Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 Korɛnt 11 - Kálar Nzyɛ̌m : Ejwán é Sáá

1 Baŋaa gá me mpʉ mé dí ebaŋǎ Krîst yɨ́.


Ɨ́ gwɨ́hlá óbûʼla, mʉmá díʼee le ntʉ̂m ndyɛlá ɨ́ lʉ̂

2 Me lɨ́ esêʼle bɨ́n ebe bɨ́n dí ebuú toŋlo mé ɨ́ bijɔʼ bíbyɛ̂h ndu e ntémé ó, bɨ̌n bé lɨ́ ebaʼle le edû mílɛ́ʼlá mé á kala bɨ̌n mí.

3 Mě gwɨ́m ó, bɨ̌n gʉ́ŋaa ó, Krîst, nye ó njwɨ́ɨ mʉrʉ̂m nyɨnyɛ̂h. Njʉ̂m, nye ó njwɨ́ɨ me mʉ́má wé. Nzyɛ̌m Sɔ́ŋ, nye ó Njwɨ́ɨ mé Krîst.

4 Mʉ́rʉ̂m dyɛ́l ntʉ̂m ɨ́ lʉ̂ ɨ́ jɔʼ nyé dí ejɨʼla, nkʉ̂ gwîh mílɔ̌b mé Nzyɛ̌m ɨ́ gwɨ́hlá óbûʼla yɨ́ nó, nyě sámlé ó njwɨ́ɨ wé, Krîst.

5 Nó ó, mʉ́má nyɨɛ bé adyɛ̌l ntʉ̂m ɨ́ lʉ̂ ɨ́ jɔʼ nyé dí ejɨʼla, nkʉ̂ gwîh mílɔ̌b mé Nzyɛ̌m ɨ́ gwɨ́hlá yɨ́ nó, nyě sámlé ó njwɨ́ɨ wé. Sôn nyaá, nye ó mpʉ sôn mʉmá dí swɨ́ʼá lʉ̂ nyá.

6 Mʉ́má bé abúblǒ lʉ̂ nɛ́ɛ: nye ntémé, nye ɨ́ jala le eswɨ́ʼɔɔ énkwɨ́h! Mpʉ yé dí ɨ́ sâ sôn, mʉmá lɨ́ eswɨ́ʼa mpúo, nkʉ̂ cɨǎ lʉ̂ yɨ́, yé jala ó, nye dyɛ́lɨɨ ntʉ̂m ɨ́ lʉ̂.

7 Bʉrʉ̂m bɨ́ɛ, bé ajala le ebúblǒ lʉ̂, ebě, bé lɨ́ enwɨɨla e Nzyɛ̌m nye mʉr tɨ̂. Bʉr gʉ́á kûm mé Nzyɛ̌m ó, ɨ́ mʉrʉ̂m. Tó kœb ó, mʉrʉ̂m á bi kûm ó, ɨ́ lɔ̌b mʉ́má á komlɔɔ, duho ɨ́ nye nyá.

8 Mʉrʉ̂m á bé akomlɔɔ, duho ɨ́ mʉmá. Mʉmá ó b'á komlɔɔ, duho ɨ́ mʉrʉ̂m.

9 Mʉrʉ̂m á bé akomlɔɔ lɨ́ esú é mʉ́má. Mʉmá á komlɔɔ ó, lɨ́ esú é mʉ́rʉ̂m.

10 Sá tɨ̂ʼ ó lʉ́ mʉ́má jálá le edidǐ ndyɛlá e ntʉ̂m yɨ́. Ntʉ̂m waá, wê nye ó, sá dí elɛ̂ʼle ó, nye ɨ́ jwɨ́ɨ́ njʉ̂m yɨ́. Nye ɨ́ jala le edyɛ̌l ntʉ̂m ntémé ó, ɨ́ lɔ̌b bééngeles dí ɨ́ gwɨ́hlá yaá bá.

11 Damá jóʼo nó, Dâ Nzyɛ̌m á si tyêl etié ó, bʉbá e bʉrʉ̂m, bé ɨ́ jala le enwɨnwɨɨlǎ twiʼ páʼ nyɔ́ɔ́; nyʉ́ʉ́ mʉ̂r tɨ̂ʼ adi e twiʼ ɨ́ nye mʉr tɨ̂.

