Galásia 2 - Kálar Nzyɛ̌m : Ejwán é Sáá

Pɔ̂l, bé e bʉ́ʉ́ bʉ̂r o mílʉ́mlʉ́

¹ Píe mimbû kám e minâ, bɨ̌h e Banabâs, bé á si baʼa tô Yerʉ́zalɛm. Bɨ̌h bé á tô ntémé ó e Títos.

² Me á tô nó ó, ɨ́ pɨʼ Nzyɛ̌m á gwîh me nyɨ́. Jɔʼ mé á pyâl gʉ̂ʼ yɨ́, bɨ̌h le minjwɨ́ʼ mí Mbɛ̌r-Nzyɛ̌m nzě gwɨ̂hla. Me nzě lɛ̂ʼle bé mpʉ mé dí etúno bʉ̂r o bíkûl Mbɨambɨa Lɔ́ɔ yɨ́. Me á bé akpɛl ó, syɛ́ɛ́ mé á be lɨ́ eboó séa yɨ́, yé dwêʼ ntuʼ.

³ Damá jóʼo ó mpʉ̌ Títos, mʉr minjoo wǎm, dí mʉr Grɛ̂s yɨ́, bé á bé atíne nyé ó, nye tíʼɔɔ mpʉ́n.

⁴ Sâ gwár, bʉ́ʉ́ bʉ̂r, bé á si gwa tíne nye nó, ebě, bʉ́ʉ́ ókrǐsten o bíbɛr, bé á be ó ɨ́ sɔ́má yɨ́h yaá. Bʉr baá, bé á swama ɨ́ sɔ́má yaá ó, mesǒ, lɨ́ edǐ gʉ́a, nkʉ̂ bɨ̌h, bʉr o dí ɨ́ mpúhlá e Yésʉs-Krîst bá, bê tyeetye ó onzyɛh o bʉ̂r. Gwɨ́má yɔ́ɔ́, yé á be ó, bé báʼa liŋ bɨ́h bitúʼǎ.

⁵ Sâ gwár, bɨ̌h bé á bé asâ bé mejóʼo, damá jóʼo ó, mâ jɔʼ tîtííǎ. Bɨ̌h bé á bé abîr ó, bé ndámaa Mbɨambɨa Lɔ́ɔ, pɛʼ ótyeetye wé. Bɨ̌h bé á kpɨkpɛl ó, bɨ̌n jóʼaa wé mpʉ wé á boo be yɨ́.

⁶ Me nzě tó bee baá bé á nyɨ̂n ɨ́ mîh ó, bé ó otyɛ̂b bé ésôʼ bá. (Nkʉ̂ bé ó otyɛ̂b bé ésôʼ, nkʉ̂ bé abe bê, nó yé asâ mɛ̂m sɔ̂ʼ, ebě, Nzyɛ̌m, nyé abe lɨ́ edwáawo bʉ̂r mempǒm.) Bʉr o b'á bu nyɨ̂n nó bá, ɨ́ jɔʼ mé á lɛ́ɛ bé Mbɨambɨa Lɔ́ɔ mé dí etúno bʉ̂r wɨ́, bé á bé akɛl ékǎn egwár tɨ̂ʼ kʉ́.

⁷ Yé á bé akúnwo nó, ebě, bé á kam ó, Nzyɛ̌m, nyɨ́ ntɨh mé lɔ́ɔ waá, ó me tôʼ le etutúno wé páʼ bʉ̂r o dí abě tíʼá mpʉ́n bá. Nye á dwe me wǎ ó, lɨ́ esú é bíkúl bíswîh mpʉ nyé á dwe Pétrus wǎ lɨ́ esú lé óYúden yɨ́.

⁸ Mʉr ngwár e ngwár á séa e nkul ɨ́ Pétrus tʉ́ŋlʉ̌, ó nye tôʼ kwá oYúden nyá, nye ntémé ó dí eséǎ jɔʼ yɨ́yɛ̂h ɨ́ me lɨ́ esú é bíkúl bíswîh.

⁹ Jacques, bé e Kefâs, ndu e Yʉánɛs, bé ó b'á bu nyɨ̂n ɨ́ mîh ó, bé ó dí «medwii me sɔ́ŋ» ɨ́ Mbɛ̌r-Nzyɛ̌m. Bé á si gʉ́a lɨ́ otyeetye ó, Nzyɛ̌m á si lɛ̂ʼle me mpam nyé. Bé ntɔ̂ʼ bára e bɨ̌h e Banabâs, lɨ́ elɛ̂ʼle ó, bɨ̌h á kʉ be ó, ɨ́ mpúhlá miléme, bɨ̌h le onɔ́ɔ́. Bɨ̌h ntɔ̂ʼ di twíí ó, bɨ̌h bé ótô kwá bʉr o dí abe óYúden bá. Bɨ́ɛ, bé ótô kwá oYúden.

¹⁰ Bé á jaa lɛ́ɛ bɨ̌h ó, njɨ bɨ̌h sâʼ sâ gwár: esúʼo báántéʼenteʼe o bʉ̂r. Tó kœb ó, me á boo be e tiŋé ɨ́ léme ó, me báná sâ ó, syɛ́ɛla yaá.

Pétrus, bé e Pɔ̂l ɨ́ Antiôs

¹¹ Píe tɨ̂, ɨ́ jɔ̌ʼ Kefâs á nze kœb me ɨ́ Antiôs yɨ́, me á si lwímla e né, ebě, yé á si nyɨ̂n ɨ́ kpɛŋlɛm ó, nye á be ó e mebě.

