1 Yʉanes 4 - Kálar Nzyɛ̌m : Ejwán é Sáá

Krîst, bé e Mʉr Dɔm wé

¹ Bʉr ó kpɛ̌l bâm, ayɨ́ bûʼla gá kám e kám mʉr nyɨnyɛ̂h bɨ́n jóʼó lɨ́ edwe bʉ̂r milɛ́ʼlá nyá. Tááráá ébóblo gá bʉr baá, bɨ̌n nkʉ̂ gʉ́a, nkʉ̂ misísǐm bé dí e myé mí, myé lɨ́ eduho kwá mé Nzyɛ̌m, ebě, ogwíha o mílɔ̌b o bíbɛr, bé mû ó sí buo ɨ́ sí yɨ́yɛ̂h.

² Bɨ̌n bé ódwidweʼě Sísǐm mé Nzyɛ̌m ó, mbi wɨ̂: waá nyɨnyɛ̂h dí elɛ́ɛ ó: «Yésʉs-Krîst á nze ɨ́ sí yɨ̂ʼ ó e nyʉ̂l mʉr mpâ» nyá duho ó kwá mé Nzyɛ̌m.

³ Tó kœb ó, waá nyɨnyɛ̂h dí akpɛl ékam ó, Yésʉs á nze ɨ́ sí yɨ̂ʼ ó e nyʉ̂l mʉr mpâ nyá, nyé abe e Sísǐm dí eduho kwá mé Nzyɛ̌m wɨ́. Sísǐm nyé dí e wé wɨ́, wé ó waá Mʉ̂r Dɔm mé Krîst. Bɨ̌n bé á nyɛɛ jóʼo lɔ́ɔ ó, nye ɨ́ jala le enze. Nó ɨ́ báánâ, nye mû ó sí pyâl ɨ́ sí yɨ̂.

⁴ Bɨ̌n bɨɛ bwán bâm, bɨ̌n dumo ó e Nzyɛ̌m. Bɨ̌n bɨ́ ntaa óntɨ̂m le obɨn mé Krîst baá, ebě, Sísǐm bɨ́n dí e wé wɨ́, wé ɨ́ lele nkûl, laa waá dí ɨ́ bʉr ó sí yɨ̂ʼ wɨ́.

⁵ Bɨ́ɛ, bé e twiʼ ó, yaá dí eduhǒ sí yɨ̂ʼ yɨ́. Sá tɨ̂ʼ ó bé dí elwib bísá bí sí yɨ̂, bʉr ó sí yɨ̂ʼ ntémé lɨ́ ekʉ́ jôʼlo bé yɨ́.

⁶ Nó ó, mɨná bɨɛ dumo gá ó e Nzyɛ̌m. Mʉr dí egʉ́ǎ Nzyɛ̌m nyá, nye lɨ́ esâ mɨ́ná gá mejóʼo. Mʉr dí aduho kwá mé Nzyɛ̌m nyá, nyé asâ mɨ́ná gá mejóʼo. Nó ó mɨ́ná dí e nkul edweʼe gá mbɔ́ʼ páʼ Sísǐm Ótyeetye, ndu e sísǐm bíbɛr yɨ́.

Nzyɛ̌m, nye ó kpɛ̌l

⁷ Bʉr ó kpɛ̌l bâm, mɨná kpɛ́laa gá páʼ gá nyɨ́ná, ebě, kpɛ̌l, yé lɨ́ eduho kwá mé Nzyɛ̌m. Mʉr nyɨnyɛ̂h dí e kpɛ̌l nyá, nye ó mbyɛ́lá ɨ́ nkul mé Nzyɛ̌m. Nye ntémé, nyɨ́ gʉ́ǎ Nzyɛ̌m.

⁸ Mʉr dí akpɛl nyá, nyé apǎ gʉ́ǎ Nzyɛ̌m, ebě, Nzyɛ̌m, nye ó kpɛ̌l.

⁹ Mpʉ̌ Nzyɛ̌m á lɛ̂ʼle kpɛ̌l yé ɨ́ sɔ́má gá yɨ́ná yɨ́ ó yɨ̂: nye á si ntɨh mɨná gá Etíʼé é Mwân lé ɨ́ sí yɨ̂, ó mɨná nkʉ̂ bi gá twiʼ ɨ́ nzɨ̌ nyé.

¹⁰ Kpɛ̌l mpâ ó yɨ̂: yé abe yaá mɨ́ná dí elɛ̂ʼle gá Nzyɛ̌m yɨ́. Yé ó yaá nyɨ́ɛ á lɛ̂ʼle mɨná gá yɨ́, ebě, nye á si ntɨh mɨná gá Mwân wé. Nye ó mʉr á búra le syóm wɨ́ná nyá. Nye ntémé ó b'á leʼe nkpaa mé Nzyɛ̌m.