12 Ebě, Nzyɛ̌m á si nʉa dwehé gwár ɨ́ mʉrʉ̂m, nzě komlo mʉ́má e tɨ̂. Jwɨʼ gwár e gwár yaá ntémé ó bʉ́rʉ̂m dí ebi ményʉ́l mɔ́ɔ́ yɨ́. Bé bi mé ó, cɨɨ e bʉbá. Nó ó, sâ yaá yɨ́yɛ̂h, yé duho ó kwá mé Nzyɛ̌m.

13 Bɨ̌n bʉr o tɨ̂, tíʼáá gâ. Ɨ́ jɔʼ bɨ́n mû lɨ́ etáare gwɨ́hlá óbûʼla, mʉmá lɨ́ esâ mínjɨʼla e Nzyɛ̌m yɨ́, nzê yé mbɨa ó, nye díʼee abe e ntʉ̂m ndyɛlá ɛ́?

14 Njwɨr ébyɛ̂l, wé mʉr tɨ̂, wé lɛ́ʼlé ntémé ó, ɨ́ jɔʼ mʉ́rʉ̂m dí ebaʼle mpúo ɨ́ jaa jaa yɨ́, sâ yaá, yê nye ó e sôn.

15 Tó kœb ó, ɨ́ jɔʼ mʉ́má dí e mpuo nó yɨ́, ɨ́ páʼ wé, mpuo nyé, nye nye ó, sá dúu, ebě, Nzyɛ̌m á dwe nye mpuo ó, jala e búró.

16 Mʉ̂r sí gwɨ̂m étô dóló le edo e bɨ̌h ɨ́ lɔ̌b waá nó, nye gʉ́ŋaa ó, bɨ̌h e bʉr ó Mbɛ̌r-Nzyɛ̌m bɨ́bɛ̂h, bɨ̌h bé abe e tum swîh.

17 Jɔʼ mé mû lɨ́ etyêl bɨ́n metié mâʼ yɨ̂, mé abe e nkul esêʼle bɨ́n, ebě, bigwɨ́hlá bɨ́n dí esâ Nzyɛ̌m bí, byé lɨ́ ebuú sâ bɨ́n bʉr o tɨ̂ʼ ebébe, laa émbɨa.

18 Sá ésôʼ, yé ó, ɨ́ jɔʼ bɨ́n dí esâ bígwɨ́hlá bí Mbɛ̌r-Nzyɛ̌m bín yɨ́, bé lɛ́ɛ́ mé ó, bɨ̌n bé lɨ́ esâ mpɔ́ʼá menkɔ̌m. Nó ó, me lɨ́ ebúʼla gúú páʼ lɔ́ɔ waá.

19 Ebě, mpɔ́ʼá menkɔ̌m, nye ɨ́ jala le enyɨ̂nyɨn páʼ nyɨ́n ó, bé gwâ dweʼe baá o dí tyeetye e búʼó bá.

20 Jɔʼ bɨ́n dí egwɨ̂hla yɨ́, edɨ́ɨ́ é méde bɨ́n dí ede lɨ́, lé adwɛ̂ʼ Tî Yésʉs.

21 Jɔʼ bɨ́n mû lɨ́ edɨ́ɨ́ lɨ́n laá yɨ́, mʉr nyɨnyɛ̂h jaá susuo ó, njɨ nyɨɛ dêʼ. Tó kœb ó, nyâ, nyé abe e péh dœʼ; nyʉ́ʉ́ nyɨɛ ɨ́ mpur menyoʼ.

22 Nzê bɨ̌n bé abe e mimbɛ̌r, ó bɨ̌n dêʼ mede le menyoʼ mɨ́n tɨ̂ʼ ɛ́? Ntʉ̌ pyêh bɨ́n dí esâ Mbɛ̌r-Nzyɛ̌m nɨ̌ ɛ́? Nzê bɨ̌n bé lɨ́ ekpɛl égbâ bʉ̂r o dí abe e mede bá sôn ɨ́ nyʉ̂l ɛ̌? Yé bɨ́n dí ekpɛl ó, me lɛ́yɨɨ bɨ̌n? Nzê me ósêʼle bɨ́n tɨ̂ʼ ɛ̌? Kʉ́ kâr káráa! Me ábá sêʼle bɨ́n.


