1 Timotɛ 5 - Kálar Nzyɛ̌m : Ejwán é Sáá

Kʉ̌ tyen óbûʼla

¹ Antuhlo tɔ́má mʉr ɨ́ lɔ̌b syɛ́ɛla ébébe yé. Go ɨ́ jala le etɨ́e nyé yɨ́ɛ ó mpʉ sʉ́ŋ. Tɨ́áá duo yô, biloʼo, mpʉ bɨ́ɔɔ́ bô.

² Tɨ́e ntémé otɔ́má bʉ́bá mpʉ ónyʉ̌ŋ. Tɨ́e méséhé mé bʉ́bá ntémé mpʉ ókɛ́l bô, lɨ́ edwe nyʉ̂l nyǒ medile ɨ́ míh mé Nzyɛ̌m.

³ Jwááwáá míkúhó mí bʉ́bá mi dí myaá mimpâ mí.

⁴ Gúú kúho, bé e bwân, nkʉ̂ onta nó, bwán bé baá nyɛ́ɛ jɨ̂ʼ éséǎ Nzyɛ̌m syɛ́ɛ́ ɨ́ mbɛ̌r bʉ̂r wɔ́ɔ́ tʉ́ŋlʉ̌. Bé nkʉ̂ jána ósɔ́ŋ le onyɔ̌ŋ bɔ́ɔ́ mpʉ́lá bisyɛ́ɛla bɨ́ɛ, bé á pa sâ bé bí, ebě, syɛ́ɛla yaá, yé ɨ́ mbɨa ɨ́ míh mé Nzyɛ̌m.

⁵ Nó ó, waá dí kúho tyeetye ɨ́ ntɛ̂ʼ wé omér wɨ́, wé lɨ́ ekʉ́ sâ sɨ́n lɨ́ ejɨʼla e Nzyɛ̌m móhó e pum, ó nye súʼaa wê. Nzyɛ̌m nye omér ó dí egbâ wé mpûʼla ɨ́ léme.

⁶ Kúho dí etíʼe ɨ́ gwɨ́má bísâ wɨ́, wɨ́haá, wɨ́ boó dwe yé kɔ́m, damá be ó, wé dína ó lɨ́ ekubla.

⁷ Lɛ́yɨ́ɨ́ myé ntémé milɔ̌b mîʼ mímyɛ̂h. Myé díʼee bʉr o dí, abe e nkul edweŋɔɔ mébě bá.

⁸ Nyʉ́ʉ́ mʉ̂r bé abaʼle mímbyɛ́l myé, kʉ́ buú be, baá ó mbɛ̌r bʉ̂r wé nɛ́ɛ: nye mʉr tɨ̂, nyɨ́ beně búʼó. Nye ɨ́ bébe, laa hááden.

⁹ Go ócɛmǎ kúhó mʉ́má ɨ́ mekaná míé míkúho ó, waá mû e mimbû mekám mésaman wɨ́. Wé díʼee ntémé waá á be e njʉ̂m ngwár wɨ́.

¹⁰ Go ócɛmǎ kúho díe ó, waá wé óbe, wé mû sí gúmo ɨ́ páʼ bísyɛ́ɛla bimpâ wɨ́. Wé díʼee mbi mʉ́má wɨ̂: waá á gwɨ̂l bwân, nʉa ójwóo mbɨ̂mbɨá, waá á jwɨɨ bʉr o mé Nzyɛ̌m mekʉ̌, kɛm bʉ̂r o dí esia e mitúú bá, gbâ nkûl lɨ́ esâ bísyɛ́ɛla bimpâ mimbi mímyɛ̂h wɨ́.

¹¹ Yé ókǎ be míkúho mi dína meséhe mí nó, acɛma míé mɔ́ɔ́ ɨ́ mekaná míkúho maá, ebě, bé gwɨ́m étô ɨ́ mebâ nó, bé ótúmǒ koo e Krîst, ntɔ̂ʼ tô ɨ́ mʉ́ʉ́ mébâ meswîh.

¹² Bé lɨ́ edulo mébě ɨ́ menyʉ́l mɔ́ɔ́, ebě, bɨ́ syěl tí mínkâl bé á pa ntaa mí.

¹³ Nó ntémé, bé ámû jaá jɨ̂ʼ édi lɨ́ ontwii. Bé ámû jaá tô le etô mímbɛ̌r e mímbɛ̌r myɛ̂h, le esâ mpǔʼ, le elwib bílwǐb bi dí asiŋa bí.

