ

Mɨngwiha 3 - Kálar Nzyɛ̌m : Ejwán é Sáá

Mekaná mé á tyenɔɔ Mbɛ̌r-Nzyɛ̌m Sárdɛs má

¹ «Cɛmaa mékaná. Go e tyén éngeles dí edwéelě Mbɛ̌r-Nzyɛ̌m, waá dí ɨ́ Sárdɛs wɨ́ nyá. Lɛ́yɨ́ɨ́ nyé ó: Waá dí emɛ̂r mísísǐm mé Nzyɛ̌m nzaangbá ndu e l'ocwícwén nzaangbá nyá, nyě lɛ́ɛ́ ó: me lɨ́ egʉ́ǎ sá yɨ́yɛ̂h gó dí esâ yɨ́. Bʉr bɨ́ɛ bee ó, go ó kublakúbla. Nkúná gua, go ó mpʉ̌ múu.

² Gbɔlwaa gá sí. Diʼee gá ɨ́ mpʉ̂n. Bɨ̌n bé ámû jaá síe lɨ́ edwe ɨ́ méŋlɛ́, ebě, me á si bee ó, syɛ́ɛ́ yɨ́n, yé dína ó, apǎ gwá bě lwɨ́ŋlá ɨ́ míh mé Nzyɛ̌m.

³ Ebe nó, símsáá gá milɛ́ʼlá bɨ́n á jóʼo ɨ́ mimbú mí píhe mí. Símsáá gá ntémé mpʉ bɨ́n á nyɛɛ nʉa myé yɨ́. Túmáá gá mikoo e mebébe mɨ́n. Bɨ̌n e dwírá míléme, le ebaʼle mílɛ́ʼlá myaá. Bɨ́n bé yɨ́ɛ ajɨmajɨma nɛ́ɛ: gʉ́ŋáá gá ó, me ónze ɨ́ sɔ́má yɨ́n. Sâ gwár, bɨ̌n bé ágʉ́ǎ jɔʼ mé ónze yɨ́. Me ónze ó, metwɨrâ, mpʉ̌ ndíblʉ̌.

⁴ Nó ó, yé e bʉ́ʉ́ bʉ̂r ɨ́ sɔ́má yɨ́n ɨ́ Sárdɛs, baá bé á be alœʼ mikán myɔ́ɔ́ bá. Bé óbwâr míkán ɨ́ pumo pumo. Bɨ̌h le onɔ́ɔ́ bé ótyě sɔ́má gwár, ebě, bé lɨ́ ejala e tɨ̂.

⁵ Baá bé óntaa, búla le onkɔ́ɔ́ bá, me óbôr bé mikán ɨ́ pumo pumo. Me ápɛʼ míé mɔ́ɔ́ ɨ́ mekaná mé twiʼ. Me ólɛ́ɛ Sɔ́ŋ wǎm, bé e beéngeles bé ó: “Baá bâm bê.”

⁶ Mekǎn Sísǐm mé Nzyɛ̌m dí elɛ́ɛ bʉ̂r ó Mbɛ̌r-Nzyɛ̌m má, mé ó ménɨ̌. Mʉr nyɨnyɛ̂h dí e megwǎl mé éjóʼo nyá, nye jóʼaa náǎ!»

Mekaná mé á tyenɔɔ Mbɛ̌r-Nzyɛ̌m Filadɛ́lfia má

⁷ «Cɛmaa mékaná. Go e tyén éngeles dí edwéelě Mbɛ̌r-Nzyɛ̌m, waá dí ɨ́ Filadɛ́lfia wɨ́ nyá. Lɛ́yɨ́ɨ́ nyé ó: Lɔ́ɔ́ wɨ̂, wé duho ó, ɨ́ num mé Mʉr mé Nzyɛ̌m dí tí, waá dí tyeetye nyá. Paá bee gâ: osab me Njwɨ́ɨ David ó mé dí e bé ɨ́ mebô bâ. Mé díb ébê nó, abe e mʉr ókǎ pɨr lê. Mé pɨ́r lé nó, abe e mʉr dí e nkul ekǎ báʼǎ dib.

⁸ Me lɨ́ egʉ́ǎ sá bɨ́n dí esâ yɨ́. Me lɨ́ egʉ́a ó, bɨ̌n bé e bwá ó nkûl. Damá jóʼo nó, bɨ̌n bé á si baʼle lɔ́ɔ́ wâm. Bɨ̌n bé á bé akɛ́la mê. Jwɛ́ʼɛ́ɛ́ gâ, mɨ́ dib bɨ́n ebê, abe e mʉr dí e nkul ekamle bɨ́n lɨ́ enî tɨ̂.

⁹ Beyɨɨ gá, ɨ́ mpʉʼ ó mé ósâ bʉ̂r o mpáh minjɨʼla mé Sátan, baá o dí elɛ́ɛ ó, bé ó oYúden, bɨ́ɛ abe bé bá. Bé kʉ́ sâ ó, njɨ bibɛr. Me ósâ bé mbi dí ó, bé ntáa nzě bɨʼ mébóó mɔ́ɔ́ sí ɨ́ mempǒm mɨ́n yɨ́, ebě, bé nkʉ̂ gʉ́a ó, me lɨ́ ekpɛl bɨ́n.

¹⁰ Sâ gwár, me á lɛ́ɛ e bɨ̌n bɨɛ ó, bɨ̌n dûhwaa. Bɨ̌n bé á si bana baʼle lɔ́ɔ́ wâm waá. Mpʉ bɨ́n á jóʼo me nó yɨ́, me óbaʼle bɨ́n, ebě, bɨ̌n bé ámû jaá nî ɨ́ bintɨ́ʼá mû lɨ́ epyâl ɨ́ mʉr nyɨnyɛ̂h ɨ́ sí yɨ̂ʼ bí.