Mede mé Tî Yésʉs
( Matthieu 26.26-29 ; Marc 14.22-25 ; Luc 22.14-20 )

23 Lɛ́ʼlá Dâ á dwe me wɨ́, wé ó mé múo nzě kala bɨ́n wɨ̂. Wé ó: Tî Yésʉs, ɨ́ pum bé á bɛ́ma nye wɨ́, nye á si nʉa blêr,

24 dwě Nzyɛ̌m nzyǒo, ntɔ̂ʼ pɛ̂ʼ yê. Nye ó: «Blêr yɨ̂, yé ó nyʉ̂l nyǎm dí lɨ́ esú lɨ́n nyɨ́. Bɨ̌n bé ótô le esɨ̂sǎ syɛ́ɛla yɨ̂ʼ bijɔʼ bíbyɛ̂h, le esîsimsa mé e tɨ̂.»

25 Jwɨʼ gwár yaá, ɨ́ jɔʼ bé á sil ede yɨ́, nye ntɔ̂ʼ nʉǎ bélé ményoʼ. Nye ó: «Menyoʼ mâ, mê nze tyél ó, edwán é sáá, ɨ́ nzɨ̌ metié mâm dí lɨ́ esú lɨ́n má. Jɔʼ yɨ́yɛ̂h bɨ́n ódɨde ményoʼ mâʼ yɨ́, bɨ̌n e sísímsá mé tɨ̂.»

26 Ebě, ɨ́ jɔʼ bɨ́n dína lɨ́ edě blêr yɨ̂ʼ le menyoʼ mâʼ yɨ́, bɨ̌n bé lɨ́ etúno pô eswie mé Tî gá wɨ́ná. Bɨ̌n bé ósɨ̂sa nó ó, tó pyâl ɨ́ jɔʼ nyé óbáʼǎ nze yɨ́.


Mbǐ ndéá dí ajala wɨ́

27 Sɨ́ǎ yaá ó dí ó, mʉ̂r sí dě blêr yaá, nkʉ̂ menyoʼ maá mbǐ ndéá dí ajala wɨ́ nó, nye ónʉa mébě, ebě, nyɨ́ sâ syóm ɨ́ nkǒ pâʼ nyʉ̂l le metié me Tî gá wɨ́ná.

28 Nó ó, mʉr páa pahlě twiʼ yé. Jɔʼ yaá ó nyé ká nzě dě blêr le menyoʼ mâʼ yɨ́.

29 Mʉ̂r sí dě blêr le menyoʼ maá, nye l'adweʼe nyʉ̂l mé Krîst dí tɨ̂ʼ nyɨ́ nɛ́ɛ: lɛ́ɛ́, Nzyɛ̌m ótíʼe nyé milɔ̌b, dumo e ndéá wé waá.

30 Sá tɨ̂ʼ ó bʉ̂r ɨ́ buo buo ɨ́ sɔ́má yɨ́n mû mimbêl: bâʼ, onzwoó; bʉ́ʉ́ ntémé, sí síe lɨ́ edwe yɨ́.

31 Mɨ́ná sí pahle gá mɨná gá bʉr o tɨ̂ʼ nó, go ó, mɨná bé ósyɛ̂hle gá eduma ɨ́ tíʼá mílɔ̌b mé Nzyɛ̌m.

32 Sâ gwár, Tî Yésʉs, nyɨ́ nyɛl étíʼ é mílɔ̌b gá lɨ́ná. Nó yé ó, nye mû ó lɨ́ esɨ̂ʼ mɨ́ná gá milʉ̂. Nyě sá nó ó, mɨná nkʉ̂ syɛ̂hle gá lé ɨ́ jɔʼ nyé ótíʼe bʉ̂r oswîh milɔ̌b, le edwe bé mebě jɔʼ gwár yɨ́.

33 Nó ó, bɨ́ɔɔ́ bâm, jɔʼ bɨ́n dí egwɨ̂hla, pûhla mébô lɨ́ esú lé éde méde yɨ́, bɨ̌n e nyɛ́ɛ́ bóno ó, bʉ́ʉ́ bʉ̂r nyɛ́ɛ pɛ̂ʼlǎ sá éde!

34 Mʉ̂r bé lɨ́ ejóʼo nzâ nó, nye e bóó dě mbɛ̌r wé. Bɨ́n gwɨ́hlá ɨ́ mbi waá nó, go ó, bɨ̌n bé óbe ó mbɨ̂mbɨá, adulo mébě ɨ́ menyʉ́l mɨ́n. Ɨ́ nkǒ páʼ mʉ́ʉ́ métíá méswîh, me ókǎ nzě yala bɨ́n mǎ ó, ɨ́ jɔʼ mé ónze gʉ̂ʼ kwá nyɨ́n yɨ́.

ကြှနျုပျတို့နောကျလိုကျပါ:



ကြော်ငြာတွေ