Lʉkas 11 - Kálar Nzyɛ̌m : Ejwán é Sáá

Yésʉs lɨ́ elɛ̂ʼle bʉ̂r minjɨʼla

¹ Ɨ́ lʉ́ʉ́ dʉ́o, Yésʉs á be ó yʉ́ʉ́ gúmo lɨ́ ejɨʼla. Jɔʼ nyé á sil ejɨʼla yɨ́, nyʉ́ʉ́ mpʉ́n wé ntɔ̂ʼ lɛ́ɛ e né ó: «Dâ ɛ̌, lɛ́ʼláá bɨ́h esâ mínjɨʼla mpʉ̌ Yʉánɛs Ndubʉr nyɨɛ á lɛ̂ʼle bé ómpʉ́n myaá myɔ́ɔ́ yɨ́.»

² Yésʉs ntɔ̂ʼ lɛ́ɛ e bé ó: «Jɔʼ bɨ́n dí ejɨʼla yɨ́, lɛ́yɨ́ɨ́ gá ó: “Sɔ́ŋ wɨ́h, lɛ́ʼláá bʉ̂r bɨ́bɛ̂h ó, go ó Nzyɛ̌m dí ti nyá. Jwɨ́ɨ́ yô, yé ntâʼ.

³ Jwǐdwéʼ bɨ́h mede me jálá e bɨ̌h ɨ́ dʉ́ó lɨ́lɛ̂h má.

⁴ Pɛʼɛɛ bíbaa gó á niʼe bɨ̌h ɨ́ lɔ̌b mébébe mɨ́h bí, ebě, bɨ̌h ntémé bé lɨ́ epɛʼ bíbaa bɨ́h dí eniʼe bʉ̂r bɨ́bɛ̂h ɨ́ lɔ̌b ébébe bé dí esâ bɨ́h lɨ́. Ayɨ́ bîr ó, bɨ̌h níʼee ɨ́ mebʉ́blá.”»

⁵ Nye ó: «Mʉ̂r ɨ́ sɔ́má yɨ́n bé e só nó, nye óbánǎ tó kœb nyé témé pum, le elɛ́ɛ e só waá ó: “Mɨ́ɔɔ́ wǎm, paá kʉl mé biblêr bilɛ̂l.

⁶ Nyʉ́ʉ́ só wǎm, nyɨ́ búla ɨ́ tyen, pyâl kwá nyǎm. Mé abe e sá mé dwé nyê.”

⁷ Só wé nyé á to bee nyá, sí kǎ yala e né tʉ́ŋlʉ̌ mbɛ̌r ó: “Ayɨ́ kǎ ntɨ̂ʼ mê. Ebê, lɨ́ boó pɨrɔɔ le sab. Bɨ̌h e bwán bâm mû ó minjáʼ mí sí. Mé abe e nkul ekǎ gbɔlwa sí, dwe gó sɔ̂ʼ.”

⁸ Mě lɛ́ɛ́ bɨ́n ó, damá jóʼo bé e nɔ́ɔ́ bé ó osó, nye óbánǎ yala ɨ́ mbi waá, le ebene égbɔlwa sí. Sâ gwár yɨ́ɛ, nye ónzoó gbɔlwa sí, dwe só wé sá yɨ́yɛ̂h nyê bé lɨ́ edî yɨ́ ó, ebe nyé dí ejaʼ, atyɛʼ nkûl.

⁹ «Mɛ̌m lɛ́ɛ́ e bɨ̌n ó, gwámáá gâ, bɨ̌n nkʉ̂ bi. Sáŋáá gâ, bɨ̌n nkʉ̂ bee. Kwáʼláá gá ebê, lé nkʉ̂ dibɔɔ bɨ́n.

¹⁰ Ebě, mʉr nyɨnyɛ̂h dí egwâm nyá, óbi. Mʉr dí esáa nyá, óbee. Ebê, lé ódibɔɔ lɨ́ esú é mʉ̂r dí ekwâʼle nyá.

¹¹ Wáa mʉ̂r ɨ́ sɔ́má yɨ́n dí ó, mwân wé gwám nyé sû nɛ́ɛ: nyě kǎ dwe nyé nyʉ́a ɨ́ dilá sû nyê gwám nyá?

¹² Nzê nyě e nkul edwe nyé bámlwál ɨ́ jɔʼ nyé jáʼ nyé ecɨ́ é kúo yɨ́ ɛ́?