¹⁴ Sá tɨ̂ʼ ó mé dí ekpɛl ó, mikúhó mí bʉ́bá dína mempɨ̂h mí, myé tôʼ ɨ́ mebâ yɨ́. Myé nkʉ̂ byâ bwân, le ebaʼle mímbɛ̌r myɔ́ɔ́. Myé ayɨ́ dwe bʉ̂r o dí elwímla e mɨná gá bá jɔʼ dí ó, bé swéʼee díé é sɔ́má gá yɨ́ná yɨ́.

¹⁵ Ebě, damá jóʼo ɨ́ báánâ, myúú, mí duho ɨ́ nzɨ̌ mpâ, dyɛ́lɔɔ ɨ́ nzɨ̌ swîh, lɨ́ etó dû Sátan.

¹⁶ Mbûʼla mʉmá óbe e mbyɛ̂l, kúho ɨ́ mbɛ̌r bʉ̂r wé nó, nye súʼaa kúho waá. Mbûʼla mʉmá sá antúŋlǒ Mbɛ̌r-Nzyɛ̌m e mbeʼ waá, ebě, Mbɛ̌r-Nzyɛ̌m jaá susúʼo míkúho ó, njɨ myaá mi dí ɨ́ ntɛ̂ʼ mí.

¹⁷ Otyɛ̂b bé ésôʼ dí ejwɨ́ɨ̌ Mbɛ̌r-Nzyɛ̌m mbɨ̂mbɨá bá, bé ɨ́ jala le ebi myɛ́na mebá. Baá dí etúno mílɔ̌b mé Nzyɛ̌m, le edwe bʉ̂r milɛ́ʼlá bá ó ngá bi mé, sahle.

¹⁸ Ebě, yê cɛmá ɨ́ Mekaná mé Nzyɛ̌m ó: Bɨ̌n sá apɨ̌r ntœœ num ó, yé ayɨ́ de ɨ́ jɔʼ yé dí eséǎ syɛ́ɛ́ blê yɨ́. Ntémé: Lóbila jala le edweŋɔɔ ó myɛ́na mé.

¹⁹ Akam ó, mʉr ngwár e ngwár dwêʼ tyɛ̂b esôʼ Mbɛ̌r-Nzyɛ̌m mebě. Kamaǎ njɨ ɨ́ jɔʼ óboʼlo dí obá, nkʉ̂ olɛ̂l yɨ́.

²⁰ Baá dí etô le esâ syóm dóló bá, cɨ́lɨ́ɨ́ bé ɨ́ kpɛŋlɛm. Jɔʼ yaá ó bʉ́ʉ́ bʉ̂r ó sɔ́má yaá ngá jóʼo bʉ́á yɨ́.

²¹ Mě lɛ́ɛ́ gó ɨ́ míh mé Nzyɛ̌m, le Yésʉs-Krîst, bé e mitwárá bééngeles ó, go bâʼlaa metwɨ́ɨ́ mâ. Gǒ sá asâ ménkɔ̌m ɨ́ jɔʼ gó tíʼé lɔ̌b yɨ́. Akʉ́a nyʉ́ʉ́ mʉ̂r ɨ́ nkɔb.

²² Alɨ̌ kɛl mʉ̂r mebô, lɨ́ etyêl nyé ɨ́ dǐ ɨ́ Mbɛ̌r-Nzyɛ̌m. Nó ntémé, anʉa ntœ́b ɨ́ bisyɛ́ɛla bí ébébe byé onkán. Ɨ́ páʼ kʉ̌ tyen gó dí edû wɨ́, wé díʼee abe e mebě.

²³ Akǎ dɨdě njɨ medíbé mé omér. Déʼ bá ményoʼ, lɨ́ esú é mo gô, le ɨ́ lɔ̌b métyɛʼ me nyʉ̂l me dí esâ gó ɨ́ jɔʼ yɨ́yɛ̂h má.

²⁴ Misyóm mí bʉ́ʉ́ bʉ̂r, sɨ́sá ó nyɨnyɨ̂n ɨ́ ponó, bʉr baá dína apǎ dweŋɔɔ mébě. Bʉ́ʉ́ bʉ̂r bɨ́ɛ, misyóm myɔ́ɔ́, myé lɨ́ ekǎ nyɨ́n ɨ́ kpɛŋlɛm ó, njɨ epíhe.

²⁵ Jwɨʼ gwár e gwár yaá ntémé ó bísyɛ́ɛla bimpâ dí enyɨ̂n ɨ́ sʉ́lʉ́lʉ́ yɨ́. Byé damá di anyɨ̂n ɨ́ sʉ́lʉ́lʉ́, byé abe e nkul eswab.