1 Korɛnt 15 - Kálar Nzyɛ̌m : Ejwán é Sáá

Pahá sóo mé Yésʉs

¹ Bɨ́ɔɔ́ bâm! Okɛ́l bâm! Me múo nzě jɨm bín bitɔŋlá ɨ́ Mbɨambɨa Lɔ́ɔ́ mé á túno bɨ̌n, waá bɨ́n á jóʼo wɨ́. Wé ntémé, wé ó waá dí bɨ̌n simá ɨ́ miléme wɨ́.

² Bɨ́n óbaʼlě lɔ́ɔ waá mbɨ̂mbɨá mpʉ mé á túno bɨ̌n wǎ yɨ́ nó, wé ótiʼ bɨ́n. Yé bé abe nó wá, lɛ́ɛ́, búʼó yɨ́n, yé ó dwêh.

³ Me á bě sí kala bɨ́n lɔ́ɔ́ mé á lɛ́ɔɔ wɨ́. Wé ɨ́ bwǎʼ nyɔm. Wé ó nɛ́ɛ: Krîst, nye á si búra e misyóm gá míná mpʉ yé á boo be cɛmá ɨ́ Mekaná mé Nzyɛ̌m yɨ́.

⁴ Nye á be ó sí debe. Nye nzě pah, duho lɨ́ odwe ɨ́ móhó lɛ̂l mpʉ Mékaná mé Nzyɛ̌m á boo lɛ́ɛ yɨ́.

⁵ Nye á be ó sí pyâl kwá mé Kefâs, nzě pyâl ntémé kwá bʉr o mílʉ́mlʉ́ kám le obá.

⁶ Píe tɨ̂, nye nzě pyâl kwá bʉ́ʉ́ óbûʼla bé, laa mínter mitɛ̂n, bɨ́bɛ̂h bee nyé ɨ́ jɔʼ gwár. Bâʼ bʉ̂r o tɨ̂, bé dína ó, ɨ́ twiʼ, kumo ɨ́ báánâ; bʉ́ʉ́, bɨ́ dwe.

⁷ Nye nzě báʼǎ pyâl kwá mé Jacques ti e bʉr o mílʉ́mlʉ́ bɨ́bɛ̂h.

⁸ Epíhe le epíhe ó nyé á ka nze pyâl kwá nyǎm yɨ́, mɛm yɨ́ɛ mpʉ mʉ̂r á byɛ̂l sónó nyá.

⁹ Ɨ́ sɔ́má bʉ̂r o mílʉ́mlʉ́ tʉ́ŋlʉ̌, mɛm ó dí mʉr epíhe. Lɨ́ otyeetye, mé ajala le ejébɔɔ «mʉ̂r milʉ́mlʉ́,» ebě, me á si tíble Mbɛ̌r-Nzyɛ̌m.

¹⁰ Damá jóʼo nó, me mʉr milʉ́mlʉ́ ó, ɨ́ metyɛʼ me mpóm Nzyɛ̌m á sʉ me má. Nye á bé asʉ mé mǎ dwêh. Nye á sʉ me mǎ ó, me nkʉ̂ séa, laa bʉ́ʉ́ bʉ̂r o mílʉ́mlʉ́ bé bɨ́bɛ̂h. Lɨ́ otyeetye, ntʉ mé á séa. Metyɛʼ me mpóm me dí ɨ́ me má, mé ó dí esâ ó, me séaa.

¹¹ Damá be ó, me ó dí ɨ́ buú séa, nkʉ̂ ntɔ̂ʼ bɨ́ɛ: bɨ̌h bé yɨ́ɛ ó lɨ́ etúnǒ lɔ́ɔ waá. Lɔ́ɔ ngwár waá ó bɨ́n á bûʼla wɨ́.

Pahá ódwe

¹² Yé bé yê tyeetye ó, Krîst á si pah, duho lɨ́ odwe nó, á bʉ́ʉ́ bʉ̂r ɨ́ sɔ́má yɨ́n, bé báná kʉ́ lɛ́ɛ ó, odwe, bé ákóʼó pah ɨ́ soo nyá?