¹³ Bibɨ́bla bi bʉ̂r bɨ́n dí nɨ̌, bɨ̌n pǎ nyɛɛ́ dwe bwán bɨ́n bisá bímpâ, á dwɛʼra e Sɔ́ŋ wɨ́n! Nye óntɨ̌h Sísǐm wé, duho ɨ́ jʉ́o kʉ́, dwe wé bʉr o dí egwâm nyé wǎ bá.»

Yésʉs, bé e Sátan

¹⁴ Ɨ́ lʉ́ʉ́ dʉ́o, Yésʉs á be ó lɨ́ edwih mʉ̂r eleme. Mʉr waá á be ó ányâ-emúmó, duho lɨ́ eleme nyé á jaʼra e lé lɨ́. Jɔʼ éleme, lé á duho ɨ́ nyʉ̂l nyé yɨ́, mʉr á be ányâ-emúmó nyá, ntɔ̂ʼ báʼǎ táare élwib. Entumo e bʉ̂r nzě twɨra.

¹⁵ Nó bʉ́ʉ́ bʉ̂r, bé á nze lɛ́ɛ ó: «Yé ó Béelzébul, njwɨ́ɨ meleme, ó dí edwe nyé nkul ó, nye sôʼ meleme ménɨ̌.»

¹⁶ Bʉ́ʉ́, bé á si sáa ebóblo nyê. Bé ó, nye sâʼ bé esimá e nkul dí eduho ɨ́ jʉ́o kʉ́ nyɨ́.

¹⁷ Nó mpʉ nyé á gʉ́a bijwɨʼ byɔ́ɔ́ yɨ́, nye e bé ó: «Kúl yɨ́yɛ̂h bʉ̂r o tɨ̂ʼ dí elwímla páʼ nyɔ́ɔ́ yɨ́, yé lɨ́ esûʼla ó ɨ́ twíilɨ̌, akǎ be e bʉr. Wɨ̂ʼ mbɛ̌r, wé ónkaŋa é gúú.

¹⁸ Yé bé bʉr mé Sátan, bɨ́ bɔ́ʼa, sâ ménkɔ̌m mebá nó, lɛ́ɛ́, mpóʼo nyé, nyé abe e nkul ebyéa le ejah ó tɨ̂ʼ yɨ́. Ebě, bɨ̌n lɛ́ɛ́ ó, mě dwidwǐh bʉ̂r meleme ó e nkul dí eduho kwá mé Béelzébul nyɨ́.

¹⁹ Bɨ́n lɛ́ɛ́ ó, mě sǒ méleme ó e nzɨ̌ nkul Béelzébul dí edwe mé nyɨ́ nó, á nzé nyɨɛ dí edwě dyɛɛ́ yɨ́n nyɔ́ɔ́ nkûl eso mê? Bé bʉr o tɨ̂, bé ó dí elɛ̂ʼle ɨ́ kpɛŋlɛm ó, bɨ̌n bé e mebě.

²⁰ Yé bé mě sǒ méleme ɨ́ bʉr e nkul diné mé Nzyɛ̌m nó, lɛ́ɛ́, Mpóʼo mé Nzyɛ̌m mû ó, lɨ́ ekúnwo e bɨ̌n.

²¹ «Jɔ̌ʼ nkɔ́ɔ́ mʉ̂r mû sí komlo dɔ̂m yɨ́, yé lɨ́ ebaʼle mébi mé ɨ́ puuu, akpɛ́ɛ̌ sɔ̂ʼ.

²² Damá jóʼo nó, jɔʼ nyʉ́ʉ́ ánkul-bituma láá nyé nyá, ntáá nyé ɨ́ dɔm yɨ́, nye ópar nyé bisá bí dɔ̂m nyé á bûbuʼla bí. Nyé onʉa byê, kab bʉ̂r oswîh.

²³ «Mʉr nyɨnyɛ̂h dí abe ɨ́ nkɔ̌m nyǎm nyá, nye me ó ɨ́ nkɔ̌m kɔ́m nkɛ́ɛ́. Mʉr dí akœb mé lɨ́ esyɛŋ nyá, nye lɨ́ egbah ó gbaháa.»

Mpúla mbɨ́ǎ sísǐm

²⁴ «Jɔ̌ʼ mbɨ́ǎ sísǐm wé mû sí duho mʉ̂r ɨ́ nyʉ̂l yɨ́, wé sɨ́sá ó, tô le epómo, lɨ́ esáǎ gúmó égbala. Tó kœ̌b njɨ bigúmo bi dí ɨ́ swáh swáh bí. Mpʉ wé dí abeě gúmó égbala yɨ́, wé lɨ́ elɛ́ɛ ɨ́ wé mʉr tɨ̂ʼ ó: “Mě búlá ó, tô mbɛ̌r wâm, gúmó mé á pa duho yɨ́.”

