Galásia 3 - Kálar Nzyɛ̌m : Ejwán é Sáá

Pɛ́hɛ́ɛ́ gâ: nkʉ̂ metié, nkʉ̂ nkɛ̌ʼ

¹ Bɨ̌n bʉr ó Galásia bé ó bigʉʼlʉgʉ́. Nzé á bana kʉ́a bɨ̌n? Báb, bé á si kʉ gwa lɛ̂ʼle bɨ̌n ɨ́ micɛmá, bɨ̌n nzě bee ɨ́ sʉ́lʉ́lʉ́ mpʉ̌ Yésʉs-Krîst á jʉ́ŋɔɔ ɨ́ kolôs kʉ́ yɨ́.

² Me ódî bɨ́n tíá mpwár nyɨ̂: nzê Nzyɛ̌m á ntɨh bɨ̌n Sísǐm wé jɔʼ bɨ́n á lóŋlo metié yɨ́ ɛ́? Nzê nye á bé antɨh wé ɨ́ jɔʼ bɨ́n á bûʼla Mbɨambɨa Lɔ́ɔ bé á lɛ́ɛ bɨ̌n wɨ́ ɛ́?

³ Wáǎ mbi bígʉʼlʉgʉ́ bɨ́n dí wɨ̂? Bɨ̌n nyɨɛ sí pǎ táare étiʼe ɨ́ nkul dí eduho e Sísǐm mé Nzyɛ̌m nyɨ́. Nó ó bɨ̌n kǎ kpɛl éswâhle ó e nkul dí eduho ɨ́ nyʉ̂l bipúno nyɨ́?

⁴ Nzê bɨ̌n bé á kʉ sia e mitúú ɨ́ buo buo ó, dwêh ɛ̌? Mé abûʼla ó, myé ó dwêh.

⁵ Ɨ́ jɔ̌ʼ Nzyɛ̌m dí entɨh bɨ́n Sísǐm wé, le esâ mésimá ménɨ́nɨ́ɨ́ páʼ nyɨ́n yɨ́, nzê nyě sá nó ó ebe bɨ́n dí elóŋlo métié ɛ́? Nzê yé ó ebe bɨ́n dí ebúʼla Mbɨambɨa Lɔ́ɔ bɨ́n á jóʼo wɨ́ ɛ́?

⁶ Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Abraham á si dyêʼ koo e Nzyɛ̌m. Nzyɛ̌m nzě beě mpʉ̌ Abraham á dyɛ̂ʼwo e né yɨ́, Nzyɛ̌m ntɔ̂ʼ láa ó, nye ó tîtyěl mʉr ɨ́ lɔ̌b búʼó yé yaá yɨ́.

⁷ Gʉ́ŋáá gá bé ó, bʉr o dí edyɛ̂ʼwo e Nzyɛ̌m bá, bé ó dí bwán mé Abraham.

⁸ Bé á si boo cɛma ɨ́ Mekaná mé Nzyɛ̌m ó, bʉr o bíkûl biswîh, bé óbi nkâm ɨ́ míh mé Nzyɛ̌m ó, ɨ́ lɔ̌b búʼó yɔ́ɔ́. Mbɨambɨa Lɔ́ɔ́ wɨ̂, wé á nyɛɛ túnɔɔ ó, Abraham! Nzyɛ̌m á lɛ́ɛ e né ó: Me ósʉ bíkúl bíbyɛ̂h metyɛʼ mé mpóm ó, ɨ́ koo gô.

⁹ Abraham nzě dyêʼ koo e Nzyɛ̌m. Nó ó Nzyɛ̌m á sʉ nye metyɛʼ me mpóm yɨ́. Jwɨʼ gwár e gwár yaá ntémé ó Nzyɛ̌m ngá sʉ bʉ̂r bɨ́bɛ̂h o dí edyɛ̂ʼwo e né bá metyɛʼ me mpóm yɨ́.

¹⁰ Ebě, mʉ̂r sí bûʼla ó, Nzyɛ̌m ódwe nyé nkam ɨ́ lɔ̌b mbaʼlá nyé dí ebaʼle métié wɨ́ nó, lɛ́ɛ́, nyě e meswomlʉ, ebě, yê cɛmá ó: Mʉr nyɨnyɛ̂h dí abaʼle métié Mékaná mé Nzyɛ̌m mɨ́mɛ̂h nyá, nyě e meswomlʉ.

¹¹ Mɨná mû ó sí gʉ́a gá ɨ́ pébébé ó, yé abe e mʉr dí e nkul ebi nkâm ɨ́ míh mé Nzyɛ̌m ɨ́ lɔ̌b mbaʼlá métié. Mekaná mé Nzyɛ̌m, mé lɨ́ elɛ́ɛ tɨ̂ʼ ó: Tîtyěl mʉr, nye ótiʼe ó, ɨ́ lɔ̌b búʼó yé.