¹³ Yé bé odwe, bé ápah ɨ́ soo nó, lɛ́ɛ́, Krîst á bé apah ntémé.

¹⁴ Yé bé Krîst á bé apah nó, lɛ́ɛ́, túnó bɨ́h dí etúnǒ Mbɨambɨa Lɔ́ɔ wɨ́, wé ó dwêh. Mbûʼlá bɨ́n dí ebúʼla wé wɨ́, wé ntémé, wé ó dwêh.

¹⁵ Yé bé yé ó nó wá, yé nyɨ́n ntémé ó, bɨ̌h bé lɨ́ elɛ́ɛ bíbɛr, dumo e Nzyɛ̌m, ebě, bɨ̌h bʉboʼló ɨ́ páʼ wé ó, nye ó b'á pɛh Krîst. Yé bé odwe, bé ákóʼó pɛhɔɔ nó, lɛ́ɛ́, Nzyɛ̌m á bé apɛh nyê.

¹⁶ Yé bé odwe, bé ákóʼó pɛhɔɔ nó, lɛ́ɛ́, Krîst á bé apah ntémé.

¹⁷ Yé bé Krîst á bé apah nó, lɛ́ɛ́, búʼó yɨ́n, yé ó dwêh; lɛ́ɛ́ ntémé, bɨ̌n dína ó, ɨ́ mpila ébébe yɨ́n tʉ́ŋlʉ̌,

¹⁸ lɛ́ɛ́, baá bé á pûhla e Krîst, ntɔ̂ʼ dwe bá, bɨ́ tó dîm.

¹⁹ Yé bé milémé gá míná jaá didyɛ̂ʼwo ɨ́ Krîst ó, njɨ ɨ́ twǐʼ sí yɨ̂ʼ nó, lɛ́ɛ́, mɨná gá bé e nkoó, laa bʉ̂r ó sí yɨ̂ʼ bɨ́bɛ̂h.

²⁰ Sâ gwár, Krîst nyɨɛ á si kʉ pah, duho lɨ́ odwe. Nye ó mʉr esôʼ á nyɛɛ kʉ byɛ̂l ɨ́ káhlá, nzě dwe, ntɔ̂ʼ kǎ pah nyá.

²¹ Jwɨʼ gwár e gwár e mpʉ nyʉ́ʉ́ mʉ̂r ngwár á sâ syóm, eswie ntɔ̂ʼ jala e bʉr bɨ́bɛ̂h yɨ́, nó ntémé ó mʉ̂r ngwár á jala le esâ ó, odwe pɛ́hɔɔ yɨ́.

²² Jwɨʼ gwár mpʉ bʉ̂r dí edwe ɨ́ mpúhlá nyɔ́ɔ́ le Ádam yɨ́, nó ntémé ó, Nzyɛ̌m ópɛh bɨ́bɛ̂h ɨ́ mpúhlá nyɔ́ɔ́ e Krîst.

²³ Sâ gwár, mʉr nyɨnyɛ̂h, nye ópah ó, ɨ́ yé jɔʼ: Krîst esôʼ; bʉr bé, bé ónzě bɔma e né ɨ́ jɔʼ nyé ngá báʼǎ nze yɨ́.

²⁴ Jɔʼ yaá ó ésúʼlá é sí yɨ̂, lé ókǎ pyâl yɨ́. Krîst ógbah mísísǐm mí édúrʉ́ʉ́ mímyɛ̂h: le myaá mi dí milʉ̂, le myaá mi nkûl jwɨ́ɨ, le myaá mi dí e menkul ménɨ́nɨ́ɨ́ mí. Nyé odwě Nzyɛ̌m Sɔ́ŋ jwɨ́ɨ́ yé yaá.

