Éfɛsɔs 4 - Kálar Nzyɛ̌m : Ejwán é Sáá

Mpúhlá gá nyɨ́ná e Krîst

¹ Nó, mɛm mʉr dí mbʉʼ mé Tî Yésʉs nyá, mě jɨʼlá e bɨ̌n ó, bɨ̌n dúʼoo mbɨambɨa kʉ̌ tyěn Nzyɛ̌m á jébe bɨ̌n ó, bɨ̌n dúʼoo wɨ́.

² Jɔrɨɨ gá menyʉ́l mɨ́n páʼ nyɨ́n. Diʼee gá bʉr o dí ɨ́ talǎ njwɨr bá, le bʉr o bíhwó. Júdúhwáá gá páʼ nyɨ́n ɨ́ lɔ̌b kpɛ̌l bɨ́n dí e yé yɨ́.

³ Sísǐm mé Nzyɛ̌m tyɛ́bɨɨ bɨ̌n ɨ́ miléme, ó bɨ̌n díʼee e mepyɛbla páʼ nyɨ́n. Mépyɛbla maá, mé ódi bɨ́n simá ɨ́ miléme nó, sɔ́má gá yɨ́ná, yé ójaá di ó, njɨ gwár. Gbáʼ gá nkul, ó bɨ̌n díʼee lémé ngwár nó.

⁴ Nyʉ̂l mé Krîst, nye ó mpwár. Sísǐm mé Nzyɛ̌m, nye ó ngwár. Mpûʼla mpwár ó dí bɨ̌n ɨ́ miléme, táare ɨ́ jɔ̌ʼ Nzyɛ̌m á jébe bɨ̌n yɨ́.

⁵ Njwɨ́ɨ gá wɨ́ná, nye ó ngwár. Mɨná kam gá ó, búʼó gwár. Mɨná duŋɔɔ gá ó, ndubó ngwár.

⁶ Waá dí Nzyɛ̌m bʉ̂r bɨ́bɛ̂h, dí ntémé Sɔ́ŋ bʉr bɨ́bɛ̂h nyá, nyé ó njɨ ngwár. Nye lɨ́ ejwɨ́ɨ̌ sá yɨ́yɛ̂h. Nye ntémé ó dí eséa, cɨɨ e nzɨ̌ sá yɨ́yɛ̂h. Nye ɨ́ sá yɨ́yɛ̂h.

⁷ Mɨná gá óbɛ̂h, bé á be ó sí bi míndwéá mimbi mimbi lɨ́ edû mpʉ̌ Krîst nyɨɛ á ntɨh mɨná gá myǎ yɨ́.

⁸ Sá tɨ̂ʼ ó yé dí cɛmá ó: Jɔʼ nyé á bɨ́nɔɔ ɨ́ jʉ́o kʉ́ yɨ́, nye á si ntaa ontɨ̂m le obɨn bé. Nye nzě tô e bé lɨ́ okómó. Nye ntɔ̂ʼ kab bʉ̂r ó sí mindwéá.

⁹ (Ekǎn e dí ó: Nye á si bɨ́nɔɔ ɨ́ jʉ́o kʉ́ lɨ́, lé lɛ́ɛ́ yé? Nó yé ó, nye á si sulo, nî ɨ́ sí yɨ̂, bánǎ tó kpâhla ɨ́ sí yɨ̂ʼ tʉ́ŋlʉ̌.

¹⁰ Mʉr á sulo ɨ́ sí yɨ̂ʼ nyá, nye ntémé ó b'á bére, laǎ jʉ́o, le ejwoo le baántɛ́n. Táare ɨ́ tyé yaá, nzě kumo ɨ́ gúmó yɨ́yɛ̂h, nye ó ngá jwɨ́ɨ̌ sá yɨ́yɛ̂h.)

¹¹ Nye á be ɨ́ dwe bʉ̂r mindwéá mimbi mimbi. Nye nzě sâ ó, bâʼ bʉ̂r, bé díʼee bʉr o mílʉ́mlʉ́ mé Yésʉs; bâʼ bɨ́ɛ, ogwíha o mílɔ̌b; bʉ́ʉ́ bɨ́ɛ, otúna ó Mbɨambɨa Lɔ́ɔ; bʉ́ʉ́ bʉ̂r ntémé, otyɛ̂b bé ésôʼ ó Mbɛ̌r-Nzyɛ̌m; bʉ́ʉ́, olɛ̂ʼla o mílɔ̌b mé Nzyɛ̌m.