²⁵ Wé ntɔ̂ʼ búla, kœ̌b mbɛ̌r ngwámlá, mbɨambɨa kʉmsá.

²⁶ Wê nzě tó nʉa mísísǐm miswîh, myaá myé á be ɨ́ buú bébe, laa wé mí, nzaangbá. Myé ntɔ̂ʼ búlǎ sɔ́má, nzě diŋɔɔ sí ɨ́ mbɛ̌r waá. Ɨ́ jɔ̌ʼ nɨ̌, ntɨ́ʼá mʉ̂r waá ókǎ sia e yé yɨ́, yé ólaa yaá ésôʼ lɨ́ ebébe.»

Metyɛʼ me mpóm mempâ

²⁷ Yésʉs dína lɨ́ ekʉ́ lwib nó nɛ́ɛ: nyʉ́ʉ́ mʉ́má ntɔ̂ʼ pâm lɨ́ entumo e bʉ̂r laá. Nye e Yésʉs ó: «Metyɛʼ me mpóm, mé díʼee e mʉmá á nkɛ́ɛ go ɨ́ mo wé, le edêhle gó ebél lé nyá!»

²⁸ Nó ó Yésʉs á yala e né ó: «Metyɛʼ me mpóm, mé buú buo ó e baá o dí ejóʼo mílɔ̌b mé Nzyɛ̌m ndu e l'ebaʼle myé bá.»

Bʉr lɨ́ edî mésimá

²⁹ Ɨ́ jɔʼ bʉ̂r, bé á be lɨ́ emâʼlǎ gúmó Yésʉs á be yɨ́, nye e bé ó: «Á bébe bʉ̂r ó myǎ wɨ̂ʼ ɛ̌! Bé lɨ́ edǐ bee mésimá. Bé ákóʼó bee ésimá egwár, alaa ó laá lé á syɛ́ɛ ɨ́ twiʼ mé Yʉ́nas lɨ́.

³⁰ Ebě, jwɨʼ gwár e gwár e mpʉ bʉ̂r ó Ninevâ, bé á bee esimá lɨ́ esyɛ́ɛ ɨ́ twiʼ mé Yʉ́nas, jwɨʼ gwár yaá ntémé ó bʉ̂r ó myǎ wɨ̂ʼ ngá bee ésimá lɨ́ esyɛ́ɛ ɨ́ twiʼ Mwân mé Mʉr yɨ́.

³¹ Ɨ́ dʉ́ó lé étíʼ é mílɔ̌b, njwɨ́ɨ mʉmá á duhǒ díbé tie nyá, ótyɛ̂b, nwâhle bʉ́rʉ̂m ó myǎ wɨ̂, ebě, nye á si duho médumo me ntwíʼ, lɨ́ enzě jóʼo métwɨ́ɨ́ mé ócwóó mé Salomɔ̂ŋ. Paá bee gâ: sá láá Salomɔ̂ŋ yɨ́, yé ó wâ.

³² Ɨ́ dʉ́ó lé étíʼ é mílɔ̌b, bʉrʉ̂m ó Ninevâ, bé ógbɔlwa, nwâhle bʉ̂r ó myǎ wɨ̂, ebě, bé á be ó sí túmo míkoo le edwira míléme lɨ́ ejóʼo mpáŋla mé Yʉ́nas. Nó, paá bee gâ: sá láá Yʉ́nas yɨ́, yé ó wâ.»

Diʼee gá ɨ́ myɛ́n

³³ «Mʉr, nyé abe lɨ́ etumo éláma lɨ́ esú lé égbâ lé lɨ́ esǒ. Yé jala ó, bé tyélɨɨ lé ɨ́ tyélátyéla éláma kʉ́, ó bʉr nkʉ̂ kœ̌b mbɛ̌r e myɛ́n ɨ́ jɔʼ yɨ́yɛ̂h bé nî yɨ́.

³⁴ Díh lô, lé ó eláma e nyʉ̂l nyǒ. Yé bé díh lô, lé ó mbɨ̂mbɨá nó, lɛ́ɛ́, nyʉ̂l nyǒ nyɨnyɛ̂h, nye ó ɨ́ myɛ́n tʉ́ŋlʉ̌. Lé bé abě mbɨ̂mbɨá nó, lɛ́ɛ́, nyʉ̂l nyǒ nyɨnyɛ̂h, nye ó lɨ́ edúrʉ́ʉ́.