²⁵ Ebě, yé á jala ó, Krîst díʼee njwɨ́ɨ, tó pyâl ɨ́ jɔʼ nyé óbe, nye mû sí ntaa óntɨ̂m le obɨn bé bɨ́bɛ̂h, gbâ bé sí mebo mé yɨ́.

²⁶ Ntɨ̂m e mbɨn epíhe nyé ókǎ gbah nyá, óbe ó Eswie, lé mʉr tɨ̂.

²⁷ Ebě, yê cɛmá ó: Nzyɛ̌m á si gbâ sá yɨ́yɛ̂h ɨ́ jwɨ́ɨ́ yé, sí mebo mé. Nó yé lɛ́ʼlé mbɨ̂mbɨá ó, Nzyɛ̌m nyɨɛ, mʉr dí egbâ sá yɨ́yɛ̂h ɨ́ jwɨ́ɨ́ mé Krîst yaá nyá, nyé abe tɨ̂ʼ ɨ́ jwɨ́ɨ yaá tʉ́ŋlʉ̌.

²⁸ Jɔʼ nyé óbe, nye mû sí gbâ sá yɨ́yɛ̂h ɨ́ jwɨ́ɨ́ mé Krîst yɨ́, ɨ́ jɔʼ yaá ó Krîst nyɨɛ ngá kǎ nî ɨ́ jwɨ́ɨ́ mé Nzyɛ̌m yɨ́, nyɨɛ mʉr á pa gbâ sá yɨ́yɛ̂h ɨ́ jwɨ́ɨ́ mé Krîst nyá. Nzyɛ̌m Sɔ́ŋ ókǎ be ó njwɨ́ɨ sá yɨ́yɛ̂h ɨ́ jɔʼ yaá.

²⁹ Yé bé abe nó wá, á baá o dí eduŋɔɔ lɨ́ esú lé ódwe bá, bé óbi yé? Ódwe bé apah nó, á bé duduŋɔɔ ɨ́ páʼ wɔ́ɔ́ ɨ́ yé?

³⁰ Ódwe bé apah nó, á bɨ̌h bʉr o dí ekam édidi ɨ́ ka sóo bá, bé nzoó kam nó lɨ́ ewala lɨ́lɛ̂h ɨ́ yé?

³¹ Bɨ́ɔɔ́ bâm! Okɛ́l bâm! Yê tyeetye ó, mě pǎm le eswie ó, dʉ́ó lɨ́lɛ̂h. Yê tyeetye ntémé ó, me lɨ́ enkʉ́na ɨ́ lɔ̌b wɨ́n ɨ́ mpǒm mé Tî gá wɨ́ná, Yésʉs-Krîst.

³² Yé bé me á si sia e mitúú Éfɛsɔs lɨ́ ejaá dû njɨ minyɔm mi bʉ̂r ó sí yɨ̂ʼ nó, lɛ́ɛ́, syɛ́ɛla yaá, yé á gwa be me e wáǎ nyɔm? Ódwe bé ápah nó, lɛ́ɛ́, yé á bé agwá be mé e nyɔm. Kɨkɛna, yé ó: «Mɨná dêʼ gá mede le menyoʼ, ebě, ómɛ́n, mɨná bé ódwe gâ.»

³³ Mʉ̌r sá ajéʼě sɨ̂: «Bibɨ́bla mínjoo sá ó, ndáma mímpaŋ métum.»

³⁴ Yé jala ó, bɨ̌n bírɨɨ lɔ̌b ógʉ̌ wɨ́n. Bɨ̌n a gwáʼ ésâ mísyóm. Bʉ́ʉ́ bʉ̂r ó sɔ́má yɨ́n, bé agʉ́ǎ Nzyɛ̌m. Mě lɛ́ɛ́ mpʉ́nʉ̌ ó, lɨ́ egbâ bɨ́n sôn ɨ́ nyʉ̂l.

Edwán é nyʉ̂l

³⁵ Nó ó, nyʉ́ʉ́ mʉ̂r, nyě e nkul edî ó: «Odwe, bé pah nyá? Bé óbúla kwár odwe e wáǎ mbi ményʉ̂l?»