¹¹ Bʉr ó kpɛ̌l bâm, yé bé Nzyɛ̌m á be ɨ́ bánǎ lɛ̂ʼle mɨ́ná gá kpɛ̌l yaá nó, lɛ́ɛ́, mɨná bé ɨ́ jala le ekpɛla gá páʼ gá nyɨ́ná ntémé.

¹² Abe e mʉr dí ɨ́ pǎ beě Nzyɛ̌m. Mɨ́ná kpɛ́lá gá páʼ gá nyɨ́ná nó, Nzyɛ̌m ókʉ́ tíʼe ɨ́ mɨná gâ. Milémé gá míná, myé olóno ɨ́ kpɛ̌l yé.

¹³ Mɨná bé lɨ́ egʉ́a gá ó, mɨná tíʼe gá ó, ɨ́ mpúhlá e Nzyɛ̌m, nyɨɛ ntémé ɨ́ mpúhlá e mɨná gá ó, mbi wɨ̂: nye á si ntɨh mɨná gá Sísǐm wé.

¹⁴ Mɨná bɨ́ bee gá sá mɨ́ná tʉ́tó gá le eboʼlo yɨ́. Mboʼlá gá wɨ́ná, wé ó wɨ̂: Dâ Nzyɛ̌m á ntɨh Mwân wé ó, nye díʼee Tiʼbʉr ɨ́ sí yɨ̂ʼ yɨ́yɛ̂h.

¹⁵ Mʉ̂r lɛ́ɛ́ ó, Yésʉs, nye ó Mwân mé Nzyɛ̌m nó, Nzyɛ̌m ótíʼe ɨ́ mpúhlá e nye; nye ntémé ódi ɨ́ mpúhlá e Nzyɛ̌m.

¹⁶ Nó ó mɨ́ná bɨ́ gʉ́a gá kpɛ̌l Nzyɛ̌m dí elɛ̂ʼle mɨ́ná gá yɨ́. Mɨná bé lɨ́ ekʉ́ bûʼla gá ó, nye lɨ́ ekpɛl mɨ́ná gâ. Nzyɛ̌m, nye ó kpɛ̌l. Mʉr dí etíʼe e kpɛ̌l nyá, nyě dǐ ó, ɨ́ mpúhlá e Nzyɛ̌m; Nzyɛ̌m ntémé ɨ́ mpúhlá e né.

¹⁷ Milémé gá míná, myé ólóno ɨ́ kpɛ̌l yé ɨ́ nzɨ̌ nyaá. Mɨná bé ónʉa gá pîm ɨ́ búʼó ɨ́ móhó étíʼ é mílɔ̌b ntémé, ebě, kʉ̌ tyen mɨ́ná dí edû gá ɨ́ sí yɨ̂ʼ wɨ́, wé nwɨɨla ó e waá wé nye mʉr tɨ̂.

¹⁸ Bʉ́á, bé e kpɛ̌l, byé abe e nkul epûhla. Mílémé gá míná, myé ólóno ɨ́ kpɛ̌l yé nó, kpɛ̌l yaá, yé ópɛʼ mɨ́ná gá bʉ́á ɨ́ miléme. Ányâ-bʉ́á, nyě bʉ́bónó ó, njɨ bintɨ́ʼá. Lémé wé, wé apǎ lóno ɨ́ kpɛ̌l mpâ.

¹⁹ Nó ó, mɨná gá bɨɛ mû ó lɨ́ ekpɛla gá ó, ebě, nye á si nyɛɛ kpɛl mɨná gâ.

²⁰ Mʉ̂r lɛ́ɛ́ ó: «Mě kpɛl ó, Nzyɛ̌m,» nyɨɛ yɨ́ɛ lɨ́ enwim mɨ́ɔɔ́ wé nó, nye ó mʉr bibɛr, ebě, mʉr dí apǎ kpɛl mɨ́ɔɔ́ wé, mʉr nyé dí ebee nyá, nyé abe e nkul ekpɛ̌l Nzyɛ̌m, mʉr nyé dí abee nyá.

²¹ Le ntémé ó, Yésʉs-Krîst á tyêl mɨná gá etié ó, mʉr nyɨnyɛ̂h dí ekpɛ̌l Nzyɛ̌m nyá, nye kpɛ́lɨɨ ntémé mɨ́ɔɔ́ wé.