¹¹ Me mû ó kúno enze. Mɛ́rɨ́ɨ́ gá sá bɨ́n dí e yé yɨ́ ɨ́ kpɨ́ɨ́ɨ́, ebě, nyʉ́ʉ́ mʉ̂r ámû jaá dɛ̂ʼ bɨ́n káráá mé á gwa dwe bɨ̌n tâŋ myɛ́na yɨ́.

¹² Baá bé óntaa, búla le onkɔ́ɔ́ bá, me ótyêl bé mpʉ médwii ɨ́ mbɛ̌r me Sɔ́ŋ wǎm. Bé ótyɛ̂b ɨ́ lyahwó. Yé ákǎ be e sá yé ópyêl bé tɨ̂. Me ócɛma díé mé Nzyɛ̌m ɨ́ menyʉ́l mɔ́ɔ́. Me ócɛma ntémé díé é nkana mé Nzyɛ̌m, yaá dí edwán é Yerʉ́zalɛm yɨ́. Nzyɛ̌m óntɨ̌h nkana yaá kâʼ sí, duho ɨ́ jʉ́o kʉ́. Me ócɛma ntémé edwán é díé lâm ɨ́ menyʉ́l mé bʉ̂r baá.

¹³ Mekǎn Sísǐm dí elɛ́ɛ̌ Mbɛ̌r-Nzyɛ̌m má, mé ó ménɨ̌. Mʉr nyɨnyɛ̂h dí e megwǎl mé éjóʼo nyá, nye jóʼaa náǎ!»

Mekaná mé á tyenɔɔ Mbɛ̌r-Nzyɛ̌m Laodiséa má

¹⁴ «Cɛmaa mékaná. Go e tyén éngeles dí edwéelě Mbɛ̌r-Nzyɛ̌m, waá dí ɨ́ Laodiséa wɨ́ nyá. Lɛ́yɨ́ɨ́ nyé ó: Waá dí e díe ó, “Amɛn”, dí ntémé mboʼlo mpâ, mʉr ebúʼlɔɔ. Nye ó waá Nzyɛ̌m á kuho kʉ́ e sí ɨ́ nzɨ̌ nyé nyá. Nyě lɛ́ɛ́ gó ó:

¹⁵ “Me lɨ́ egʉ́a bísyɛ́ɛla bín. Me lɨ́ egʉ́a ó, bɨ̌n bé atala. Bɨ̌n ntémé, bé adíʼa ɨ́ yʉŋ yʉŋ mpʉ médíbé me dí etwaʼ má. Yé bé go bé yɨ́ɛ ó yɨ̂, nkʉ̂ yʉ́ʉ́ nó!

¹⁶ Ebě, bɨ̌n bé ó mpʉ médíbé me dí ɨ́ nyêʼraa, adíʼa, atala má. Sá tɨ̂ʼ ó mé ójʉ̂ gó bijwɨ́ɨlɨ́ yɨ́.

¹⁷ Bɨ̌n bé lɨ́ elɛ́ɛ ó, bɨ̌n bé le okúm le ogbaa le ombeʼ o nyʉ̂l. Bɨ̌n bɨɛ, bé agʉ́a ó, lɨ́ otyeetye, bɨ̌n bé ó bʉr o dí ɨ́ buú kpaa nkóó bá, ndu e bʉr o métɨʼla. Bɨ̌n bé ó baántéʼenteʼe o bʉ̂r, baántím, misuswáh.

¹⁸ Me lɨ́ etɨ́e bɨ́n ó: yé bé bɨ̌n bé lɨ́ egwɨ̂m ébi ókúm ómpâ nó, bwámáá gá gʉ̂l yâm. Yé á be ɨ́ duho ɨ́ duró lé ólûl. Bwámáá gá mikán ɨ́ pumo pumo. Bɨ̌n e bwár myê, akǎ dǐ suswáh ɨ́ ŋmáh ndu e sôn. Bɨ̌n e bwám ntémé mǐr étwáale ɨ́ mîh, ó bɨ̌n nkʉ̂ báʼǎ bee!

¹⁹ “Mɛm, me lɨ́ edwe mʉ̂r nyɨnyɛ̂h mé dí ekpɛl nyá melɨ́, le esɨ̂ʼ nyé lʉ̂. Nó, sáʼ gá sɨ́n, lɨ́ esú ó bɨ̌n túmaa mikoo e misyóm mín. Bɨ̌n e dwírá míléme.

²⁰ Paá bee gâ: me ó wâʼ lɨ́ ekwâʼle ébé lô ó, me níʼee. Mʉr ngá jóʼǒ lwǐb yâm, dib mé lǎ nyá, me ónî kwá nyé. Bɨ̌h e nɔ́ɔ́, bé opûhla mébô lɨ́ ede.

²¹ “Mʉr óntaa, búla le onkɔ́ɔ́ nyá, me ódwe nyé nkul ó, bɨ̌h e nɔ́ɔ́ díʼee diá gwár ɨ́ mecwɨ́ɨ́ mé jwɨ́ɨ́ yâm, ebě, mɛm ntémé, me á si ntaa, búla e wâm ónkɔ́ɔ́. Me á si di sí bǎʼ e Sɔ́ŋ wǎm ɨ́ mecwɨ́ɨ́ mé jwɨ́ɨ́ yé.”

²² «Mekǎn Sísǐm mé Nzyɛ̌m dí elɛ́ɛ̌ Mbɛ̌r-Nzyɛ̌m, mé ó ménɨ̌. Waá dí e megwǎl mé éjóʼo nyá, nye jóʼaa náǎ.»

« အရင်

နောက်တစ်ခု »

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