¹² Nyě sá nó ó, lɨ́ esú é bʉ̂r o mé Nzyɛ̌m, ó bé díʼee bʉr o dí e nkul elóŋlǒ syɛ́ɛ́ yé bá. Nyě lɛ́ʼlé bé esâ nó ó, lɨ́ esú lé édwě Mbɛ̌r-Nzyɛ̌m (dí nyʉ̂l mé Krîst wɨ́) megwɨ́e.

¹³ Ɨ́ mbi waá ó, mɨ́ná gá óbɛ̂h ngá be gá ɨ́ mpúhlá, cɨɨ ɨ́ nzɨ̌ búʼó gwár yɨ́. Mɨná bé ógʉ́a gá Mwân mé Nzyɛ̌m ɨ́ pébébé. Mɨná bé ópʉʼa gá lɨ́ ontwǒm, tô gá lɨ́ obwam. Mɨná bé ócéne gá ɨ́ mipáʼ mímyɛ̂h, lɨ́ esûʼlǎ nʉǎ tyé mé Krîst mʉr tɨ̂.

¹⁴ Jɔʼ yaá ó mɨ́ná ngá pʉʼa gá ɨ́ tyé bwá ó ntwǒm ɨ́ nkǒ páʼ búʼó yɨ́. Milɛ́ʼlá míswîh, myé ákǎ ntyeŋ mɨ́ná gâ, nkʉ̂ dímle mɨ́ná gá ɨ́ nzɨ̌ mikóo. Baányâ-mikóo baá, bé gwɨ́m ó, bé mɛ́rɨɨ mɨná gá ɨ́ mpila mépɨʼ yɔ́ɔ́, le ntémé ó, mɨná nʉ́aa gá bidyɛʼ byɔ́ɔ́.

¹⁵ Tó kœb ó, mɨ́ná lɛ́ɛ́ gá otyeetye tʉ́ŋlʉ̌ kpɛ̌l nó, mɨná bé ógwɨ́e le ebwaʼ gâ, tótôʼ, tó pyâl ɨ́ jɔʼ mɨ́ná ngá di gá mbɨmá ɨ́ Krîst tʉ́ŋlʉ̌, mʉr pá dǐ lʉ̂ gá wɨ́ná nyá.

¹⁶ Nye ó mʉr dí epûhla mɨ́ná gá óbɛ̂h, ó mɨná díʼee gá nyʉ̂l mpwár nyá. Bitíl bí nyʉ̂l byaá, nyě dirá byé ɨ́ mebɨ̌l ó e misihé. Misihé myaá ó dí entɛŋ bítíl bí nyʉ̂l bisâ bi dí byé e nyɔm bí. Sihé wɨ́wɛ̂h, wé ɨ́ jala le esúʼo nyʉ̂l ó, lɨ́ edû mpʉ̌ Nzyɛ̌m á komlo wɨ́haá yɨ́. Nkul nyé ó dí esâ ó, nyʉ̂l nyaá gwɨ́aa mbɨ̂mbɨá. Mpúhlá obûʼla, nye lɨ́ etô le egwɨ́e dóló ɨ́ jɔʼ bʉ̂r o dí tɨ̂ʼ bá dí ekpɛla yɨ́.

Twiʼ dwân ɨ́ Krîst tʉ́ŋlʉ̌

¹⁷ Nó sá mé múo nzě lɛ́ɛ bɨ́n, le eboʼlo ɨ́ díé mé Tî Yésʉs yɨ̂, yé ó: mʉr adû gá kʉ̌ tyen óhááden dí edû wɨ́. Bé jaá sâ nó ó, njɨ ebě, ocwóó wɔ́ɔ́, wé ó dwêh.

¹⁸ Sá écwólwo lɔ́ɔ́, lé akǎ siŋa. Bé mû ó e ncɛrá e twiʼ mé Nzyɛ̌m, tɨ̂ lɨ́ egʉʼla bé dí e lé lɨ́, le elele e míléme lɔ́ɔ́.

¹⁹ Ɨ́ sɔ́ɔlʉ pɨ̂ʼ wɔ́ɔ́, bɨ́ swâhle mímbi mébébé mɨ́mɛ̂h lɨ́ esâ. Bé lɨ́ esâ bímolá nzam le ekomo. Bé sá ntémé ó, bisyɛ́ɛla bi dí edulo mpîr ɨ́ nyʉ̂l bí, abe e njɨ.

²⁰ Ntʉ̌ mbi waá bɨ́n á lɛ̂ʼlɔɔ ɨ́ jɔʼ bɨ́n á jɨ̂ʼ etiʼe ɨ́ Krîst yɨ́.