³⁶ Gʉʼlʉgʉ́! Jɔʼ gó dí e mpeʼ yɨ́, gó bé aswah yé ɨ́ bibwǎh nó, yé abe e nkul epâh.

³⁷ Ntʉ̌ sá gó dí ebe ɨ́ bibwǎh yɨ́, dí kuó lɨ́ ngá pâh yɨ́. Sá gó dí ebe yɨ́, yé ó mâ bumó. Yé óbɛ̌m bě bumó mpiha, nkʉ̂ yʉ́ʉ́ bumó swîh.

³⁸ Nzyɛ̌m dwé bumó yaá nyʉ̂l ó mpʉ nyé kpɛ̂l yɨ́. Nye lɨ́ edwě bumó yɨ́yɛ̂h nyʉ̂l dí ɨ́ jʉ́ʼa e yɨ́haá bumó nyɨ́.

³⁹ Menyʉ́l mɨ́mɛ̂h, mé abě jwɨʼ gwár. Bʉr, bé ó e wɔ́ɔ́ mbi nyʉ̂l; otír e wɔ́ɔ́; binʉ̌n e wɔ́ɔ́; osû ntémé e wɔ́ɔ́ mbi.

⁴⁰ Yé ntémé, yé ó e menyʉ́l bísá bí jʉ́o kʉ́, ndu e maá bísá bí sí. Menyʉ́l bísá bí jʉ́o kʉ́, mé ó e wɔ́ɔ́ mbi ójɔɔ́. Menyʉ́l bísá bí sí e wɔ́ɔ́ mbi ójɔɔ́.

⁴¹ Dʉ́o, lé ó e wé mbi ójɔɔ́; álomó e waá wé; ocwícwén e wɔ́ɔ́ mbi. Damá jóʼo nó, ojɔɔ́ wé ócwícwén, wé sá ó, syɛ́ɛla páʼ nyɔ́ɔ́.

⁴² Yé óbe ntémé ó nó, ɨ́ jɔʼ ódwe, bé ópah yɨ́. Ndwe nyɨɛ, nye lɨ́ edɨlɔɔ, nzě bo. Jɔʼ ndwê ópah yɨ́, nye ákǎ dwe, nkʉ̂ bo.

⁴³ Jɔʼ ndwê dí edɨlɔɔ yɨ́, nye ɨ́ ntéʼe. Jɔʼ nyé ópah yɨ́, nye óbe ó e kûm. Jɔʼ nyé dí edɨlɔɔ yɨ́, nyě e nkoó le etyɛʼ. Jɔʼ nyé ópah yɨ́, nye óbe ó e nkul.

⁴⁴ Jɔʼ ndwê dí edɨlɔɔ yɨ́, nyě e nyʉ̂l bipúno. Jɔʼ nyé ókǎ pah yɨ́, nye óbe ó e nyʉ̂l sísǐm. Yé ó e nyʉ̂l bipúno. Yé ntémé, yé ɨ́ jala le ebe ó e nyʉ̂l sísǐm.

⁴⁵ Ebě, yê cɛmá: Mʉr esôʼ, Ádam, á be lɨ́ etiʼe. Ádam á suʼla ka nze nyá nyɨɛ, nye ó Sísǐm dí etiʼ bʉ̂r wɨ́.

⁴⁶ Ntʉ nyʉ̂l sísǐm á nyɛɛ nze. Yé á be ó nyʉ̂l bipúno. Jɔʼ yaá ó nyʉ̂l sísǐm nyɨɛ á ka nze epíhe yɨ́.

⁴⁷ Ádam esôʼ á meŋɔɔ ó e bibwǎh. Ádam mbá á duho ó, ɨ́ jʉ́o kʉ́.

⁴⁸ Bʉr o dí egúmo e sí yɨ̂ʼ bá, bé nwɨɨla ó e mʉr á meŋɔɔ e bibwǎh nyá. Tó kœb ó, bʉr o dí egúmo e jʉ́o bá, bé nwɨɨla ó e waá á duho ɨ́ jʉ́o kʉ́ nyá.