¹² Mʉr, nyé abaʼle métié ɨ́ lɔ̌b búʼó nyé dí ebúʼlǎ Nzyɛ̌m yɨ́, ebě, Mekaná mé Nzyɛ̌m, mé lɨ́ elɛ́ɛ ó: Waá nyɨnyɛ̂h dí ebaʼle métié nyá, óbǐ twiʼ ó e nzɨ̌ metié maá.

¹³ Mpʉ mɨ́ná dí abaʼle gá metié yɨ́, nó ó, Nzyɛ̌m, nyɨ́ syɛm mɨ́ná gâ. Sâ gwár, Yésʉs-Krîst á si dwih mɨná gá ɨ́ mpila ébébe, le enʉa méswomlʉ maá mɨ́mɛ̂h ɨ́ nyʉ̂l nyé lɨ́ esú gá lɨ́ná, ebě, yê cɛmá ó: Mʉr nyɨnyɛ̂h á tyelɔɔ ɨ́ lɨ́ kʉ́ nyá, nye ó waá Nzyɛ̌m á syɛm nyá.

¹⁴ Yésʉs-Krîst á dwih mɨná gá ɨ́ mpila ébébe nó ó, lɨ́ esú é bʉ̂r o bíkúl bíswîh. Nye mû ó lɨ́ enzě ntɛŋ bɨ́n metyɛʼ me mpóm Nzyɛ̌m á kɛʼ Abraham ó, nye ósʉ má. Nye á dwih mɨná gá le onɔ́ɔ́ ɨ́ mpila yaá ó, mɨná nkʉ̂ bi gá nkɛ̌ʼ mé Nzyɛ̌m. Nkɛ̌ʼ nyaá, nye ó Sísǐm wé, waá nyé á kɛʼ mɨná gá wɨ́. Nyě ntɨ̌h wé ó, ebe mɨ́ná dí edyɛ̂ʼwo gá e né.

Nkɛ̌ʼ mé Nzyɛ̌m ó b'á pyâl esôʼ

¹⁵ Bɨ́ɔɔ́ bâm! Okɛ́l bâm! Sá yɨ̂, yé ó kwahaá syɛ́ɛla bʉ̂r dí esɨsâ yɨ́. Mʉ̂r sí cɛma mékaná bílíʼe mpʉ bʉ̂r dí boó sɨ̂sa yɨ́ nó, abe e mʉr ókǎ gbɛ́ɛ mícɛmá myaá. Mʉr swîh, nyé abe e nkul ekǎ kɛl lʉ́ʉ́ ékǎn tɨ̂.

¹⁶ Jwɨʼ gwár e gwár yaá ó Nzyɛ̌m á dwe Abraham bé e nta wé nkɛ̌ʼ yɨ́. Mekaná mé Nzyɛ̌m, mé alɛ́ɛ ó: «onta». Mé kʉ́ jaá lɛ́ɛ ó, njɨ «nta ngwár.» Nta mé Abraham waá ó dí Yésʉs-Krîst.

¹⁷ Sá mé mû lɨ́ ejɨ̌ lɛ́ɛ yɨ́ ó yɨ̂: Nzyɛ̌m á si boo tyêl saá le Abraham. Píe mimbû minter minâ e mekám mélɛ̂l, nye nzě tyêl óYúden metié. Metié maá, mé á bé agwá gbɛ́ɛ sáá nyaá, nkʉ̂ dímle ménkɛ̌ʼ nyé á dwe Abraham tɨ̂ʼ má.

¹⁸ Yé bé Nzyɛ̌m kab mʉ̂r embɨa lé ɨ́ lɔ̌b mbaʼlá mʉ̂r waá dí ebaʼle métié wɨ́ nó, lɛ́ɛ́, nyé antɨh nyé nyǎ ɨ́ lɔ̌b nkɛ́ʼ. Tó kœb ó, Nzyɛ̌m á dwe Abraham nkɔb membɨa nyé ó, ɨ́ nkɛ̌ʼ nyé á pa kɛʼ nye ɨ́ lɔ̌b mpâm nyé nyɨ́.

Metié mé Moyɨ̂z, mé e wáǎ nyɔm?

¹⁹ Yé bé nó wá, Nzyɛ̌m á tyêl metié maá ɨ́ yé ɛ́? Nye á tyêl mé ó, ɨ́ lɔ̌b bísyɛ́ɛla bí ébébe, lɨ́ esú é mâ jɔʼ, tó swîʼ ɨ́ jɔʼ ntâ mé Abraham waá ónzě mpʉ̌ Nzyɛ̌m á kɛʼ yɨ́. Nye á tyêl bʉr metié maá ó, lɨ́ enyɛɛ́ tímle bééngeles bé mǎ; bɨ́ɛ kǎ nzě dwe mesaádɔm.