³⁵ Gwá di gá ocwóó, lɨ́ ekpɛ́ɛ ó, dwé bɨ́n dí e yé yɨ́, yé ayɨ́ liŋa édúrʉ́ʉ́!

³⁶ Nyʉ̂l nyǒ nyɨnyɛ̂h bé ɨ́ myɛ́n, yʉ́ʉ́ tîl l'akǎ lîʼ lɨ́ edúrʉ́ʉ́ nó, lɛ́ɛ́, go mʉr tɨ̂ʼ ntinɨ̂ mû ó ɨ́ myɛ́n tʉ́ŋlʉ̌. Yé ó mpʉ éláma e dí epan gó myɛ́n lɨ́.»

Yésʉs lɨ́ edwe ójwɨ́ɨ́ ó Yúden mebě

³⁷ Jɔ̌ʼ Yésʉs á be lɨ́ elwib yɨ́, nyʉ́ʉ́ Farizyɛ̂n ntɔ̂ʼ jébe nyê. Nye e né ó: bé e nɔ́ɔ́ tô dě mbɛ̌r wé. Bé ntɔ̂ʼ tô, níŋɔɔ̌ mbɛ̌r, diŋɔɔ sí ɨ́ téble.

³⁸ Farizyɛ̂n waá á be ɨ́ kâm ɨ́ jɔʼ nyé á bee ó, Yésʉs á bana nze lɨ́ edɨ́ɨ́ ó, apǎ jwɨɨ mébô yɨ́.

³⁹ Nó ó Tî Yésʉs á nze lɛ́ɛ e né ó: «Paá bee gá mpʉ bɨ́n oFarizyɛ̂n dí yɨ́: bɨ̌n sʉsohlo bísʉ́á le bikɔ̂b ó ɨ́ páʼ kʉ̌l. Sâ gwár, bɨ̌n bɨ́ lóno ɨ́ bisá bɨ́n á pa dɛn bí, le sá bɨ́n á sâ e jélé yɨ́.

⁴⁰ Bɨ̌n bisá bígʉ́ʼ bî: Nzyɛ̌m, mʉr á komlo mʉr nyʉ̂l páʼ kʉ̌l nyá, ntʉ nyé ntémé á komlo nye páʼ tʉ́ŋlʉ̌ ɛ̌?

⁴¹ Dwéʼ gá baántéʼenteʼe o bʉ̂r sá dí ɨ́ bisʉ́á bín tʉ́ŋlʉ̌ yɨ́. Bɨ̌n bé óbee ó, bisʉ́á bín bíbyɛ̂h, byé ó mbɨ̂mbɨá ɨ́ míh mé Nzyɛ̌m.

⁴² «Nkoó, nye ó e bɨ̌n, oFarizyɛ̂n, ebě, bɨ̌n damá bi bísâ bi dí ɨ́ twâʼwo bí mpʉ bíká ménumó, biká bí dʉ̂m ti e byaá mépulo, bɨ̌n bé lɨ́ ebánǎ dwě Nzyɛ̌m nkɔb mpwár ɨ́ menkɔb kám tɨ̂. Tó kœb ó, bisyɛ́ɛla bi mpâm le byaá bí ótîtyěl Nzyɛ̌m dí ɨ́ buú beě mbɨ̂mbɨá bí, bɨ̌n bé lɨ́ epyêh byê. Yé jala ó, bɨ̌n dwêʼ nye nkɔb bisá bín dí nyaá nyé nyɨ́. Sâ gwár, ajɨha ntémé bisyɛ́ɛla bi mpâm le byaá ótîtyěl.

⁴³ «Nkoó, nye ó e bɨ̌n, oFarizyɛ̂n! Bɨ̌n bʉr o dí esâ: jɔʼ yɨ́yɛ̂h bɨ́n dí etô ɨ́ mpáh minjɨʼla yɨ́, susuɔɔ̌ njɨ bidiá bí ésôʼ. Jɔʼ bɨ́n tó lɨ́ ebɨ̌m é pátele yɨ́, bɨ̌n kpɛl ó, bʉr sɨ̂seʼlaa bɨ̌n ɨ́ jɔʼ bé dí ebára e bɨ̌n yɨ́.