²¹ Bɨ̌n bé á si gwa kʉ jóʼo sá yɨ́yɛ̂h dí edumo e né yɨ́. Bɨ̌n bé á si lɛ̂ʼlɔɔ ɨ́ díé lé tʉ́ŋlʉ̌. Bé á lɛ̂ʼle bɨ̌n ó, bɨ̌n dúʼoo otyeetye dí ɨ́ milɔ̌b mé Yésʉs wɨ́.

²² Bɨ̌n e túmó koo e kʉ̌ tyen myâ wɨ́n, myǎh njʉ̌m nyʉ̂l bɨ́n á nyɛɛ be e né nyɨ́. Bigwɨ́má bí njʉ̌m nyʉ̂l nyaá, byé lɨ́ edímle bʉ̂r ɨ́ nzɨ̌ mikóo myɔ́ɔ́, tyen bé lɨ́ eswie.

²³ Yé jala ó, bɨ̌n bíʼee edwán é pɨ̂ʼ, ndu e sísǐm dwân.

²⁴ Bé á lɛ̂ʼle bɨ̌n ntémé ó, eswam nyʉ̂l dwân Nzyɛ̌m á komlo bɨ̌n nyɨ́. Bɨ̌n bé osûʼla bʉ̂r odwân ɨ́ twǐʼ Nzyɛ̌m mʉr tɨ̂ʼ á komlo lɨ́ esú lɨ́n yɨ́. Bɨ̌n bé otyɛ̂b le otîtyěl ompâ ɨ́ míh mé Nzyɛ̌m le edi bʉ̂r bé lɨ́ otyeetye.

²⁵ Nó ó, mʉr, nyé ajala le ekǎ lɛ́ɛ mɨ́ɔɔ́ wé mʉr bibɛr. Nye lɛ́yɨɨ nye sɔ̂ʼ njɨ otyeetye, ebě, mɨná gá bé mû ó bitíl bí nyʉ̂l mpwár.

²⁶ “Lémé lónó bɨ́n ɨ́ nkpaa nó, sá asâ gá yɨ́ɛ syóm.» Mʉ̂r kóbló bɨ́n ebúʼ nó, sá abîr gá ó, ebúʼ laá díʼee bɨ̌n ɨ́ miléme, tó pyâl ɨ́ medwíne mé pum.

²⁷ Mʉ̌r sá adwe sɔ́ŋ meleme gúmó étyêl ébo.

²⁸ Mʉr á bɨbe ndíblʉ̌ nyá, nye gwáʼaa díbe. Nye séaa syɛ́ɛ́ dí e nyɔm yɨ́, e mebó mé, ɨ́ mbi dí ó, nye díʼee e sá nyé ósúʼo báántéʼenteʼe o bʉ̂r e yé yɨ́.

²⁹ Mʉr alwib gá ekǎn e dí e bibol tɨ̂ʼ lɨ́. Nye lwíbɨɨ njɨ sá ngá be e nyɔm lɨ́ esú lé égbâ bʉ́ʉ́ bʉ̂r pîm ɨ́ búʼó yɨ́. Nye jáa lwǐb njɨ sá dí ɨ́ mbɨa yɨ́, lɨ́ esú ó, Nzyɛ̌m sʉ́ʼoo bʉr o dí ejóʼo nyé bá metyɛʼ me mpóm.

³⁰ Mʉr agbâ gá Sísǐm mé Nzyɛ̌m ebúʼ ɨ́ léme. Sísǐm waá, wé ó mpʉ̌ jwɨʼ nyé á gbâ ɨ́ bɨ̌n yɨ́. Nzyɛ̌m á gbâ bɨ̌n jwɨʼ yaá ó, bɨ̌n nkʉ̂ gʉ́a tɨ̂ʼ ó, nye ótáǎ góo, le edwih bɨ́n ɨ́ mpila ébébe, pɛʼ bɨ́n ɨ́ fá.

³¹ Akǎ sâ gá otié. Pɛʼɛɛ gá ebúʼ, le nkpaa ɨ́ miléme. Syɛ́hláá gá megô ndu e melwɨ́ɨ. Pɛʼɛɛ gá ebébe é léme ɨ́ milémé mín.

³² Lɨlɛ́ʼláá gá mpam páʼ nyɨ́n, bɨ̌n óbɛ̂h. Jɨ́ʼɨ́ɨ́ gá bʉr bɨ́bɛ̂h ekpaa nkóó. Pɛʼɛɛ gá bibaa bí ébébe bɨ́n á pa niʼla bʉ́ʉ́ bʉ̂r bí, mpʉ̌ Nzyɛ̌m á pɛʼ byaá nyé á niʼe bɨ̌n ɨ́ nzɨ̌ mé Krîst bí yɨ́.