²⁰ Mesaádɔm, nyě títyɛ́b ɨ́ jɔʼ yɨ́yɛ̂h ó, páʼ menkɔ̌m mebá. Sâ gwár, ɨ́ jɔ̌ʼ Nzyɛ̌m á kɛʼ Abraham membɨa yɨ́, Nzyɛ̌m, nye á bé alómo éngeles, nkʉ̂ mʉr ó, nye díʼee mesaádɔm páʼ nyɔ́ɔ́ le Abraham. Nye á séa ó, nye omér.

²¹ Nzê yé lɨ́ elɛ́ɛ ó, metié le nkɛ̌ʼ mé Nzyɛ̌m nyaá, byé e mbɔ́ʼ ɛ̌? Heʼé, yé abá be nó. Mbɔ́ʼ ntʉ́ʼ tɨ̂. Yé bé yé á be ó e lʉ́ʉ́ étié, lé á gwa sâ ó, bʉr bíʼee twiʼ nó, lɛ́ɛ́, mʉr á gwa bi nkam ɨ́ míh mé Nzyɛ̌m e nzɨ̌ metié. Sâ gwár, yé abe e lʉ́ʉ́ étié e dí esâ mɨ́ná gá syɛ́ɛla mpâ yaá.

²² Gúmo yaá ó Mékaná mé Nzyɛ̌m dí elɛ́ɛ ó, bʉr ó sí yɨ̂ʼ bɨ́bɛ̂h, bé ɨ́ jwɨ́ɨ́ syóm yɨ́. Syóm wɔ́ɔ́, wé á si kâʼ bɨ́bɛ̂h menkara. Sâ gwár, Nzyɛ̌m dwe nkɛ́ʼ nyé ó, ɨ́ baá bɨ́bɛ̂h dí edyɛ̂ʼwo e Yésʉs-Krîst bá. Nyě dwé bé nyǎ ó, njɨ ɨ́ lɔ̌b búʼó yaá.

²³ Ɨ́ mimbú mí píhe, Nzyɛ̌m á bé apǎ kar nzɨ́ ó, bʉr dyɛ̂ʼwaa e Yésʉs-Krîst. Jɔʼ yaá ó mɨ́ná bé á be gá ɨ́ mpila métié tʉ́ŋlʉ̌ yɨ́. Mɨná bé á be gá ɨ́ mpila yaá ó, tó pyâl ɨ́ jɔ̌ʼ Nzyɛ̌m á ka tɨ́e mɨná gá nzɨ̌ edyɛ̂ʼwo e Yésʉs-Krîst yɨ́.

²⁴ Metié maá, mé á bɨbe ó mpʉ pála bwá ó ntwǒm, mʉr á lilîʼle mɨná gá kwá mé Krîst nyá. Nye á sâ nó ó, mɨná nkʉ̂ bi gá nkam ɨ́ míh mé Nzyɛ̌m ɨ́ lɔ̌b búʼó.

²⁵ Ɨ́ báánâ, mpʉ̌ Nzyɛ̌m mû sí dib mɨ́ná gá nzɨ̌ edyɛ̂ʼwo e Yésʉs-Krîst yɨ́, pála waá, nyé akǎ jwɨ́ɨ mɨ́ná gâ.

²⁶ Bɨ̌n bɨ́bɛ̂h mû ó bwán mé Nzyɛ̌m, ebě, bɨ̌n bé á si dyɛ̂ʼwo e Yésʉs-Krîst.

²⁷ Ebě, mʉr nyɨnyɛ̂h ɨ́ sɔ́má yɨ́n á duŋɔɔ e medíbé, pûhla e Krîst nyá, nyɨ́ bwâr Krîst ɨ́ nyʉ̂l.

²⁸ Sá tɨ̂ʼ ó dí akǎ buú syɛ́ɛlǎ sɔ̂ʼ páʼ óYúden le bwá ó bíkûl yɨ́. Gǒ damá bě túʼǎ, nkʉ̂ ntémé nzyɛh; damá be mʉ́má, nkʉ̂ mʉrʉ̂m, nzyɛ́ɛ́lá ntʉ́ʼ bá tɨ̂, ebě, bɨ̌n bɨ́ pûhla e Yésʉs-Krîst. Bɨ̌n bɨ́bɛ̂h mû kǎ di ó, tâŋ mʉr ngwár.

²⁹ Yé bé bɨ̌n bé lɨ́ egúmo e Krîst nó, lɛ́ɛ́, bɨ̌n ntémé bé ó bwá bé ónta mé Abraham. Bɨ̌n ntémé bé ó bʉr o ngá bi ménkɔb ɨ́ mbɨambɨa bisá Nzyɛ̌m á kɛʼ Abraham bí bá.