¹² Ɨ́ metááré, bé e bʉr o bíkúl bíswîh, bé á dɨde mede ó, lɨ́ epûhla mébô gúmo gwár. Píe tɨ̂, Jacques á si lómo bʉr gʉ̂. Jɔʼ bʉ̂r o mílʉ́mlʉ́ bé baá, bé á pyâl yɨ́, Kefâs ntɔ̂ʼ dulo nyʉ̂l, akǎ de e bʉr ó Antiôs bɨ́bɛ̂h gúmo gwár. Yé á pyâl nye nó ó, ɨ́ bʉ́á nyé á jóʼo bʉr o bé á kpɛl ó, obûʼla díʼee tíʼá mpʉ́n bá.

¹³ Bʉ́ʉ́ óbûʼla bé á byɛ̂l oYúden bá, bé á be ó e miléme mimbá mímbá, ɨ́ mpʉ mé Kefâs ntémé. Damá jóʼǒ Banabâs mʉr tɨ̂, nye á si twe ɨ́ metwɨ́ɨ́ mɔ́ɔ́. Bé e boo nɔ́ɔ́ bɨ́bɛ̂h, bé á si nyɛl esâ míkóo.

¹⁴ Mpʉ mé á bee ó, bé á bé akǎ be lɨ́ etye lɨ́ otyeetye mpʉ̌ Mbɨambɨa Lɔ́ɔ dí etɨ́e mɨ́ná gá yɨ́, me nzě lwib e Kefâs, bɨ́bɛ̂h ɨ́ mediá. Me á lɛ́ɛ e né ó: «Gua mʉr dí Yúden nyá, gǒ tiʼé wâʼ ó mpʉ bʉ̂r o bíkúl bíswîh. Mpʉ yé dí nó yɨ́, gǒ kpɛ̌l étíne bʉ̂r bâʼ ó, bɨ́ɛ tíʼaa mpʉ óYúden ɨ́ yé ɛ́?

¹⁵ «Mɨná gá ó dí mimbyɛ́lá mí óYúden. Mɨná bé abe gá bʉr o bíkúl bíswîh, osyɛ̂l o mísyóm.

¹⁶ Sâ gwár, mɨná bé lɨ́ egʉ́a gá ó, mʉr, nyé abi nkâm ɨ́ míh mé Nzyɛ̌m ɨ́ lɔ̌b mbaʼlá métié. Mʉ̌r bi nkâm ó, ɨ́ lɔ̌b búʼó, lɨ́ edyêʼ koo e Yésʉs-Krîst. Mɨná bɨ́ dyɛ̂ʼwo ntémé e Yésʉs-Krîst. Búʼó gá yɨ́ná yaá, yé aduho ɨ́ mbaʼlá metié. Mʉr ákóʼó bi nkâm ɨ́ míh mé Nzyɛ̌m ɨ́ lɔ̌b mbaʼlá métié.

¹⁷ Mɨná oYúden, mɨná bɨ́ bûʼla ó, mɨná bé lɨ́ ebi gá nkam ɨ́ míh mé Nzyɛ̌m ɨ́ lɔ̌b mpúhlá gá nyɨ́ná e Krîst. Yé mû lɨ́ enyɨ̂n ó, mɨná mû gá ó mpʉ baá mɨ́ná bé á jɨjébe gá «osyɛ̂l o mísyóm» bá. Nzê nó ó dí elɛ́ɛ ó, Krîst, nye lɨ́ etô e bʉr nko mísyóm ɛ̌? Heʼé, yé abá be nó.

¹⁸ Mʉ̂r bɔ́ʼá le ebaʼle métié, nzě báʼǎ kǎ bee ó, mé e nyɔm nó, lɛ́ɛ́, mʉr waá, nye lɨ́ edwe nyé mʉr tɨ̂ʼ mebě.

¹⁹ Ɨ́ páʼ métié maá, me ó múu tɨ̂. Metié maá, mé ó b'á jʉ̂ me, ó twiʼ yâm, yé jaá di, njɨ lɨ́ esú lé éséǎ Nzyɛ̌m syɛ́ɛ́. Ɨ́ jɔʼ bé á jʉ̂ Yésʉs-Krîst lɨ́ ebomlo nyé e binzâŋ, bɨ́nɔɔ nyé ɨ́ kolôs kʉ́ yɨ́, me ntémé á si bomlɔɔ tɨ̂, bɨ̌h e nɔ́ɔ́.

²⁰ Ntʉ mé dí etiʼe ɨ́ báánâ. Yésʉs-Krîst ó dí etiʼe tʉ́ŋlʉ̌ nyʉ̂l nyǎm. Twiʼ mé dí etiʼe ɨ́ sí yɨ̂ʼ yɨ́, mě tiʼé yé ó, njɨ ebe mé dí edyɛ̂ʼwo e Mwân mé Nzyɛ̌m. Nye á si kpɛl me, nzě syɛ́ɛlǎ twiʼ yé lɨ́ esú é twiʼ yâm.

²¹ Mé apyêh mpâm mé Nzyɛ̌m. Mʉ̂r bé mbɨ̂mbɨá ɨ́ míh mé Nzyɛ̌m ɨ́ lɔ̌b mbaʼlá nyé dí ebaʼle métié wɨ́ nó, lɛ́ɛ́, Yésʉs-Krîst á kʉ dwe ó, kwahaá dwêh.»