⁴⁴ Nkoó, nye ó e bɨ̌n! Ebě, bɨ̌n bé ó mpʉ mésoo dí akǎ nyɨ̂n kʉ̌l má. Bʉr, bé lɨ́ etíbe mésoo maá, bɨ́ɛ l'agʉ́a ó, bé lɨ́ ekúna e sá mélwaʼwo.»

⁴⁵ Nó nyʉ́ʉ́ lɛ̂ʼla metié á nze lɛ́ɛ e né ó: «Lɛ̂ʼla, jɔʼ gó dí elwib le oFarizyɛ̂n nó yɨ́, go lɨ́ esámle ntémé bɨ̌h le onɔ́ɔ́ bɨ́bɛ̂h.»

⁴⁶ Yésʉs, nye e né ó: «Nkoó, nye ó e bɨ̌n ntémé, olɛ̂ʼla o métié! Bɨ̌n bé lɨ́ egbâ bʉ̂r mimbeʼ médile ɨ́ mikoo ɨ́ nzɨʼrɨ, ó bé nkɛ́yɨɨ myê. Bɨ̌n bɨɛ l'akɛm bé lɨ́ enkɛ́ɛ myê, damá jóʼo ó e diné gwár.

⁴⁷ Nkoó, nye ó e bɨ̌n! Bɨ̌n bé lɨ́ ekɔ̂n mésoo mé ógwíha o mílɔ̌b. Tó kœb ó, bimpám bín ó b'á jʉ̂ bê.

⁴⁸ Mpʉ bɨ́n dí ekɔ̂n mésoo mɔ́ɔ́ nó yɨ́, bɨ̌n bé lɨ́ eboʼlo tɨ̂ʼ lɨ́ otyeetye ó, osɔ́ŋ bɨ́n ó dí e mpono meswie mɔ́ɔ́. Osɔ́ŋ bɨ́n ó b'á jʉ̂ ogwíha o mílɔ̌b; bɨ̌n bɨɛ kǎ kɔ̂n mésoo mɔ́ɔ́.

⁴⁹ Sɨ́ǎ yaá ó, Nzyɛ̌m dí elɛ́ɛ lɨ́ ocwóó wé ó: “Me ólómlo bé ogwíha o mílɔ̌b ndu e bʉr o mílʉ́mlʉ́ bâm. Bé ójʉ̂ bâʼ ó jʉ́ʼóo, tíble bʉ́ʉ́ tíbláa” yɨ́.

⁵⁰ Ɨ́ tɨ̂, yé lɛ́ʼlé ó, bʉr ó myǎ wɨ̂, bé óbi bíntɨ́ʼá ɨ́ buo buo. Bé ótáa métié mé ógwíha o mílɔ̌b mé Nzyɛ̌m bɨ́bɛ̂h, táare ɨ́ jɔ̌ʼ kʉ́ e sí, byé á be apǎ bě kuhá yɨ́.

⁵¹ Bɨ̌n bé ótáa méswie mɔ́ɔ́, táare lɨ́ eswie mé Ábɛl, tó pyâl ɨ́ laá mé Zacharie, mʉr á jʉ́ŋɔɔ páʼ alatâr ndu e mpáh Nzyɛ̌m nyá. Mě lɛ́ɛ́ bɨ́n lɨ́ otyeetye ó, bʉr ó myǎ wɨ̂, bé ótáa méswie mɔ́ɔ́ mɨ́mɛ̂h!

⁵² «Nkoó, nye ó e bɨ̌n, olɛ̂ʼla o métié! Bɨ̌n bɨ́ la nzɨ́ dí edwe ócwóó nyɨ́. Bɨ̌n bʉr o tɨ̂ʼ adyɛ̂l ɨ́ nzɨ̌ nyaá. Bɨ̌n bɨ́ bánǎ kamle bʉ̂r o kpɛ́l édyɛ̂l tɨ̂ʼ bá lɨ́ edû nyê.»

⁵³ Jɔ̌ʼ Yésʉs á duhǒ gúmo yaá yɨ́, olɛ̂ʼla o métié le oFarizyɛ̂n ntɔ̂ʼ sáŋɔɔ nyé otié, le esweŋɔɔ nyé e milɔ̌b ɨ́ buo buo.

⁵⁴ Bé á sâ nó ó, lɨ́ elámɔɔ nyé bilâm ɨ́ nzɨ̌, lɨ́ esâ ó, nye lɛ́yɨɨ lʉ́ʉ́ ékǎn bé ngá pur nyé e tɨ̂ʼ lɨ́.