⁴⁹ Mpʉ mɨ́ná bé á nyɛɛ nwɨɨla gá e mʉr á sáŋɔɔ e bibwǎh nyá yɨ́, jwɨʼ gwár yaá ntémé ó, mɨ́ná ngá nwɨɨla gá e mʉr á duho ɨ́ jʉ́o kʉ́ nyá yɨ́.

⁵⁰ Bɨ́ɔɔ́ bâm! Okɛ́l bâm! Mě kʉ́ lɛ́ɛ bɨ́n ó, ntʉ̌ sá dí bipúno e metié yɨ́, dí e nkul enʉǎ diá ɨ́ Mpóʼo mé Nzyɛ̌m, jala e nkɔb líʼe nyé. Sá dí edwe, bo yɨ́, yé abe e nkul elîʼ e sá dí edǐ njʉ̌m dǐ e njʉ̌m dǐ yɨ́.

⁵¹ Me múo nzě pâʼla bɨ́n lwǐb ódîm: ntʉ bʉ̂r bɨ́bɛ̂h ngá dwe! Sâ gwár, mɨná gá óbɛ̂h, bé ódwira gá menyʉ̂l.

⁵² Menyʉ́l gá mɨ́ná, mé ódwira ó, jɔʼ gwár mpʉ dîh dí ebyɛ́bla yɨ́. Yé óbe ó, ɨ́ jɔʼ sébé epíhe ólwib yɨ́, ebě, ɨ́ jɔʼ nyé ólwib yɨ́, odwe, bé ópah. Bé ódidi nó ó, akǎ dwe. Menyʉ́l gá mɨ́ná, mé ócéne.

⁵³ Nyʉ̂l dí ebo ɨ́ soo nyɨ́, nye ɨ́ jala le ecéne, liŋa nyaá dí abo nyɨ́. Sá dí e nkul edwe yɨ́, liŋa yaá dí abe e nkul edwe yɨ́.

⁵⁴ Nyʉ̂l dí ebo nyɨ́, nyé óbe, nye mû sí céne, liŋa nyaá dí abo nyɨ́ nó, nyaá dí e nkul edwe nyɨ́, nyé óbe, nye mû sí liŋa nyaá dí abe e nkul edwe nyɨ́ nó, ɨ́ jɔʼ yaá ó sá dí cɛmá yɨ́, yé ólwɨ́ŋlɨ yɨ́: Eswie, lɨ́ gbahɔɔ. Nzyɛ̌m, nyɨ́ búla le onkɔ́ɔ́!

⁵⁵ Eswie ɛ̌! Onkɔ́ɔ́ gô, wé mû nkoó? Eswie ɛ̌! Nkul ejʉ̂ bʉ̂r nyǒ, nye mû nkoó ɛ́?»

⁵⁶ Eswiě nʉnʉa nkûl ejʉ̂ bʉ̂r ó e nzɨ̌ syóm. Syóm wɨ́ɛ, wé nʉnʉa nkûl ó, duho ɨ́ metié mé Nzyɛ̌m.

⁵⁷ Nzyǒo e Nzyɛ̌m nyɨɛ, mʉr dí edwe mɨ́ná gá nkul entaa ɨ́ nzɨ̌ Tî gá wɨ́ná, Yésʉs-Krîst nyá!

⁵⁸ Bɨ́ɔɔ́ le okɛ́l bâm mé dí ekpɛl bá, tyɛ́bɨ́ɨ́ gá mekʉ̌ sí ɨ́ sɨ́ŋ. Kʉ́ buú séa gá syɛ́ɛ́ mé Tî Yésʉs ɨ́ jɔʼ yɨ́yɛ̂h. Gʉ́ŋáá gá ó, syɛ́ɛ́ bɨ́n dí eséa Tî Yésʉs yɨ́, yé ákóʼó dwě ntuʼ.