2 Korɛnt 2 - Kálar Nzyɛ̌m : Ejwán é Sáá

¹ Nó ó mé á tíʼe ɨ́ lémé wâm ó, me ákǎ báʼǎ tô kwá nyɨ́n. Me ámû jaá báʼǎ tó kwɨ́ɨ mébúʼ mɨ́n.

² Ebě, mé sí tó kwɨ́ɨ mébúʼ mɨ́n nó, nzé ngá kǎ báʼǎ dwe mé bisʉhʉʉ? Mʉr á gwa sâ ó, me sóhaa nyá, nye ó njɨ waá mé á kwɨ́ɨ ebúʼ lé nyá!

³ Me á cɛma mekaná maá ó, mé ónze kwá nyɨ́n nó, me l'akǎ kpaa ébúʼ ɨ́ lɔ̌b bísyɛ́ɛla bín, bɨ̌n bʉr o jálá le egbâ mé bisʉhʉʉ ɨ́ léme bá. Me á bě e búʼó ɨ́ páʼ wɨ́n, bɨ̌n óbɛ̂h ó, ɨ́ jɔʼ bɨ́n óbe, sí láa yɨ́, mɨná bé obi gá bisʉhʉʉ jwɨʼ gwár.

⁴ Yé ó nó! Me á cɛma bɨ̌n ó, lémé wâm, wé osí lóno lɨ́ ebúʼ, nyʉ̂l nyǎm, nyé osí buú tyɛʼ, e myɛ́ɛlé ɨ́ mîh. Me á bé acɛma bɨ́n mekaná maá lɨ́ esú ó, milémé mín lónaa lɨ́ ebúʼ. Me á jaa cɛma ó, njɨ lɨ́ elɛ̂ʼle bɨ́n kpɛ̌l ápurapúra mé dí e yé lɨ́ esú lɨ́n yɨ́.

Epɛʼ e bíbaa bí ébébe

⁵ Mʉr á to sâ ó, bɨ̌n jóʼaa ebúʼ nyá, á bé asâ mé syɛ́ɛla yaá. Nye á sâ ó, bɨ̌n bɨɛ jóʼaa ebúʼ, bɨ̌n bɨ́bɛ̂h. Nkʉ̂ ntɔ̂ʼ, lɨ́ ebene éběʼ lɔ́ɔ, nye á sâ ó, bʉ́ʉ́ bʉ̂r ɨ́ sɔ́má yɨ́n jóʼaa ebúʼ.

⁶ Bintɨ́ʼá bʉ̂r ɨ́ buo buo ɨ́ sɔ́má yɨ́n, bé á dwe mʉr waá bí, byé á si jala e bébebébe syɛ́ɛla nyé á sâ yɨ́.

⁷ Nó ó, ɨ́ báánâ, yé mû ó jɔʼ dí ó, bɨ̌n pɛ́ʼɛɛ bibaa bí ébébe bɨ́n á láa nye bí yɨ́. Yé ó jɔʼ égbâ nyé pîm ɨ́ búʼó, ebě, nyʉ̂l, nye ámû jaá tyɛʼ nyê.

⁸ Lɔ̌b waá ó mé dí ejɨʼla e bɨ̌n ó, bɨ̌n báʼa lɛ̂ʼle ó, bɨ̌n dína ó lɨ́ ekpɛl nyé yɨ́.

⁹ Ɨ́ lɔ̌b waá ó mé á cɛma bɨ̌n mekaná maá yɨ́. Yé á be ó, me bóblaa bɨ̌n. Me á be lɨ́ ekpɛl égʉ́a ó, nkʉ̂ bɨ̌n dína ó lɨ́ esâ mé mejóʼo ɨ́ milɔ̌b mímyɛ̂h.

¹⁰ Mʉr nyɨnyɛ̂h bɨ́n óbe, sí pɛʼ bíbaa bí ébébe byé nyá, bɨ̌n e gʉ́á ó, mɛm ntémé, mɨ́ pɛʼ nyé byaá mé á niʼe nye bí. Yé bé me á si niʼe nyʉ́ʉ́ mʉ̂r baa ébébe, me nzě pɛʼ nyé yǎ nó, lɛ́ɛ́, mě pɛ̌ʼ nyé yǎ ó, ɨ́ nyɔm wɨ́n, ɨ́ mpǒm mé Krîst.

¹¹ Mɨná sá gá nó ó, Sátan nkʉ̂ be, antaa mɨ́ná gâ, ebě, mɨná bé ajéʼe gá mepɨʼ mé.

Bá mé Pɔ̂l lɨ́ esú é bʉ̂r ó Troâs

¹² Nó ɨ́ jɔʼ mé á to le etúnǒ Mbɨambɨa Lɔ́ɔ́ mé Krîst, tó kumǒ Troâs yɨ́, me á to kœb gʉ̂ʼ ó, Tî Yésʉs, nyé osí dwe mé nzɨ̌ mběʼ, ó me túnaa wé ɨ́ hwɨ́m.

¹³ Damá jóʼǒ mpʉ mé á be e nkul dí ó, me lɛ́yɨɨ lɔ́ɔ́ wé waá nó yɨ́, lémé wâm, wé á bé abe mé ɨ́ mo ɨ́ puuu, ebě, me á bé akœb mɨ́ɔɔ́ wǎm Títos tɨ̂ʼ ɨ́ Troâs. Sá tɨ̂ʼ ó mé á ka nzoo jána e bé, me ntɔ̂ʼ duhǒ Troâs, tô sí Masedónia yɨ́.

¹⁴ Mɨná dwêʼ gá Nzyɛ̌m nzyǒo. Nye ó dí esâ ó, mɨná gá e Krîst díʼee binkɔ́ɔ́ bi dí entaa ɨ́ jɔʼ yɨ́yɛ̂h bí. Nye ntémé ó dí esâ ó, mɨná dwêʼ gá bʉr milɛ́ʼlá mi dí esâ ó, bé gʉ́ŋaa nye mí. Nyě sá mɨ́ná gá nó ó, ɨ́ gúmó yɨ́yɛ̂h. Mɨná gá mû ó mpʉ̌ lɔbína dí epyêl mbɨambɨa numó yɨ́.

^15-16 Ebě, mɨná gá ó dí lɔbínǎ Krîst dí entɨh e mbɨambɨa numó yɨ́. Bʉ̂r o dí ebǐ twiʼ bá, bé jʉ́ʼrá mɨ́ná gá nó, njóʼá wɔ́ɔ́, wé ó: «Yé ó numó twiʼ.» Bʉr baá, bé otô dóló le etiʼe nó. Baá dí edîm bá bɨɛ, ɨ́ jɔʼ bé jʉ́ʼrá mɨ́ná gá yɨ́, bé ó: «Yé ó numó éswie.» Bɨ́haá bʉ̂r, bé otô dóló le edwě ntuʼ. Mɛm, mé abě tyé mʉ̂r dí ó, me séaa syɛ́ɛ́ yɨ̂. Nzé nyɨɛ dí ejala e yê?

¹⁷ Nó ó, bɨ̌h bɨɛ, bé abě mpʉ óbɛ́ma o mílɔ̌b mé Nzyɛ̌m. Nzyɛ̌m á lómo bɨ̌h ó e lwǐb yé. Lwǐb yaá, yé abě mbáʼrá e mikóo. Bɨ̌h bɨɛ, bé ó baá Nzyɛ̌m á ntɨh bá. Bɨ̌h lwib mílɔ̌b myé ó, ɨ́ mpǒm mé Nzyɛ̌m, ɨ́ mpúhlá nyɨ́h e Krîst.